ဧရာဝတီတိုင်း ဒေသကြီး အတွင်း လာရောက် ရင်းနှီးမြှုပ်နှံသည့် လုပ်ငန်းရှင်များအား အကောင်းဆုံး ကူညီပေးသွားမည် ဖြစ်ကြောင်း တိုင်း ဝန်ကြီးချုပ် ဦးလှမိုးအောင်က ပြောသည်။

ယမန်နေ့ နံနက်ပိုင်းက ငွေဆောင် ကမ်းခြေရှိ ယမုံနာဦး ဟိုတယ်၌ ပြည်တွင်း၊ ပြည်ပ ရင်းနှီးမြှုပ်နှံမှု လုပ်ငန်းများ ပိုမို ဝင် ရောက်လာစေရန် ရည်ရွယ် ကျင်းပသည့် ဧရာဝတီတိုင်း ဒေသကြီး ရင်းနှီးမြှုပ်နှံမှု ပြပွဲ ၂၀၁၈ တွင် ဝန်ကြီးချုပ်က ပြော ဆိုခြင်း ဖြစ်သည်။

ဝန်ကြီးချုပ် ဦးလှမိုးအောင်က “တိုင်းအစိုးရ အဖွဲ့နဲ့ တိုင်း ရင်းနှီးမြှုပ်နှံမှု ကော်မရှင် (ARIC )အနေနဲ့ တိုင်းအတွင်း စီးပွားရေး လုပ်ငန်းများ အလျင်အမြန် တိုးတက်လာစေဖို့ အတွက် နိုင်ငံခြား ရင်းနှီးမြှုပ်နှံသူများနဲ့ ပြည်တွင်းက စီးပွားရေး လုပ်ငန်း များကို မြန်မာနိုင်ငံ ရင်းနှီးမြှုပ်နှံမှု ဥပဒေနဲ့ အညီ ရိုးရှင်း လွယ်ကူစွာ ဆောင်ရွက်ပေးသွားမှာ ဖြစ်ပါတယ်။ အထူးသဖြင့် စိုက်ပျိုးရေး ကဏ္ဍနဲ့ မွေးမြူရေး ကဏ္ဍ ရင်းနှီးမြှုပ်နှံမှုများကို ဦးစားပေး သွားမှာ ဖြစ်ပါတယ်” ဟု ပြောဆိုသည်။

ထို့ပြင် ဧရာဝတီတိုင်း၌ ရေနက် ဆိပ်ကမ်း၊ ရေနံချက် စက်ရုံ၊ ရေနံနှင့် ဓာတ်သတ္ထု တူးဖော်ခြင်း၊ စိုက်ပျိုးရေး၊ မွေးမြူရေး၊ ဆောက် လုပ်ရေး၊ ဟိုတယ်နှင့် ခရီးသွား လုပ်ငန်း စသဖြင့် စီးပွားရေး အခွင့်အလမ်း များစွာ ရှိနေသည့် အတွက် ပြည်တွင်း ပြည်ပ လုပ်ငန်းရှင်များ အနေဖြင့် လာရောက်၍ ရင်းနှီးမြှုပ်နှံမှုများ ပြုလုပ်ကြရန် ဖိတ်ခေါ်ကြောင်းလည်း ၎င်းက ပြောသည်။

အဆိုပါ ရင်းနှီးမြှုပ်နှံမှု ပြပွဲကို ဂျပန် အပြည် ပြည်ဆိုင်ရာ ပူးပေါင်း ဆောင်ရွက်ရေး အေဂျင်စီ (JICA) နှင့် တိုင်းအစိုးရတို့ ပူးပေါင်း လုပ်ဆောင်ခြင်း ဖြစ်ကာ နိုဝင်ဘာလ ၃၀ ရက်မှ ဒီဇင်ဘာ ၁ ရက် အထိ ၂ ရက်တာ ကျင်းပမည် ဖြစ်သည်။

ပြပွဲ၌ ဧရာဝတီတိုင်းတွင် ပုဂ္ဂလိက ရင်းနှီးမြှုပ်နှံထားသည့် စီးပွားရေး စီမံကိန်းများ၊ ဒေသထွက် လက်မှု ထုတ်ကုန်များနှင့် ဌာန ဆိုင်ရာ စသဖြင့် ပြခန်းပေါင်း ၃၀ ခင်းကျင်း ပြသခဲ့သည်။

ပြပွဲ ဒုတိယနေ့ ဖြစ်သည့် ဒီဇင်ဘာလ ၁ ရက်၌ ပြည်တွင်း၊ ပြည်ပ လုပ်ငန်းရှင်များကို ဧရာဝတီတိုင်း ဒေသကြီး အစိုးရ အဖွဲ့ က ဦးဆောင်၍ ငွေဆောင် ကမ်းခြေရှိ ပုစွန်နှင့် ငါးမွေးမြူရေး လုပ်ငန်းများ၊ ငွေဆောင် ဗီလာ ဆောက်လုပ်ရေး လုပ်ငန်း၊ ပုသိမ်မြို့ရှိ ပုသိမ် စက်မှုမြို့တော် စီမံကိန်းများသို့ လိုက်ပါ ပို့ဆောင်မှုများ ပြုလုပ်သွားမည် ဖြစ်သည်။

ဧရာဝတီတိုင်း ဒေသကြီး ရင်းနှီးမြှုပ်နှံမှု ကော်မရှင် (ARIC )ကို ၂၀၁၇ ခုနှစ်၊ ဇူလိုင်လ ၇ ရက်၌ ဖွဲ့စည်း၍ တိုင်းအတွင်း ရင်းနှီးမြှုပ်နှံမှုများကို ခွင့်ပြုခဲ့ရာ၂၀၁၈ ခုနှစ် နိုဝင်ဘာလ အထိ နိုင်ငံခြား ရင်းနှီးမြုပ်နှံမှု အမေရိကန် ဒေါ်လာ ၁၂ ဒသမ ၂၅ သန်း ဝင်ရောက်ခဲ့ကြောင်း တိုင်းအစိုးရအဖွဲ့က ဆိုသည်။

ထို့ပြင် ပြည်တွင်း လုပ်ငန်းရှင်များ အနေဖြင့် လုပ်ငန်းပေါင်း ၁၆ ခုမှ ရင်းနှီးမြှုပ်နှံမှု ကျပ် ၅၁၈၇၅ သန်းကျော် ဝင်ရောက်ခဲ့ ကာ အလုပ်အကိုင် အခွင့်အလမ်း အဖြစ် လူပေါင်း ၃၁၃၇ ဦးကို အလုပ်အကိုင်များ ဖန်တီးပေးခဲ့ကြောင်း အစိုးရ အဖွဲ့ထံမှ သိရသည်။

တိုင်းအတွင်း၌ ဟောင်ကောင်၊ တရုတ်၊ တောင်ကိုရီးယား၊ ဂျပန်၊ စင်ကာပူ၊ ပြင်သစ်၊ အိန္ဒိယ၊ မလေးရှား၊ လူဇင်ဘတ် စသည့် နိုင်ငံများ လာရောက် ရင်းနှီးမြှုပ်နှံထားကြပြီး အထည်ချုပ် လုပ်ငန်း ၁၂ ခု၊ ကမ်းလွန် ရေနံ တူးဖော်မှု ထောက်ပံ့ရေး စီမံကိန်း၊ ရေနံနှင့် သဘာဝ ဓာတ်ငွေ့ တူးဖော်မှု၊ လျှပ်စစ် ဓာတ်အားပေး စက်ရုံ တည်ဆောက်ခြင်း စသည့် လုပ်ငန်းများ တွင် ရင်းနှီးမြှုပ်နှံမှု ပြုလုပ်ထားကြောင်း တိုင်းအစိုးရ စာရင်းများတွင် ဖော်ပြထားသည်။

ဧရာဝတီတိုင်း၌ ရေနံနှင့် သဘာဝဓာတ်ငွေ့ တူးဖော်မှု လုပ်ဆောင်နေသည့် MRPL ကုမ္ပဏီ အုပ်စု အုပ်ချုပ်မှု ဒါရိုက်တာ ဦးတင့်ဆွေက “အခုလို ပြပွဲတွေ ပြုလုပ်တာက တိုင်းပြည် စီးပွားရေး ဖွံဖြိုး တိုးတက်လာဖို့ အတွက် အထောက်အကူ ပြု မယ်လို့ ယုံကြည်ပါတယ်။ လမ်းပန်း ဆက်သွယ်ရေးနဲ့ ပတ်သက်လို့ ဧရာဝတီတိုင်းမှာက တော်တော်လေး ပြဿနာ ရှိ တယ်။ ရန်ကုန်နဲ့ မိုင် ၁ဝဝ ကျော်ပဲ ဝေးပေမယ့် လမ်းမကောင်းဘူး။ ဒါက ရန်ကုန်ကနေ ပုသိမ်ကို လာတဲ့ အပိုင်း။ ပုသိမ် ကနေ စီမံကိန်း နေရာတွေ သွားဖို့ လမ်းက မကောင်းပြန်ဘူး။ အဲဒီ အပိုင်း မြန်မြန် တိုးတက်လာရင် တိုင်းရဲ့တိုးတက်မှုတွေ မြန်ဆန်လာမှာပါ” ဟု ဧရာဝတီကို ပြောသည်။

ဧရာဝတီတိုင်း ရင်းနှီးမြှုပ်နှံမှု ပြပွဲသို့ မြန်မာနိုင်ငံ ရင်းနှီးမြှုပ်နှံမှု ကော်မရှင် (MIC)ဒု ဥက္ကဋ္ဌ၊ စီးပွားရေးနှင့် ကူးသန်း ရောင်း ဝယ်ရေး ဝန်ကြီး ဌာန ပြည်ထောင်စု ဝန်ကြီး ဒေါက်တာ သန်းမြင့်၊ ဧရာဝတီတိုင်း ဝန်ကြီးချုပ် ဦးလှမိုးအောင်၊ ရန်ကုန်တိုင်း ဝန်ကြီးချုပ် ဦးဖြိုးမင်းသိန်း၊ မကွေးတိုင်း ဝန်ကြီးချုပ် ဒေါက်တာ အောင်မိုးညို၊ ကယား ပြည်နယ် ဝန်ကြီးချုပ် ဦးအယ်လ် ဖောင်းရှို၊ ဧရာဝတီတိုင်း လွှတ်တော် ဥက္ကဋ္ဌ ဦးအောင်ကျော်ခိုင်နှင့် အစိုးရ အဖွဲ့ ဝန်ကြီးများ၊ လွှတ်တော် ကိုယ်စားလှယ် များ၊ ဌာနဆိုင်ရာ အကြီးအကဲများနှင့် NLD ပါတီ၏ စီးပွားရေး ဆိုင်ရာ အကြံပေး အဖွဲ့တို့ တက်ရောက်ခဲ့ကြသည်။

ထို့ပြင် အာရှနှင့် ဥရောပ နိုင်ငံများမှ ရင်းနှီးမြှုပ်နှံလိုသူ လုပ်ငန်းရှင်များ၊ ပြည်တွင်း လုပ်ငန်းရှင်များ၊ နိုင်ငံတကာ သံရုံးများမှ သံအမတ်ကြီးများ၊ စီးပွားရေး ပညာရှင်များ စသဖြင့် စုစုပေါင်း လူဦးရေ ၃၅၀ ကျော် တက်ရောက်ပြီး ဧရာဝတီတိုင်း၏ စီးပွားရေး အခွင့်အလမ်းများကို အစိုးရမှ ရှင်းလင်း တင်ပြခြင်း၊ ပြည်တွင်း ပြည်ပ လုပ်ငန်းရှင်များမှ သိလိုသည်များ မေး မြန်း ဆွေးနွေးခြင်းများ ပြုလုပ်ခဲ့ကြောင်း သိရသည်။

The post ဧရာဝတီတိုင်းအတွင်း ရင်းနှီးမြှုပ်နှံသူများအား ကူညီပေးမည်ဟု ဝန်ကြီးချုပ်ဆို appeared first on ဧရာဝတီ.

အစိုးရက အများ ပြည်သူ သယ်ယူ ပို့ဆောင်ရေး စနစ်များ တိုးတက် ကောင်းမွန်လာအောင် လုပ်ဆောင်ပေးနိုင်သည့် အခါ ကိုယ်ပိုင်ကား အသုံးပြုမှု လျော့ပါးစေခြင်းဖြင့်လည်း ရန်ကုန်မြို့ ယာဉ်ကြော ကျပ်တည်းမှုနှင့် ကားပါကင် ပြဿ နာများ ဖြေရှင်းသွားနိုင်မည် ဖြစ်ကြောင်း ပို့ဆောင်ရေးနှင့် ဆက်သွယ်ရေး ဝန်ကြီးဌာန (ပို့/ဆက်)ဒုတိယ ဝန်ကြီး ဦးကျော်မျိုးက ပြောသည်။

ယနေ့ နေပြည်တော်ရှိ ပြည်သူ့ လွှတ်တော်တွင် လှိုင်မြို့နယ် ကိုယ်စားလှယ် ဦးအောင်ကျော်ကျော်ဦး၏ ရန်ကုန်မြို့ ယာဉ်ကြော ပိတ်ဆို့မှု ပြဿနာနှင့် ကားပါကင် အခက်အခဲကို မည်သို့ စီမံ ဆောင်ရွက်ထားကြောင်း သိရှိလိုခြင်း မေးခွန်းကို ဖြေကြားရာတွင် ဒုဝန်ကြီး က အထက်ပါ အတိုင်း ပြန်လည် ဖြေကြားခြင်း ဖြစ်သည်။

ရန်ကုန်တိုင်း အစိုးရ အဖွဲ့ ကိုယ်စား ဒုဝန်ကြီး ဦးကျော်မျိုးက “အများပြည်သူသုံး စနစ် တိုးတက် ကောင်းမွန်လာ သဖြင့် ကိုယ်ပိုင်ကား အသုံးပြုမှု လျော့ပါးစေခြင်း တို့ဖြင့်လည်း ယာဉ်ကြော ကျပ်တည်းမှု ပြဿနာနဲ့ ကားပါကင် ပြဿနာများ ဖြေရှင်းသွားနိုင်ရန် ကြိုးပမ်း ဆောင်ရွက်လျက် ရှိပါတယ်”ဟု ပြောသည်။

ကားပါကင် အခက်အခဲများ ဖြေရှင်းနိုင်ရန် လမ်းမကြီးများတွင် လမ်းနယ်နိမိတ် တိုးချဲ့၍ ယာဉ်ရပ်နားနေရာများ တည် ဆောက်ပေးလျက် ရှိကြောင်း၊ မြို့တွင်းမြို့နယ်များတွင် ပုဂ္ဂလိက ကုမ္ပဏီများနှင့် ပူးပေါင်းပြီး Smart ကားပါကင် လုပ် ငန်း ဆောင်ရွက်ရန် စီစဉ်လျက် ရှိကြောင်း သိရသည်။

လှိုင်မြို့နယ် ပြည်သူ့ လွှတ်တော် ကိုယ်စားလှယ် ဦးအောင်ကျော်ကျော်ဦး “ရန်ကုန်မြို့ရဲ့ ကားပါကင်က ရပ်စရာကို နေရာ မရှိဘူး။ မူလ ရှိပြီးသား ကားပါကင်တွေကလည်း နေရာဦးကြနဲ့ ကားရပ်ဖို့ နေရာ မရှိတော့ဘူး။ ကားတွေသာ တိုးလာတာ ကားပါကင် နေရာက တိုးမလာဘူး။ ကျနော့် မြို့နယ်ထဲမှာတင် ကားပါကင် လုရင်း ရိုက်မှုတွေ၊ လူသတ် မှုတွေ ဖြစ်တယ်။ လှိုင်မြို့နယ် ဆိုရင် ထိခိုက် နာကျင်မှုရဲ့ ၆၈ ရာခိုင်နှုန်းက ကားပါကင်ကြောင့် ဖြစ်တာ”ဟု လွှတ် တော် အပြီး တွင် ဧရာဝတီသို့ ပြောသည်။

ဂျပန် အပြည်ပြည် ဆိုင်ရာ ပူးပေါင်း ဆောင်ရွက်ရေး အေဂျင်စီ (JICA)၏ သုတေသန အရ ယာဉ်ကြော ပိတ်ဆို့မှု၏ အဓိက ပြဿနာမှာ ကားပါကင်ကြောင့် ဖြစ်ကြောင်း၊ အစိုးရက ကားပါကင်များ မပြုလုပ်သေးသဖြင့် လွှတ်တော် ဘက်မှ တိုက်တွန်းရခြင်း ဖြစ်ကြောင်း ၎င်းက ပြောသည်။

ဦးအောင်ကျော်ကျော်ဦးက ဆက်လက်၍ “ရန်ကုန်မြို့မှာတော့ အစိုးရပိုင် အဆောက်အအုံ၊ Public ဧရိယာ တော်တော် ရှားသွားပြီ။ နောက် ကားပါကင်ကို Business အနေနဲ့ လုပ်ဖို့က မလွယ်လှဘူး။ အစိုးရကပဲ ဦးဆောင်ပြီးတော့ လုပ်ရမှာ။ ဒါကြောင့်မိုလို့ အစိုးရပိုင်တဲ့ နေရာတွေမှာ ဥပမာ ဈေးပေါ့။ ကျနော့် မြို့နယ်ထဲမှာ ဆိုရင် ဈေး ၆၀ ရှိတယ်။ ဈေးကို ၁၀ ထပ်၊ ၁၂ ထပ်လောက် ဆောက်ရမယ်။ ၆ ထပ်လောက်ကို ကားပါကင် ဆောက်လိုက်ရင် အဆင်ပြေနိုင် ပါတယ်”ဟု ပြောသည်။

ဒဂုံမြို့နယ် ပြည်သူ့ လွှတ်တော် ကိုယ်စားလှယ် ဒေါ်သက်သက်ခိုင် ကလည်း ရန်ကုန်မြို့၏ လူဦးရေနှင့် ကားအရေ အတွက် အလွန်များလာသည့် အပေါ် အစိုးရ အနေဖြင့် ကိုင်တွယ်ရန် ခက်ခဲနေချိန်တွင် ပြည်သူများက စည်းကမ်းရှိမှု နှင့် ပါဝင် ကူညီသင့်ကြောင်း ပြောသည်။

“ကျမ ဆိုလိုချင်တာက လမ်းဘေးဈေးသည် ဆိုရင်လည်း စည်ပင်ကနေမှ ရောင်းဖို့ ချထားတဲ့ နေရာအတွင်းမှာပဲ စီမံ ခန့်ခွဲလို့ ရအောင် နယ်မြေတွေ တအားမချဲ့ နဲ့ပေါ့။ နောက်တခုကတော့ ကားပါကင်လို့ ပြောရင် ကားရပ်ခိုင်းတဲ့ နေရာ မှာပဲ ရပ်တာမျိုးပေါ့။ ဒါမျိုး လေးတွေကတော့ ကြိုးစားပြီးတော့မှ စည်းကမ်း လိုက်နာသင့်တယ်” ဟု ၎င်းက ပြောသည်။

ရန်ကုန်တိုင်း အတွင်း မြေနေရာ ရှားသော်လည်း အစိုးရက လုပ်နိုင်သည်မှာ ယာဉ်များ ရပ်နားနိုင်သည့် အထပ်မြင့် အဆောက်အအုံ (Multi-story) ကားပါကင်မျိုး ပြုလုပ်ပြီး အစားအသောက်လည်း ရောင်းချခွင့် ပေးသင့်ကြောင်း၊ လမ်းဘေး ဈေးသည်များလည်း ထိုပေါ်သို့ ရောက်ရှိ သွားမည် ဖြစ်သလို ကားများလည်း ရပ်ရန် နေရာ ရှိလာနိုင် ကြောင်း စီးပွားရေး လုပ်ငန်းရှင် တဦးလည်း ဖြစ်သူ ဒေါ်သက်သက်ခိုင်က သုံးသပ် ပြောဆိုသည်။

“ပြည်သူ လူထုရဲ့ စည်းကမ်း လိုက်နာမှုနဲ့လည်း ဆိုင်တယ်။ အဲဒါကြောင့် မြို့သစ်တွေ ချဲ့တဲ့နေရာမှာ စနစ်တကျ ချဲ့ဖို့ ပေါ့နော်။ ဥပမာ နေပြည်တော်လိုမျိုး ဆိုရင် သိပ်ပြီးတော့မှ ကျယ်ဝန်းတယ်လေ။ အဲဒီလိုမျိုးပေါ့။ အနာဂတ်ကို မျှော် မှန်းပြီးတော့ အနာဂတ်မှာ တိုးပွားလာမယ့် လူဦးရေ၊ အနာဂတ်မှာ တိုးပွားလာမယ့် ကားအရေအတွက်နဲ့ လိုက်လျော ညီထွေ ဖြစ်အောင် အမျှော်အမြင် ရှိရှိ မြို့သစ်တွေကို တည်ဆောက်ရမှာ” ဟု ၎င်းက ပြောသည်။

ရန်ကုန်မြို့မှ ကားဆရာ ကိုနိုင်က သက်ဆိုင်ရာက ရန်ကုန်တွင် ကားရပ်နား၍ ရနိုင်သည့် နေရာမှန်သမျှ ကားရပ်နား ခွင့် ရှိအောင် ဆောင်ရွက်ပေးနေသော်လည်း ကားစီးရေ အဆမတန် များနေခြင်းကြောင့် ယခုလို ပြဿနာများ ပေါ် ပေါက်နေခြင်း ဖြစ်ကြောင်း ပြောသည်။

“ပါကင် ကတော့ ကားတခါ ရပ်ဖို့ အတွက်ကို အနည်းဆုံး မိနစ် ၂၀၊ ၂၅ ကတော့ နေရာရဖို့ ပတ်နေရတာပဲ။ တော် တော်ခက်တယ်။ တချို့ လမ်းတွေမှာ ခုံချတာတို့၊ ကားတာယာချတာတို့ အဲဒါတွေကလည်း ရှိသေးတယ်။ အဲဒါတွေက စည်ပင် ကတော့ စည်ပင်က ကားကြီးနဲ့ ပတ်သိမ်းသွားတာတွေ လုပ်ပေမယ့် အမြဲတမ်း မလုပ်နိုင်တော့ ရှေ့ကသွား နောက်က ပြန်ချတာပဲ။ အဲဒီ ပြဿနာလည်း ရှိတယ်” ဟု ၎င်းက ပြောသည်။

ရန်ကုန်မြို့သည် ၂၀၁၀ ပြည့်နှစ် မတိုင်မီက ကားစီးရေ ၁ ဒသမ ၆ သိန်း ရှိခဲ့ရာ ၂၀၁၁ ခုနှစ် ကားမူဝါဒ ပြောင်းလဲပြီး နောက် ၂၀၁၈ ခုနှစ်၊ အောက်တိုဘာလကုန် အထိ လူစီး မော်တော်ယာဉ် ၁၀ သိန်း ၆ သောင်း ကျော် အထိ တိုးတက် လာခဲ့ကြောင်း၊ ရန်ကုန်မြို့တွင် မှတ်ပုံတင်ထားသည့် လူစီး မော်တော်ယာဉ် ၅ သိန်း ၆ သောင်းကျော် ရှိကြောင်း ပို့ ဆောင်ရေးနှင့် ဆက်သွယ်ရေး ဝန်ကြီးဌာနမှ သိရသည်။

ထို့ပြင် လမ်းပေါ်ရှိ စည်းကမ်းမဲ့ ယာဉ်များ ရပ်နားခြင်း၊ မောင်းနှင်ခြင်းနှင့် လမ်းပေါ် လမ်းဘေး ဈေးသည်များကို ပိုမို ထိရောက်စွာ အရေးယူနိုင်ရေး ရန်ကုန်မြို့တော် စည်ပင်သာယာရေး ဥပဒေ အသစ်ကို ၂၀၁၈ ခုနှစ်၊ ဇူလိုင်လတွင် ပြဋ္ဌာန်းနိုင်ခဲ့၍ ယင်းဥပဒေသစ်နှင့် ထိရောက်စွာ ဆောင်ရွက်နိုင်ရေး လုပ်ဆောင်မည်ဟု ဒုဝန်ကြီးက လွှတ်တော်တွင် ရှင်းလင်းခဲ့သည်။

The post ကိုယ်ပိုင်ကား အသုံးပြုမှု လျော့ချ၍ ရန်ကုန် ယာဉ်ကြောကျပ်မှု ဖြေရှင်းနိုင် ဟုဆို appeared first on ဧရာဝတီ.

တနင်္သာရီတိုင်းရှိ ထားဝယ် အထူးစီးပွားရေးဇုန် ကနဦးအဆင့် အကောင်အထည်ဖေါ်မည့်နေရာတွင် နေထိုင်သော ဒေသခံများက ထိုစီမံကိန်း ပြန်လည်စတင်ရန် နှင့် ထိုနေရာသို့ ဦးတည်သည့် အဝေးပြေး လမ်းမကြီးကို အဆင့်မြှင်တင်ရေးဆိုင်ရာ ထိုင်းနှင့် မြန်မာနိုင်ငံအကြား မကြာသေးမီက သဘောတူညီမှုကို သတိထားထောက်ခံခဲ့သည်။

အမျိုးသားဒီမိုကရေစီအဖွဲ့ချုပ်ဦးဆောင်သော အစိုးရသည် ထိုင်းမြန်မာနယ်စပ်မှ ထိုအထူးစီးပွားရေးဇုန်နှင့် ရေနက်ဆိပ်ကမ်းသို့ ဆက်သွယ်သော အဝေးပြေးလမ်းမကို နှစ်နိုင်ငံ ပူးပေါင်း အဆင့်မြှင့်တင်မည့် အမေရိကန်ဒေါ်လာ ၈ သန်းတန် သဘောတူညီချက်တခုကို ယခုလ အစောပိုင်းက လက်မှတ်ရေးထိုးခဲ့သည်။

စီမံကိန်းနှင့် ပတ်သက်သော လူထုအမြင်ကို တိုင်းတာရန် အကျိုးအမြတ်မယူသော အဖွဲ့အစည်းများဖြစ်ကြသည့် EarthRights International (ERI) နှင့် ထားဝယ် ဖွံ့ဖြိုးတိုးတက်ရေးအသင်း (DDA) တို့သည် ‘ထားဝယ် အထူးစီးပွားရေးဇုန်အတွက် ဒေသခံတို့၏ အသံများနှင့် အလားအလာများ’ အမည်ရှိ ၆ လကြာ လေ့လာမှုတခုကို ပူးတွဲ ပြုလုပ်ခဲ့သည်။

ထိုလေ့လာမှု အစီရင်ခံစာကို နိုဝင်ဘာလ ၂၉ ရက်နေ့နေ့မွန်းလွဲပိုင်းက ရန်ကုန်တွင် ကျင်းပပြီး ဒေသခံကျေးရွာသား ၄ ဦးတက်ရောက်သည့် သတင်းစာရှင်းလင်းပွဲတွင် တရားဝင် ထုတ်ပြန်ကြေညာသည်။ ထိုအစီရင်ခံစာသည် အထူးစီပွားရေးဇုန်စီမံကိန်း၏ ဗဟိုတွင်ရှိသော နဘူးလယ် ဒေသမှရွာ ၆ ရွာဖြစ်သော ပရာဒတ်၊ ထိန်ကြီး၊ မုဒု၊ ဝက်ချောင်း၊ ကမောင်းချောင်နှင့် ငပိဒက် ကျေးရွာများကို ဗဟိုပြုသည်။

အထူးစီးပွားရေးဇုန် ပြန်လည်စတင်မည်ဟု သတင်းကြားရသောအခါ မည်သို့ခံစားရသည်ကို ကျေးရွာသားလေးဦးအား ဧရာဝတီ သတင်းဌာနက မေးမြန်းခဲ့သည်။ ထိုစီမံကိန်းကို ထောက်ခံကြောင်း သို့သော် အစိုးရအနေဖြင့် သတင်းအချက်အလက် မျှတစွာရရှိရေး၊ စနစ်ကျသော မြေယာလျော်ကြေး အစီအစဉ်၊ တည်ဆောက်မည့်နေရာနှင့်ပတ်သက်သော ပွင့်လင်းမြင်သာမှု၊ အလုပ်အကိုင် အခွင့်အလမ်းနှင့် အသက်မွေးဝမ်းကြောင်း တိုးတက်မည့်အလာအလာတို့နှင့် ပတ်သက်ပြီး အာမခံရမည်ဟု ၎င်းတို့ကပြောသည်။

