ထိုင်းနိုင်ငံ၊ ဘန်ကောက်မြို့မှာ မီးခိုးမြူတွေ ပိုမိုများပြားလာတဲ့အတွက် ကြာသပတေးနေ့မှာ ဒရုန်း အစီး ၅၀ အသုံးပြုကာ လေထုထဲ ရေ ပက်ဖျန်းခဲ့ပါတယ်။

အဆိုပါဒရုန်းတွေကို ဘန်ကောက်မြို့တော်အုပ်ချုပ်ရေးအဖွဲ့ (Bangkok Metropolitan Administration “BMA”) က စိုက်ပျိုးရေးအသင်းတခုထံကနေ ငှားရမ်း အသုံးပြုခဲ့တာပါ။ ဘန်ကောက်မြို့တော် နယ်မြေ ၆ ခုမှာ မီးခိုးမှုန့်တွေ လျော့ချနိုင်ဖို့အတွက် ရေတွေပက်ဖျန်းသွားမှာ ဖြစ်တယ်လို့ ဘန်ကောက် မြို့တော်ဝန် Pol Gen Aswin Kwanmuang က ပြောကြားခဲ့ပါတယ်။

ဘန်ကောက်မြို့ရဲ့ ပိုမိုဆိုးဝါးလာတဲ့ လေထုညစ်ညမ်းမှု ပြဿနာကို ဖြေရှင်းဖို့အတွက် ဒရုန်းတွေကို ပထမဆုံးအကြိမ် အသုံးပြုခြင်းလည်း ဖြစ်ပါတယ်။

မီးခိုးမြုမှုန့်တွေ လျော့ချဖို့အတွက် ဒရုန်း ၅ စီးကို ဘန်ကောက်မြို့တော်ခန်းမရှေ့က Lan Khon Muang ကားပါကင် ကနေ စတင်လွှတ်တင်ခဲ့ပါတယ်။ ဒရုန်းအစီးရေနဲ့ ရေဖျန်းမယ့် နယ်မြေဧရိယာကို တိုးချဲ့လုပ်ဆောင်သွားမှာ ဖြစ်တယ်လို့ မြို့တော်ဝန်က ဆိုပါတယ်။

ဒရုန်းတစီးမှာ ရေ ၅ လီတာကနေ ၁၀ လီတာ အထိ သယ်ဆောင်နိုင်ပြီး၊ အားတခါသွင်းထားရင် ၂ စတုရန်းကီလိုမီတာ ဧရိယာအတွင်း ၁၅ မိနစ် ကနေ ၂၀ မိနစ်ကြား ပျံသန်းနိုင်ပါတယ်။ မီးခိုးမြူတွေ လျော့ပါးသွားဖို့အတွက် ဒရုန်းတွေအပြင် ရေသယ်ယာဉ်တွေနဲ့လည်း လေထုထဲ ရေတွေ ပက်ဖျန်းဖို့ ကြိုးစား လုပ်ဆောင်နေကြပါတယ်။

ရေသယ်ယာဉ်တွေနဲ့ ရေပက်ဖျန်းတဲ့ ပစ္စည်းတွေ ကူညီထောက်ပံ့ပေးဖို့အတွက် အမှတ် (၁) ဒေသန္တရစစ်တပ်ကိုလည်း မြို့တော် အုပ်ချုပ်ရေးအဖွဲ့က အကူအညီတောင်းခဲ့တာပါ။ ရေဖြန်းပြီးသွားရင် အများပြည်သူပိုင်နေရာတွေနဲ့ လမ်းမ မျက်နှာပြင်တွေကို BMA ဝန်ထမ်းတွေက သန့်ရှင်းရေး ပြန်လုပ်ပေးသွားမှာ ဖြစ်တယ်လို့ သိရပါတယ်။

“ဘန်ကောက် မီးသတ်နှင့် ကယ်ဆယ်ရေး ဌာနက ကြီးကြပ်ပြီး လေထုထဲကို သန့်စင်တဲ့ ရေတွေ ပက်ဖျန်းသွားမှာပါ” လို့ မြို့တော်ဝန်က ပြောပါတယ်။

မူလက လေထုထဲက မီးခိုးမြူမှုန့်တွေကို လျော့ပါးစေဖို့ အတွက် သကြားရည်တွေ ပက်ဖျန်းဖို့ စီစဉ်ထားခဲ့တာ ဖြစ်ပါတယ်။ ဒါပေမယ့် ဒရုန်းငှားရမ်းတဲ့ စိုက်ပျိုးရေးအဖွဲ့က သကြားရည်ဟာ စိုက်ပျိုးရေး လုပ်ငန်းတွေမှာ အသုံးပြုတဲ့ အရည်တမျိုး ဖြစ်ပြီး ဘန်ကောက်မြို့ပေါ် ပက်ဖျန်းမယ်ဆိုရင် လူတွေ၊ ယာဉ်တွေပေါ် အမဲရောင်အမှုန့်ခဲတွေ ပြုတ်ကျလာနိုင်ခြေရှိကြောင်း သတိပေးခဲ့တာကြောင့် ရိုးရိုးရေကိုပဲ ပြောင်းလဲ အသုံးပြုခဲ့တာပါ။

ရေပက်ဖျန်းမယ့် ဒရုန်းတွေကို Lan Khon Muang၊ Wat Phra Srimahathat၊ Kasetsart တက္ကသိုလ်၊ Chatuchak ပန်းခြံ၊ Lumpini ပန်းခြံနဲ့ Rama IX တံတား နေရာ ၆ ခုကနေ လွှတ်တင်သွားမှာ ဖြစ်ပါတယ်။ နေရာတခုမှာ တနေ့ကို မိနစ် ၉၀ ကနေ ၂ နာရီလောက် ရေ ပက်ဖျန်းသွားမယ်လို့ ကြေညာထားပါတယ်။

ဒရုန်းတွေနဲ့ လေထုထဲ ရေဖြန်းတာဟာ ထိရောက်မှုရှိပါ့မလားလို့ မြို့တော်ဝန်ကို သတင်းထောက်တွေက မေးမြန်းခဲ့ရာမှာ “ကျနော်လည်း အကုန် ဘယ်သိမလဲ။ ဒါကြောင့် ကူညီချင်သူတိုင်းကို ကြိုဆိုပါတယ်။ ကျနော်တို့ ဘာမှ မလုပ်ဘူးဆိုရင်လည်း ဒီတိုင်း ထိုင်နေတယ်ဆိုပြီး လူတွေက ဝေဖန်ကြမှာပဲ” လို့ ပြန်လည် ဖြေကြားပါတယ်။

ဘန်ကောက်မြို့နဲ့ အနီးတဝိုက်က လေထုထဲမှာ PM2.5 လို့ခေါ်တဲ့ အချင်း ၂ ဒဿမ ၅ မိုက်ခရိုမီတာ ရှိတဲ့အန္တရာယ်ရှိ ဖုန်မှုန့်တွေ လွှမ်းခြုံနေခဲ့တာ ရက်သတ္တပတ်အတော် ကြာမြင့်ခဲ့ပါပြီ။ လေထုညစ်ညမ်းမှု ပြဿနာကြောင့် ဘန်ကောက်က အစိုးရ ကျောင်းပေါင်း ၄၃၇ ကျောင်းကိုလည်း နောက်တပတ်အထိ ပိတ်ထားရပါတယ်။ ဒါ့အပြင် ဘန်ကောက်နဲ့ အနီးနား မြို့နယ်တွေက ပုဂ္ဂလိက ကျောင်းတွေ အကုန်လုံးကိုလည်း ပိတ်ထားဖို့ ပညာရေးဝန်ကြီးဌာနက ယခုတပတ် ကြာသပတေးနေ့မှာ ညွှန်ကြားခဲ့ပါတယ်။

Bangkok Post တွင် ရေးသားထားသော City deploys water-spraying drones to reduce smog  သတင်းအား ဆီလျော်အောင် ဘာသာပြန်ဆိုထားသည်။

The post ဘန်ကောက်တွင် မီးခိုးမြူများ လျော့ပါးသွားရန် ဒရုန်းများဖြင့် ရေ ပက်ဖျန်း appeared first on ဧရာဝတီ.

နည်းပညာခေတ်ကြီးမှာ အိမ်တွင်း၊ အိမ်ပြင် သန့်ရှင်းရေးကို လူကိုယ်တိုင် လုပ်စရာ မလိုတော့ပါဘူး။ စက်ရုပ်တွေကို ခိုင်းစေလာနိုင်ပါပြီ။ အိမ်တွင်းသန့်ရှင်းရေးအတွက် နာမည်ကျော် Roomba ဖုန်စုပ်စက်ရုပ်ကို ထုတ်လုပ်ခဲ့တဲ့ iRobot ကုမ္ပဏီဟာ ယခုအခါ အိမ်ပြင်မှာ မြက်ရိတ်ခိုင်းဖို့အတွက် “Terra” အမည်ရ မြက်ရိတ်စက်ရုပ်ကို ထပ်မံ မိတ်ဆက်လိုက်ပါတယ်။