အထူးစီးပွားရေးဇုန်အတွင်း တည်ရှိနေသော ကျေးရွာများသည် မဟာဓါတ်အားလိုင်းနှင့်ဖြစ်စေ အစိုးရက လုပ်ကိုင်သည့် ဓါတ်ငွေ့တာဘိုင်နှင့်ဖြစ်စေ ချိတ်ဆက်မှုမရှိကြောင်း နဘူးလယ် ကျေးရွာမှ ဒေါ်ပိုဝင်းကပြောသည်။ လမ်းအခြေအနေမှာလည်း လွန်စွာ တိုးတက်မှုနိမ့်ကျနေသော်လည်း ထားဝယ်ခရိုင်အတွင်းရှိ မြို့နယ်လေးခုတို့သည် ၂၄ နာရီ လျှပ်စစ်ဓါတ်အားရရှိကြသည်ဟု သူပြောသည်။ ကျေးရွာသား အများစုတို့သည် ပုဂ္ဂလိက ဓါတ်အားပေးစက်များမှ လျှပ်စစ်ဓါတ်အားကို တယူနစ်လျှင့် ၉၀၀ ကျပ်မျှဖြင့် ဝယ်ယူသုံးစွဲနေကြရသည်ဟု ဆိုသည်။

“အထူးစီးပွားရေးဇုန် ပြန်စမှာနဲ့ပတ်သက်ပြီး ကျမတို့အရမ်းဝမ်းသာပေမယ့် အရင်တခါကထက်တော့ အခြေအနေတွေ ပိုတိုးတက်လာဖို့မျှော်လင့်တယ်” ဟု ဒေါ်ပိုဝင်းပြောသည်။

ကနဦးအဆင့်ဖြစ်သော စက်မှုဇုန်သည် အမေရိကန်ဒေါ်လာ၁.၈ ဘီလီယံ ကုန်ကျမည်ဟု မျှော်လင့်ရပြီး ၂၇ စတုရန်း ကီလိုမီတာ ကျယ်ဝန်းသည်။ ထိုကုန်ကျစရိတ်မှာ ကနဦးအဆိုပြုထားသော ကုန်ကျစရိတ်ထက် များစွာလျှော့နည်းပြီး ၎င်း၏အစိတ်အပိုင်းမျှသာ ရှိသည်။ ထားဝယ် အထူးစီးပွားရေးဇုန် စီမံခန့်ခွဲမှုကော်မတီ၏ နောက်ဆုံး အကြံပြုချက်တခုအရ စီမံကိန်း၏ အဆင့်အားလုံးကို တပြိုင်နက် စတင်နိုင်မည်ဟု ERI က ယုံကြည်သည်။

ထိုအထူးစီးပွားရေးဇုန်မှ ရရှိနိုင်သော အကျိုးကျေးဇူးများကို အစိုးရက အမြဲလိုလို အလေးထားပြောကြားနေသော်လည်း စီမံကိန်းနှင့် ပတ်သက်သည့် မရေရာသည့် သတင်းအချက်အလက်များကို သာ ထုတ်ပြန်သည်ဟု ERI ကပြောသည်။ ထို့အပြင် ဒေသခံများသည် အီတာလျံ-ထိုင်း ဆောက်လုပ်ရေးကုမ္ပဏီ (ITD) ကြောင့် ပျက်စီးသွားသော မြေများအတွက် လျှော်ကြေး တကျပ်ပင် မရသေးပေ။

ITD သည် လျှော်ကြေးပေးရာတွင် သြဇာရှိသူများ၏ အလိုကို လိုက်ခဲ့ပြီး မမျှတသောကြောင့် သာမာန်လယ်သမားများမှာ အနည်းငယ်သာရရှိသည်ဟု ERI ၏ အကြံပေး ကိုဘိုဘိုအောင်က ပြောသည်။ ထိုကုမ္ပဏီသည် ဒေသခံများ၏ မြေများအတွက် ပေါက်ဈေးအတိုင်း ပေးလျှော်ခြင်း ရှိမရှိနှင့် ထုံးစံအတိုင်းသာ လျှော်ကြေးပေးခဲ့ခြင်း ရှိမရှိ ရှင်းရှင်းလင်းလင်း မသိရပေ။

“တချို့ရွာသားတွေက စီမံကိန်းပြန်စမယ်ဆိုရင် လျှော်ကြေးထပ်ရဖို့ မျှော်လင့်နေတုန်းပဲ။ လျှော်ကြေးတွေကသာ သူတို့ဘဝတိုးတက်ဖို့ တခုတည်းသော နည်းလမ်းလို့သူတို့ယုံကြည်လို့ ဒီလိုမျှော်လင့်နေတာ” ဟု ကိုဘိုဘိုအောင်ပြောသည်။

အစိုးရ၏ ပြန်လည်နေရာချထားရေး စီမံချက်များကလည်း အမြဲလိုလို ထိခိုက်သော အသိုင်းအဝန်းများကို ခွဲခြားပစ်သည်။

ထိုအထူးစီးပွားရေးဇုန် စီမံကိန်းသည် ယခင် ဦးသိန်းစိန် အစိုးရ၏ အကြံအစည်ဖြစ်သည်။ မဟာစီမံချက်တွင် ရေနက်ဆိပ်ကမ်းတခု၊ ကျယ်ပြန့်သော ရေနံဓါတု စက်မှုဇုန်တခု၊ အသေးစားနှင့် လုပ်အား အပြင်းအထန်လိုသော စက်မှုလုပ်ငန်းများအတွက် စက်မှုဇုန်အသေးတခု၊ ကျောက်မီးသွေးသုံး ဓါတ်အားပေးစက်ရုံတရုံ၊ ရေကာတာ တခု၊ အလုပ်သမားများအတွက် မြို့သစ်တခု၊ ရေနံနှင့် သဘာဝဓါတ်ငွေ့ပိုက်လိုင်းများနှင့် ထိုင်းနိုင်ငံနှင့်ချိတ်ဆက်သော ရထားလမ်း ကားလမ်းများ ပါဝင်သည်။

ကျောက်မီးသွေးသုံး ဓါတ်အားပေးစက်ရုံကို ၂၀၁၂ ခုနှစ်က ဒေသခံများ ကန့်ကွက်သောအခါ အစိုးရက ထိုစီမံကိန်းကို နှစ်အတန်ကြာ ဆိုင်းငံ့ထားခဲ့သည်။ လက်ရှိ အစိုးရသည် ထိုကျောက်မီးသွေးသုံး ဓါတ်အားပေးစက်ရုံကို ဆက်လက်ဆောင်ရွက်မည်၊ မဆောင်ရွက်မည်ကိုလည်း ရှင်းရှင်းလင်းလင်း မသိရပေ။

ထိုင်းနိုင်ငံ၏ အိမ်နီးချင်းနိုင်ငံများ စီးပွားတိုးတက်ရေး ပူးပေါင်းဆောင်ရွက်မှု ဌာန (NEDA) ထံမှ ဘတ် ၄.၅ ဘီလီယံ (အမေရိကန်ဒေါ်လာ ၁၃၇ သန်းခန့်) အတိုးနိမ့်ချေးငွေရယူရန် ပြည်ထောင်စုလွှတ်တော်က ဆောက်လုပ်ရေးဝန်ကြီးဌာနကို ခွင့်ပြုထားသည်။ ဆောက်လုပ်ရေးဝန်ကြီးဌာနသည် ထိုင်းနိုင်ငံ အဝေးပြေး လမ်းမကြီးများဌာနနှင့် ၂၀၁၅ ခုနှစ်မှ စတင် ပူးပေါင်းဆောင်ရွက်နေပြီး အဝေပြေးလမ်းအတွက် တိုင်းတာမှုများ ပြုလုပ်နေသည်။

(Villagers Support Dawei SEZ Resumption but Demand Fairness  ကို ဆီလျော်အောင် ဘာသာပြန်သည်။)

The post ထားဝယ်စီမံကိန်း ပြန်စရန် ဒေသခံများ သတိထား ထောက်ခံ appeared first on ဧရာဝတီ.

Apple ဟာ ပထမဆုံးအကြိမ်အဖြစ် The Ellen Show နဲ့ ပူးပေါင်းကာ ပွဲကြည့် ပရိတ်သတ်တိုင်းကို အသစ်စက်စက် iPhone XR တလုံးစီ အခမဲ့ ပေးဝေခဲ့ပါတယ်။

The Ellen Show ဟာ အားလပ်ရက်ရာသီတိုင်းမှာ ပွဲလာပရိတ်သတ်တွေကို လက်ဆောင်ပစ္စည်းတွေ ၁၂ ရက်ထိ အခမဲ့ ပေးဝေလေ့ ရှိပါတယ်။ Apple ပူးပေါင်း ပါဝင်လာတာတော့ ဒါ ပထမဆုံးအကြိမ် ဖြစ်ပါတယ်။

iPhone XR ပေးမယ့် အစီအစဉ်ကိုတော့ ပွဲတင်ဆက်သူ Ellen DeGeneres နဲ့ ဟောလိဝုဒ်ကြယ်ပွင့် မင်းသမီး Julia Roberts တို့နှစ်ယောက် Heads Up ကစားနည်း ဆော့ပြီး စတင်ခဲ့ကြပါတယ်။ Heads Up ဆိုတာကတော့ လူနှစ်ယောက် မျက်နှာချင်းဆိုင်ထိုင်ပြီး တယောက် ကိုင်ထားတဲ့ ဖုန်း Screen က အရာကို နောက်တယောက်က အမူအရာနဲ့ သရုပ်ဖော်ပြရတာပါ။

ကစားပြီးနောက်မှာတော့ Ellen Denegeres နဲ့ Julia Roberts တို့ နှစ်ယောက်ဟာ ခရစ်စမတ်နောက်ခံ Screen ရှေ့မှာ iPhone XR နဲ့ Selfie တူတူ ရိုက်ခဲ့ကြပါတယ်။

ဓာတ်ပုံ ရိုက်နေရင်းနဲ့ Roberts က “အရောင် ၆ ရောင် ရနိုင်တာကတော့ တကယ်မိုက်တယ်။ ဘက်ထရီလည်း အခံဆုံးပဲ” လို့ ပြောပြီးပြီးချင်းမှာပဲ Ellen က အခု ပွဲလာတဲ့ ပရိတ်သတ်တိုင်းကို iPhone XR တလုံးစီ ပေးသွားမှာဖြစ်ကြောင်း ရုတ်တရက် ကြေညာခဲ့တာ ဖြစ်ပါတယ်။

iPhone XR တလုံးကို အမေရိကန်ပြည်ထောင်စုမှာ ၇၄၉ ဒေါ်လာနဲ့ ရောင်းချလျက်ရှိပြီး Ellen Show အစီအစဉ် တခုကို ပရိတ်သတ် ၄၀၀ လောက် ပုံမှန် လာကြည့်ကြပါတယ်။ ဒါကြောင့် Apple အနေနဲ့ iPhones ဒေါ်လာ ၃ သိန်းဖိုးအထိကို အခမဲ့ ပေးဝေခဲ့တာပါ။

Ellen ဟာ ယခုနှစ် ဖေဖော်ဝါရီလတုန်းကလည်း Cheerios အမှတ်တံဆိပ်နဲ့ ပူးပေါင်းကာ ဒေါ်လာ ၁ သန်းကို ပရိတ်သတ်တွေ ခွဲယူဖို့ ပေးခဲ့ပါသေးတယ်။ ပွဲလာသူ အယောက် ၄၀၀ နဲ့ တွက်မယ်ဆိုရင် တယောက်ကို ဒေါ်လာ ၂၅၀၀ ခန့် ရခဲ့ကြပါတယ်။

Ref: 9to5Mac ၊ Soyacinau

The post The Ellen Show မှာ ပွဲကြည့် ပရိတ်သတ်တိုင်းကို iPhone XR တလုံးစီ ပေးဝေ appeared first on ဧရာဝတီ.

မြန်မာနိုင်ငံ၏ နောက်ဆုံးနန်းမြို့တော်ဖြစ်သော မန္တလေးကို CIO Asiaက စမတ်စီးတီးအဖြစ် ပြောင်းလဲမည့် အရှေ့တောင်အာရှ ထိပ်ဆုံး မြို့ကြီး ဆယ်မြို့အနက် ပဉ္စမမြောက်မြို့အဖြစ် မကြာသေးမီက သတ်မှတ်ခဲ့သည်ဟု ASEAN Post၊ ကွန်ရက်တခု၏ စီမံချက်ဖြစ်သော Economist Intelligence Unit နှင့် Govlnsider တို့၏ သတင်းအချက်အလက်များအရ သိရသည်။

မန္တလေး မြို့တော်စည်ပင်သာယာရေး ကော်မတီ (MCDC) သည် ရေးပေးဝေရေးစနစ်၊ ရေဝေရေလဲဒေသ ပြုပြင်မှု၊ စမတ်နည်းပညာ အသုံးပြုသော အစိုင်အခဲ အညစ်အကြေး စီမံခန့်ခွဲမှု အဆင့်မြှင့်တင်ရေး ရည်ရွယ်ချက်ဖြင့် နှစ် ၃၀ မြို့ပြ ဖွံ့ဖြိုးတိုးတက်ရေး စီမံကိန်းကို ရေးဆွဲထားသည်။

မန္တလေးမြို့လမ်းများပေါ်မှ မော်တော်ယာဉ်များကို အချိန်နှင့် တပြေးညီ စောင့်ကြည့်ထိန်းချုပ်ရန်နှင့် ပိုက်လိုင်းများ၊ ရေမီတာများနှင့် အီလက်ထရွန်းနစ် လမ်းအသုံးပြုခ ကောက်ခံမှု စနစ်များကို စောင့်ကြည့်ရန် အာရုံခံ ကိရိယာများကို တပ်ဆင်ထားပြီးဖြစ်သည်။

ထိုသို့သော အားထုတ်မှုများကြောင့် မန္တလေးနန်းမြို့သည် တခြားပြိုင်ဘက် ASEAN မြို့ကြီး ၂၀ အနက် စမတ် စီးတီး ဖြစ်လာမည့် ခိုင်မာသော အလားအလာများကို ပြသနေသည်။

မန္တလေး မြူနီစပယ်နယ်နိမိတ်အတွင်း နည်းပညာအသွင် ကူးပြောင်းခြင်းနှင့် စမတ်စီးတီး အဆင့်အတန်း အပြည့်အ၀ ရရှိရေးတွင် ရင်ဆိုင်ရမည့် စိန်ခေါ်မှုများ၊ နောက်ဆုံး ဖြစ်ပေါ်တိုးတက်မှုများနှင့် ပတ်သက်၍ ဧရာဝတီ သတင်းဌာနမှ သတင်းထောက် နန်းလွင်က မန္တလေး စမတ်စီးတီးအရာရှိနှင့် MCDC ကော်မတီဝင် ဦးရဲမြတ်သူကို တွေ့ဆုံ မေးမြန်းခဲ့သည်။

မေး။ ။ မန္တလေး နန်းမြို့ကို CIO Asia က စမတ်စီးတီး ဖြစ်လာတော့မယ့် အရှေ့တောင်အာရှ မြို့ကြီး တမြို့အဖြစ် မကြာသေးမီက အသိအမှတ်ပြုခဲ့ပါတယ်။ အဲဒီစာရင်းထဲမှာဆိုရင် ပဉ္စမမြောက် အလားအလာ အကောင်းဆုံး အဆင့်မှာတောင် ရှိနေပါတယ်။ အခု MCDC ရဲ့ လက်ကျန် သက်တမ်း နှစ်နှစ်အတွင်းမှာ ဒီလို ဖြစ်လာအောင် ဘယ်လိုလုပ်မယ်လို့ ရည်မှန်းထားပါသလဲ။

ဖြေ။ ။ စမတ်စီးတီးဆိုတာ ဂျိမ်းစ်ဘွန်း ကားထဲကလို အဆင့်မြင့်နည်းပညာ လက်နက်ကိရိယာတွေ အများကြီးနဲ့ မြို့လိုမျိုးလို့ ထင်တဲ့လူလည်း ထင်မှာပဲ။ တချို့ကျပြန်တော့လည်း ငွေတွေအများကြီး သုံးပြီး မြို့ထဲက အရာရာကို အဆင့်မြှင့်တင်မယ်လို့ ထင်ရင်ထင်နိုင်တယ်။ အဲဒီလိုမျိုး လုံး၀ မဟုတ်ပါဘူး။ တကယ်တော့ စမတ်စီးတီးဆိုတာ အများပြည်သူ ဝန်ဆောင်မှုတွေကို နည်းပညာသုံးပြီး အဆင်ပြေချောမွေ့အောင် လုပ်ပေးတဲ့ မြို့ကြီးတမြို့ပါ။

အခုဆိုရင် မန္တလေးမှာ မီးပွိုင့် မှတ်တမ်းကို အချိန်နဲ့တပြေးညီ မှတ်တမ်းတင် နေပြီး ယာဉ်ကြောပိတ်ဆို့မှုကို အလိုအလျှောက် ထိန်းချုပ်စင်တာက တဆင့် အာရုံခံ ကိရိယာတွေကို အသုံးပြုနေပါပြီ။

ဒီ အာရုံခံကိရိယာတွေဟာ ရေယိုစိမ့်မှုကို သိနိုင်ဖို့ ရေပိုက်လိုင်းတွေ၊ ရေမီတာတွေကိုလည်း အချိန်နဲ့ တပြေးညီ စောင့်ကြည့် နေပါတယ်။ Radio-frequency identification (RFID) စနစ်သုံး အီလက်ထရွန်းနစ် လမ်းတံတား အသုံးပြုခ ကောက်ခံတဲ့ စနစ်သစ်တွေကိုလည်း အသုံးပြုနေပါတယ်။

စင်ကာပူနိုင်ငံက ASEAN ဥက္ကဋ္ဌ တာဝန်ထမ်းဆောင်တဲ့ ဒီနှစ်အစောပိုင်းမှာ ဝန်ကြီးချုပ် လီရှန်လောင်းက ASEAN စမတ်စီးတီး ကွန်ရက် အစီအစဉ်ကို အဆိုပြုခဲ့ပါတယ်။ အဆင့်မြင့်ပြီး သဘာဝပတ်ဝန်းကျင်နဲ့ ရေရှည်တည်တံ့တဲ့ မြို့ပြ တိုးတက်ရေးအတွက် ASEAN အဖွဲ့ဝင် နိုင်ငံအားလုံးက ဒီအစီအစဉ်မှာ ပူးပေါင်းဆောင်ရွက်ဖို့ သဘောတူခဲ့ ပါတယ်။ ပါဝင်တဲ့ မြို့ကြီး ၂၀ အတွင်းမှာ ကျနော်တို့ရဲ့ လုပ်ငန်းအဆင့်ဆင့်က စမတ်စီးတီး ရည်မှန်းချက် အောင်မြင်ရေး လုပ်ငန်းအတွက် ခိုင်မာတဲ့ တိုးတက်မှုတွေကို ဖော်ပြနေပါတယ်။

ဒါကြောင့် မန္တလေးဟာ စမတ်စီးတီး ဖြစ်လာမယ့် လုပ်ငန်းစဉ်ထဲကမြို့အဖြစ် အသိအမှတ်ပြု ခံရပြီး စမတ်စီးတီး အဆင့် အပြည့်အဝဖြစ်စေမယ့် တချို့သော သွင်ပြင် လက္ခဏာတွေ ရှိနေပြီးဖြစ်ပါတယ်။

မေး။ ။ ASEAN စမတ် စီးတီးတခုရဲ့ သွင်ပြင်လက္ခဏာတွေနဲ့ မူဘောင်တွေက ဘာတွေလဲ။

ဖြေ။ ။ တရားဝင် စမတ်စီးတီးမူဘောင်က ပူးပေါင်းဆောင်ရွက်မှုနဲ့ ငွေကြေးထောက်ပံ့မှုအပေါ် မူတည်တယ်။ ဒီမူဘောင်မှာ မြို့ပြပြည်သူနဲ့ လူမှုရေးဆိုင်ရာ၊ ကျန်းမာရေးနဲ့ ဘဝသာယာရေး၊ ဘေးအန္တရာယ် ကင်းရှင်းရေးနဲ့ လုံခြုံရေး၊ အရည်အသွေးမြင့် ပတ်ဝန်းကျင်၊ အဆောက်အအုံဆိုင်ရာ အခြေခံနဲ့ စက်မှုလုပ်ငန်းနဲ့ တီထွင် ဆန်းသစ်မှု ဆိုပြီး အဓိကနယ်ပယ် ခြောက်ခုရှိတယ်။

နယ်ပယ်တခုစီ မှာလည်း ယဉ်ကျေးမှုနဲ့ ယဉ်ကျေးမှု အမွေအနှစ် ဆိုင်ရာ ခရီးသွားလုပ်ငန်း၊ အများပြည်သူနဲ့ မြူနီစပါယ်ဝန်ဆောင်မှုတွေ၊ အုပ်ချုပ်ရေး၊ အိုးအိမ်နဲ့ မိသားစု၊ ကျန်းမာရေး စောင့်ရှောက်မှု၊ ပညာရေး၊ သယံဇာတလုံခြုံမှု၊ ဆိုက်ဘာလုံခြုံရေး၊ အများပြည်သူ ဘေးအန္တရာယ် ကင်းရှင်းရေး၊ မြို့တွင်း စောင့်ကြည့်ထိန်းသိမ်းမှု၊ ရာဇဝတ်မှု တားဆီးကာကွယ်ရေး စသည်ဖြင့် တိုးတက်အောင် လုပ်ဆောင်သွားရမယ့် သီးခြားနယ်ပယ်တွေ ရှိနေတယ်။

ကျနော်တို့ မြန်မာနိုင်ငံမှာတော့ ယဉ်ကျေးမှုနဲ့ ယဉ်ကျေးမှု အမွေအနှစ်၊ သယံဇာတလုံခြုံရေး၊ ဆိုက်ဘာလုံခြုံရေး၊ မြို့တွင်း စောင့်ကြည့်ထိန်းသိမ်းမှုနဲ့ ရာဇဝတ်မှု တားဆီးကာကွယ်ရေး၊ ကုန်သွယ်ရေးနဲ့ ကူးသန်းရောင်းဝယ်ရေး စတာတွေဟာ မတူညီတဲ့ ဝန်ကြီးဌာနတွေရဲ့ လက်အောက်မှာ ရှိနေတယ်။ တခြားနိုင်ငံတွေမှာ ဒါတွေအားလုံးက မြို့တော်ဝန် တယောက်တည်းရဲ့ လက်အောက်မှာ ရှိနေတယ်။

ဒီတော့ ကျနော်တို့က သူတို့လို ASEAN စမတ်စီးတီး မူဘောင်မှာပါတဲ့ ကဏ္ဍအားလုံးကို မထိန်းချုပ်နိုင်ဘူး။ ဒါပေမယ့် အများပြည်သူနဲ့ မြူနီစပါယ် ဝန်ဆောင်မှုတွေ၊ အီး ဂါးဗားမင့် အုပ်ချုပ်ရေး၊ သဘာဝ ပတ်ဝန်းကျင် အရည်အသွေး၊ သယံဇာတသုံးစွဲမှုနဲ့ စီမံခန့်ခွဲရေး၊ မြို့ပြခံနိုင်ရည် မြှင့်တင်ရေး၊ ယာဉ်ကြောထိန်းချုပ်မှု၊ အဆောက်အအုံနဲ့ ဆောက်လုပ်ရေးတွေ ကတော့ MCDC ရဲ့ ထိန်းချုပ်မှုအောက်မှာ ရှိတယ်။ ဒီတော့ ကျနော်တို့ ထိန်းချုပ်မှုအောက်မှာ ရှိတာတွေကို နည်းပညာသုံးပြီး ပြုပြင်ပြောင်းလဲမှုတွေ လုပ်နေပါတယ်။

မေး။ ။ မန္တလေးမှာ MCDC ရဲ့ အဓိက နည်းပညာ ပြုပြင်ပြောင်းလဲမှုတွေက ဘာတွေလဲ။

ဖြေ။ ။ အမှိုက်သိမ်းကားကနေ စပြောရမှာပဲ။ အမှိုက်ကားတွေရဲ့ လမ်းကြောင်းနဲ့ တာဝန်ကျတဲ့ နယ်ပယ်ကို ကြီးကြပ်ဖို့ GPS နဲ့ ဆော့ဖ်ဝဲလ်တွေ တပ်ဆင်တယ်။ အမှိုက်သိမ်းရမယ့် မြို့နယ်ကို သူတို့မသွားရင် ကျနော်တို့ကို သတိပေးတဲ့ စနစ် တပ်ဆင်ထားတော့ ကျနော်တို့ ဒါတွေကို သိနေရတယ်။

ကျနော်တို့ လမ်းတွေပေါ်မှာ ကားတွေကို ခြေရာခံကြည့်နိုင်တဲ့ နေ့စဉ်သုံး ကိရိယာတွေကို ဆက်သွယ် စောင့်ကြည့်တဲ့ IOT အာရုံခံကိရိယာတွေ တပ်ဆင်ထားတယ်။ အဲဒီအာရုံခံကိရိယာတွေဟာ ကားနံပါတ်ပြားကို ဖတ်နိုင်တယ်။ မီးနီကိုပဲ ဖြတ်မောင်းသလား၊ ဘယ်ဘက်ကို ဦးတည်နေလဲ စသည်ဖြင့် သူတို့ရဲ့လမ်းကြောင်းကို ထိန်းချုပ်ခန်းကနေ အချိန်နဲ့တပြေးညီ စောင့်ကြည့် ကိရိယာတွေနဲ့ ထိန်းချုပ်နိုင်တယ်။

မီးပွိုင့်တွေမှာလည်း ကျနော်တို့က CCTV တွေ တပ်ထားတယ်။ တချို့ ကင်မရာတွေဆိုရင် ခါးပတ်ပတ်ထားလား၊ မပတ်ထား ဘူးလားဆိုတာ၊ ကားထဲမှာ လူဘယ်နှယောက်ပါလဲ ဆိုတာကိုပါ ရှင်းရှင်းလင်းလင်း မြင်ရတယ်။ ဒီအချက်အလက် အားလုံးကို ထိန်းချုပ်ခန်းကို ပို့တယ်။ ကားနံပါတ်ကို ထည့်လိုက်တာနဲ့ ကားရဲ့လမ်းကြောင်းကို အသေးစိတ် ရှာလို့ရတယ်။ ဒါမျိုးတွေက ရာဇဝတ်မှု တိုက်ဖျက်ရေးနဲ့ စုံစမ်းစစ်ဆေးရေးကို အထောက်အကူ ပြုတယ်။

မီးပွိုင့်တွေက အလိုအလျောက်မီးပွိုင့်တွေဖြစ်ပြီး ယာဉ်ကြောပိတ်ဆို့မှုကို လိုက်ပြီး ချိန်ညှိပေးနိုင်တယ်။ တဖက်မှာ ဘာကားမှမရှိဘူးဆိုရင် မီးစိမ်းက အလိုလို ပေါ်လာမယ်။ ဒီစနစ်ကို စင်ကာပူနိုင်ငံမှာ လောလောဆယ် သုံးနေတဲ့အတိုင်း တခြားဘက်က ယာဉ်က သွားလို့ရတယ်။

နည်းပညာကို အသုံးပြုခြင်းအားဖြင့် ယာဉ်ကြောပိတ်ဆို့မှုဆိုင်ရာ သတင်းအချက်အလက် တွေကိုလည်း ကျနော်တို့ရတယ်။ ဒါကြောင့် ဘယ်လမ်းကို တလမ်းမောင်းလုပ်ရမယ်၊ ဘယ်လမ်းကို နှစ်လမ်းမောင်း လုပ်ရမယ် ဆိုတာကိုလည်း လေ့လာနိုင်တယ်။

ရေဒီယို ကြိမ်နှုန်း ခွဲခြားသတ်မှတ်မှု (RFID) ကို အခြေခံတဲ့ စနစ်တခုကို လမ်းတံတားဖြတ်သန်းခွင့် ကောက်ခံတဲ့ နေရာတွေမှာ တပ်ဆင်ထားတယ်။ ဒါဟာ အီလက်ထရွန်းနစ် ငွေပေးချေမှု စနစ်ပဲ။ အဝေးပြေးလမ်းတိုင်းမှာ ကားအရွယ်အစားကို ဆုံးဖြတ်ပြီး ကျသင့်ငွေကို တွက်ချက်နိုင်တဲ့ လေဆာနံရံတွေ တပ်ဆင်ထားတယ်။ အစဉ်အလာအတိုင်း ဆိုရင် ဖြတ်သန်းခကို တိုးလ်ဂိတ်တွေမှာ လက်နဲ့ပေးချေနေကြရတာ။

အဲဒီတော့ အချက်အလက်မရဘူး။ ကျနော်တို့ ရတဲ့ငွေကလည်း အမှန်တကယ်ရတဲ့ငွေထက် အမြဲလျော့နေတယ်။ ဒါဟာ အဂတိလိုက်စားမှုတွေပဲ။ စာရင်းတွေကလည်း တလွဲတွေ။