ဆယ်စုနှစ်တခုကျော် တီထွင်ဖန်တီးခဲ့တဲ့ နည်းပညာဖြစ်တယ်လို့ iRobot က ပြောကြားပါတယ်။ တခြား အလိုအလျောက် မြက်ရိတ်စက်တွေဟာ နယ်နမိတ် သတ်မှတ်ဖို့အတွက် ဝါယာကြိုး ချထားဖို့ လိုပေမယ့် Terra မှာတော့ ကြိုးမဲ့ အချက်ပြတိုင်လေးတွေကို မြက်ခင်း ပတ်လည် အနားတလျှောက်မှာ ချထားပေးဖို့ပဲ လိုပါတယ်။

ပထမဆုံး အသုံးပြုတဲ့အခါမှာ တွဲဖက်အသုံးပြုရမယ့် iRobot HOME App ကနေ Terra ကို မြက်ခင်းတလျှောက် မောင်းသွားပြီး မြက်ရိတ်ရမယ့် နေရာတွေနဲ့ ရှောင်ရှားရမယ့် နေရာတွေကို ပြထားပေးဖို့ပဲ လိုပါတယ်။ နောက်ပိုင်းမှာ Terra က မြက်ခင်းမြေပုံကို မှတ်သားထားကာ အလိုလို မြက်ရိတ်ပေးမှာပါ။

Terra ကို ၁ နာရီကြာ မြက်ရိတ်ခိုင်းနိုင်ပြီး ၂ နာရီကြာ အားပြန်သွင်းပေးဖို့ လိုပါတယ်။ ဒါပေမဲ့ မြက်ရိတ်နေစဉ် ဘက်ထရီကုန်သွားတဲ့ အခါမျိုးမှာလည်း အားသွင်းစက်ရှိရာဆီ အလိုလို ပြန်လာအားသွင်းနိုင်ပါတယ်။ အားပြည့်သွားရင် ရိတ်လက်စ နေရာကနေ ပြန်ရိတ်ပေးသွားမှာပါ။

Terra ရဲ့ ဖြုတ်တပ်နိုင်တဲ့ မြက်ရိတ်ဒလက် နည်းပညာက ကျောက်ခဲလို မာကျောတဲ့အရာတွေကို ပြန်ကန်ထုတ်ပေးနိုင်တာကြောင့် ဒလက်ကျိုးမှာလည်း ပူစရာ မလိုပါဘူး။ Terra ကို App ကနေလည်း အပြည့်အဝ ထိန်းချုပ်နိုင်မှာပါ။ မြက်တွေရဲ့ အမြင့်၊ ရိတ်မယ့် အချိန် စတဲ့ ချိန်ညှိမှုတွေကို လိုအပ်သလို App ကနေ သတ်မှတ်ပေးနိုင်ပါတယ်။

Terra အလိုအလျောက် မြက်ရိတ်စက်ရုပ်ကို Bosh၊ Husqvarna စတဲ့ ကုမ္ပဏီတွေရဲ့ နယ်နမိတ်သတ်မှတ်ဝါယာကြိုးသုံး မြက်ရိတ်စက်တွေ ခေတ်စားတဲ့ ဂျာမနီနိုင်ငံမှာ စတင်ရောင်းချသွားမှာပါ။ အမေရိကန်မှာတော့ ၂၀၂၀ ခုနှစ်မှ စတင်ရောင်းချမယ်လို့ ဆိုပါတယ်။ ဈေးနှုန်းကိုတော့ မကြေညာရသေးပါဘူး။

Ref: The Verge, DailyMail

The post အလိုအလျောက် မြက်ရိတ်စက်ရုပ်ကို iRobot ပြသ appeared first on ဧရာဝတီ.

ကမ္ဘာ့အကြီးဆုံး မိုဘိုင်းနည်းပညာပြပွဲကြီးတခုဖြစ်တဲ့ Mobile World Congress (MWC) ကို စပိန်နိုင်ငံ၊ ဘာစီလိုနာမြို့မှာ ယခု ဖေဖော်ဝါရီလ ၂၅ နေ့ စတင် ကျင်းပသွားမှာ ဖြစ်ပါတယ်။ ဒီပွဲမှာ ကမ္ဘာ့ပထမဆုံး 5G ခေါက်ချိုးဖုန်းကို စတင်မြင်တွေ့ရတော့မှာပါ။