အခုတော့ အဝေးပြေး လိုင်းတွေကလည်း သူတို့ရဲ့ကားကို သူတို့ ခြေရာခံနိုင်ပြီး အသေးစိတ် အချက်အလက်တွေ ရရှိလို့ ကျနော်တို့ရဲ့ ကြိုတင်ငွေပေးချေရတဲ့ အီလက်ထရွန်းနစ်ပေးချေမှု စနစ်ကို နှစ်သက်နေတယ်။ ဒိအပြင် တိကျတဲ့ ငွေပမာဏကို တွက်ချက်ဖို့ စက်တွေလည်း သူတို့မလိုတော့ဘူး။

MCDC ဟာ နိုင်ငံသားတွေအတွက် လျှော့ချ၊ ပြန်သုံး၊ ပြန်လည်ပြုပြင်သုံး 3-R စနစ်ကို စတင်မိတ်ဆက်နေပြီ။ နေရာ အများအပြားမှာ အမှိုက်အမျိုးမျိုးအတွက် ပြန်လည်အသုံးပြုတဲ့ အမှိုက်ပုံးတွေ ချထားပြီးပြီ။

ကျောင်းသားတွေက ကျောင်းတွေမှာ ပြန်လည်ပြုပြင် အသုံးချတဲ့ အမှိုက်ပုံးတွေအကြောင်း လေ့လာနေကြတယ်။ အမှိုက်ပုံး အမျိုးမျိုး ( စက္ကူ၊ သံဘူး သို့မဟုတ် ပလတ်စတစ်) ထဲကို ဘယ်လိုပစ်ရမယ်ဆိုတာကို ကျနော်တို့ သူတို့ကို လေ့ကျင့်ပေးနေတယ်။

မေး။ ။ မန္တလေးရဲ့ နှစ်သုံးဆယ် မဟာ စီမံချက်နဲ့ပတ်သက်ပြီး အသေးစိတ် ထပ်ရှင်းပြပေးပါ။

ဖြေ။ ။ ကျနော်တို့က အမှိုက်သိမ်းစနစ်သစ်ကို ပြည်သူတွေသိအောင် ကြေညာလိုက်သလို၊ အိမ်ရှေ့က ဖြတ်လျှောက် သွားတာနဲ့ ဝန်ထမ်းတွေက အဲဒီအိမ်ရဲ့ ရေ အသုံးပြုမှုကို သူတို့ မိုဘိုင်းဖုန်း အပလီကေးရှင်းကနေ သိနိုင်တဲ့ အလိုအလျောက် ရေမီတာဖတ် စနစ်ကိုလည်း တချို့မြို့နယ်တွေမှာ စတင်နေပြီ။ ရေပမာဏ ဘယ်လောက်ကို ဖြုန်းတီးပစ်နေတယ် ဆိုတာကို မှတ်တမ်းတင်နိုင်တဲ့ အာရုံခံ ကိရိယာတွေကိုလည်း ကျနော်တို့ တပ်ဆင် ထားတယ်။

ဒီစီမံကိန်းတွေကို အာရှဖွံ့ဖြိုးရေးဘဏ် (ADB)၊ နယ်သာလန်၊ ဂျပန်နဲ့ တခြားနိုင်ငံတွေက ငွေကြေး ထောက်ပံ့ ကြတာ။

မောင်းသူမဲ့ လေယာဉ်တွေက မြို့ပြစီမံကိန်းနဲ့ အဆောက်အအုံ အသေးစိတ်ကို မှတ်တမ်းတင်တယ်။ ဒါ့အပြင် ကျနော်တို့က မိသားစုဝင် အရေအတွက်၊ ပိုင်ဆိုင်မှုနဲ့ ကားစီးရေ အပါအဝင် မိသားစု အချက်အလက် တွေကိုလည်း ပြန်ကောက်တယ်။

ဒီစီမံကိန်းက အချက်အလက်သစ် တစုံရဖို့ ရည်ရွယ်တယ်။ မိသားစုဝင် အရေအတွက်ကို သိရင် သူတို့အမှိုက် ဘယ်လောက် ထုတ်လုပ်မလဲ ကျနာ်တို့ သိနိုင်တယ်။ သူတို့ပိုင်တဲ့ကား အရေအတွက်ကို သိရင် ယာဉ်ကြော ပိတ်ဆို့မှုနဲ့ လမ်းစီမံချက် စနစ်သစ်တွေကို ကျနော်တို့ တွက်ချက်လို့ရတယ်။

စိတ်ဝင်စားစရာ ကောင်းတာက မြို့မှာရှိတဲ့ လူဦးရေ၊ အိမ်ယာနဲ့ ပတ်သက်ပြီး အချက်အလက်သစ်တွေ ရလာတယ်။ ဥပမာပြောရရင် အရင်စာရင်းတွေမှာ အဆောက်အအုံ တသန်းပဲရှိပေမယ့် ကျနော်တို့ စာရင်းမှာ အဲဒီနှစ်ဆ ဖြစ်နေမယ်။ အချက်အလက်သစ်တွေအပေါ် အခြေခံပြီး နိုင်ငံသားတွေဆီကအခွန် ပိုရနိုင်တယ်။

မေး။ ။ MCDC ဟာ သာမန်ပြည်သူတွေနဲ့ အကျွမ်းတဝင်မရှိတဲ့ နည်းပညာတွေ၊ စည်းမျဉ်းတွေကို ကျင့်သုံးနေတယ်။ ဒီတော့ သူတို့တွေနဲ့ ဘယ်လို ထိတွေ့ ဆက်ဆံမလဲ။

ဖြေ။ ။ အပြောင်းအလဲတွေ အတွက် စဉ်းစားဆင်ခြင်ရာမှာ အချက်အလက်တွေက အထောက်အကူပြုလို့ အပြောင်းအလဲတခုခု မလုပ်ခင်မှာ ကျနော်တို့က အချက်အလက်တွေကို အရင်စုဆောင်းတယ်။ MCDC အဖွဲ့ဟာ ပြည်သူတွေရဲ့ တိုင်ကြားစာတွေ အတွက်လည်း ပြည့်ပြည့်စုံစုံ ပြင်ဆင်ထားတယ်။ မြို့မှာ ပြုလုပ်တဲ့ အပြောင်းအလဲ တွေနဲ့ ပတ်သက်ပြီး ကျနော်တို့မှာ ခိုင်မာတဲ့ အကြောင်းရင်းတွေရှိတယ်။ နိုင်ငံသားတွေနဲ့ ထိတွေ့ဆက်ဆံရာမှာ ဆုံမှတ်ဖြစ်တဲ့ MCDC အဖွဲ့ဝင်တွေကိုလည်း ရွေးချယ်ထားတယ်။

မေး။ ။ စမတ်စီးတီးအဖြစ် အသွင်ကူးပြောင်းရာမှာ ပြည်သူတွေရဲ့ အလေ့အထဟောင်းတွေကို ပြောင်းလဲတာနဲ့ ပတ်သက်ပြီး ဘယ်လို ပြဿနာတွေရှိလဲ။

ဖြေ။ ။ ပြည်သူတွေ စည်းကမ်းလိုက်နာအောင် ကျနော်တို့လုပ်တယ်။ ယုံကြည်မှုက အရေးပါတယ်။ ကျနော်တို့ဟာ သူတို့အတွက် အပြုသဘောဆောင်တဲ့ အပြောင်းအလဲတွေ လုပ်နေတယ်ဆိုတာကို သူတို့ ယုံကြည်ဖို့ လိုတယ်။

ပြည်သူတွေ စည်းကမ်းမလိုက်နာရင် ကျနော်တို့ သုံးလိုက်တဲ့ ငွေတွေအားလုံးဟာ အလဟသဖြစ်ကုန်မှာပဲ။ ပြည်သူတွေ အရမ်း ပြောင်းလဲသွားတယ်လို့ ကျနော်ထင်တယ်။ ပျက်စီးနေတဲ့ ပြတင်းပေါက် သဘောတရားလိုပဲ အဆောက်အအုံတခုဟာ ပျက်စီးနေရင် တခြား ပြတင်းပေါက်တွေလည်း ပိုပြီး ဖျက်ဆီးခံရနိုင်ခြေ ရှိတယ်။

အမှိုက်မရှိဘဲ သန့်ရှင်းနေတဲ့နေရာတခုဟာ အမှိုက်မပစ်အောင် လူတွေကို တားဆီးနိုင်တယ်။

ပြည်သူတွေဟာ သူတို့ ရပ်ရွာအသိုက်အဝန်းအနေနဲ့ စည်းကမ်းလိုက်နာအောင် ထိန်းချုပ်နိုင်တယ်လို့ ကျနော် ယုံကြည်တယ်။ တချို့ မြို့နယ်တွေမှာ ဆိုရင် အမှိုက်ကောက်ဖို့ ပြည်သူတွေက ထရပ်ကား အသေးလေးတွေ စီစဉ်ထားတာ ရှိတယ်။ ကျနော်တို့က အမှိုက်ပုံးတွေ ပေးပြီး တနေရာတည်းမှာ သွားသိမ်းရုံပဲ။

တချို့လူတွေက အမှိုက်ပုံး အနီးမှာ ဆက်ပစ်နေကြလို့ ဘယ်သူတွေဟာ အမှိုက်မပစ်ရမယ့် နေရာမှာ ဆက်ပစ်နေသေးလဲ ဆိုတာကို သိရအောင် သူတို့က CCTV တွေလည်း တပ်ဆင်ထားတယ်။ အမှိုက်ပုံးထဲကို အမှိုက်ဝင်အောင် မပစ်တဲ့သူတွေကို အရေးယူတဲ့ ပြစ်ဒဏ်တွေလည်း ရှိပါတယ်။

မေး။ ။ စမတ်စီးတီးဆိုတဲ့ အယူအဆက မြို့တော်ဝန် မဖြစ်ခင်ကတည်းက မြို့ပြစီမံကိန်းနဲ့ ပတ်သက်ပြီး အရမ်းကို စိတ်ဝင်စားတဲ့ မြို့တော်ဝန် တယောက်ဆီကနေ မြစ်ဖျားခံလာတယ်လို့ သိရတယ်။ ဒီ အသွင်ကူးပြောင်း မှုမှာ မန္တလေး မြို့တော်ဝန်ရဲ့ အခန်းကဏ္ဍက ဘာလဲ။

ဖြေ။ ။ မြို့တော်အတွက် ဆုံးဖြတ်ချက် အားလုံးဟာ မြို့တော်ဝန်ရဲ့ ရည်မှန်းချက်အပေါ်မှာ အခြေခံတယ်။ သူဟာ နောက်ဆုံးပေါ် နည်းပညာတွေကို ဝယ်ဖို့ ဆုံးဖြတ်ရဲတဲ့အတွက် သူဟာ ရဲရင့်တယ်လို့ ဆိုရမှာပဲ။ သူသာ မရဲရင့်ရင် ကျတော်တို့တတွေ တရုတ်နိုင်ငံလုပ် စက်ပစ္စည်းတွေနဲ့ပဲ အလုပ်လုပ်နေရပြီး ရလဒ်မှာတော့ ပြဿနာ ဖြစ်နေမှာပဲ။

ခွင့်ပြုငွေရဲ့ တစိတ်တပိုင်းကို စမတ် စီးတီးအတွက် နည်းပညာ ဒါမှမဟုတ် ဆော့ဖ်ဝဲလ် ဒါမှမဟုတ် စက်ပစ္စည်း အတွက် သုံးစွဲရတိုင်း ကျနော်တို့က စာရင်းစစ်အဖွဲ့နဲ့ ရင်ဆိုင်ရတာပဲ။ ဒါပေမယ့် ရေရှည်ခံတဲ့ ပစ္စည်းတွေဟာ ဈေးပိုကြီးတဲ့အကြောင်း မြို့တော်ဝန်က သူတို့ကို အမြဲရှင်းပြတယ်။ ဒီလို ကိစ္စမျိုးတွေကို သူနားမလည်ရင် ကျနော်တို့ မြို့အတွက် အကောင်းဆုံးနည်းပညာနဲ့ စက်ပစ္စည်းတွေရမှာမဟုတ်ဘူး။

မေး။ ။ MCDC ဟာ အချိန်တိုအတွင်း နယ်ပယ်များစွာမှာ နည်းပညာသစ်များစွာကို မိတ်ဆက်ပေး ခဲ့တယ်။ အသုံးစရိတ်ကို ဘယ်လို စီမံခန့်ခွဲလည်း။

တချို့ အဆင့်မြင့်နည်းပညာ ဆော့ဖ်ဝဲလ်တွေကို နိုင်ငံခြား ကုမ္ပဏီတွေက လှူဒါန်းပါတယ်။ ကုမ္ပဏီတွေက မန္တလေးကို စံနမူနာအဖြစ် ပြချင်တော့ များသော အားဖြင့်တော့ ကျနော်တို့ လျှော့ဈေးနဲ့ရတယ်။ ဒီမှာ စီမံကိန်း ရလဒ်ကောင်းရင် ကုမ္ပဏီတွေအနေနဲ့ သူတို့ ထုတ်ကုန်တွေကို ကျန်တနိုင်ငံလုံးအတွက် ကြော်ငြာပြီးသား ဖြစ်သွားပြီ။

ဒီစီမံကိန်းအတွက် အသုံးစရိတ်ကို MCDC က ပြည်ထောင်စု အစိုးရထံက ရတာမဟုတ်ဘူး။ အဆောက်အအုံနဲ့ လူဦးရေ ဆိုင်ရာ အချက်အလက်တွေ ကောက်ခံပြီးတဲ့အခါကျတော့ ပြည်သူတွေဆီက အခွန်တွေ ပိုရလာတယ်။ အဲဒီအပြင် လမ်းတံတား အသုံးပြုခွင့် ကောက်ခံတဲ့ဂိတ်က RFID စနစ်ကလည်း MCDC အတွက် ဝင်ငွေ အများအပြား ရစေတယ်။

လမ်းတံတား အသုံးပြုခွင့် ကောက်ခံတဲ့လုပ်ငန်း၊ ရေမီတာနဲ့ တခြားနေရာတွေ အပါအဝင် အများပြည်သူ ဝန်ဆောင်မှု ကဏ္ဍမှာ နည်းပညာ အသုံးပြုပြီးနောက် ကျနော်တို့ရဲ့ ဝင်ငွေက သိသိသာသာ တိုးတက်လာတယ်။

အရင်တုန်းကဆိုရင် ပြည်သူတွေက MCDC ခွင့်ပြုချက်မရဘဲ အဆောက်အအုံ ဆောက်တာတို့၊ ပြုပြင်ထိန်းသိမ်း တာတို့ လုပ်ခဲ့ဖူးတယ်။ အခုတော့ ကျနော်တို့က မောင်းသူမဲ့ လေယာဉ်တွေ သုံးပြီး လက်တွေ့ဖြစ်နေတဲ့ အဆောက်အအုံ ဓာတ်ပုံတွေနဲ့ ကိန်းဂဏန်းတွေကို ရရှိနေတယ်။

သူတို့ ခွင့်ပြုချက်မရဘဲ ဆောက်ရင် ကျနော်တို့ အချက်အလက် ဌာနက ချက်ခြင်းသိမယ်ဆိုတာ ပြည်သူတွေ သဘောပေါက်နေကြပြီ။ ဒါကြောင့် အဆောက်အအုံ တည်ဆောက်ခွင့် ပြုတဲ့လုပ်ငန်းကလည်း ဝင်ငွေတိုး လာတယ်။

မေး။ ။ အကြီးမားဆုံး စိန်ခေါ်မှုကဘာလဲ။

ဖြေ။ ။ အပြောင်းအလဲတိုင်းမှာ ခုခံမှုတွေရှိတယ်။ တခါတခါကျရင် အဲဒီလိုခုခံမှုက ကျနော်တို့ရဲ့ ဝန်ထမ်းထဲ မှာတောင် လာဖြစ်တယ်။ အမှိုက်ကားတွေမှာ GPS စနစ်တပ်ဆင်တုန်းက တချို့ အလုပ်သမားတွေက အဲဒီစနစ်တွေထဲကို ရေတွေ ဝင်အောင်လုပ်ပြီး သူတို့လမ်းကြောင်းကို ကျနော်တို့ မသိနိုင်အောင် လုပ်ကြတယ်။ နောက်တခါ ဒီလိုလုပ်ရင် ပြင်းပြင်းထန်ထန် အရေးယူမယ် ဆိုတဲ့အကြောင်း သူတို့ကို သတိပေးခဲ့ရတယ်။

ဝန်ကြီးဌာန တချို့နဲ့ ဆက်ဆံရာမှာလည်း အခက်အခဲတွေ ရှိတယ်။ ဥပမာပြောရရင် မြစ်ကမ်းနားနေရာ တခုဆိုရင် ဝန်ကြီးဌာနက ပုဂ္ဂလိက ကုမ္ပဏီတခုကို သဲထုတ်ယူခွင့် ပေးထားတော့ ဒီနေရာက အရမ်းကို ညစ်ပတ်နေတယ်။ ဒါပေမယ့် ဒီကိစ္စက ကျနော်တို့ ထိန်းချုပ်မှုအောက်မှာ မဟုတ်လို့ ကျနော်တို့ ဘာမှ လုပ်လို့မရဘူး။

အများပြည်သူ သယ်ယူပို့ဆောင်ရေး ကလည်း MCDC ရဲ့ ထိန်းချုပ်မှုအောက်မှာ မရှိဘူး။ ကားသမားတွေက စည်းမျဉ်းတွေ ချိုးဖောက်နေကြပေမယ့် ကျနော်တို့က သူတို့ကို အရေးယူလို့ မရဘူး။ သူတို့တွေက ကျနော်တို့ကို လုံး၀ မမှုကြဘူး။ တခါတခါ တိုင်းရင်းသား မိတ်ဆွေတွေနဲ့တွေ့ရင် ကျနော်တို့လည်း မန္တလေးမှာ ဖက်ဒရယ် စနစ် ထူထောင်ချင်တယ် လို့တောင် နောက်ပြောင်မိတယ်။

မေး။ ။ MCDC ရဲ့ အနာဂတ် အစီအစဉ်တွေကို ပြောပြပေးပါ။

ဖြေ။ ။ အခုကျနော်တို့ မန္တလေးမှာ ဘယ်နေရာကို မဆို အလွယ်တကူ ရှာနိုင်အောင်လို့ စံချိန်မီ မြေပုံ ထုတ်လုပ်ဖို့ လုပ်နေတယ်။ နိုင်ငံတကာ၊ အထူးသဖြင့် အမေရိကန် စံနှုန်းညီတဲ့ စနစ်တွေ သုံးပြီးတော့ လမ်းညွှန် ဆိုင်းဘုတ်တွေ ဆွဲမယ်။ ပြည်သူတွေ ရုံးကိုလာပြီး အိမ်ခြံမြေခွန်တွေ၊ ဆောက်လုပ်ခွင့် ပြုချက်တွေနဲ့ အခြား မြူနီစပါယ် ကိစ္စတွေအတွက် အခွန်ငွေ သွင်းစရာမလိုအောင် ငွေပေးချေမှု စနစ်တွေလုပ်မယ်။

အနာဂတ်မှာ ပြည်သူတွေဟာ QR codes တွေ သုံးပြီး အနီးဆုံး ဘဏ်မှာ ငွေပေးချေနိုင်မယ်။ နည်းပညာအရ အဆင်သင့် နီးပါးဖြစ်နေပေမယ့် ပုဂ္ဂလိက ဘဏ်တွေနဲ့ ညှိဖို့ လိုနေသေးတယ်။ MCDC ဟာ ရာဇဝတ်မှုတွေမှာ ရဲတပ်ဖွဲ့ကို ကူညီနိုင်အောင်လို့ စံချိန်မီ မျက်နှာခွဲခြား သိမှတ်စနစ် နည်းပညာဝယ်ယူဖို့ လေ့လာနေတယ်။

ရေဆိုးသန့်စင် စက်ရုံတခုကို အခုတည်ဆောက်နေပြီး မကြာခင်အနာဂတ်မှာ ရေဆိုးအားလုံးကို သန့်စင်ဖို့ လုပ်နေတယ်။ MCDC ဟာ လမ်းတွေကို ရေလွှမ်းမိုးတာနဲ့ တခြား ပြဿနာတွေကို ဖြေရှင်းဖို့ ရေနုတ်မြောင်း စနစ်ကို ဂျပန်နိုင်ငံနဲ့အတူ ရေးဆွဲနေတယ်။ ရေနုတ်မြောင်းစနစ်အတွက် နည်းပညာသစ်တွေကို အနာဂတ်မှာ သုံးမယ်။

မန္တလေးဟာ ဘယ်အချိန်မှာ စမတ်စီးတီးအဆင့် အပြည့်အဝဖြစ်မယ်လို့ ကျနော် မပြောနိုင်ပေမယ့် ကျနော်တို့ တာဝန် ထမ်းဆောင်ချိန်အတွင်း ဆောင်ရွက်ချက်တွေကို အုတ်မြစ်အဖြစ် ထားရစ်ခဲ့မယ်။

(နန်းလွင်သည် ဧရာဝတီအင်္ဂလိပ်ပိုင်း၏ အကြီးတန်း သတင်းထောက် တဦးဖြစ်သည်။ ယခု အင်တာဗျူးအား အင်္ဂလိပ်ဘာသာဖြင့် Making Myanmar’s Last Royal Capital an ASEAN ‘Smart City’  တွင် ဖတ်ရှုပါ။)

The post မန္တလေး စမတ်စီးတီးအရာရှိ ဦးရဲမြတ်သူနှင့် တွေ့ဆုံ မေးမြန်းခြင်း appeared first on ဧရာဝတီ.

တိုကျိုမြို့ရှိ ပြင်သစ် သံအမတ်၏ နေအိမ်တွင် နိုဝင်ဘာ ၁၉ရက်နေ့ ညနေခင်းက ပြုလုပ်သည့် ပါတီတခုတွင် ဂုဏ်သရေရှိ ဧည့်သည်များ စုရုံးမိကြချိန်တွင် လူတိုင်း၏ အာရုံစူးစိုက်မှုက ထိုနေရာတွင် ရှိမနေသော လူတယောက်ထံ၌ ရှိနေ၏။

နစ်ဆန်းမော်တာ Nissan Motor ၏ ဥက္ကဌဟောင်း ကားလို့စ်ဂွန်း Carlos Ghosn အဖမ်းခံရသည့် သတင်းက ထွက်ပေါ်နေခဲ့သည်။ ထို့ကြောင့် ဂျပန် ဗဟို ဘဏ်အုပ်ချုပ်ရေးမှူး Haruhiko Kuroda က သူ၏ နိုင်ငံနှင့် ပြင်သစ်တို့၏ ချစ်ကြည်ရင်းနှီးမှုအတွက် အရက်ခွက်ကို မြှောက်၍ ဆုတောင်းချိန်တွင် ပါတီတက်ရောက်လာသူများက တစုံတရာ ဘာမှ အမှားအယွင်း မရှိသလိုမျိုးဖြင့် ရှန်ပိန်ခွက် ချင်းတိုက်လိုက်ကြသော်လည်း အများစုမှာ တီးတိုးမပြောဘဲ မနေနိုင်ခဲ့ကြပါ။

“သူတကယ် အဖမ်းခံရတာလား” ဟု တယောက်က ပြောသည်။ “သတင်းအသစ ်ရှိသေးသလား။”

ပြင်သစ် အမှုဆောင်အချို့ ရှိနေခြင်းက အခြေအနေကို ပို၍ပင် ကမောက်ကမ ဖြစ်စေခဲ့သည်။ ပြင်သစ်မော်တော်ကား ကုမ္ပဏီ ရေးနော့ Renault ၏ ဥက္ကဌဟောင်း လူဝီရွှစ်ဇာ Louis Schweitzer လည်း ရှိနေသည်။ သူက အသက်ငင်နေသော Nissan ကို ကယ်တင်ရန် ၁၉၉၉ ခုနှစ်တွင် ကားလို့စ်ဂွန်းကို စေလွှတ်ပေးခဲ့သူ ဖြစ်သည်။

ပြင်သစ်နိုင်ငံ စီးပွားရေးနှင့် ဘဏ္ဍာရေး ဒုတိယ ဝန်ကြီး Agnes Pannier-Runacher က လေးလေးနက်နက် အသွင်ရှိနေ သည်။ Nissan အမှုဆောင် တဦးက သတင်းထုတ်ပြန်ချက်တစောင် ထုတ်ပြန်ခဲ့ကြောင်းကို သာ ပြောလိမ့်မည် ဖြစ်သည်။

ထိတ်လန့်စရာကိစ္စက လောလောလတ်လတ်သာ ရှိသေးသည်။ သို့သော်လည်း ကားလို့စ်ဂွန်းကို ဖမ်းဆီးသည်အထိ ရောက်စေခဲ့သော အဖြစ်အပျက်များက ပြီးခဲ့သည့် ၆ လ ခန့်ကထဲက စတင်နေခဲ့ပြီ ဖြစ်သည်။

မလျှော်မကန်ပြုလုပ်ခြင်း ဖြစ်နိုင်သည့် သက်သေအထောက်အထားကို သတိပြုမိချိန်တွင် Nissan မှ အကြီးတန်း အတွင်းလူတဦးက ကားလို့စ်ဂွန်း၏ လျှို့ဝှက် ဘဏ္ဍာရေး အချက်အလက်များကို စေ့စေ့စပ်စပ် စစ်ဆေးနေခဲ့ပြီ ဖြစ်သည်။ သူ ထိတ်လန့် တုန်လှုပ်ခဲ့ရသည်။ “အဲဒါကို ခွင့်မပြုသင့်ဘူး” ဟုသူက စာရွက်စာတမ်းများကို ပိုက်စိပ်တိုက် စစ်ဆေးခဲ့သည့် အကြောင်းများကို ပြန်ပြောပြသည်။

အဆိုပါ အတွင်းလူ အပါအဝင် ထိပ်တန်း လျှို့ဝှက် စုံစမ်းစစ်ဆေးရေး အဖွဲ့တခုကို ကုမ္ပဏီအတွင်းတွင် ဖွဲ့စည်းခဲ့သည်။ စုံစမ်းစစ်ဆေးမှုကို ကားလို့စ်ဂွန်း အပါအဝင် ကုမ္ပဏီ အမှုဆောင် အများအပြား မသိအောင် လျှို့ဝှက်ထားခဲ့သည်။ သက်သေအထောက်အထား ပြည့်စုံသည်အခါ ဂျပန်အာဏာပိုင်များက ကားလို့စ်ဂွန်းကို သူ၏ ကိုယ်ပိုင် Gulfstream ဂျက်လေယာဉ်ပေါ်တွင် ဖမ်းဆီးထိန်းသိမ်းလိုက်သည်။

နိုဝင်ဘာ၁၉ ရက်နေ့ မွန်းလွဲပိုင်းက Haneda လေဆိပ်သို့ လေယာဉ်ဆင်းသက်ပြီးသည်နှင့် တိုကျိုခရိုင် အစိုးရရှေ့နေရုံးမှ ဧဂျင့်များက လေယာဉ်အမှတ် N155AN ပေါ်သို့ တက်ရောက်သွားခဲ့ကြသည်။ ကနဦးစုံစမ်း စစ်ဆေးမှုများ ပြုလုပ်ပြီး နောက် ကုမ္ပဏီ ဥက္ကဌကို ဆက်လက် စုံစမ်းစစ်ဆေးမှုများ ပြုလုပ်ရန် မြို့တော် တိုကျိုရှိ အစိုးရရှေ့နေရုံးသို့ ခေါ်ဆောင် သွားကြသည်။

နာရီ အနည်းငယ် အတွင်းမှာပင် ကားလို့စ်ဂွန်းကို ဝင်ငွေ အမှန်အတိုင်း မဖော်ပြဘဲ ထိန်ချန်မှုဖြင့် သံသယရှိသည့် အတွက် ဖမ်းဆီး ထိန်းသိမ်းခဲ့သည်။

ကားလို့စ်ဂွန်း ရုတ်တရက် အရာကျသွားခြင်းက အောင်မြင်မှု အမြောက်အမြား ရရှိခဲ့ပြီး ဖြစ်သည့် သူ၏ လုပ်ငန်း သက်တမ်းတလျှောက်တွင် အရဲတင်းဆုံး လုပ်ရပ်တခု ဖြစ်နိုင်သည့် Nissan နှင့် Renault ကို ပေါင်းစည်းရန် ပြုလုပ်နေစဉ် ပေါ်ပေါက်လာခြင်း ဖြစ်သည်။

ကုမ္ပဏီတွင်း စုံစမ်းစစ်ဆေးမှုများ စတင်ခဲ့သည့် ကာလဝန်းကျင်ခန့် ဖြစ်သော ဧပြီလအတွင်းတွင် ထိုစဉ်က ဥက္ကဌက Renault နှင့် Nissan တို့၏ အရင်းအနှီးဆက်သွယ်မှုများနှင့် ပတ်သက်၍ လေ့လာသုံးသပ်မှုတခုကို ကြေညာခဲ့သည်။

Nissan နှင့် ပူးပေါင်းခြင်းက နောက်ကြောင်းပြန်လှည့်၍ မရသည့် အနေအထားမျိုး ဖြစ်စေလိုကြောင်း ပြင်သစ် အစိုးရ က ကားလို့စ်ဂွန်းကို ပြောကြားခဲ့သည်။ သို့သော်လည်း Nissan ၏ ဘုတ်အဖွဲ့က အပြည့်အဝ ပူးပေါင်းခြင်းကို ဆန့်ကျင်လိမ့်မည် ဖြစ်ကြောင်း ကားလို့စ်ဂွန်းက သိထားသည်။ ပြီးခဲ့သည့်နှစ် အတွင်းတွင် နေ့စဉ် စီမံခန့်ခွဲမှုအပိုင်းကို ကားလို့စ်ဂွန်းထံမှ လွှဲပြောင်းယူခဲ့သည့် ဥက္ကဌနှင့် အမှုဆောင်ရာရှိချုပ် Hiroto Saikawa က သူ၏ ကန့်ကွက်မှုကို လူသိရှင်ကြား ပြသခဲ့ပြီး ဖြစ်သည်။

သူ၏ စိတ်ကူးများထဲမှ တခုမှာ ကုမ္ပဏီ ၂ ခုလုံး (Renault နှင့် Nissan )မှ အစုရှယ်ယာများ ပါဝင်သည့် ဦးဆောင်ကုမ္ပဏီ တခု တည်ထောင်ရန် ဖြစ်ကြောင်း ကားလို့စ်ဂွန်း နှင့် နီးစပ်သူများက ပြောကြသည်။

သို့သော်လည်း ထိုစိတ်ကူးကပင်လျှင် သံသယများကို ပေါ်ပေါက်စေခဲ့သည်။ ကားလို့စ်ဂွန်း အနေဖြင့် အမှုဆောင်အရာရှိချုပ် နေရာကို Hiroto Saikawa သို့ လွှဲပြောင်းပေးလိုက်ရခြင်းအားဖြင့် Nissan တွင် သူချုပ်ကိုင်ထားသည့် အာဏာအချို့ ကို အလျှော့ပေးခဲ့ရခြင်း ဖြစ်နိုင်ပါသည်။ သို့သော်လည်း အဓိကကျသည့် ဆုံးဖြတ်ချက်များက သူ၏ လက်တွင် ရှိနေဆဲ ဖြစ်သည်။

နောက်ပိုင်းတွင် ကားလို့စ်ဂွန်းက သူ့အနေဖြင့် အဖွဲ့အစည်းသစ်တခု၏ ထိပ်ဆုံးနေရာကို ရယူရန် ရည်ရွယ်ထားကြောင်း အခြားအမှုဆောင်များကို စောင်းပါးရိပ်ခြည် ပြောပြခဲ့သည်။ ကုမ္ပဏီ ဖွဲ့စည်းပုံအသစ်သို့ ပြောင်းလဲပြီး နောက်ပိုင်းတွင် ပြောကြားခဲ့ခြင်း ဖြစ်သည်။

စက်တင်ဘာလ တွင် Renault နှင့် Nissan ကြားမှ အရင်းအနှီးဆက်နွယ်မှုကို သုံးသပ်ရန် ဘုတ်အဖွဲ့က သဘောတူညီခဲ့ သည်။ သို့သော်လည်း အသေးစိတ်ကို ထုတ်ပြန်ခဲ့ခြင်း မရှိပါ။

ကားလို့စ်ဂွန်းက လာမည့်နွေဦးရာသီတွင် ဖွဲ့စည်းပုံအသစ်ကို တရားဝင် ဆုံးဖြတ်သွားရန် ရှိနေသည်ဟု Nissan မှ အမှုဆောင်တဦးက ယုံကြည်ထားသည်။ မတ်လအတွင်းတွင် ပါရီမြို့၌ ခန်းနားကြီးကျယ်စွာ ပြုလုပ်မည့် ပူးပေါင်းမှု နှစ် ၂၀ ပြည့် အခန်းအနားနှင့် တိုက်ဆိုင်စွာ ဖြစ်လာဖွယ်ရှိသည်။
ကားလို့စ်ဂွန်းက ကုမ္ပဏီ ၂ ခုတွင် သူ၏ ထိန်းချုပ်မှု ခိုင်မာ အားကောင်းစေရေး ရည်မှန်းချက်ကို အပြည့်အဝ အကောင်အထည်ဖော်နိုင်ခဲ့လျှင် ယခု အရှုပ်တော်ပုံက အလင်းရောင် အောက်သို့ ရောက်ချင်မှ ရောက်လာလိမ့်မည် ဖြစ်သည်။

သို့သော်လည်း ကားလို့စ်ဂွန်းက အခြေခံကျသည့် ပြင်ဆင်မှုများ ပြုလုပ်နေချိန်တွင် Nissan က ပြင်ပမှ အာဏာပိုင်များကို ခေါ်ယူလာခဲ့သည်။ ကုမ္ပဏီတွင်း စုံစမ်းစစ်ဆေးမှုမှ ရရှိသည့် သတင်းအချက်အလက်များကို ကုမ္ပဏီက အစိုးရ ရှေ့နေ များသို့ လွှဲပြောင်းပေးခဲ့သည်။ ထိုအချိန်တွင် Renault နှင့် ပြင်သစ်အစိုးရက ဘာမှ မသိဘဲ ရှိနေခဲ့သည်။ ပြင်သစ် သံအမတ်၏ နေအိမ်မှ ပါတီပွဲတွင် တွေ့ခဲ့ရသော Renault မှ ဒါရိုက်တာတဦးမှာ ထိုအကြောင်းကို အွန်လိုင်းမှသာ သိရှိခဲ့ရ သည်။

ဘရာဇီးနိုင်ငံဖွား ပြင်သစ်နိုင်ငံသား တဦးဖြစ်သည့် ကားလို့စ်ဂွန်းသည် ဒေဝါလီ ခံရလုဆဲဆဲ ဖြစ်နေသည့် Nissan ကို ပြန်ဆွဲတင်နိုင်ခဲ့ခြင်းကြောင့် ကမ္ဘာတွင် ထင်ရှားသူတယောက် ဖြစ်လာခဲ့သည်။ သူက (Renault တွင် တွင်ခဲ့သည့် Le Cost Killer ဆိုသော နာမည်ပြောင်နှင့် လျှော်ညီစွာ) အသုံးစရိတ် အကြီးအကျယ် ဖြတ်တောက်ခြင်း အပါအဝင် အခြေခံကျသည့် ပြင်ဆင်ဖွဲ့စည်းမှုများကို ပြုလုပ်ခဲ့သည်။ သူ့ကိုယ်သူလည်း Nissan ၏ ပြိုင်ဘက်မရှိ ခေါင်းဆောင်ဖြစ်အောင် တည်ထောင်နိုင်ခဲ့သည်။

ကားလို့စ်ဂွန်းက အသုံးစရိတ် လျှော့ချခြင်းထက် များစွာပို၍ ဆောင်ရွက်နိုင်ခဲ့သည်ဟု ဆိုလျှင် ငြင်းဆန်မည့်သူ အနည်းငယ်မျှသာ ရှိပါလိမ့်မည်။ မနက်အစောကြီးမှသည် ညနက်သည်အထိ အလုပ်လုပ်သည့် သူ၏ အလေ့အကျင့်ကြောင့် “Seven-Eleven” ဆိုသည့် နောက်ထပ် နာမည်ပြောင်တခုကို ရရှိခဲ့သည်။ သူက Nissan ၏ အရိုးစွဲနေသော ကော်ပိုရိတ် ယဉ်ကျေးမှုကို လှုပ်ခါပစ်ခဲ့သည်။ လူငယ်ဝန်ထမ်းများ၏ စကားကို နားထောင်သည်။ ကျား/မ သို့မဟုတ် လူမျိုး မခွဲခြားဘဲ အရည်အချင်းကို အခြေခံ၍ ရာထူးတိုးပေးခြင်းများ ပြုလုပ်ခဲ့သည်။

တလျှောက်လုံးတွင် သူက အခြားသော ဂျပန်ကုမ္ပဏီများမှ အမှုဆောင်များအတွက် ဥပမာ တခုဖြစ်ခဲ့သည်။ ခေတ်မမီတော့သည့် စီမံခန့်ခွဲရေး အစဉ်အလာများကို ဖောက်ထွက်၍ ရနိုင်ကြောင်း ပြသသည့် သက်ရှိထင်ရှား သက်သေ အထောက်အထားတခုလည်း ဖြစ်ခဲ့သည်။

သို့သော်လည်း Renault ၏ အမှုဆောင်အရာရှိချုပ်လည်း ဖြစ်လာသည့် ၂၀၀၅ ခုနှစ်တွင် သူက ပျက်စီးမည့် လမ်းကြောင်းသို့ ရုတ်တရက်ပြောင်းသွားခဲ့ခြင်း ဖြစ်နိုင်ပါသည်။

“ရှယ်ယာတွေ အပြန်အလှန် ပိုင်ဆိုင်ခြင်းပေါ်မှာ အခြေခံတဲ့ Nissan နဲ့ Renault ကြားက အရင်းအနှီးဆက်သွယ်မှုက ကုမ္ပဏီ ၂ ခုကို လူတဦးထဲကပဲ ဦးဆောင်လိမ့်မယ်ဆိုတဲ့ အယူအဆနဲ့ ပြုလုပ်ခဲ့တာ မဟုတ်ပါဘူး” ဟု ပူးပေါင်းရေးတွင် ပါဝင်ခဲ့သော အကြီးတန်း အမှုဆောင်ဟောင်းတဦးက ပြောသည်။

၂၀၀၉ ခုနှစ်တွင် Louis Schweitzer အနားယူသွားခဲ့ပြီးနောက် ကမ္ဘာ့ အကြီးဆုံးဟု ဆိုနိုင်မည့် မော်တော်ကား ကုမ္ပဏီ တခု တည်ထောင်နိုင်ရန် ကားလို့စ်ဂွန်းက ပိုမို၍ အားသွန်ဆောင်ရွက်ခဲ့သည်။

Renault-Nissan ပူးပေါင်းမည့် စီမံကိန်းအပြင် အခက်အခဲဖြစ်နေသည့် Mitsubishi Motors ကို ထိန်းချုပ်နိုင်သည့် အစု ရှယ်ယာများကို Nissan က ၂၀၁၆ ခုနှစ်တွင် ရယူခဲ့ရာတွင်လည်း သူက ဦးဆောင်ခဲ့သည်။ ထိုသို့ ရယူလိုက်နိုင်ခြင်းက သူတို့ကို Toyota Motor နှင့် Volkswagen အုပ်စုတို့နှင့်အတူ တနှစ်လျှင် မော်တော်ကား ၁၀ သန်းကျော် ထုတ်လုပ်နိုင်သည့် ထိပ်တန်းအဆင့်သို့ ရောက်ရှိစေခဲ့သည်။

ကားလို့စ်ဂွန်းက သူ့ကိုယ်သူ “မဟာမိတ်အဖွဲ့ ၏ တည်ထောင်သူ” အဖြစ် စတင် ခေါ်ဆိုခဲ့သည်။
သို့သော်လည်း ကုမ္ပဏီများအပေါ်တွင် သူ၏ ထိန်းချုပ်မှုက တင်းကျင်သည်နှင့် အမျှ ကားလို့စ်ဂွန်းအနေဖြင့် သူ၏ အတော်ဆုံး လက်ထောက်များထဲမှ အချို့ကို စတင် ဆုံးရှုံးလာခဲ့သည်။ တချိန်က သူ အားကိုးအားထားပြုခဲ့ရသည့် အမှုဆောင်များက အလုပ်ပြောင်းသွားကြသည်။ အရည်အချင်း ရှိသည်သာမက သူ၏ စိတ်လိုက်မာန်ပါ လုပ်ဆောင်မှုများကို လိုက်ထိန်းပေးနိုင်သူများကို ဆုံးရှုံးခဲ့ရသည်။

ဘက်ပြောင်းသွားသူများထဲတွင် တယောက်အပါအဝင် ဖြစ်သော Nissan ၏ အမှုဆောင် ဒုတိယ ဥက္ကဌဟောင်းဖြစ်သည့် Andy Palmer က နိုဝင်ဘာလ အစောပိုင်းတွင် ဂျပန်နိုင်ငံသို့ လာရောက်လည်ပတ်ခဲ့သည့် ခရီးစဉ်အတွင်း မှတ်ချက်အချို့ ပြောသွားခဲ့သည်။

ယခုအခါ ဗြိတိန် ဇိမ်ခံကားထုတ်လုပ်သည့် ကုမ္ပဏီ Aston Martin ၏ အမှုဆောင် အရာရှိချုပ် အဖြစ်ဆောင်ရွက်နေသည့် Andy Palmer က ၂၀၁၄ ခုနှစ်တွင် သူထွက်ခွာခဲ့ရခြင်းမှာ ပတ်ဝန်းကျင်တွင် ကားလို့စ်ဂွန်း ရှိနေသမျှ ထိပ်ဆုံးသို့ သူ မည်သည့် အချိန်တွင်မျှ ရောက်လိမ့်မည် မဟုတ်သည်ကို သတိပြုမိသောကြောင့် ဖြစ်သည်ဟု ပြောသည်။

သူ၏ အလုပ်သစ်တွင် အခွင့်အာဏာကို ဖက်တွယ်ထားရန် ရည်ရွယ်ချက် မရှိကြောင်း Andy Palmer က Nikkei Asian Review သို့ ပြောသည်။“အမှုဆောင်အရာရှိချုပ် အများအပြားက သူတို့ကို ဆက်ခံမယ့်သူကို လေ့ကျင့် ပျိုးထောင်ဖို့ ပျက်ကွက်ခဲ့ကြပါတယ်။ ဒါက ကျနော့် ရည်ရွယ်ချက် မဟုတ်ပါဘူး။ အနာဂတ်မှာ အမှုဆောင် အရာရှိချုပ် ဖြစ်လာနိုင်မယ့်သူ အများအပြား ကျနော့် နားမှာ ရှိပါတယ်။ ကုမ္ပဏီက ရေရှည်တည်တံ့ပြီလို့ ကျနော် ယုံကြည်တဲ့အခါ ကျနော် Aston Martin ကနေ ထွက်သွားပါ မယ်” ဟု သူကဆိုသည်။

Nissan မှနေ၍ Andy Palmer ထွက်သွားသည့် အချိန်လောက်တွင် မဟာမိတ်အဖွဲ့ အနေဖြင့် နောက်ထပ် အရေးပါသည့် အမှုဆောင်တယောက်ကို ဆုံးရှုံးလိုက်ရသည်။ Renault ၏ လုပ်ငန်း အရာရှိချုပ်(COO) အဖြစ် တာဝန်ထမ်းဆောင်နေပြီး ကားလို့စ်ဂွန်း၏ အနီးစပ်ဆုံး အမွေဆက်ခံမည့်သူအဖြစ် ကျယ်ကျယ်ပြန့်ပြန့် သတ်မှတ်ခြင်းခံထားရသည့် Carlos Tavares က Renault ၏ ပြင်သစ်ပြည်တွင်း ပြိုင်ဘက်ကုမ္ပဏီဖြစ်သော PSA Group သို့ ပြောင်းရွှေ့သွားခဲ့သည်။

Nikkei Asian Review နှင့် တွေ့ဆုံမေးမြန်းမှုတွင် Andy Palmer က Nissan ၏ အနာဂတ်ကို မေးခွန်းထုတ်ခဲ့သည်။ ကားလို့စ်ဂွန်းအနေဖြင့် အရေးအကြီးဆုံး လက်ထောက် ၂ ယောက်ကို ဆုံးရှုံးခဲ့သောကြောင့် ဖြစ်သည်။ “သူက သူ့ လက်ရုံး ၂ ဘက် လုံး ကို သွားခွင့်ပြုခဲ့တယ်” ဟု Andy Palmer က ပြောသည်။

နောက်ထပ် အရေးပါသည့် အမှုဆောင်တဦး ဖြစ်သည့် Nissan ၏ ဘဏ္ဍာရေး အရာရှိချုပ် (CFO) ဖြစ်သည့် Joseph Peter ကလည်း မေလတွင် ကုမ္ပဏီမှ ထွက်ခွာသွားခဲ့သည်။ CFO က ဥက္ကဌ၏ စီမံခန့်ခွဲမှုနှင့် ပတ်သက်၍ ဝေဖန်သော မှတ်ချက် အများအပြား ပြုလုပ်ခဲ့သည်ဟု Nissan မှ အကြီးတန်း အမှုဆောင် တဦးက ပြောသည်။ ကားလို့စ်ဂွန်းနှင့် Joseph Peter တို့ ပဋိပက္ခ ဖြစ်ခဲ့သည်ဟု ခန့်မှန်းမှုများ ပေါ်ပေါက်ခဲ့သည်။

နေ့စဉ် အသေးစိတ် စီမံခန့်ခွဲမှုများကို Hiroto Saikawa က လွှဲပြောင်းယူခဲ့ပြီးနောက် ကားလို့စ်ဂွန်း ဂျပန်နိုင်ငံသို့ လာ ရောက်သည့် အကြိမ်ရေ နည်းသွားသည်။ ဂျပန်နိုင်ငံတွင် ရှိနေသည့်တိုင် ကားလို့စ်ဂွန်းက ရုံးခန်းတွင် ရှိနေသည့် အချိန် နည်းသွားသည်၊ လုပ်ငန်းများနှင့် ပို၍ ဝေးကွာလာသည် ဟု Nissan ဝန်ထမ်းများက ပြောကြသည်။

သို့သော်လည်း သူ၏ ရည်မှန်းချက်က တောက်လောင်နေဆဲ ဖြစ်သည်။ အာဏာပိုင်များက သူ့ကို Haneda လေဆိပ်၌် ဟန့်တားခဲ့သည့် အချိန်တွင် ကားလို့စ်ဂွန်းက သူ၏လုပ်ငန်းသက်တမ်းတွင် နောက်ထပ် အောင်မြင်မှုတခု ဖြစ်စေမည့် Nissan-Renault မဟာမိတ် ပြင်ဆင်ဖွဲ့စည်းရေးအတွက် ပြင်ဆင်နေခဲ့သည်ဟု ယူဆရပါသည်။ ဂျပန်နိုင်ငံတွင် တိုကျို အုပ်ချုပ်ရေးမှူး Yuriko Koike နှင့် တွေ့ဆုံရန် အပါအဝင် သူ့၌ အစီအစဉ်များ အပြည့်ရှိနေခဲ့သည်။

Nissan ဘုတ်အဖွဲ့က သူ့ကို နိုဝင်ဘာလ ၂၂ ရက်နေ့တွင် ဥက္ကဌရာထူးမှ ထုတ်ပယ်ပစ်လိုက်သည်။ သူ၏ မဟာစီမံကိန်းမှာ ရေစုန်မျောခဲ့ရပြီး သူကလည်း အချုပ်ခန်းအတွင်းတွင် ရှိနေဆဲ ဖြစ်သည်။ မော်တော်ကားကုမ္ပဏီ ၃ ခု မဟာမိတ်အဖွဲ့ (Nissan၊ Renault နှင့် Mitsubishi) မှာ ယခုအခါတွင် မောင်းသူမဲ့ကားကဲ့သို့သော မော်တော်ကားလုပ်ငန်းကို လွှမ်းမိုး နေသည့် နည်းပညာအပြောင်းအလဲများကို အမီလိုက်ရင်း ရင်းနှီးမြှုပ်နှံသူများ၏ ယုံကြည်စိတ်ချမှုကို ပြန်လည်ရယူရေး အတွက် စိန်ခေါ်မှုများနှင့် ရင်ဆိုင်နေရသည်။

ထို့ကြောင့် ကားလို့စ်ဂွန်း က Nissan ကို သူရောက်လာစဉ်က အခြေအနေအတိုင်း အကျပ်အတည်းအတွင်း ပြန်ထား ရစ်ခဲ့သည်ဟု ဆိုလျှင် ရနိုင်ပါလိမ့်မည်။

(Nikkei Asian Review ပါ Akito Tanaka နှင့် Masayasu Ito တို့ ရေးသားသော Ghosn’s fall from grace: How Nissan’s savior became a threat ကို ဘာသာပြန်သည်။)

The post အဖမ်းခံလိုက်ရတဲ့ နစ်ဆန်း ဥက္ကဋ္ဌဟောင်း ကားလို့စ်ဂွန်း appeared first on ဧရာဝတီ.

ပြည်ပချေးငွေ ရယူကာ ဝန်ကြီးဌာနနှင် အစိုးရအဖွဲ့အစားများက အကောင်အထည် ဖော်နေသည့် စီမံကိန်းများမှာ သတ်မှတ်ကာလအတွင်း ပြီးစီးအောင် မဆောင်ရွက်နိုင်ခြင်းကြောင့် ချေးငွေအတိုးများမှာ တိုင်းပြည်အတွက် ဝန်ထုပ်ဝန်ပိုး ဖြစ်လာနေကြောင်း လွှတ်တော် ကိုယ်စားလှယ်များက ဝေဖန်လိုက်သည်။

စီမံကိန်းနှင့် ဘဏ္ဍာရေးဝန်ကြီးဌာနက နိုဝင်ဘာလ ၂၉ ရက်က ပြုလုပ်သည့် ပြည်ထောင်စု လွှတ်တော်အစည်းအဝေးတွင် အစိုးရက ပေးပို့သည့် ၂၀၁၇-၁၈ ဘဏ္ဍာနှစ်အတွက် အစိုးရ၏ ကြွေးမြီ နှစ်ပတ်လည် အစီရင်ခံစာ တင်သွင်းခဲ့ပြီးနောက် ယခုကဲ့သို့ ဝေဖန်နေကြခြင်း ဖြစ်သည်။

ယင်းအစီရင်ခံစာနှင့် ပတ်သက်၍ ပြည်ထောင်စုလွှတ်တော် ပြည်သူ့ငွေစာရင်း ပူးပေါင်းကော်မတီက လေ့လာတွေ့ရှိချက်နှင့် သဘောထား မှတ်ချက်အစီရင်ခံစာကို ထပ်မံတင်သွင်းရာ ဝန်ကြီးဌာနများအနေဖြင့် ငွေချေးသည့် နိုင်ငံ/ အဖွဲ့အစည်းများ၏ စည်းမျဉ်းစည်းကမ်းအတိုင်း ဆောင်ရွက်ရာတွင် အတွေ့အကြုံနှင့် ကျွမ်းကျင်မှု အားနည်းခြင်းကြောင့် ငွေချေးစာချုပ် ချုပ်ဆိုပြီးနောက် ထုတ်ယူသုံးစွဲနိုင်မှုနှင့် စီမံကိန်း အကောင်အထည်ဖော်မှုတွင် နှောင့်နှေး ကြန့်ကြာမှုများ ရှိနေသည်ကို တွေ့ရသည်ဟု ကော်မတီအစီရင်ခံစာ၌ ဖော်ပြပါရှိသည်။

ပုလဲမဲဆန္ဒနယ်မှ ဒေါ်ခင်စန်းလှိုင်က “ဝန်ကြီးဌာနတွေက စီမံကိန်းတွေကို သတ်မှတ်ထားတဲ့နှစ်အတွင်းမှာ မဆောင်ရွက် နိုင်တဲ့အတွက် ချေးထားတဲ့ချေးငွေတွေက အတိုးပေးရမယ့် အချိန်မှာ ပေးရတာရှိသလို အရင်းပြန်ဆပ်ရတာတွေ ရှိတယ်လေ။ ပြောရရင် ဝန်ကြီးဌာနတွေက စီမံကိန်းတွေကို တင်ပြပြီး အကောင်အထည်မဖော်နိုင်ဘူးဆိုရင် တိုင်းပြည် အတွက် ကြွေးမြီ ဝန်ထုပ်ဝန်ပိုးတွေ ဖြစ်တယ်။ နောက် နှစ်စဉ် တိုင်းပြည်အတွက် လိုငွေပြနေတဲ့ ဘတ်ဂျက်တွေက ဒီဟာထဲက ပါနေတာပေါ့။ ပြောရရင် တိုင်းပြည်စီးပွားရေးကို ထိခိုက်သလို နိုင်ငံတော်ရဲ့ ငွေကြေးလှည့်ပတ် သုံးစွဲမှုတွေမှာလည်း အများကြီး ထိခိုက်တာ ရှိလာတယ်” ဟု ဧရာဝတီသို့ ပြောသည်။

ချေးငွေ ရယူကာ လုပ်ဆောင်နေသည့် စီမံကိန်းများ ကြန့်ကြာမှုနှင့် ပတ်သက်၍ ဌာနဆိုင်ရာ အဖွဲ့အစည်းများအနေဖြင့် ချေးငွေစာချုပ်ပါ သတ်မှတ်ချက်များနှင့်အညီ စီမံကိန်း ရည်မှန်းချက် ပြည့်မီအောင် အကောင်အထည်ဖော် ဆောင်ရွက်ရန်နှင့် ထိရောက်စွာ သုံးစွဲရန် လိုအပ်ကြောင်းလည်း ပြည်သူ့ငွေစာရင်း ပူးပေါင်းကောင်မတီက သဘောထား မှတ်ချက် ပေးထားသည်။

ကရင်ပြည်နယ် လှိုင်းဘွဲ့မဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးခင်ချိုကလည်း “သဘောက စီမံကိန်းက ငါးနှစ်၊ ပိုက်ဆံမထုတ်နိုင်လို့ ငါးနှစ်ကနေ ၁၀ နှစ်ဖြစ်မယ်။ ငါးနှစ်မှာ လုပ်ငန်းပြီးရင် ၆ နှစ်၊ ၇ နှစ်၊ ၈ နှစ်မှာ ပိုက်ဆံရှာလို့ရမယ်။ ပြီးရမယ့်အချိန်မှာ မပြီးရင် ပိုက်ဆံလည်း ရှာလို့မရဘဲ နိုင်ငံအတွက် အတိုးလည်း ဝန်ထုပ်ဝန်ပိုး ဖြစ်လာမယ်။ သူ့စာချုပ် စည်းမျဉ်းအတိုင်း ပိုက်ဆံထုတ်နိုင်ရင် အကောင်းဆုံးပေါ့” ဟု ဆိုသည်။

ပြည်ပ ချေးငွေရယူမှုတွင် အမျိုးသားဒီမိုကရေစီအဖွဲ့ချုပ် (NLD) အစိုးရ လက်ထက်ဖြစ်သည့် ၂၀၁၆-၁၇ ဘဏ္ဍာနှစ်မှ ၂၀၁၇-၁၈ ဘဏ္ဍာနှစ်အတွင်း ပြည်ပနိုင်ငံနှင့် အဖွဲ့အစည်းများမှ ချေးငွေရယူမှု စာချုပ်ချုပ်ဆိုခြင်းမှာ ဒေါ်လာ သန်း ၃၈၀၀ ကျော်ရှိသော်လည်း ထုတ်ယူသုံးစွဲမှု ပမာဏမှာ ဒေါ်လာ ၉၁ သန်းကျော်သာ ရှိသေးသည်ဟု ပြည်သူ့ငွေစာရင်း ပူးပေါင်းကော်မတီ အစီရင်ခံစာအရ သိရသည်။

၂၀၁၇-၁၈ ဘဏ္ဍာနှစ်အတွင်း အစိုးရက ပြင်ပနိုင်ငံနှင့် အဖွဲ့အစည်း ၈ ခုမှ ပြည်ပချေးငွေ စာချုပ် ချုပ်ဆိုထားသည့် ချေးငွေပမာဏမှာ ဒေါ်လာ ၁၉၁၇ ဒသမ ၃၉၉ သန်း ရှိပြီး ထုတ်ယူသုံးစွဲမှု ပမာဏမှာ ၆၉၆ ဒသမ ၈၉၈ သန်းသာ ရှိသေးသည်။

ချေးငွေ ပြန်ဆပ်မှုမှာ ချေးငွေအရင်း ဒေါ်လာ ၄၆၅ ဒသမ ၂၈၉ သန်းနှင့် အတိုး ၂၃၂ ဒသမ ၈၈၃ သန်း ရှိကာ၊ စုစုပေါင်း အတိုးနှင့်အရင်း ပြန်ဆပ်မှု ပမာဏ ၆၉၈ ဒသမ ၁၇၂ သန်း ရှိသည်ဟု သိရသည်။

ပြည်ပ ချေးငွေ ရယူထားသည့် ဝန်ကြီးဌာနများအနက် လျှပ်စစ်နှင့် စွမ်းအင်ဝန်ကြီးဌာနမှာ အမေရိကန်ဒေါ်လာ သန်း ၃၂၀၀ ကျော်ဖြင့် အများဆုံးဖြစ်ကာ ယင်းနောက်တွင် စီမံကိန်းနှင့် ဘဏ္ဍာရေးဝန်ကြီးဌာနက ဒေါ်လာ သန်း ၂၃၀၀ ကျော်၊ ပို့ဆောင်ရေးနှင့် ဆက်သွယ်ရေးဝန်ကြီးဌာနက ဒေါ်လာ သန်း ၁၇၀၀ ခန့်နှင့် စက်မှုဝန်ကြီးဌာနက ဒေါ်လာ သန်း ၁၄၀၀ ကျော် ချေးငွေရယူထားကြသည်။

“ချေးငွေနဲ့ ဆောင်ရွက်နေပြီး ဒီနေ့အချိန်အထိ ဖွံ့ဖြိုးတိုးတက်မှု မရှိတာက ဆက်သွယ်ရေးဝန်ကြီးဌာန၊ လျှပ်စစ်ဝန်ကြီး ဌာန၊ လယ်/ဆည်ဝန်ကြီးဌာန ဆောက်လုပ်ရေးပေါ့။ ဒါတွေက တိုးတက်မှု အင်မတန်နှေးတယ်။ ငွေပမာဏကလည်း များတယ်” ဟု ဒေါ်ခင်စန်းလှိုင်က ပြောသည်။

ပြည်ပ ချေးငွေဖြင့် အကောင်အထည်ဖော်သည့် စီမံကိန်းများမှာ ငွေသားရယူ အကောင်အထည်ဖော်သည့် စီမံကိန်းများဖြစ်ပြီး ချေးငွေထုတ်ယူသုံးစွဲရာတွင် မြန်ဆန်သော်လည်း စီမံကိန်းအတွက် လိုအပ်သည့် ပစ္စည်းများ ဝယ်ယူခြင်း၊ စီမံကိန်း အသေးစိတ်ပုံစံ ရေးဆွဲခြင်း၊ တင်ဒါခေါ်ယူသည့် လုပ်ငန်းစဉ်များ လုပ်ဆောင်ရခြင်း၊ ချေးငွေပေးသည့် နိုင်ငံနှင့် အဖွဲ့အစည်းများ၏ လုပ်ထုံးလုပ်နည်း၊ စည်းကမ်းများကို လေ့လာရခြင်း၊ ဌာနဆိုင်ရာ အဖွဲ့အစည်းများတွင် ကျွမ်းကျင်ဝန်ထမ်းများ မလုံလောက်ခြင်းတို့ကြောင့် ဖြစ်ကြောင်း စီမံကိန်းနှင့် ဘဏ္ဍာရေးဝန်ကြီးဌာနက လွှတ်တော်သို့ တင်ပြထားသည်။

ပြည်ထောင်စုလွှတ်တော် ပြည်သူ့ငွေစာရင်းပူးပေါင်းကော်မတီ ဒုတိယဥက္ကဋ္ဌ ဦးအောင်မင်းက “ဘယ်လိုပဲဆိုဆို ချေးငွေတရပ်ယူမယ်ဆိုရင် မြီရှင်နိုင်ငံ အဖွဲ့အစည်းရဲ့ စည်းမျဉ်းစည်းကမ်းနဲ့အညီ လုပ်ရမှာပဲ။ ကျွမ်းကျင်မှုမရှိသေးရင် ကျွမ်းကျင်မှုရှိအောင် လုပ်ရမှာ၊ တာဝန်ယူ တာဝန်ခံစနစ်နဲ့ပေါ့။ ကျွမ်းကျင်မှုမရှိလို့ အဲဒီရဲ့လုပ်ငန်းစဉ်တွေကြောင့် နှောင့်နှေးရတယ်ဆိုတဲ့ကိစ္စက ရေရှည်မှာတော့ အကြောင်းပြချက် တခုအနေနဲ့ မဖြစ်သင့်တော့ဘူး” ဟု ဆိုသည်။

မင်္ဂလာဒုံမြို့နယ် ပြည်သူ့လွှတ်တော် ကိုယ်စားလှယ် ဦးအောင်လှိုင်းဝင်းက “ဝန်ကြီးဌာနကတွေက အကောင်အထည် မဖော်နိုင်တာပေါ့။ ချေးငွေက အပိုင်းတခုချင်းအလိုက် ထုတ်ပေးတာကိုး။ အဲဒီတော့ ပထမအပိုင်းမပြီးရင် နောက်အပိုင်းက ရဖို့ အခက်အခဲရှိတာကိုး။ အစိုးရပိုင်းက ကတိကဝတ် ပေးထားပေမယ့် တကယ်ထုတ်ယူတဲ့ အပိုင်းက နည်းနေသေးတယ်” ပြောသည်။

၎င်းက ဆက်လက်ပြီး “ရန်ကုန်မြို့တော် စည်ပင်သာယာက ရန်ကုန်မြို့တွင်း ၆ မြို့နယ် ရေကြီးရေလျှံကာကွယ်ဖို့အတွက် ချေးထားတဲ့ ကန်ဒေါ်လာ သန်း ၁၀၀ ကျော်က အကောင်အထည် မဖော်ရသေးဘူး။ ဒီစီမံကိန်းတွေက ရှေ့က အကောင်အထည် မဖော်ရသေးဘဲနဲ့ နောက်က ထပ်ချေးနေတဲ့ သဘော ဖြစ်နေတယ်။ အခုဆိုရင် ရန်ကုန်မြို့ မြစ်ကြောင်း တလျှောက်အတွက် ထပ်ချေးတယ်ပေါ့နော်။ ကျနော်တို့က တကယ်လိုတဲ့ နေရာမှာ ချေးဖို့၊ ထိထိရောက်ရောက် အသုံးချဖို့ လွှတ်တော်ကိုယ်စားလှယ် တယောက်အနေနဲ့ တိုက်တွန်းချင်တယ်။ ထိရောက်အောင် မလုပ်နိုင်ဘဲ အစိုးရက အာမခံပြီး နောင်လာမယ့် မျိုးဆက်တွေ ဆပ်ရမယ့် ချေးငွေမျိုးကို မဖြစ်စေချင်ဘူး” ဟု ဆိုသည်။

မြန်မာကျပ်ငွေ တန်ဖိုး ကျဆင်းခြင်းကြောင့် သက်ဆိုင်ရာ ဝန်ကြီးဌာနများအနေဖြင့် စီမံကိန်း ဆောင်ရွက်မည့် နည်းလမ်းနှင့် ကြွေးမြီပြန်ဆပ်ရေး မူဝါဒကို ခိုင်မာစွာ ရေးဆွဲထားရန်၊ ချေးငွေ ထုတ်ယူထားသော်လည်း သုံးစွဲခြင်း မရှိသေးသည့်အတွက် အတိုးစရိတ်များ ကျခံရမည်ဖြစ်သဖြင့် မလိုပါဘဲ ချေးငွေ ကြိုတင်ထုတ်ယူခြင်း မပြုရန်လည်း ပြည်သူ့ငွေစာရင်း ပူးပေါင်းကော်မတီက သဘောထားမှတ်ချက် ပြုထားသည်။

၁၉၈၈ ခုနှစ်မတိုင်မီ ကာလမှ လက်ရှိ ၂၀၁၈ ခုနှစ် မတ်လအထိ ပြန်ဆပ်ရမည့် ပြည်ပကြွေးမြီ ပမာဏမှာ ဒေါ်လာ သန်း ၁၀၀၀၀ ကျော် ရှိကြောင်း ပြည်သူ့ငွေစာရင်း ပူးပေါင်းကောင်မတီ၏ ၂၀၁၈-၁၈ ခုနှစ် အစိုးရ၏ ကြွေးမြီဆိုင်ရာ နှစ်ပတ်လည် အစီရင်ခံစာတွင် ဖော်ပြထားသည်။

၁၉၈၈ ခုနှစ်မှ ၂၀၁၀-၁၁ ခုနှစ်အထိ တရုတ်နိုင်ငံ Exim Bank of China နှင့် China Development Bank တို့မှ ချေးငွေ အများဆုံး ရယူခဲ့ခြင်း ဖြစ်ပြီး ၂၀၁၁-၁၂ မှ ၂၀၁၅-၁၆ ဘဏ္ဍာနှစ်အတွင်း ဂျပန်နိုင်ငံ အပြည်ပြည်ဆိုင်ရာ ပူးပေါင်းဆောင်ရွက်ရေး အေဂျင်စီ (JICA) ထံမှ အများဆုံး ရယူခြင်းဖြစ်သည်ဟု သိရသည်။

၂၀၁၇-၁၇ မှ ၂၀၁၇-၁၈ ဘဏ္ဍာနှစ်အတွက် ကမ္ဘာ့ဘဏ် (အိုင်ဒီအေ) မှ ချေးငွေ အများဆုံး ရယူခဲ့ခြင်းဖြစ်ကာ ကျန်ရှိ ကြွေးမြီ စုစုပေါင်းအနက် အမေရိကန်ဒေါ်လာ သန်း ၄၀၀၀ ကျော်ကို တရုတ်နိုင်ငံသို့ ပေးဆပ်ရမည် ဖြစ်သည်ဟု ပြည်ထောင်စုလွှတ်တော် ပြည်သူ့ငွေစာရင်း ပူးပေါင်းကော်မတီ၏ ၂၀၁၇-၁၈ ဘဏ္ဍာနှစ် အစိုးရ၏ ကြွေးမြီဆိုင်ရာ နှစ်ပတ်လည်အစီရင်ခံစာနှင့် စပ်လျဉ်း၍ လေ့လာတွေ့ရှိချက်နှင့် သဘောထားမှတ်ချက် အစီရင်ခံစာတွင် ဖော်ပြထားသည်။

အစိုးရငွေတိုက်စာချုပ်နှင့် ငွေတိုက်လက်မှတ်များ ထုတ်ရောင်းခြင်းဖြင့် ရယူထားကာ ပြန်လည်ပေးဆပ်ရမည့် ပြည်တွင်းချေးငွေ ပမာဏမှာ ကျပ် ၂၀၇၂၄ ဒသမ ၆ ဘီလီယံ ရှိသည်ဟုလည်း စီမံကိန်းနှင့် ဘဏ္ဍာရေးဝန်ကြီးဌာန၏ ၂၀၁၇-၁၈ ဘဏ္ဍာနှစ် အစိုးရ၏ ကြွေးမြီဆိုင်ရာ နှစ်ပတ်လည်အစီရင်ခံစာတွင် ဖော်ပြထားသည်။

ဆက်စပ်ဖတ်ရှုရန်

ပြည်ပချေးငွေ ရရှိမှု မမျှတဟု ဆွေးနွေးသည့် ရခိုင်အမတ် သတိပေးခံရ
၂၀၁၈-၁၉ ဘဏ္ဍာရေးနှစ်အတွက် အသုံးစရိတ် အတည်ပြု

The post စီမံကိန်းများ မပြီး၍ ပြည်ပချေးငွေများ ဝန်ထုပ်ဝန်ပိုး ဖြစ်လာနေ appeared first on ဧရာဝတီ.

Samsung ရဲ့ အသစ်စက်စက် Screen ကွေး နည်းပညာကို ခိုးပြီး၊ တရုတ်ကုမ္ပဏီ ၂ ခုထံ ရောင်းချမှုကြောင့် လူ ၁၁ ဦးကို တောင်ကိုရီးယားမှာ တရားစွဲထားတယ်လို့ သိရပါတယ်။ Suwon ခရိုင်ရှေ့နေတရားရုံးဟာ လူ ၁၁ ဦးကို Samsung ကုမ္ပဏီထံမှ နည်းပညာလှို့ဝှက်ချက်တွေ ခိုးယူမှုကြောင့် တရားစွဲဆိုထားတာပါ။

တရားလိုရှေ့နေတွေရဲ့ ပြောကြားချက်အရ Samsung ကုမ္ပဏီကို ပစ္စည်းသွင်းတဲ့ Supplier တဦးဟာ Samsung ရဲ့ ‘Flexible OLED edge panel 3D lamination” အသေးစိတ် ဒီဇိုင်းပုံစံတွေကို ကုမ္ပဏီတခုထံ ပေးအပ်ခဲ့တာ ဖြစ်တယ်လို့ သိရပါတယ်။

Samsung ထံက နည်းပညာ ခိုးယူဖို့ကို အဆိုပါ ကုမ္ပဏီက စီစဉ်ခဲ့တာ ဖြစ်ပြီး၊ Samsung နည်းပညာလှို့ဝှက်ချက်တွေကို တရုတ်နည်းပညာကုမ္ပဏီ ၂ ခုထံ ကန်ဒေါ်လာ ၁၄ သန်းနဲ့ ပြန်ရောင်းချခဲ့တာ ဖြစ်ပါတယ်။ ယခုအမှုမှာ ပါဝင်တဲ့ ကုမ္ပဏီနဲ့ လူတွေ နာမည်ကိုတော့ မဖော်ပြထားပါဘူး။

Samsung Electronics ရဲ့ ဌာနခွဲတခုဖြစ်တဲ့ Samsung Display က “ အစိုးရရှေ့နေတွေရဲ့ စုံစမ်းမှု ရလဒ်တွေကို သိရတဲ့အခါ အံ့အားသင့်၊ စိတ်ပျက်မိကြောင်း သောကြာနေ့က သတင်းထုတ်ပြန်ချက်မှာ ရေးသားခဲ့ပါတယ်။

Samsung ဟာ ကွေးညွတ်နိုင်တဲ့ Screen ကို ထုတ်လုပ်နိုင်ဖို့အတွက် ကန်ဒေါ်လာ ၁၃၀ ကျော် ရင်းနှီးကာ၊ ၆ နှစ်ခန့် အချိန်ယူခဲ့ရပါတယ်။ Samsung ရဲ့ Screen အကွေး နည်းပညာဟာ စမတ်ဖုန်းလောကကို ပြောင်းလဲပစ်နိုင်ဖို့ အလားအလာရှိ နည်းပညာတခု အဖြစ် ရေပန်းစားနေပါတယ်။ Samsung ဟာ အဆိုပါနည်းပညာကို ယခုလအစောပိုင်းတုန်းက တရားဝင် မိတ်ဆက်ပြသခဲ့ပြီးပါပြီ။

Samsung ဆီက နည်းပညာခိုးယူမှုပါဝင်ခဲ့တဲ့ တရုတ်လူမျိုး ၂ ဦးကိုတော့ ယခုအချိန်ထိ ဖမ်းဆီး၊ မေးမြန်းနိုင်ခြင်း မရှိသေးဘဲ၊ အပြည်ပြည်ဆိုင်ရာ ရဲတပ်ဖွဲ့ Interpol ကို အကူအညီတောင်းခံထားတယ်လို့ သိရပါတယ်။ လူ ၁၁ ဦးထဲက ၃ ဦးကိုတော့ ထိန်းသိမ်းထားပြီး ဖြစ်ပါတယ်။ အမှု စစ်ဆေးကြားနာမယ့် ရက်ကို မကြာမီ ရက်ပိုင်းအတွင်း ထုတ်ပြန်ကြေညာသွားဖို့ ရှိပါတယ်။

Ref: CNN, Slash Gear

The post Samsung ရဲ့ ခေါက်ချိုးနိုင်တဲ့ Display နည်းပညာ အခိုးခံရ appeared first on ဧရာဝတီ.

၂၀၂၀ခုနှစ် တိုကျို အိုလံပစ် နဲ့ မသန်စွမ်း အိုလံပစ်ပြိုင်ပွဲ မကျင်းပခင်မှာ လုံခြုံရေး တိုးမြှင့်ဖို့ ဆောင်ရွက်လျက်ရှိတဲ့ ဂျပန်နိုင်ငံဟာ လုံခြုံရေးဝန်ထမ်းအဖြစ် တာဝန်ထမ်းဆောင်မယ့် စက်ရုပ်တရုပ်ကို ပြီးခဲ့တဲ့ ကြာသပတေးနေ့က ပြသခဲ့ပါတယ်။

အမြင့်ပေ ၁၆၇.၅ စင်တီမီတာ ရှိတဲ့ စက်ရုပ်ကို Perseusbot လို့ အမည်ပေးထားပြီး ဘူတာရုံတွေမှာ လုံခြုံရေးအတွက် အသုံးပြုဖို့ ရည်ရွယ် ထုတ်လုပ်ထားတာပါ။ Perseusbot မှာ လုံခြုံရေးကင်မရာတခုနဲ့ Artificial Intelligence နည်းပညာတို့ တပ်ဆင်ထားပြီး၊ ကင်းလှည့်ချိန်မှာ အတားအဆီးတွေကို အလိုအလျောက် ရှောင်ရှားနိုင်စွမ်း ရှိပါတယ်။

မသင်္ကာဖွယ် လှုပ်ရှားနေတဲ့ လူ ဒါမှမဟုတ် ပိုင်ရှင်မဲ့ ပစ္စည်း တခုခုကို တွေ့ရှိတာနဲ့ လုံခြုံရေးဝန်ထမ်းတွေရဲ့ စမတ်ဖုန်းကို သတိပေးချက် လှမ်းပို့ ပေးသွားမှာပါ။ လက်နက်ကိရိယာတွေ မပါဝင်တဲ့အတွက် မတော်တဆ အန္တရာယ်ဖြစ်မှာ စိုးရိမ်စရာ မလိုပါဘူး။

Perseusbot ကို တိုကျိုမြို့က Seibu Shinjuku Station မှာ နိုဝင်ဘာ ၂၆ ရက်နေ့ကနေ နိုဝင်ဘာ ၃၀ ရက်နေ့အထိ စမ်းသပ်သွားခဲ့ပါတယ်။ အပြီးသတ်အဆင့် မရောက်သေးတဲ့အတွက် စမ်းသပ်စဉ်မှာတော့ စက်ရုပ်နောက်က ပညာရှင်တွေ လိုက်ပါနေတာကို မြင်တွေ့ရပါတယ်။

Perseusbot ကို တိုကျို မြို့ပြစက်မှုနည်းပညာ လေ့လာရေးဌာန ၊ Seibu Railyway ကုမ္ပဏီ ၊ သတင်းအချက်အလက် နည်းပညာကုမ္ပဏီ Nihon Unisys Ltd. နဲ့ AI ကင်မရာ ကုမ္ပဏီ Earth Eyes တို့ ပူးပေါင်း ထုတ်လုပ်ထားတာ ဖြစ်ပါတယ်။

Ref: Japan Times, Sora News

The post လုံခြုံရေးစက်ရုပ်တရုပ်ကို တိုကျို ဘူတာရုံမှာ စတင် စမ်းသပ် appeared first on ဧရာဝတီ.

စမတ်စီးတီးအဖြစ် မန္တလေးမြို့ တိုးတက်လာမှုကို သဘောကျမိကာ စီးပွားရေး ဖွံ့ဖြိုးတိုးတက်နေသည့် ရန်ကုန်မြို့တွင် စုပြုံနေသူများလည်း အခြားနေရာများသို့ ပျံ့နှံ့သွားမည် ဖြစ်ကြောင်း ရန်ကုန်မြို့တော်ဝန် ဦးမောင်မောင်စိုးက ပြော သည်။

နေပြည်တော် ပြည်ထောင်စုလွှတ်တော်သို့ အစည်းအဝေး တက်ရောက်ရန် ရောက်ရှိလာစဉ် မန္တလေးမြို့မှာ စမတ် စီးတီး အဖြစ် နာမည်ကောင်း ရနေချိန်တွင် ၎င်းတာဝန်ယူရသည့် ရန်ကုန်မြို့မှာ မည်သည့်အတွက်ကြောင့် ရှေ့ မရောက် ဖြစ်နေရပါသနည်းဟု ဧရာဝတီက မေးမြန်းရာ ယခုကဲ့သို့ ပြောဆိုလိုက်ခြင်း ဖြစ်သည်။

ဦးမောင်မောင်စိုးက“မန္တလေးတိုးတက်ရင် ကျနော် ပိုကြိုက်တယ်။ ဘာလို့ဆိုတော့ ရန်ကုန် စီးပွားရေးရှာလို့ ကောင်းတဲ့ နေရာကနေ ပျံ့ပြီး ထွက်သွားမယ်။ ဧရာဝတီ၊ ကချင်၊ ကရင် အကုန်လုံး တိုးတက်ရင် ကောင်းတယ်။ အဲဒီတော့မှ လူဦး ရေ ပျံ့သွားမှာ။ အခက်အခဲတွေ ကြားထဲမှာ စီးပွားရှာလို့ ကောင်းတယ်ဆိုပြီး လူဦးရေက တိုးလာတော့ လူများလေ အမှိုက်များလေ အကုန်များလေ။ ပြဿနာများလေပဲ”ဟု ပြောသည်။

မြို့တော်ဟူသည့် အဓိပ္ပာယ် ဖွင့်ဆိုချက်ကို နားလည်ရန် လိုကြောင်းနှင့် မန္တလေးတွင် လူဦးရေ ၁ သန်းသာ ရှိပြီး ရန်ကုန်တွင် လူဦးရေ ၇ သန်း ရှိနေသည်ဟု ဆိုကာ“တရပ်ကွက်လုံးထက် စာရင်တော့ အိမ် တအိမ် ရှင်းရတာ လွယ်တာပေါ့။ ကျနော်တို့သည် အရှိန်တော့ မလျော့ပါဘူး။ သို့သော် ကိုယ့်ဟာနဲ့ကိုယ် လုံးချာလိုက်နေတာ မန္တလေးကို လှည့်တောင် မကြည့်အားဘူး။ မန္တလေးက လာလာ၊ ကြည့်ကြည့်ပြီး ပြောနေတာ ကျနော် အံ့သြတယ်။ တော်တော် အားများ နေကြလား မသိဘူး”ဟုလည်း ဦးမောင်မောင်စိုးက ဆိုသည်။

မြန်မာပြည်၏ မြို့တော်ဟောင်းနှင့် စီးပွားရေး မြို့တော်ဖြစ်သည့် ရန်ကုန်မြို့သည် မန္တလေးမြို့ထက် ပိုမို ကျယ်ဝန်း သော်လည်း ယခု တိုင်းအစိုးရ လက်ထက်အတွင်း စီမံခန့်ခွဲမှု အားနည်းခြင်းများကြောင့် မတိုးတက်ရခြင်း ဖြစ်ကာ အစိုးရခန့် ကော်မတီဝင်များ သည်လည်း စည်ပင်သာယာရေး လုပ်ငန်းအား ကျွမ်းကျင်မှု မရှိခြင်းကြောင့် ဖြစ်ကြောင်း ရန်ကုန်တိုင်း လွှတ်တော် ကိုယ်စားလှယ် ဒေါ်စန္ဒာမင်းက ထောက်ပြ ပြောဆိုသည်။

၎င်းက“အားမကောင်းဘူးဆိုရင် ဘာကြောင့် ၃ နှစ်လောက် ရွေးကောက်ပွဲ မလုပ်ဘဲ နေတာလဲ။ ကျယ်ပြန့်လို့ မြို့တော်ဝန် တယောက်တည်း မလုံလောက်ရင် ဒုမြို့တော်ဝန် ခန့်လိုက်ပေါ့။ ဒုမြို့တော်ဝန် ခန့်ဖို့လည်း Delegation (အလုပ်ခွဲဝေမှု) လုပ်ဖို့ အရမ်း တွန့်နေတယ်။ ဒါမျိုးလည်း မလုပ်ချင်ဘူး။ နောက် တကယ်နိုင်သလား ဆိုတော့လည်း မနိုင်ဘူး”ဟု ပြောသည်။

ဝန်ကြီးချုပ် ဦးဖြိုးမင်းသိန်း ခေါင်းဆောင်သည့် ရန်ကုန်တိုင်း အစိုးရ လက်ထက်တွင် ယခင် အစိုးရလက်ထက်က ပြည်သူ လူထုက မဲပေး ရွေးချယ်ထားသည့် မြို့နယ်၊ ခရိုင်နှင့် ကော်မတီဝင်အဆင့် စည်ပင်သာယာရေး ဝန်ထမ်းများ ကို ဖြုတ်ချခဲ့ကာ အစိုးရခန့် ကော်မတီဝင်များကို ပြန်လည်ခန့်ထားခဲ့သော်လည်း ရွေးကောက်ပွဲများအား ယနေ့ အချိန် အထိ ပြန်လည် ပြုလုပ်ပေးခြင်း မရှိသေးပေ။

ဒေါ်စန္ဒာမင်းက“ရန်ကုန်မြို့ကြီးက ကျယ်ပြန့်တယ်ဆိုရင် ကျယ်ပြန့်တဲ့အလျောက် လုပ်နိုင်ကိုင်နိုင်တဲ့ ဝန်ထမ်းဦးရေ၊ ကော်မတီဝင် ဦးရေတွေကို တိုးချဲ့လိုက်ပါလား။ အစိုးရက Selected Person တွေ ခန့်ထားတယ်။ စည်ပင်သာယာ လုပ်ငန်းတွေနဲ့ လုံးဝ မကျွမ်းဝင်တဲ့သူတွေ ဖြစ်နေတယ်။ ဒါကြောင့် လုပ်ဆောင်ချက်တွေက အောက်ခြေအထိ မရောက်ဘူး။ အဲဒါက လုပ်ငန်းကို လုံးဝ မအောင်မြင်စေသော အချက်ပဲ”ဟု ပြောဆိုသည်။

မင်းနေပြည်တော်ဟောင်း တခုဖြစ်သည့် မန္တလေးမြို့တွင်မူ ရေပေးဝေရေးစနစ်၊ ရေဝေရေလဲဒေသ ပြုပြင်မှု၊ စမတ် နည်းပညာ အသုံးပြုသော အစိုင်အခဲအညစ်အကြေး စီမံခန့်ခွဲမှု အဆင့်မြှင့်တင်ရေး ရည်ရွယ်ချက်ဖြင့် နှစ် ၃၀ မြို့ပြ ဖွံ့ဖြိုးတိုးတက်ရေး စီမံကိန်းကို ရေးဆွဲထားသလို မြို့၏ လမ်းများပေါ်မှ မော်တော်ယာဉ်များကို အချိန်နှင့်တပြေးညီ စောင့်ကြည့် ထိန်းချုပ်ရန်နှင့် ပိုက်လိုင်းများ၊ ရေမီတာများနှင့် အီလက်ထရွန်နစ် လမ်းအသုံးပြုခ ကောက်ခံမှု စနစ်များ ကို စောင့်ကြည့်ရန် အာရုံခံ ကိရိယာများကို တပ်ဆင်ထားပြီး ဖြစ်ကြောင်း သိရသည်။

“စမတ်စီးတီး ဆိုတာ ဂျိန်းစ်ဘွန်းကားထဲကလို အဆင်မြင့် နည်းပညာ လက်နက်ကိရိယာတွေ အများကြီးနဲ့ မြို့လိုမျိုး ထင်တဲ့သူတွေလည်း ထင်မှာပဲ။ တချို့ကျပြန်တော့လည်း ငွေတွေ အများကြီးသုံးပြီး မြို့ထဲက အရာရာကို အဆင့်မြှင့် တင်မယ်လို့ ထင်ရင် ထင်နိုင်တယ်။ အဲဒီလို လုံးဝ မဟုတ်ပါဘူး။ စမတ်စီးတီး ဆိုတာ အများပြည်သူ ဝန်ဆောင်မှု တွေကို နည်းပညာသုံးပြီး အဆင်ပြေချောမွေ့အောင် လုပ်ပေးတဲ့ မြို့ကြီးတမြို့ပါ”ဟု မန္တလေး စည်ပင်သာယာရေး ကော်မတီဝင် ဦးရဲမြတ်သူက နိုဝင်ဘာလအတွင်းက ဧရာဝတီသို့ ပြောဆိုထားသည်။

ထို့ပြင် မကြာမီ ကာလအတွင်း မန္တလေးမြို့၏ မည်သည့်နေရာမဆို အလွယ်တကူ ရှာနိုင်သည့် စံချိန်မီ မြေပုံ ထုတ်လုပ် နိုင်ရေး၊ အမေရိကန် စံနှုန်းနှင့်အညီ လမ်းညွှန်ဆိုင်းဘုတ်များ ရေးဆွဲရန် ရှိကြောင်း၊ ပြည်သူများအနေဖြင့် အိမ်ခြံမြေ ခွန်၊ ဆောက်လုပ်ရေး ခွင့်ပြုချက်များကို ရုံးသို့လာရန် မလိုသည့် ငွေပေးချေမှု စနစ်များ ဆောင်ရွက်နိုင်ရန် မန္တလေး စည်ပင်သာယာရေး ကော်မတီက ကြိုးပမ်းလျက် ရှိသည်။

ရန်ကုန်မြို့သည် ၂၀၁၆ ခုနှစ် မတိုင်မီ နေပြည်တော် မပေါ်ပေါက်ခင်အထိ မြန်မာနိုင်ငံ၏ မြို့တော်ဖြစ်ပြီး လူဦးရေ သိပ်သည်းလာသည့် အတွက် မြို့သစ်များ တိုးချဲ့တည်ဆောက်ခဲ့သော်လည်း လူနေမှု အဆင့်အတန်း ဆက်လက် နိမ့်ကျနေဆဲ ဖြစ်သည်ဟု ဝေဖန်မှုများ ရှိသည်။

“ရန်ကုန်က လူတွေ အရမ်းများနေပြီ။ အသံချဲ့စက်တွေကလည်း ဆူတယ်။ ကားလမ်းပိတ်တာတော့ ပုံမှန်လို ဖြစ်နေ တော့ မပျော်တော့ဘူး။ ဒါပေမယ့် ပညာရှာဖို့၊ စီးပွားရေး အခွင့်အလမ်းတွေ အတွက်ကတော့ ဒီမှာပဲ နေရမှာပဲ။ ပြည်တွင်းမှာ တခြားလည်း သွားလုပ်စရာက မရှိသေးဘူး”ဟု ရန်ကုန်မြို့ စမ်းချောင်းတွင် နေထိုင်သူ ဦးညီညီက ပြောဆိုသည်။

The post မန္တလေးကို လှည့်တောင် မကြည့်အားဘူးဟု ရန်ကုန်မြို့တော်ဝန် ပြော appeared first on ဧရာဝတီ.

မြန်မာအင်ဂျင်နီယာ ကောင်စီ (MEngC) နှင့် တရုတ်နိုင်ငံ သိပ္ပံနှင့် နည်းပညာအဖွဲ့ (CAST) တို့အကြား အချက် ၅ – ချက်ပါ သဘောတူ စာချွန်လွှာကို ဤ နိုဝင်ဘာလဆန်းပိုင်းက ပြည်ထောင်စုဝန်ကြီးများ အသိသက်သေထား လက်မှတ် ရေးထိုးခဲ့ကြသည်။

စာချွန်လွှာပါ အချက်များတွင် အင်ဂျင်နီယာ နည်းပညာဆိုင်ရာ လက်မှတ်များ နှစ်ဖက် အပြန်အလှန် စိစစ်အကဲဖြတ်ရေး၊ အသိအမှတ် ပြုရေး၊ Washington Accord (ကမ္ဘာ့နိုင်ငံတကာ အင်ဂျင်နီယာများ မဟာမိတ်အဖွဲ့၊ WA) လျှောက်ထားခြင်းကို CAST အဖွဲ့က ကူညီပေးရေးနှင့် တခြားအချက်များ ပါဝင်သည်။

သတင်းအချုပ်အားဖြင့် မြန်မာအင်ဂျင်နီယာနှင့် အတတ်ပညာရှင်များအတွက် အားတက်ဖွယ်ဟု ယူဆနိုင်သော်လည်း စာချွန်လွှာပါ အချက်များကို လေ့လာခြင်းအားဖြင့် “တရုတ် အင်ဂျင်နီယာများအား MEngC က အသိအမှတ်ပြုရေး ဆောင်ရွက်သွားမည်ဖြစ်ကြောင်း သဘောတူညီချက်” ဟု သုံးသပ်နိုင်သည်။

မြန်မာပြည်သို့ လာရောက်လုပ်ကိုင်မည့် ပြည်ပ အင်ဂျင်နီယာ အတတ်ပညာရှင်များသည် MEngC ၏ ခွင့်ပြုလက်မှတ် လိုအပ်ခြင်း၊ တရုတ်နိုင်ငံဆိုင်ရာ စီမံကိန်းများ (ရန်ကုန်မြို့သစ်၊ ကျောက်ဖြူရေနက်ဆိပ်ကမ်း) စသည်တို့အတွက် ၎င်းတို့ အင်ဂျင်နီယာများ ဝင်ရောက် လုပ်ကိုင်နိုင်ရန် လိုအပ်ခြင်းတို့အတွက် ဤသဘောတူညီချက်သည် ဂိတ်တံခါးသဖွယ် ဖြစ်သည်ဟု မှတ်ယူနိုင်သည်။

MEngC နှင့် CAST တို့ သဘောတူစာချွန်လွှာ လက်မှတ်ထိုးရာတွင် CAST ဖက်မှ လက်မှတ်ထိုးသူသည် Ms Xin Bing (Director of the Centre for Professional Training and Services, CPTS) ဟု ဖော်ပြထားသည်။ သို့သော် စာရေးသူ လေ့လာကြည့်ရာတွင် CAST သည် တရုတ်နိုင်ငံ၏ သိပ္ပံနှင့် နည်းပညာဆိုင်ရာ အဖွဲ့ပေါင်း ၁၃၇ ဖွဲ့တို့ကို ချိတ်ဆက် ထားသည် အကြီးမားဆုံးသော အဖွဲ့ဖြစ်သည်ဟု ဖော်ပြထားသော်လည်း CPTS ဆိုသည့်အဖွဲ့ မပါရှိခြင်းကို သတိပြုမိသည်။

CAST ၏ ဝက်ဘ်ဆိုက်တွင် တရုတ်နိုင်ငံမှ အင်ဂျင်နီယာ လက်မှတ် အရည်အချင်း စိစစ်ရေးအဖွဲ့ (China Engineering Education Accreditation Association) ၏ ခွင့်ပြုလက်မှတ်ရ အင်ဂျင်နီယာ စာရင်းကို အလွယ်တကူ ဝင်ရောက်လေ့လာနိုင်သလို၊ ဤမှာဘက် MEngC ဝက်ဘ်ဆိုက်တွင်လည်း အင်ဂျင်နီယာ အရည်အချင်း စိစစ်လုပ်ဆောင်နေမှုများကို အလွယ်တကူ တွေ့ရှိ နိုင်သည့်အတွက် နှစ်ဖက်အပြန်အလှန် စိစစ်အကဲဖြတ်ရေး ဆိုသည်မှာ အထူးမလိုအပ်ပေ။

ဤနေရာတွင် အသိအမှတ်ပြုရေး ကိစ္စသည် စိတ်ဝင်စားစရာဖြစ်သည်။ Washington Accord (WA) တွင် ၂၀၁၆ ခုနှစ်မှ စ၍ အသင်းဝင် ဖြစ်ခဲ့သည့် CAST သည် လက်ရှိအဖွဲ့ဝင် မဖြစ်နိုင်သေးသည့် မြန်မာပြည်၏ MEngC ကို WA ထံမှ အသိအမှတ်ပြုမှု ရရှိရေး ကြိုးစားခြင်းပင်။

မြန်မာ အင်ဂျင်နီယာများသည် CAST ၏ အသိအမှတ်ပြုချက် ရရှိရန် တဦးချင်းအလိုက် အရည်အချင်းကိုသာ လုပ်ထုံးလုပ်နည်း အတိုင်း စိစစ်မည်ဖြစ်သဖြင့် တရုတ်နိုင်ငံဆိုင်ရာ စီမံကိန်းများတွင် ဝင်ရောက်လုပ်ကိုင်နိုင်မည့် အခွင့်အလမ်း နည်းပါးမည်မှာ အသေအချာပင်။ သို့သော် မြန်မာပြည် အစိုးရနှင့် ချုပ်ဆိုထားသည့် နိုင်ငံတဝှန်း စီမံကိန်းများ မကြာမီ စတော့မည်ဖြစ်သဖြင့် တရုတ်နိုင်ငံမှ အင်ဂျင်နီယာများနှင့် အတတ်ပညာရှင်များ အချိန်မီ ဝင်ရောက် လုပ်ကိုင်နိုင်ရေးတို့အတွက် MEngC ဘက်မှ အသိအမှတ်ပြုမှု ဦးစွာရရှိထားရေးသည် အဓိက သော့ချက်သဖွယ် အလွန်အရေးကြီးသည်မှာ အမှန်ပင်။

MEngC အနေဖြင့် ကမ္ဘာ့နိုင်ငံတကာ အင်ဂျင်နီယာများ မဟာမိတ်အဖွဲ့ (WA) ၏ အသင်းဝင်ဖြစ်လာရေး ဆောင်ရွက်ရာတွင် WA နှင့် အာဆီယံ အင်ဂျင်နီယာ ဝါရင့်အသင်းဝင်များ ဖြစ်ကြသည့် စင်ကာပူ၊ မလေးရှား စသည့် အဖွဲ့ဝင် နိုင်ငံများ၏ ပံ့ပိုးကူညီမှုကို ယူသင့်သော်လည်း ၂၀၁၆ ခုနှစ်မှ အသင်းဝင်ဖြစ်လာသည့် တရုတ်နိုင်ငံ၏ အကူအညီရရေးအတွက် ယခုကဲ့သို့ စာချွန်လွှာ လက်မှတ် ထိုးခြင်းသည်လည်း စဉ်းစားစရာအချက် ဖြစ်လာသည်။

WA ဝက်ဘ်ဆိုက် ဖော်ပြချက်အရ တရုတ်နိုင်ငံကိုယ်စားပြု CAST အဖွဲ့သည် ၂၀၁၆ ခုနှစ်မှစ၍ အသင်းဝင် ဖြစ်လာသည်။ ဤသို့ဆိုလျှင် ၂၀၁၆ ခုှနှစ် မတိုင်မီ ဒီဂရီဘွဲ့ရသည့် တရုတ်နိုင်ငံမှ အင်ဂျင်နီယာနှင့် အတတ်ပညာ ရှင်များသည် CAST အဖွဲ့၏ ခွင့်ပြု လက်မှတ် ရှိထားသည့်တိုင် WA တခြားအဖွဲ့ဝင် နိုင်ငံများ၏ အသိအမှတ်ပြု စာရင်းတွင် အကျုံးဝင်မည်မဟုတ်ဘဲ ၂၀၁၆ ခုနှစ်နှင့် နှောင်းပိုင်း ဒီဂရီဘွဲ့ရ ဖြစ်မှသာ WA အသင်းဝင်အားလုံးနှင့် အကြုံးဝင်သည်ကို ဆိုလိုသည်။

သို့ပါ၍ CAST အဖွဲ့၏ ခွင့်ပြုလက်မှတ် ရှိထားသည့် ၂၀၁၆ ခုနှစ် မတိုင်ခင်က တရုတ်နိုင်ငံမှ ဒီဂရီဘွဲ့ရများ အနေဖြင့် တခြား နိုင်ငံတနိုင်ငံတွင် အလုပ်လုပ်လိုပါက ထိုသက်ဆိုင်ရာနိုင်ငံ အင်ဂျင်နီယာ ကောင်စီ၏ သတ်မှတ်စည်းကမ်း အတိုင်း ခွင့်ပြုလက်မှတ် လျှောက်ထားရန် လိုအပ်သည်မှာ အသေအချာ ဖြစ်သည်။

ထိုနည်းလည်းကောင်း MEngC သည်လည်း ပြည်ပ အင်ဂျင်နီယာနှင့် အတတ်ပညာရှင်များအား မိမိတို့ လုပ်ထုံး လုပ်နည်းနှင့်အညီ တဦးချင်း စိစစ်ပြီး ကိုက်ညီမှသာ အသိအမှတ်ပြုရန် လိုအပ်သည်။

တဦးတယောက်ချင်းစီ စိစစ်ခြင်းသည် အချိန်ကာလတခုအထိ ကြံ့ကြာနိုင်ပြီး မကြာမီ စတော့မည့် မြန်မာပြည်တွင်း တရုတ်စီမံကိန်းကြီးများအတွက် လွန်စွာထိခိုက်နိုင်သည်။

ဤစီမံကိန်းများအတွက် တရုတ်နိုင်ငံအနေဖြင့် ၂၀၀၉ ခုနှစ် ကတည်းက အပတ်တကုတ် ကြိုးစားခဲ့ရပြီး ပြည်တွင်းမှ ခုခံမှုမျိုးစုံကို ကျော်လွှားခဲ့၊ ကျော်လွှားနေရဆဲ အခြေအနေ ဖြစ်သောကြောင့် CAST အဖွဲ့၏ အင်ဂျင်နီယာနှင့် Technologists များကို MEngC ၏ အသိအမှတ် ပြုလာရေးဆိုသည့် သဘောတူစာချွန်လွှာကို အချိန်ကိုက် မြန်ဆန် ဆောင်ရွက်လာခြင်းဟု သုံးသပ်မိသည်။

ထိုသဘောတူလက်မှတ် အောက်တွင် ၎င်းတို့ အင်ဂျင်နီယာနှင့် အတတ်ပညာရှင်များ အလုံးအရင်း ဝင်ရောက်လာနိုင်မည့် အချက်ကိုလည်း လျစ်လျူမရှုသင့်ပေ။

လက်ရှိအနေအထားအရ အလုပ်အကိုင် အခွင့်အလမ်းများ နည်းပါးနေချိန် ထိုသို့ ပြည်ပ အင်ဂျင်နီယာနှင့် အတတ်ပညာရှင်များကို မြန်မာပြည်တွင်းသို့ အလုံးအရင်း ဝင်ရောက်လာစေလျှင်ဖြင့် မိမိတို့အတွက် အလုပ်အကိုင် အခွင့်အလမ်း အကျပ်အတည်း ပိုမိုဖြစ်လာစေမည်လား၊ အလုပ်လက်မဲ့ ဖြစ်သွားတော့မည်လားဟု မြန်မာ အင်ဂျင်နီယာများ တွေးပူနေကြရပြီ။

တဖက်မှာလည်း အနာဂတ် အင်ဂျင်နီယာ ဖြစ်လာရေး မျှော်လင့်ချက်ကြီးစွာဖြင့် ပြည်တွင်း၌ အသက်မွေး ဝမ်းကျောင်း ပညာ ကြိုးစားရှာမှီး နေကြသူများ၊ အပင်ပန်းခံ စီးပွားရှာပြီး မိမိတို့ သားသမီးများကို အင်ဂျင်နီယာ ပညာရှင်များ ဖြစ်လာကြရေး မျှော်လင့်ချက်ကြီးစွာ ထားကြသော မိဘများ၊ တိုင်းပြည်အနာဂတ် အတတ်ပညာရှင်များ မွေးထုတ်ပေးနေသော ကျောင်းတော်ကြီးများ၏ မျှော်လင့်ချက်တို့သည် ဤသဘောတူ စာချွန်လွှာကြောင့် မှေးမှိန်သွားကြမည်ကို ရင်လေးစွာ တွေးမိသည်။

သီရိလင်္ကာနိုင်ငံနှင့် ကျောက်ဖြူ ရေနံ-ဂက်စ်ပိုက်လိုင်း ဆိုင်ရာ တရုတ်စီမံကိန်းများအား သာဓကပြုရလျှင် သီရိလင်္ကာ နိုင်ငံတွင် တရုတ်ကုမ္ပဏီများက ၎င်းတို့ တရုတ်နိုင်ငံ အလုပ်သမားများသာ ခေါ်သွင်း အသုံးပြုခြင်းကြောင့် သီရိလင်္ကာနိုင်ငံ စီးပွားရေးအကျိုးအမြတ် ရတန်သလောက်မရပေ (The New York Times: 13-Nov-2018)။

တဖန် မြန်မာနိုင်ငံ ကျောက်ဖြူ-ကူမင်း ရေနံ-ဂက်စ်ပိုက်လိုင်း ကိစ္စကြောင့် ရခိုင်ဒေသခံများ အခက်တွေ့ရသည့် သတင်းတခုတွင်လည်း ၂၀၀၉ ခုနှစ်မှ စခဲ့သည့် ထိုလုပ်ငန်းများအတွက် (CITIC နှင့် Petrochina) တို့က ရခိုင် ဒေသခံ တသိန်းခန့်ကို အလုပ်အကိုင် စီစဉ်ပေးမည်ဖြစ်ကြောင်း ကနဦး ကတိရှိခဲ့ခြင်း သာမက၊ ၇၂ ရာခိုင်နှုန်းသော မြန်မာနိုင်ငံသားများအား အလုပ်ခန့်ရမည်ဟု သဘောတူညီမှုများ ရှိခဲ့သော်လည်း ဒေသခံ အနည်းငယ်သာ အလုပ်အကိုင် ရရှိပြီး တရုတ်နိုင်ငံသားများစွာ ဝင်ရောက် လုပ်ကိုင်နေခြင်းကိုလည်း တွေ့ရှိရသည် (Reuters: ၉ -ဇွန်လ-၂၀၁၇)။

အထက်တွင် အလုပ်အကိုင် အခွင့်အလမ်းနှင့် အကြပ်အတည်းများကို ပမာနှိုင်းယှဉ် ပြခဲ့ရခြင်းမှာ မြန်မာပြည်၏ ရေရှည် တိုးတက်မှုအတွက် မြို့ပြဖွံ့ဖြိုးမှုမျှသာအတွက် မဟုတ်ဘဲ၊ လူ့စွမ်းအင် အရင်းအမြစ်ပါ တိုးတက်လာစေရန် လွန်စွာ အရေးကြီးသောကြောင့်ပင်။

ပမာဆိုရသော် တရုတ်နိုင်ငံမှ ကုမ္ပဏီများသည် အာဖရိကနိုင်ငံများသို့ ဈေးကွက် ထိုးဖောက်ရာတွင် နှုန်းထားသက်သာခြင်း၊ ဘာသာစကား အခက်အခဲနှင့် လုပ်ငန်းမြန်ဆန် တွင်ကျယ်ရေး အကြောင်းပြကာ တရုတ်နိုင်ငံသား အတတ်ပညာရှင် အစုံအား ခေါ်ယူ လုပ်ကိုင်ခြင်း စသည်တို့ကြောင့် အာဖရိကနိုင်ငံသားများ လုပ်ငန်းပညာ အတွေ့အကြုံ ဖလှယ်မှုရရှိရေး လွန်စွာ ခက်ခဲ သွားသည်သာမက၊ နိုင်ငံတကာအသိအမှတ်ပြု အင်ယာ အတတ်ပညာရှင် မွေးထုတ်ရေးကို လွန်စွာထိခိုက် သွားသည်ဟု Engineers for Africa တွင် ဖော်ပြထားသည်။

အကြံပြုချက်

ထို့ကြောင့် အလုပ်အကိုင် အခွင့်အလမ်းများ တိုးပွားရေးနှင့် လူ့စွမ်းအင် အရင်းအမြစ် ပိုမိုကောင်းမွန် လာစေရန် စာရေးသူ အကြံပြုလိုသည်မှာ

၁) ဤသဘောတူ စာချွန်လွှာ၌ လက်မှတ်ရေးထိုးသည့် CPTS အဖွဲ့သည် တရုတ်နိုင်ငံ CAST ၏ ကိုယ်စားပြုအဖွဲ့လော၊ မြန်မာနိုင်ငံသို့ ဝင်ရောက်လုပ်ကိုင်မည့် တရုတ်နိုင်ငံ ကုမ္ပဏီများအတွက် အင်ဂျင်နီယာ လက်မှတ်များ အသိအမှတ်ပြုမှု ရရှိရေး ဆောင်ရွက်မည့် ကိုယ်စားလှယ်အဖွဲ့လော ဆိုသည်ကို ပြည်သူများသိရန် လိုအပ်သည်။

၂) MEngC ဘက်ကလည်း တရုတ်နိုင်ငံ အင်ဂျင်နီယာနှင့် အတတ်ပညာရှင်များကို အသိအမှတ်ပြုရေး လုပ်ဆောင်ရာတွင် သတ်မှတ် စည်းကမ်းနှင့်အညီ တဦးချင်းစိစစ်ရန် လိုအပ်ပြီး “အသိအမှတ်ပြုခြင်း” ဆိုသည့် ခေါင်းစဉ်အောက်မှ မြန်မာပြည်တွင်း တရုတ် စီမံကိန်းများအတွက် ၎င်းတို့နိုင်ငံသားများ အလုံးအရင်း ဝင်ရောက်မလာရေး အထူးသတိပြုရန် လိုအပ်သည်။

၃) ပြည်ပ ကုမ္ပဏီများ ဝင်ရောက်လုပ်ကိုင်မည့် အင်ဂျင်နီယာနှင့် ပညာရှင်များ ဦးရေကန့်သတ်+ဗီဇာ စသည်တို့ကို နိုင်ငံတော်အစိုးရက စနစ်တကျ ထိမ်းချုပ်ဆောင်ရွက်ရန် လိုအပ်သည်။

၄) ဤစီမံကိန်းများကို အခြေခံ၍ တိုင်းသူပြည်သားများ လူ့စွမ်းအင်အရင်းအမြစ် တိုးတက်လာစေရေး၊ အလုပ်အကိုင် အခွင့်အလမ်း ပိုမိုရရှိရေး၊ အတတ်ပညာ ဖလှယ်နိုင်ရေးနှင့် လုပ်ငန်းအတွေ့အကြုံ အပြည့်အ၀ ရရှိရေး၊ ပြည်ပရောက် မြန်မာ ပညာရှင်များ တိုင်းပြည် ပြန်လည်ထူထောင်ရေး ကဏ္ဍများတွင် ဝင်ရောက်ပံ့ပိုးနိုင်ရေးတို့ကို အဓိကထား ဆောင်ရွက်ရန် လိုအပ်သည်။

ထိုသို့ ဆောင်ရွက်ခြင်းဖြင့် မြန်မာ အင်ဂျင်နီယာနှင့် အတတ်ပညာရှင်များ အလုပ်လက်မဲ့ ဖြစ်ရမည့် အခြေအနေမှ တားဆီး နိုင်သည်သာမက၊ လူ့စွမ်းအင် အရင်းအမြစ် ပိုမိုတိုးတက် ကောင်းမွန်လာနိုင်သည့်အတွက် တိုင်းပြည်၏ ရေရှည်ဖွံ့ဖြိုးမှုကို များစွာ အထောက်အကူပြုလာမည် ဖြစ်ပါကြောင်း။

( ဒေါက်တာသိန်းမိုးဝင်းသည် ဩစတြေးလျနိုင်ငံ ဆစ်ဒနီရောက် မြန်မာ့အသိုင်းအဝိုင်းနှင့်အတူ မြန်မာပြည်အရေး စဉ်ဆက်မပြတ် ပါဝင်လှုပ်ရှားနေသူ ဖြစ်သည်)

The post တရုတ် အင်ဂျင်နီယာတွေ အလုံးအရင်း ဝင်လာတော့လေမလား appeared first on ဧရာဝတီ.

ပြည်ပသို့ ဆန်တင်ပို့မှု တိုးတက်စေရန်အတွက် နိုင်ငံတကာ စံချိန်စံညွန်းနှင့် ကိုက်ညီစေရန် မြန်မာ့ ဆန်စပါး စံချိန်စံညွှန်းကို ပြင်ဆင်ရေးဆွဲနေပြီး ဖြစ်ကြောင်း မြန်မာဆန်စပါး စံချိန်စံညွှန်း၊ အရည်အသွေးများ ပြင်ဆင်ရေးကော်မတီဥက္ကဋ္ဌ ဦးအောင်သန်းဦးက ပြောသည်။

ပြင်ဆင်ရေးဆွဲနေသည့် မူကြမ်းတွင် ဆန်အဆင့်အတန်း သတ်မှတ်ရာတွင် အသုံးပြုသည့် အသုံးအနှုန်းများ၊ ဆန်အဆင့်အတန်းနှင့် ပုံစံ အရွယ်အစား၊ ဆန်ကြိတ်ဖွတ်ခြင်း အတိုင်းအတာ၊ ကျန်းမာသန့်ရှင်းရေး/ ထုပ်ပိုးခြင်း/ အမှတ်တံဆိပ် ကပ်ခြင်း၊ ဆန်အဆင့်အတန်းနှင့် အရည်အသွေး သတ်မှတ်ချက်များ ပါဝင်မည် ဖြစ်သည်။

ကော်မတီဥက္ကဋ္ဌ ဦးအောင်သန်းဦး က “မြန်မာနိုင်ငံမှာ ကျင့်သုံးနေတဲ့ စပါးတတင်း ၄၆ ပေါင်၊ အုတ်/သဲ/ ခဲ/ အဖျင်းအမော် ပါဝင်မှု ဆိုတဲ့ ကွဲကွဲပြားပြား မရှိခဲ့ဘူး။ ဆန်နဲ့ ပတ်သက်တဲ့ အလျားတိုင်းတဲ့ ကိရိယာတွေ၊ အစိုဓာတ်ပါဝင်မှုတွေ၊ ဖွဲနု/ဖွဲကြောင်း ပါဝင်မှု တိုင်းတာရေးကိရိယာတွေ ဒါတွေက ခေတ်မီလာတယ်။ အဆင့်တန်းမြင့်တဲ့ စက်ကိရိယာတွေ သုံးစွဲပြီး ဆန်ကိုတင်ပို့နိုင်ဖို့ဆိုရင် ဈေးကွက်အသစ်တွေ အခုထက်ပိုရဖို့ လိုသလို ရတဲ့အခါမှာလည်း အရည်အသွေးနဲ့ စံနှုန်းက အရေးပါလာတယ်။ အဲဒါကြောင့်မို့ စံချိန်စံညွှန်းကို ပြုပြင်ရေးဆွဲဖို့ လိုလာတယ်” ဟု ပြောသည်။

မြန်မာနိုင်ငံ စက်မှုကုန်သည်အသင်းချုပ် (UMFCCI) တွင် ပြုလုပ်သည့် မြန်မာ့ဆန်စပါး စံချိန်စံညွှန်း၊ အရည်အသွေးများ ပြင်ဆင်ရေးဆိုင်ရာ ဆွေးနွေးပွဲတွင် ဦးအောင်သန်းဦးက ပြောဆိုလိုက်ခြင်းဖြစ်ကာ ၎င်းသည် မြန်မာနိုင်ငံ ဆန်စပါးအသင်းချုပ် ဒုဥက္ကဋ္ဌလည်း ဖြစ်သည်။

အဆိုပါ မူကြမ်းကို မြန်မာနိုင်ငံဆန်စပါးအသင်းချုပ်၊ မြန်မာ့ဆန် စံချိန်စံညွှန်း၊ အရည်အသွေးများ ပြင်ဆင်ရေး ကော်မတီနှင့် International Finance Corporation (IFC) တို့ ပူးပေါင်းရေးဆွဲထားခြင်း ဖြစ်ကာ ဆန်နှင့် ပတ်သက်သည့် ကဏ္ဍတွင် မူကြမ်းရေးဆွဲမှု ၄၅ ရာခိုင်နှုန်း ပြီးစီးပြီဖြစ်ပြီး စပါးကဏ္ဍအတွက်မူ ၆၀ ရာခိုင်နှုန်း ပြီးစီးနေပြီဖြစ်ကာ လာမည့် နှစ် ဇန်နဝါလတွင် နိုင်ငံတော်အဆင့် စံချိန်စံညွှန်း ကော်မတီသို့ တင်ပြသွားမည်ဟု သိရသည်။

“အဓိကတော့ တရုတ်အပြင် ဖိလစ်ပိုင်ဆိုရင်လည်း ၂၅ မှတ်ကို အခု ရောင်းလာနိုင်တယ်။ အီးယူနိုင်ငံများကို တင်ပို့တဲ့ နေရာမှာလည်း စံချိန်စံညွှန်းက အရေးကြီးတယ်။ ဒါကြောင့်မို့ ဒီစံချိန်စံညွှန်းကို ပြုပြင်တာ” ဟု ဦးအောင်သန်းဦးက ဆိုသည်။

စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ စိုက်ပျိုးရေးဦးစီးဌာနမှ ဒုတိယညွှန်ကြားရေးမှူးချုပ် ဦးအေးကိုကိုက “Asean Free Trade အရ တနိုင်ငံနဲ့ တနိုင်ငံ လွတ်လပ်စွာ သွားတဲ့အခါမှာ ကျနော်တို့ရဲ့ ကုန်ပစ္စည်း အရည်အသွေးက ထိုင်းဆန်နဲ့ မြန်မာဆန် ယှဉ်ကြတဲ့အခါမှာ ကျနော်တို့ရဲ့ ဆန်ကလည်း သူ့အရေးအသွေးကို မီမှ ဈေးရမှာ ဖြစ်ပါတယ်။ သူ့ဆန်က ပိုကောင်းပြီး ကျနော်တို့ ဆန်က အရည်အသွေး ညံ့နေရင်တော့ ဈေးရဖို့ဆိုတဲ့ အခြေအနေက ခဲယဉ်းပါလိမ့်မယ်” ဟု ပြောသည်။

မြန်မာနိုင်ငံတွင် တနိုင်ငံလုံး အတိုင်းအတာအနေဖြင့် မိုးစပါး စိုက်ဧက ၁၅ သန်းကျော်နှင့် နွေစပါး စိုက်ဧက ၂ သန်းခွဲကျော် စိုက်ပျိုးထုတ်လုပ်နေရာ စပါးတန်ချိန် ၂၈ သန်းကျော် ထွက်ရှိသည်ဟု စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန ကိန်းဂဏန်းများအရ သိရသည်။

ဆန်စပါးကဏ္ဍ ဖွံ့ဖြိုးရေးမှုသည် နိုင်ငံ့စီးပွား ဖွံ့ဖြိုးတိုးတက်မှုနှင့် တိုက်ရိုက်အချိုးကျသည့အတွက် စံချိန်စံညွှန်း ရေးဆွဲရေးမှုတွင် လိုအပ်ချက်များရှိပါကလည်း စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနက ပူးပေါင်းဆောင်ရွက်သွားမည်ဟုလည်း သိရသည်။

၂၀၁၇ – ၁၈ဘဏ္ဍာနှစ်တွင် ဆန်တန်ချိန် ၃ ဒသမ ၅၈ သန်းကို ပြည်ပနိုင်ငံပေါင်း ၆၄ နိုင်ငံသို့ တင်ပို့ထားသည်ဟုလည်း သိရသည်။

ဧရာဝတီတိုင်း၊ ဓနုဖြူမြို့နယ်၊ ရဲတံခွန်ကျေးရွာအုပ်စုမှ စပါးစိုက်တောင်သူ ဦးရင်မောင်က “ကျနော်တို့ တောင်သူတွေကတော့ စပါးသာ စိုက်တာ စံချိန်စံညွှန်းကို နားမလည်ဘူး။ ဒါပေမယ့် မျိုးစေ့ထုတ်တွေ ဘာတွေမှာတော့ စံချိန်စံညွှန်းမီရင် မျိုးကောင်းမယ်၊ ဈေးကောင်းရမယ်ဆိုပြီး သုံးသပ်ပါတယ်။ ကျနော်တို့ဆီမှာ စပါး ၄ မျိုး စိုက်ပျိုးတယ်၊ မှော်ဘီ ၃။ ဒါက ကြိတ်လိုက်ရင် အကျိုးအကြေ များတယ်၊ စံချိန်မမီဘူး။ အများစုက အဲဒါပဲ စိုက်တယ်။ ဒီလိုစပါးမျိုးကို စိုက်ပျိုးရေးဌာန၊ မျိုးစေ့ထုတ်ဌာနနဲ့ ကုမ္ပဏီတို့လို၊ မြန်မာနိုင်ငံ ဆန်စပါးအသင်းတို့လို ပူးပေါင်းပြီး လုပ်မယ်ဆိုရင် ကောင်းတယ်” ဟု ပြောသည်။

ဆက်စပ်သတင်း

၂၀၁၇-၁၈ ဆန်တင်ပို့မှုမှ အမေရိကန်ဒေါ်လာ ၁ ဘီလီယံ ရရှိ

အစိုးရချင်း ညှိနှိုင်းပြီး ဆန်တင်ပို့မှု မြှင့်တင်ရန် ထိုင်း စီစဉ်

ဆန်စပါးမှောင်ခို ထွက်ရှိမှု အစိုးရ ထိန်းချုပ်ရန် မလွယ်ဟု စီးပွား/ကူးသန်း ဝန်ကြီး ပြော

The post နိုင်ငံတကာနှင့် ကိုက်ညီအောင် မြန်မာ့ ဆန် စပါး စံချိန်စံညွှန်း ပြင်ဆင်နေ appeared first on ဧရာဝတီ.

အမေရိကန် အစိုးရက နောက်ဆက်တွဲ အခွန်ချမှတ်ခြင်းကို ရက်ပေါင်း ၉၀ ဆိုင်းငံ့ရန် သဘောတူပြီး ကုန်သွယ်ရေး မညီမျှမှု လျှော့ချရန် တရုတ်နိုင်ငံက အမေရိကန် ကုန်ပစ္စည်းများကို အကြီးအကျယ် ဝယ်ယူရန် ကတိပြုခဲ့ပြီးနောက် ကုန်သွယ်ရေး စစ်ပွဲ ခေတ္တရပ်ဆိုင်းလိုက်ကြောင်း ဒီဇင်ဘာလ ၁ ရက်နေ့တွင် အမေရိကန်သမ္မတ ဒေါ်နယ်ထရမ့်နှင့် တရုတ် သမ္မတ ရှီကျင့်ပင်တို့ ကြေညာလိုက်သည်။

ကမ္ဘာ့အကြီးမားဆုံး စီးပွားရေး နှစ်ခုအကြား ကုန်သွယ်ရေးတင်းမာမှု လျှော့ချရေးအတွက် စက်မှု ထိပ်သီးနိုင်ငံ ၂၀ အစည်းအဝေး၏ သီးခြားဆွေးနွေးပွဲတွင် ခေါင်းဆောင်နှစ်ဦး တွေ့ဆုံဆွေးနွေးပြီး ယခုကဲ့သို့ ကုန်သွယ်ရေးစစ်ပွဲ ခေတ္တ ရပ်ဆိုင်လိုက်ခြင်းဖြစ်သည်။

သို့သော် ရေရှည် တည်တံ့သော သဘောတူညီချက်ရရန် အဟန့်အတား ဖြစ်စေပြီး နက်ရင်းစွာ အမြစ်တွယ်နေသည့် စနစ်ဆိုင်ရာ ပြဿနာများကို ဖြေရှင်းရန် မတ်လအထိ ခက်ခက်ခဲခဲ ဆွေးနွေးရမည် ဖြစ်ကြောင်းကိုလည်း ယခု ဆွေးနွေးပွဲက ပြသနေသောကြောင့် မကြာမီ ထိုနှစ်နိုင်ငံအကြား ပဋိပက္ခ ပြန်လည် ဖြစ်ပေါ်လာနိုင်ကြောင်း ကျွမ်းကျင်သူများက ယုံကြည်နေကြသည်။

အိမ်ဖြူတော်၏ အဆိုအရ ထရမ့်သည် ကုန်စည် ဒေါ်လာ ၂၀၀ ဘီလျံဖိုးကို ဇန်နဝါရီလ ၁ ရက်နေ့မှ စတင်ပြီး အခွန် ၂၅ ရာခိုင်နှုန်း ကောက်ခံမည့် အစီအစဉ်ကို ဆိုင်းငံ့ရန် သဘောတူသည်ဟု သိရသည်။ တချိန်တည်းတွင် တရုတ်နိုင်ငံက အတိအကျ မဖော်ပြသော်လည်း စိုက်ပျိုးရေး၊ စွမ်းအင်၊ စက်မှုနှင့် အခြားထုတ်ကုန်များကို အကြီးအကျယ် ဝယ်ယူရန်နှင့် လယ်ယာ ထုတ်ကုန်များ ဝယ်ယူခြင်းကို ချက်ခြင်း တိုးချဲ့မည်ဟု ကတိပြုလိုက်သည်။

နည်းပညာ အတင်းအကျပ် လွှဲပြောင်းပေးရေး၊ ဉာဏပစ္စည်း အကာအကွယ်ပေးရေး၊ ဆိုက်ဘာ ကျူးကျော်မှုနှင့် ခိုးယူမှု၊ ဝန်ဆောင်မှုနှင့် စိုက်ပျိုးရေး စသည့် နယ်ပယ် ၅ ခုတွင် စနစ်ဆိုင်ရာ ပြုပြင်ပြောင်းလဲရေးနှင့် ပတ်သက်သော ဆွေးနွေးမှုများကို ချက်ခြင်း စတင်မည်ဖြစ်သည်။ ရက်ပေါင်း ၉၀ ကျော်သော်လည်း တိုးတက်မှုမရရှိပါက အမေရိကန် ပြည်ထောင်စုသည် စီစဉ်ထားသည့် အခွန်တိုးမြှင့် ချမှတ်ခြင်းကို ဆက်လက် လုပ်ဆောင်မည်ဖြစ်သည်။

ခေါင်းဆောင်နှစ်ဦးတို့သည် ညစာစားပွဲအတွင်း နှစ်နာရီခွဲကျော်ကြာ ဆွေးနွေးခဲ့ကြပြီး ထိုဆွေးနွေးပွဲသည် လွန်စွာ အောင်မြင်ကြောင်း ထရမ့်နှင့် ရှီက ပြောသည်ဟု အိမ်ဖြူတော် ပြန်ကြားရေးအတွင်းဝန် ဆာရာဆန်းဒါးက ထုတ်ပြန်သည့် ကြေညာချက်အရ သိရသည်။

မြောက်ကိုရီးယား နျူကလီးယား လက်နက်ဖျက်သိမ်းရေး အပါအဝင် တခြား ပြဿနာများကို ခေါင်းဆောင် နှစ်ဦး ဆွေးနွေးချိန် ပိုမိုရရှိရန်အတွက် ညစာစားပွဲကို မူလစီစဉ်ထားသည်ထက် တနာရီ ပိုမိုစောစီးစွာ ကျင်းပခဲ့သည်။

အမေရိကန် ဆီမီး ကွန်ဒတ်တာလုပ်ငန်း Qualcomm နှင့် ဒတ်ချ်နိုင်ငံမှ ချစ်ပ် ပြုလုပ်သူ NXP တို့ ပူးပေါင်းမည့် အစီအစဉ်ကို ခွင့်ပြုရန် လမ်းဖွင့်ပေးထားကြောင်းလည်း ရှီက ပြောခဲ့သည်။ ထိုအစီအစဉ်ကို အမေရိကန်နှင့် ဥရောပ အရာရှိများက ခွင့်ပြုခဲ့ပြီးနောက် တရုတ်နိုင်ငံက လက်ဝါးကြီးအုပ်မှု ဖြစ်ပေါ်မည်ဟု ဆိုကာ ပိတ်ဆို့ထားခဲ့သည်။

“ထို အစည်းအဝေးသည် အမေရိကန်နှင့် တရုတ် နှစ်နိုင်ငံစလုံးအတွက် အကန့်အသတ်မဲ့သော အလားအလာများ ဖြစ်ပေါ်စေသည့် အံ့သြဖွယ်ရာ အကျိုးရှိသော အစည်းအဝေးဖြစ်သည်” ဟု ထရမ့်က သူ၏ ကြေညာချက်တွင် ဖော်ပြသည်။

ကုန်သွယ်ရေးမညီမျှမှုကို တဖြည်းဖြည်း ဖြေရှင်းရန် တရုတ်နိုင်ငံသည် အမေရိကန် ကုန်ပစ္စည်းများ ပြည်တွင်း ဈေးကွက်နှင့် ပြည်သူများ၏ ဝယ်လိုအားအရ တင်သွင်းရန် သဘောတူပြီးဖြစ်ကြောင်း ထိပ်သီး အစည်းအဝေးအပြီးတွင် တရုတ် နိုင်ငံခြားရေးဝန်ကြီး ဝမ်ရိက သတင်းထောက်များကို ပြောသည်။ သို့သော် ဆွေးနွေးမှုများ နောက်ဆုံး ပြီးစီး အောင်မြင်အောင် လုပ်မည့်အချိန်နှင့် စနစ်ဆိုင်ရာ ပြုပြင်ပြောင်းလဲမှု အသေးစိတ်ကို တရုတ်နိုင်ငံဘက်က ပြောဆိုခြင်း မရှိပေ။

အမေရိကန် ပြည်ထောင်စုနှင့် တရုတ်နိုင်ငံတို့အကြား တင်းမာမှု မြင့်မားလာခြင်းကြောင့် ကမ္ဘာ့ ဘဏ္ဍာရေးဈေးကွက်နှင့် စီးပွားရေးများတွင် လှုပ်လှုပ်ခါခါ ဖြစ်ခဲ့သည်။ ဥပမာဆိုရပါက အပြန်အလှန် လက်စားချေ အခွန်တိုးမြှင့်သတ်မှတ်ခြင်း၏ ရိုက်ခတ်မှုများကို မခံစားရမီ တတိယ သုံးလပတ်အတွင်း ကမ္ဘာ့ ကုန်သွယ်ရေး ပမာဏမှာ အလယ်အလတ်သာ ရှိခဲ့ကြောင်း CPB Netherlands စီးပွားရေးမူဝါဒ သုတေသနဌာန၏ နိုဝင်ဘာလ ၂၃ ရက်နေ့က စာရင်းများအရ သိရသည်။

အာရှမှ ကုန်ထုတ်လုပ်သူများသည်လည်း ရိုက်ခတ်မှုကို ခံကြရပြီး တချို့သော ဈေးကွက်များသည် Nikkei Purchasing Managers’ Index ကုန်ထုတ်လုပ်မှုနှင့် ဝန်ဆောင်မှုကဏ္ဍ အခြေအနေပြ အညွှန်းကိန်းတွင် သိသိသာသာ ကျုံ့သွား ခဲ့သည်။ စက်တင်ဘာလက ၅၀.၈ ရှိရှာမှ အောက်တိုဘာလ အတွင်း ၄၈.၇ သို့ ကျဆင်းသွားသောကြောင့် ထိုင်ဝမ်၏ PMI သည် သိသိသာသာ ကျဆင်းသွားသည်။ ထိုသို့ ကျုံ့သွားခြင်းမှာ၂၀၁၆ ခုနှစ် မေလနောက်ပိုင်း ပထမဆုံးအကြိမ် ဖြစ်သည်။

စက်မှုထိပ်သီးနိုင်ငံ ၂၀ ထိပ်သီး ဆွေးနွေးပွဲတွင် ခေါင်းဆောင်များသည် အခြေအနေနှင့် ပတ်သက်ပြီး စိုးရိမ်မကင်းကြောင်း ပြောကြားခဲ့ကြသည်။ နိုင်ငံတကာ ငွေကြေးရန်ပုံငွေအဖွဲ့ IMF မန်နေဂျင်းဒါရိုက်တာ ခရစ်စတင်းလာဂတ်က ကုန်သွယ်ရေး စစ်ပွဲ ချက်ခြင်း ရပ်ဆိုင်းရန် တောင်းဆိုသည်။
“ထွန်းသစ်စ ဈေးကွက်များအပေါ် ဖိအား မြင့်တက်နေပြီး ကုန်သွယ်ရေး တင်းမာမှုသည် ဆိုးကျိုးများ စတင် ဖြစ်ပေါ် လာစေကာ ဆုံးရှုံးမှု အန္တရာယ်များ တိုးလာသည်” ဟု ထိပ်သီးဆွေးနွေးပွဲအပြီး ထုတ်ပြန်ကြေညာချက်တွင် သူက ဖော်ပြသည်။

သို့သော် ရေရှည်တည်တံ့သော ငြိမ်းချမ်းရေးရမည်ဟု မျှော်လင့်သည့် တရုတ်ရေးရာ လေ့လာသူ မရှိသလောက်ပင် ဖြစ်နေသည်။

“နှစ်ဖက်စလုံးက ဘယ်လောက်ပဲ ဆုံးဖြတ်ချက် ပြတ်သားနေပါစေ အတင်းအကျပ် နည်းပညာ လွှဲပြောင်းခိုင်းတာ၊ ဉာဏ ပစ္စည်းပိုင်ဆိုင်မှု အကာအကွယ်ပေးရေးနဲ့ ဆိုက်ဘာ ဖောက်ထွင်းမှုလို ရှုပ်ထွေးတဲ့ ပြဿနာတွေကို သုံးလအတွင်း သဘောတူညီမှု ရဖို့ဆိုတာ အရမ်းကို ခက်ခဲတယ်” ဟု အမေရိကန် ကုန်သွယ်ရေး ကိုယ်စားလှယ်၏ လက်ထောက်ဟောင်း ဝင်ဒီ ကပ်တလာက ပြောသည်။

ထို့အပြင် ဇန်နဝါရီလမှ မတ်လ အစောပိုင်းအထိ နောက်ဆုတ်ပေးခဲ့သော သဘောတူညီမှုအတွက် နောက်ဆုံး သတ်မှတ်ရက်သည် တရုတ်နိုင်ငံအတွက် နိုင်ငံရေးအရ လွန်စွာ အရေးပါသော အချိန်ကာလ ဖြစ်နေသည်။

“မတ်လ ၁ ရက်နေ့ဆိုတာ ဘေဂျင်းမှာ နှစ်စဉ် လွှတ်တော်ခေါ်ခါနီး အချိန်။ ဒီလိုအချိန်မှာ ကုန်သွယ်ရေး စစ်ပွဲ ပြန်လည်စဖြစ်ရင် ရှီကျင့်ပင်အတွက် ကသိအအောက်နိုင်တဲ့ အချိန်ပဲ” ဟု သေနင်္ဂဗျူဟာနှင့် နိုင်ငံတကာ လေ့လာရေး ဌာနမှ တရုတ်နိုင်ငံရေးရာဌာ ဒုတိယ ညွှန်ကြားရေးမှူး စကော့ ကနေဒီက ပြောသည်။

မမျှတသော ကုန်သွယ်ရေး အလေ့အထများကြောင့်ဟု ဆိုကာ အမေရိကန်ပြည်ထောင်စုသည် တရုတ်ကုန်စည် ဒေါ်လာ ၂၅၀ ဘီလျံဖိုးအပေါ် အခွန်တိုးမြှင့် ချမှတ်ခဲ့သည်။ တရုတ်နိုင်ငံကလည်း ချက်ခြင်း လက်စားခြေခဲ့သည်။ ယခု နှစ်နိုင်ငံ စလုံးက ကုန်သွယ်ရေး စစ်ပွဲ ခေတ္တရပ်ရန် သဘောတူသော်လည်း အခွန်တိုးမြှင့်မှုများကို ရုပ်သိမ်းခြင်းမရှိပေ။

ထို့ကြောင့် ဆိုင်းငံ့ကြောင်း ကြေညာထားသော်လည်း ကုန်သွယ်ရေးစစ်ပွဲမှာ ဆက်လက်ဖြစ်ပွားနေဆဲ သဘော သက်ရောက်နေသည်။

မူလက ဇန်နဝါရီလတွင် စတင်ရန် စီစဉ်ထားသည့် အခွန်ထပ်မံတိုးမြှင့် ကောက်ခံခြင်းအပြင် နောက်ထပ် တရုတ် ကုန်စည် အမေရိကန်ဒေါ်လာ ၂၆၇ သန်းဖိုးအတွက် အခွန်တိုးမြှင့် နိုင်သည်ဟုလည်း ထရမ့်က ပြောကြားခဲ့သည်။ ထိုသို့ လုပ်ဆောင်ပါက အမေရိကန်သို့ တင်ပို့သည့် တရုတ်ကုန်စည် အားလုံးကို အခွန်တိုးမြှင့် လိုက်ခြင်းပင်ဖြစ်သည်။

ကိုးကား။ ။ Nikkei Asian Review

The post ကန်-တရုတ် ကုန်သွယ်ရေး စစ်ပွဲ တင်းမာမှု ခေတ္တရပ်ဆိုင်း appeared first on ဧရာဝတီ.

ဥရောပ သမဂ္ဂ နိုင်ငံများ (EU) သို့ တင်ပို့နေသည့် ဆန်လုံးရှည် အပေါ် ကုန်သွယ်မှု အထူးအခွင့်အရေး (GSP) ရုပ်သိမ်း၍ အခွန်ကောက်ရေး နှင့် ပတ်သက်ပြီး ယခုလလယ်တွင် ဆုံးဖြတ်မည် ဖြစ်ကြောင်း သိရသည်။

ပြီးခဲ့သည့် နိုင်ဝင်ဘာလ အတွင်းက EU နိုင်ငံများ၏ ကန့်ကွက်မှုကြောင့် မြန်မာနိုင်ငံ အပေါ် GSP ရုပ်သိမ်းရန် သင့်၊ မသင့် ကို မကြာမီ ရက်ပိုင်း အတွင်း ၎င်းတို့က အကြောင်းပြန်မည်ဟု သိရကြောင်း မြန်မာနိုင်ငံ ဆန်စပါး အသင်းချုပ် ဥက္ကဋ္ဌ ဦးအောင်သန်းဦးက ပြောသည်။

EU အဖွဲ့က ရုပ်သိမ်းလိုသည့် ဆန်အမျိုးအစားမှာ ဆန်လုံးရှည် ဖြစ်ပြီး မြန်မာနိုင်ငံမှ အများဆုံး တင်ပို့နေသော ဆန် အမျိုး အစားမှာ ဆန်ကွဲနှင့် ဆန်လုံးပု ဖြစ်ကြောင်း ၎င်းက ပြောဆိုသည်။

ကုန်သွယ်မှု အထူးအခွင့်အရေး (GSP) ဆိုသည်မှာ အချိန်ကာလ တခု အနေဖြင့်သာ ပေးအပ်သည့် အခွန်သက်သာခွင့် အမျိုးအစား တရပ် ဖြစ်ပြီး ဖွံ့ဖြိုးဆဲနိုင်ငံများ အနေနှင့် အခြား ဖွံ့ဖြိုးပြီး နိုင်ငံများနှင့် ယှဉ်ပြိုင်ရာတွင် အထောက်အကူ ပြုစေ ရန် ပေးသည့် အထူး အခွင့်အရေး ဖြစ်သည်။

ယင်းကို မြန်မာနိုင်ငံ အနေဖြင့် ပြီးခဲ့သည့် ၂၀၁၃ ခုနှစ်မှ စတင်၍ ရရှိထားသော်လည်း လက်ရှိတွင် EU နိုင်ငံများက ၎င်းတို့ ၏ အမျိုးသား အကျိုးစီးပွားအရ GSP ကို ရုပ်သိမ်းရန် အတွက် နိုဝင်ဘာလ ဒုတိယ တပတ်အတွင်းက မြန်မာနိုင်ငံ ဆန်စပါး အသင်းချုပ်သို့ အကြောင်းကြားစာ ပေးပို့ခဲ့ခြင်း ဖြစ်သည်။

“အခု EU အခွန် ကိစ္စကို ကျော်လွှားဖို့ မြန်မာနိုင်ငံ အနေနဲ့ သက်ဆိုင်ရာ ဝန်ကြီး ဌာနကို EU ကော်မရှင်ကို တင်ပြ ထား တယ်။ မြန်မာနိုင်ငံက တင်ပို့နေတဲ့ ဆန်ကွဲ၊ ဆန်လုံးပုတွေ မပါဘူး။ ဆန်လုံးရှည်နဲ့ EU ဘက်မှာ ထွက်တဲ့ စပါး အမျိုး အစား လောက်ကိုပဲ အခွန်ကောက်ဖို့ လုပ်တာ။ ဒါကိုလည်း မြန်မာနိုင်ငံ အနေနဲ့ တင်ပြစရာရှိတာ အကုန်လုံးကို တင်ပြ ထားတယ်။ အခု ဒီဇင်ဘာလ အလယ်မှာ အဖြေထွက်မယ်လို့ သိရတယ်”ဟု ဦးအောင်သန်းဦးက ပြောသည်။

ဆန်၊ စပါး စိုက်ပျိုးသော EU နိုင်ငံများ ဖြစ်သည့် စပိန်နှင့် အီတလီနိုင်ငံတို့က GSP အခွင့်အရေး ရရှိထားသော မြန်မာနှင့် ကမ္ဘောဒီးယား နိုင်ငံတို့မှ ဆန်နှင့် ဈေးနှုန်း ယှဉ်ပြိုင် ရောင်းချနိုင်ခြင်း မရှိသဖြင့် GSP ရုပ်သိမ်းရန် EU အဖွဲ့သို့ တင်ပြထား ခြင်း ဖြစ်ကြောင်း ဦးအောင်သန်းဦးက ဆိုသည်။

ဆက်လက်၍ ၎င်းက“နောက်ပြီးတော့ ဝယ်စားတဲ့ နိုင်ငံ တော်တော်များများကလည်း ဈေးသက်သာတာပဲ လိုချင်တာ ဖြစ် တဲ့ အတွက် EU နိုင်ငံ တော်တော်များများက ကျနော်တို့ဘက်ကပဲ ရပ်တည်မှာ ဖြစ်ပါတယ်။ မဲခွဲ ဆုံးဖြတ်ပြီးမှ အဖြေ သိရ မှာ ပေါ့”ဟု ပြောသည်။

လက်ရှိ EU နိုင်ငံများသို့ ဆန်တင်ပို့သည့် မြန်မာ ကုမ္ပဏီ ၁၅ ခု ရှိပြီး တင်ပို့ရာ၌ ဆန်ကွဲကို ၆၅ ရာခိုင်နှုန်းဖြင့် အများဆုံး တင်ပို့ကာ ဆန်ချော ၃၅ ရာခိုင်နှုန်း၊ ဆန်လုံးရှည်ကို ၁၀ မှ ၁၅ ရာခိုင်နှုန်းခန့်သာ တင်ပို့ခြင်း ဖြစ်ကြောင်း မြန်မာနိုင်ငံ ဆန်စပါး အသင်းချုပ်က ဆိုထားသည်။

မြန်မာနိုင်ငံမှ ဆန်ကွဲ တန်ချိန် ၃ သိန်းနှင့် ဆန်ဖြူ တန်ချိန် ၁ သိန်းကျော်နှင့် စုစုပေါင်း တန်ချိန် ၄ သိန်းကျော် EU ဈေးကွက် သို့ နှစ်စဉ် တင်ပို့လျက်ရှိကြောင်း မြန်မာနိုင်ငံ ဆန်စပါး အသင်းချုပ်က သိရသည်။

The post မြန်မာ့ ဆန်လုံးရှည် အခွန်ကောက်ရေး EU ယခုလ ဆုံးဖြတ်မည် appeared first on ဧရာဝတီ.

တရုတ်နိုင်ငံမှ ရထားတွဲများဝယ်ရန် တရုတ်နိုင်ငံမှ ယွမ် သန်း ၈၀ (ဒေါ်လာ ၁၁.၆ သန်း) ချေးယူမည့် အစိုးရ၏ အစီအစဉ်ကို လွှတ်တော်က ခွင့်ပြုလိုက်သည်။

ရိုးရိုးတန်းရထားတွဲ ၁၄ တွဲနှင့် ပထမတန်း ရထားတွဲ ၁၄ အပါအဝင် စုစုပေါင်း ၂၈ တွဲကို ရန်ကုန်မန္တလေး ရထားလမ်းတွင် အသုံးပြုမည်ဖြစ်သည်။ သယ်ယူပို့ဆောင်ရေးနှင့် ဆက်သွယ်ရေးဝန်ကြီးဌာန၏ အဆိုအရ ထိုရထားလမ်းပိုင်းကို နေ့စဉ် လူ ၁၀၀၀ ခန့်အသုံးပြုနေကြပြီး တတွဲလျှင် တနေ့ ကျပ်သုံးသန်း (ဒေါ်လာ ၁၉၀၀) ခန့် ဝင်ငွေရရှိနေသည်ဟု သိရသည်။

ရထားတွဲသစ်များဖြင့် ခရီးသည်များ ပိုမိုဘေးကင်းလုံခြုံ အဆင်ပြေရေးနှင့် မြန်မာ့မီးရထား၏ ဝင်ငွေကို မြှင့်တင်ခြင်းတို့ဖြင့် ဝန်ဆောင်မှု တိုးတက်စေရန် ရည်ရွယ်ကြောင်း သယ်ယူပို့ဆောင်ရေးနှင့် ဆက်သွယ်ရေးဝန်ကြီး ဦးသန့်ဇင်မောင်က ပြည်ထောင်စု လွှတ်တော်တွင် လွန်ခဲ့သောလက ပြောကြားခဲ့သည်။

ထိုအတိုးမဲ့ချေးငွေ ရယူရေးအတွက် လွှတ်တော်ကိုယ်စားလှယ်များသည် နိုဝင်ဘာလ ၁၅ ရက်နေ့က ဆွေးနွေးခဲ့ကြသည်။ ပဲခူးတိုင်း အုတ်တွင်းမြို့နယ်မှ လွှတ်တော်ကိုယ်စားလှယ် ဒေါ်ချိုချိုက တာဝန်ရှိသူများအနေဖြင့် ကုန်ကျစရိတ်ကို ဂရုစိုက် စစ်ဆေးရန် တိုက်တွန်းသည်။

“အတိုးမဲ့ချေးငွေဆိုပေမယ့် ပစ္စည်းကို သူတို့ဆီကပဲ ပြန်ဝယ်နေရတယ်။ ဒီတော့ ရထားတွဲတွေရဲ့ အရည်အသွေးကောင်း မကောင်း၊ ဈေးနှုန်း မှန်မမှန် စစ်ဖို့အရေးကြီးတယ်။ တခြားနိုင်ငံတွေက ဝယ်ထာထက် ပိုကုန်ကျနေလား စစ်ဖို့လိုတယ်။ အတိုးမဲ့မဲ့ မမဲ့မဲ့ ချေးထားတဲ့ငွေကတော့ ပြန်ဆပ်ရမှာပဲ” ဟု ဒေါ်ချိုချိုပြောသည်။

ဒေါ်ချိုချိုထောက်ပြသော အချက်သည် လုံးဝမှန်ကန်ကြောင်း စီမံကိန်းနှင့် ဘာဏ္ဍာရေးဒုတိယ ဝန်ကြီး ဦးမောင်မောင်ဝင်းက ဒီဇင်ဘာလ ၃ ရက်နေ့တွင်ပြောသည်။

“သက်ဆိုင်ရာ ဝန်ကြီးဌာန အနေနဲ့ ချေးငွေရဲ့ နောက်ဆက်တွဲ စာချုပ်ချုပ်တဲ့အခါ တိုင်းပြည်အတွက် မနစ်နာအောင် လုပ်ဖို့ လိုတယ်” ဟု ဒုဝန်ကြီးက ပြောသည်။

The post တရုတ်လုပ် ရထားတွဲဝယ်ရန် တရုတ်ထံမှ ငွေချေးရေး လွှတ်တော် ခွင့်ပြု appeared first on ဧရာဝတီ.

လက်ပံတောင်း ကြေးနီ စီမံကိန်းလုပ်ကိုင်နေသော တရုတ်ကုမ္ပဏီက ကြေးနီထပ်မံ တူးဖော်ရေးအတွက် စစ်ကိုင်းတိုင်း မုံရွာမြို့နယ် ယင်းမာပင်ဒေသတွင် မြေယာ စစ်ဆေးခြင်းပြုလုပ်ရန် လျှောက်ထားလာသော ကြောင့် ဒေသခံများမှာ သဘာဝပတ်ဝန်းကျင်ထိခိုက်မှုနှင့် မြေယာ အသိမ်းခံရမည့် အရေးအတွက် ထပ်မံ ပူပင်နေကြရသည်။

ဘေဂျင်း အခြေစိုက် ဝမ်ပေါင် သတ္တုတူးဖေါ်ရေး လီမိတက်၏ လုပ်ငန်းခွဲတခု ဖြစ်သော မုံရွာမြို့နယ် ဆားလင်းကြီး ရှိ လက်ပံတောင်း ကြေးနီတူးဖေါ်ရေးနယ်မြေတွင် လုပ်ကိုင်နေသော မြန်မာယန်စီ ကြေးနီလီမိတက်သည် ဆားလင်းကြီး၊ ယင်းမာပင်နှင့် ကန္နီ မြို့နယ်များတွင် နောက်ထပ်ကြေးနီတူးဖေါ်ရန်အတွက် မြေဧက တသိန်းကျော်တွင် ပဏာမ မြေယာစစ်ဆေးမှုပြုလုပ်ရန် လျှောက်ထားခဲ့သည်။

ထိုသို့ခွင့်ပြုချက်လျှောက်ထားခြင်းကို နိုဝင်ဘာလ ၂၉ ရက်နေ့က တိုင်းအစိုးရသို့ လျှောက်ထားခဲ့ပြီး ခွင့်ပြုချက်မှာမူ ချထားပေးခြင်း မရှိသေးကြောင်း တိုင်းအစိုးရ အရာရှိများ၏အဆိုအရ သိရသည်။

“အဲဒီကုမ္ပဏီက မြေယာ စစ်ဆေးဖို့ လျှောက်ထားလာပြီး သူတို့နဲ့ အစိုးရအရာရှိတွေ နိုဝင်ဘာလကုန်က တွေ့ခဲ့ကြတယ်။ ဒါကို အစိုးရက စဉ်းစားနေတုန်းပဲ။ ဘာခွင့်ပြုချက်မှ ချမပေးရသေးဘူး” ဟု စစ်ကိုင်းတိုင်း စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီး ဦးကမ်ဇမုံက ဧရာဝတီ သတင်းဌာနသို့ ပြောသည်။

ထိုကုမ္ပဏီသည် ကန္နီ၊ ယင်းမာပင်နှင့် ဆားလင်းကြီးမြို့နယ်များအနီး မြေဧက တသိန်းတွင် မြေစစ်ဆေးရေးစီမံကိန်းအတွက် အမေရိကန်ဒေါ်လာ ၆ သန်းမှ ၁၀ သန်းအထိ ရင်းနှီးမြှုပ်နှံသွားမည်ဖြစ်သော်လည်း စီမံကိန်း အသေးစိတ်အစီအစဉ်ကို မသိရသေးပေ။

“မြေစစ်ဆေးဖို့ ခွင့်ပြုရင်တောင်မှ အဲဒီနေရာမှာ သူတို့ သတ္တုတူးဖို့ ခွင့်ပြုတယ်လို့ မဆိုလိုဘူး။ လက်ပံတောင်းမှာ လောလောဆယ်ဖြစ်နေတဲ့ ပြဿနာတွေကိုတောင်မှ မရှင်းရသေးလို့ ကျနော်တို့လည်း စိုးရိမ်မှုရှိပါတယ်” ဟုလည်း သူပြောသည်။

သို့သော် မြန်မာယန်စီ ကြေးနီလီမိတက်သည် မြေနမူ စစ်ဆေးမှုများကို နေရာအချို့တွင် စတင်လုပ်ကိုင်နေသည်ဆိုသည့် ကောလာဟလများမှာ ဒေသခံများအကြားတွင် ပျံ့နှံ့နေသည်။ ဒေသခံများသည် လက်ပံတောင်း သတ္တုမိုင်းကြောင့် ပတ်ဝန်းကျင်ထိခိုက်မှုများနှင့် အတင်းအကျပ် ရွှေ့ပြောင်းခံရခြင်းများကို ကိုယ်တိုင် မြင်တွေ့ခဲ့ရသည်ဖြစ်၍ အလားတူဖြစ်ရပ်မျိုးကို သူတို့ဒေသတွင် မကြုံတွေ့လိုကြောင်း ဆိုကြသည်။

“အဲဒီ ကုမ္ပဏီက စက်ပစ္စည်းတွေနဲ့ မြေစမ်းဖို့ သူတို့ဒေသကို လာတာတွေ ရှိတယ်လို့ ယင်းမာပင်နဲ့ ကန္နီက ဒေသခံတွေက ကျနော်တို့ကို ပြောတယ်။ သူတို့ဒေသ လက်ပံတောင်းလို ဖြစ်သွားမှာကို ဒေသခံတွေက စိုးရိမ်နေကြတယ်” ဟု ကန္နီမြို့နယ်မှ လွှတ်တော်ကိုယ်စားလှယ် ဦးထွန်းထွန်းဝင်းက ပြောသည်။

ကြေးနီတူးဖေါ်ရန် မြန်မာယန်စီ ကြေးနီကုမ္ပဏီက မျက်စိကျနေသောနေရာတွင် ရွာပေါင်း အနည်းဆုံး ၃၀ ရှိပြီး လယ်မြေဧက ထောင်ပေါင်းများစွာ ရှိနေသည်။ ကန္နီမြို့နယ်တွင် မီးတောင်သေ နှစ်လုံးရှိပြီး ၎င်းတို့သည် စစ်ဆေးမည့် နေရာတွင် ပါဝင်နေသည်။

“ဒေသတွင်းက လွှတ်တော်ကိုယ်စားလှယ်တွေအနေနဲ့ ဒေသထဲမှာ ပတ်ဝန်းကျင်ကို ခြိမ်းခြောက်တဲ့ စီမံကိန်း တခု ထပ်မလိုချင်တော့ဘူး။ ပြည်သူ့အသံနဲ့ အချက်အလက်တွေကောက်ခံပြီး ဒီဒေသမှာ သတ္တုတူးခွင့် ထပ်မပြုဖို့ လွှတ်တော်ကို တင်သွင်းသွားမယ်” ဟု ယင်းမာပင်မြို့နယ်မှ လွှတ်တော်ကိုယ်စားလှယ် ဒေါ်အောင်မာရီ ကပြောသည်။

တပ်မတော်ပိုင် ပြည်ထောင်စု မြန်မာနိုင်ငံ စီးပွားရေး ဦးပိုင်လီမိတက်နှင့် တရုတ်နိုင်ငံ ဝမ်ပေါင် လုပ်ငန်းတို့အကြား ဖက်စပ်ဖြစ်သော ပထမ လက်ပံတောင်းကြေးနီ စီမံကိန်းကို ၂၀၁၀ ခုနှစ်က စတင်ခဲ့သည်။

ဆားလင်းကြီး မြို့နယ်အတွင်းမှ မြေ ၇၈၀၀ ဧကခန့်ကို စီမံကိန်းအတွက် သိမ်းယူခဲ့ပြီး မြေယာလျှော်ကြေး ပေးချေမှု နည်းခြင်းနှင့် ပတ်ဝန်းကျင် ထိခိုက်မှုများကြောင့် ၂၀၁၂ ခုနှစ်မှ စတင်ပြီး ထိုစီမံကိန်းသည် ဒေသခံများ၏ ပြင်းထန်သော ဆန့်ကျင်မှုကို ခံနေရသည်။

The post မြန်မာယန်စီ ကြေးနီစီမံကိန်းကုမ္ပဏီက ထပ်တိုးမြေဧက တသိန်းလျှောက်ထား appeared first on ဧရာဝတီ.

ကမ္ဘာပေါ်မှာ အကြားအာရုံ မသန်စွမ်းတဲ့ ကလေးငယ်ပေါင်း ၃၂ သန်း ကျော် ရှိပါတယ်။ ဒီကလေးငယ်တွေထဲက ၉၀ ရာခိုင်နှုန်းလောက်ဟာ အကြားအာရုံ ကောင်းမွန်တဲ့ မိဘနှစ်ပါးက မွေးဖွားလာသူတွေ ဖြစ်ပါတယ်။

အကြားအာရုံ မသန်စွမ်း ကလေးငယ်တွေဟာ စာဖတ်ရာမှာ အခက်အခဲများစွာ ရင်ဆိုင်ရပါတယ်။ မိဘနဲ့ ဆရာ၊ ဆရာမ အများစုကလည်း “Sign Language” လို့ ခေါ်တဲ့ လက်သင်္ကေတပြ ဘာသာ စကားကို မတတ်ကျွမ်းကြတဲ့အတွက်၊ ကလေးတွေဟာ စာရွက်ပေါ်က စကားလုံးတွေနဲ့ လက်တွေ့ ဘဝအတွေ့အကြုံတွေကြား ဆက်စပ်မှုကို နားမလည်နိုင်ကြပါဘူး။

ဒါပေမဲ့ ဒီအခက်အခဲတွေကို ကူညီဖြေရှင်းပေးမယ့် App တခုကို Huawei က ထုတ်ပေးလိုက်ပါပြီ။ “StorySign” လို့ အမည်ရပြီး၊ Android မှာပဲ အသုံးပြုနိုင်မှာပါ။ StorySign ရဲ့ အလုပ်လုပ်ပုံကတော့ ကလေးဖတ် စာအုပ်တွေက စာသားတွေကို ဖုန်းကင်မရာနဲ့ ချိန်ရိုက်လိုက်တာနဲ့ စကားလုံးတလုံးချင်းစီကို ကာတွန်းအရုပ်လေးတွေက လက်သင်္ကေတပြ ဘာသာစကားနဲ့ ဖော်ပြပေးမှာ ဖြစ်ပါတယ်။

ယခု App ကိုတော့ Huawei ၊ အကြားအာရုံမသန်စွမ်းသူများ ဥရောပသမဂ္ဂအဖွဲ့၊ Penguin Books စာအုပ်တိုက် နဲ့ Aardman Animation တို့ ပူးပေါင်း ဖန်တီးထားတာပါ။

ပုံဖတ်သားမှု Image Recognition နဲ့ အက္ခရာစာလုံး ဖတ်သားမှု Optical Character Recognition စတဲ့ Huawei AI Tools တွေကို အသုံးပြုပြီး စာအုပ်ပေါ်က စာလုံးတွေကို Sign Language အဖြစ် အသက်သွင်းပေးမှာ ဖြစ်ပါတယ်။ Image Recognition ကြောင့် စာအုပ်ကို စောင်းကိုင်ထားရင်တောင် အလုပ်လုပ်တယ်လို့ Huawei က ဆိုပါတယ်။

StorySign App ကို Google Play  ကနေ Download ပြုလုပ်နိုင်သလို၊ Huawei ရဲ့ ကိုယ်ပိုင် App Store “AppGallery” ကနေလည်း ဥရောပဈေးကွက် ၁၀ ခုမှာ ယနေ့ကစ Download လုပ်နိုင်ပါပြီ။ Android 6.0 နဲ့ အထက် ဖုန်းတိုင်းမှာ အသုံးပြုနိုင်မှာပါ။

Sign Language ဟာ တနိုင်ငံနဲ့ တနိုင်ငံ မတူညီတာကြောင့် StorySign မှာလည်း မိမိ အသုံးပြုလိုတဲ့ Sign Language ကို အရင် ရွေးချယ်ပေးရမှာ ဖြစ်ပါတယ်။ လောလောဆယ်မှာတော့ “Where’s Spot?” ဆိုတဲ့ စာအုပ်တအုပ်ပဲ ဖတ်နိုင်ပါသေးတယ်။ နောက်ပိုင်းမှာ စာအုပ်အသစ်တွေ ထပ်မံ ပါဝင်လာဖို့ ရှိတယ်လို့ သိရပါတယ်။

Ref: Engadget, Venture Beat

The post အကြားအာရုံ မသန်စွမ်း ကလေးငယ်တွေကို စာဖတ်ပြမယ့် Huawei App appeared first on ဧရာဝတီ.

Skype ဟာ အကြားအာရုံ မသန်စွမ်းသူတွေကို ကူညီဖို့အတွက် ဗီဒီယိုခေါ်ဆိုမှု (Video Call) တွေမှာ အချိန်နဲ့တပြေးညီ စာတန်း ထိုးပေးတော့မှာ ဖြစ်ပါတယ်။ နည်းပညာ ကုမ္ပဏီတွေဟာ အကြားအာရုံ မသန်စွမ်းသူတွေပါ အဆင်ပြေပြေ အသုံးပြုနိုင်ဖို့အတွက် ပြင်ဆင်လာကြတာ တွေ့ရပါတယ်။

Microsoft ဟာ မကြာသေးခင်ကတင် PowerPoint မှာလည်း အချိန်နဲ့ တပြေးညီ စာတန်း ထိုးပေးတော့မှာ ဖြစ်ကြောင်း ကြေညာခဲ့ပြီး၊ အခု Skype မှာလည်း အလားတူ လုပ်ဆောင်ချက် ထည့်ပေးမှာ ဖြစ်ကြောင်း ပြောကြားလိုက်တာပါ။ ယနေ့မှာပဲ Huawei ကလည်း နားမကြား ကလေးငယ်တွေကို လက်သင်္ကေတပြ ဘာသာစကားနဲ့ စာဖတ်ပြပေးမယ့် App တခုကို ထုတ်ပေးခဲ့ပါသေးတယ်။

Microsoft ဟာ Skype မှာလည်း PowerPoint ကလိုပဲ Artificial Intelligence နည်းပညာနဲ့ Video Call တွေကို အင်္ဂလိပ်ဘာသာစကားနဲ့ စာတန်းထိုးပေးမှာ ဖြစ်ပါတယ်။

Video Call ခေါ်နေတုန်း “more” ဒါမှမဟုတ် (+) ခလုတ်ကို နှိပ်ပြီး၊ စာတန်း ဖော်နိုင်ပါတယ်။ နောက်ထပ် တကူးတက ဖွင့်နေစရာမလိုဘဲ၊ Video Call တိုင်းမှာ စာတန်းထိုးပြဖို့ကိုလည်း Default အနေနဲ့ ရွေးထားနိုင်မှာ ဖြစ်တယ်လို့ သိရပါတယ်။

Skype စာတန်းထိုး လုပ်ဆောင်ချက်ကို တဦးချင်း ခေါ်ဆိုမှုနဲ့ အုပ်စုလိုက် ခေါ်ဆိုမှုတွေမှာပါ အသုံးပြုနိုင်မှာ ပါ။ ဗီဒီယိုပြောနေတုန်းမှာ စာတန်းက အချိန်နဲ့ တပြေးညီ အလိုလိုကျလာ (Auto-scroll) မှာ ဖြစ်တဲ့အတွက် အကြားအာရုံ မသန်စွမ်းသူတွေအနေနဲ့ ပြောသမျှ နားလည်နိုင်မှာ ဖြစ်ပါတယ်။

ဒါ့အပြင် တဖက်က အင်္ဂလိပ်လို ပြောတာကို နားလည်ဖို့ အာရုံစိုက် နားထောင်နေရသူတွေအတွက်လည်း စာတန်း ထိုးပေးတာက တော်တော်အသုံးဝင်ပါလိမ့်မယ်။ ယခု လုပ်ဆောင်ချက်အသစ်ကို Android ၊ iOS ၊ Linux ၊ Mac နဲ့ Windows OS တို့က Skype Version 8 မှာ စတင် အသုံးပြုနိုင်မှာ ဖြစ်ပါတယ်။ ထွက်ရှိဖို့တော့ အချိန်အနည်းငယ် လိုပါဦးမယ်။

Microsoft ဟာ Skype မှာ ဘာသာစကား ၂၀ ကျော် ဘာသာပြန်ပေးနိုင်မယ့် လုပ်ဆောင်ချက်အသစ်တမျိုးကိုလည်း လာမယ့် ရက်သတ္တပတ်အတွင်း ထည့်ပေးဖို့ ပြင်ဆင်နေတယ်လို့ သိရပါတယ်။

Ref: The Verge, Appuals

The post Skype ဗီဒီယိုခေါ်ဆိုမှုတွေမှာ စာတန်း တိုက်ရိုက် ထိုးပေးမည် appeared first on ဧရာဝတီ.

ဂျပန် ကုမ္ပဏီ ၂ ခုဖြစ်တဲ့ Toyota နဲ့ NTT DOCOMO တို့ ပူးပေါင်းပြီး T-HR3 ဆိုတဲ့ လူပုံစံ စက်ရုပ်တရုပ်ကို ပြသခဲ့ပါတယ်။ T-HR3 စက်ရုပ်ဟာ 5G ကွန်ရက်လိုင်း သုံးပြီး အဝေးက ထိန်းချုပ်နိုင်တဲ့ စက်ရုပ်ဖြစ်ပါတယ်။ စမ်းသပ်မှုမှာ လူသား ဝန်ထမ်းတဦးဟာ အဝေးထိန်းကိရိယာနဲ့ ၆ မိုင်အကွာအဝေးမှာ ရှိတဲ့ စက်ရုပ်ကို အောင်မြင်စွာ ထိန်းချုပ်ပြနိုင်ခဲ့ပါတယ်။

Toyota ဟာ အခြေအနေ အရပ်ရပ်မှာ လူသားကဲ့သို့ ပြုမူလှုပ်ရှားနိုင်တဲ့ တွဲဖက် စက်ရုပ်မျိုးကို ဖန်တီးဖို့ ရည်ရွယ်ချက်နဲ့ T-HR3 စက်ရုပ်ကို ဖန်တီးခဲ့တာ ဖြစ်တယ်လို့ ဆိုပါတယ်။ ကျန်းမာရေးစောင့်ရှောက်မှုတွေနဲ့ အိမ်တွင်းလုပ်ငန်းတွေ မှာလည်း အသုံးပြုဖို့အတွက် Toyota က စဉ်းစားထားပါတယ်။

T-HR3 စက်ရုပ်ဟာ ခြေတဖက်တည်းနဲ့ ဟန်ချက်ထိန်း ရပ်ပြတာကနေ ပူဖောင်းကို မပေါက်အောင် ဖိညှစ်ပြတာမျိုးအထိ လူသားထိန်းချုပ်သူရဲ့ လှုပ်ရှားမှုတိုင်းကို တုပ ဆောင်ရွက်နိုင်ပါတယ်။

လှုပ်ရှားမှု အမူအရာတွေကို စက်ရုပ်ဆီ တိုက်ရိုက် ပေးပို့ ဆက်သွယ်နိုင်ဖို့အတွက် Sensor စနစ်မျိုးစုံ တပ်ဆင်ထားတဲ့ “Master Maneuvering System” အမည်ရ အဝေးထိန်းစနစ်ကို အဓိက အသုံးပြုထားတယ်လို့ Toyota က ဆိုပါတယ်။

Master Maneuvering System ဟာ အကြမ်းဖျဉ်းအားဖြင့် လှုပ်ရှားနိုင်တဲ့ လက်၊ ခြေထောက်နဲ့ ဆန်ဆာတွေ ပါဝင်တဲ့ ထိုင်ခုံတလုံး ပုံစံပါ။ T-HR3 စက်ရုပ်မှာတော့ လည်ပတ်လှုပ်ရှားမှုတွေ ပြုလုပ်နိုင်တဲ့ Torque Servo Modules ၂၉ ခု တပ်ဆင်ထားပါတယ်။

အဝေးထိန်းချုပ်သူအနေနဲ့ VR Headset တခု တပ်ဆင်ရမှာဖြစ်ပြီး၊ စက်ရုပ် မြင်ကွင်းကို 3D မြင်ကွင်းနဲ့ တိုက်ရိုက် ပြန်မြင်ရမှာဖြစ်တာကြောင့် ပိုမိုတိကျစွာ ထိန်းချုပ်ဆောင်ရွက်နိုင်မှာ ဖြစ်ပါတယ်။ ဒါ့အပြင် စက်ရုပ်အပေါ် သက်ရောက် လာတဲ့ အားတွေကိုလည်း ထိန်းချုပ်သူက ခံစားနိုင်မှာပါ။

T-HR3 စက်ရုပ်ကို 5G ကွန်ယက်ပေါ်မှာ စမ်းသပ်တာက ယခု ပထမဆုံးအကြိမ်ဖြစ်ပြီး၊ အရင်က ကြိုးတပ်ပြီးပဲ စမ်းသပ်ခဲ့တာ ဖြစ်တယ်လို့ သိရပါတယ်။ 5G ကွန်ယက်နည်းပညာကိုတော့ DOCOMO က ထောက်ပံ့ပေးထားပြီး၊ စက်ရုပ်နဲ့ ထိန်းချုပ်သူတို့ဟာ နှောင့်နှေးမှုမရှိ ဆက်သွယ် ဆောင်ရွက်နိုင်တာကို တွေ့မြင်ရမှာပါ။

T-HR3 စက်ရုပ်ဟာ အမြင့် ၅ ပေရှိပြီး၊ အလေးချိန် ၇၄ ကီလိုဂရမ် ရှိပါတယ်။ လူသားတွေအတွက် ပြုလုပ်ထားတဲ့ ပစ္စည်းကိရိယာအမျိုးမျိုးကို ကိုင်တွယ်၊ ထိန်းချုပ်နိုင်ဖို့အတွက် ဝင်ရိုး ၃၂ ခု နဲ့ လက်ချောင်း ၁၀ ချောင်းတို့ ပါဝင်ပါတယ်။

Ref: DailyMail, SlashGear

The post ၆ မိုင် အကွာကနေ ထိန်းချုပ်နိုင်တဲ့ စက်ရုပ်ကို Toyota ပြသ appeared first on ဧရာဝတီ.

မန္တလေးမြို့ ကျုံးအရှေ့ဘက်ခြမ်းတွင် နေ့ ည ဖွင့်လှစ်နိုင်သည့် ဈေးသစ်တခုအား ယခုဘဏ္ဍာနှစ်အတွင်း တည်ဆောက်နိုင်ရန် စီစဉ်နေကြောင်း မန္တလေးမြို့တော် စည်ပင်သာယာရေး ကော်မတီထံမှ သိရသည်။

အဆိုပါဈေးကို အောင်မြေသာစံမြို့နယ်၊ ၆၂ လမ်းနှင့် ၆၆ လမ်းကြား၊ ၁၄ လမ်း (ကျုံးအရှေ့ဘက်) တလျှောက်တွင် တည်ဆောက်မည်ဖြစ်ကာ အကောင်အထည်ဖော် ဆောင်ရွက်ရေး ကော်မတီ ဖွဲ့စည်းပြီး ဖြစ်သည်။

ဈေးသစ်အတွက် မြေတိုင်းခြင်း၊ မြေပြုပြင်ခြင်း၊ ရေမြောင်းစနစ် ပြုပြင်ခြင်းများကို ပထမဦးစား လုပ်ဆောင်မည်ဖြစ်ကာ လမ်းခင်းခြင်း၊ သစ်ပင်များ စိုက်ပျိုးခြင်းတို့ ပြုလုပ်ပြီးမှသာ အကောင်အထည်ဖော် ဆောက်လုပ်မည် ဖြစ်သည်ဟု သိရသည်။

မန္တလေးမြို့တော် စည်ပင်သာယာရေး ကော်မတီဝင် ဦးကျော်ဆန်းမြင့်က “ကျုံးအရှေ့ဘက်ကို ညပိုင်းအချိန်မှာ စည်စည်ကားကားလေးနဲ့ စားစရာတွေကို ဝယ်ယူစားသုံးလို့ရမယ့်အပြင် အပန်းဖြေ အနားယူနိုင်အောင်အတွက်ပါ ဈေးတန်းတခု ဖော်ဆောင်ပေးတာပါ၊ ခေတ်မီဆိုင်ခန်းတွေ ဆောက်ရမှာဆိုတော့ လုပ်ငန်းအဆင့်တွေများတဲ့ အတွက် ၂ဝ၁၉ ခုနှစ်လောက်မှ ဈေးက အကောင်အထည် ပေါ်လာမှာပါ” ဟု ပြောသည်။

ဈေးကို ကျုံးအရှေ့ဘက် ၁၄ လမ်းရှိ ရေဆိုးမြောင်းအား ကြိုတင် ပုံစံလောင်းထားသည့် ကွန်ကရစ်တုံး (Concrete Pre-cast) များဖြင့် ပြန်လည်ပြုပြင်ကာ ခေတ်မီ ဆိုင်ခန်းများ တည်ဆောက်မည် ဖြစ်ပြီး အပန်းဖြေအနားယူနိုင်သည့် ပန်းခြံတခုလည်း ပါဝင်မည်ဟု သိရသည်။

“Precast မြောင်းတွေရဲ့ အားသာချက်တွေက အများကြီးပါ။ စက်ရုံထုတ်ဖြစ်လို့ အရည်အသွေးကို တိတိကျကျ ထိန်းသိမ်းနိုင်သလို အလေအလွင့်မရှိလို့ အုတ်စီမြောင်း ကုန်ကျစားရိတ်ထက် သက်သာပါတယ်။ အုတ်စီမြောင်းနဲ့ ယှဉ်ရင် တည်ဆောက်ချိန် အရမ်းမြန်ပါတယ်။ မြောင်းဖုံးနဲ့ မြောင်းက ကွက်တိဖြစ်နေလို့ လူတက်လျှောက်လို့ရတော့ လျှောက်လမ်း ကျဉ်းတဲ့ နေရာတွေအတွက် လူသွားလမ်း ပိုကျယ်လာပါတယ်။ အဲဒီလိုလုပ်ပြီးတော့မှ ဈေးကို အကောင်အထည် ဖော်မှာပါ”ဟု မန္တလေး မြို့တော်ဝန် ဒေါက်တာရဲလွင်က ၎င်း၏ လူမှုကွန်ရက် facebook စာမျက်နှာတွင် ရေးသားထားသည်။

ဈေးတွင် အစားအသောက်နှင့် ဒေသထွက်ကုန် အရောင်းဆိုင်များ၊ ပြည်တွင်း/ပြည်ပ ခရီးသွားများအတွက် အမှတ်တရ ပစ္စည်းအရောင်းဆိုင်များ၊ စာအုပ်ဆိုင်များ ပါဝင်မည်ဖြစ်ကာ တနေရာတည်းတွင် တစုတစည်းတည်း ဝယ်ယူစားသောက်နိုင်မည့် စားသောက်ဆိုင်တန်းများလည်း ပါဝင်မည်ဟု သိရသည်။

ဈေးသစ် တည်ဆောက်ပြီးပါက ဆိုင်ခန်းဖွင့်လိုသူများကို အငှားစနစ်ဖြင့် နေရာချထားပေးမည်ဖြစ်ကာ သတ်မှတ် ကုန်ပစ္စည်းများသာ ရောင်းချနိုင်ရေးအတွက် စည်းကမ်းချက်များ ထုတ်ပြန်သွားမည်ဟု မန္တလေး စည်ပင်ကော်မတီထံမှ သိရသည်။

မန္တလေးမြို့ခံ စာရေးဆရာ သိုက်ထွန်းသက်က “အဓိကကတော့ ကားပါကင် နေရာက အရေးကြီးပါတယ်။ ဒါကို ထည့်သွင်း စဉ်းစားသင့်တယ်။ အရေးကြီးဆုံးကတော့ သန့်သန့်ရှင်းရှင်းနဲ့ တရားဥပဒေ စိုးမိုးမှုရှိတဲ့ ဈေးတခု ဖြစ်ဖို့လိုပါတယ်။ ထပ်ပြောရမယ်ဆိုရင် အခုဈေးကိုလည်း ကြိုဆိုသလို အခြားဈေးတွေကိုလည်း အဆင့်မြှင့်တင် ပြုပြင်မှုတွေ ပြုလုပ်ပေးသင့်တယ်” ဟု ပြောသည်။

The post မန္တလေးကျုံးရှေ့ နေ့ ည ဖွင့်သည့် ဈေးသစ် ဆောက်မည် appeared first on ဧရာဝတီ.