လွန်ခဲ့တဲ့ တပတ်က တရုတ်နိုင်ငံ၊ ဘေဂျင်းမြို့မှာ ကျင်းပခဲ့တဲ့ MWC 2019 ပွဲကြို ရှင်းလင်းပွဲမှာ Huawei က စွမ်းဆောင်ရည်မြင့် 5G ခေါက်ချိုး စမတ်ဖုန်းတလုံးကို မိတ်ဆက်သွားဖို့ စီစဉ်ထားကြောင်း အတည်ပြု ပြောကြားလိုက်ပါတယ်။

https://t.co/yv7Pf2CN6Y

— Huawei Mobile (@HuaweiMobile) January 24, 2019

Huawei ရဲ့ Consumer Business Group CEO ဖြစ်သူ Richard Yu က ခေါက်ချိုးဖုန်းရဲ့ နာမည်ကိုတော့ မပြောသွားခဲ့ပါဘူး။ ဒါပေမယ့် Huawei ရဲ့ မျိုးဆက်သစ်မိုဘိုင်းချစ်ပ် Kirin 990 နဲ့ Balong 500 5G modem ကို ထည့်သွင်း ထုတ်လုပ်သွားမှာ ဖြစ်တယ်လို့ ပြောကြားခဲ့ပါတယ်။

Huawei ရဲ့ 5G modem အသစ်ဟာ 2G, 3G, 4G နည်းပညာတွေပါ အသုံးပြုနိုင်မယ့် modem ဖြစ်ပြီး၊ 4G ထက် ၁၀ ဆ ပိုမြန်ပါတယ်။ ဒါ့အပြင် ပြိုင်ဘက် Qualcomm ရဲ့ X50 5G model ထက်လည်း ၂ ဆ ပိုမို မြန်ဆန်တယ်လို့ Yu က ဆိုပါတယ်။

Huawei ဟာ MWC 2019 ပွဲအတွက် ဖိတ်စာတွေကိုလည်း ယနေ့ ထုတ်ပြန်လိုက်ပါပြီ။ Huawei ရဲ့ MWC မိတ်ဆက်ပွဲ အခမ်းအနားကိုတော့ အရှေ့တိုင်းစံတော်ချိန် ဖေဖော်ဝါရီလ ၂၄ ရက်၊ မနက် ၈ နာရီမှာ ကျင်းပသွားမှာပါ။

Huawei နည်းတူ Samsung ကလည်း ခေါက်ချိုးဖုန်းတမျိုးကို မိတ်ဆက်ဖို့ ပြင်ဆင်နေပါတယ်။ Samsung ရဲ့ ခေါက်ချိုးဖုန်းကိုတော့ ဖေဖော်ဝါရီလ ၂၀ ရက်နေ့ ကျင်းပမယ့် Unpacked Event မှာ တွေ့မြင်ရနိုင်ပါတယ်။ ဘယ်ကုမ္ပဏီက အရင် မိတ်ဆက်နိုင်မလဲဆိုတာကိုတော့ စောင့်ကြည့်ရမှာပါ။

၂၀၁၉ ခုနှစ်ဟာ ခေါက်ချိုးဖုန်းတွေနဲ့ 5G စက်ပစ္စည်း (ဖုန်း၊ တက်ဘလက်၊ Router စတာတွေ) စတင် ခေတ်စားလာမယ့် နှစ်တနှစ် ဖြစ်လာမှာပါ။ ခေါက်ချိုးဖုန်းတွေကို Xiaomi ၊ LG၊ Intel စတဲ့ နည်းပညာကုမ္ပဏီကြီးတွေက ထုတ်လုပ်ဖို့ ပြင်ဆင်နေကြသလို၊ ဆက်သွယ်ရေး ကုမ္ပဏီတွေကလည်း 5G ကွန်ရက်ကို သုံးစွဲသူတွေလက်ထဲ အမြန်ဆုံး ထည့်ပေးနိုင်ဖို့ ကြိုးစားနေကြပါတယ်။

Ref: Forbes

The post ကမ္ဘာ့ပထမဆုံး 5G ခေါက်ချိုးဖုန်းကို ယခုလအတွင်း မိတ်ဆက်မှာဖြစ်ကြောင်း Huawei ပြော appeared first on ဧရာဝတီ.

မြန်မာ့ အော်ဂဲနစ် ပိုးထည်နှင့် ချည်ထည် ထုတ်လုပ်မှု လုပ်ငန်းများတွင် ဗြိတိန်အပါအဝင် ယူနိုက်တက် ကင်းဒမ်း(UK)မှ အမေရိကန်ဒေါ်လာ ၁.၄ မီလီယံ ခန့် ရင်းနှီးမြှပ်နှံမှု ပြုလုပ်သွားမည်ဟု UK နိုင်ငံ တကာ ဖွံ့ဖြိုးရေးဌာန (DFID) ကသိရ သည်။

အဆိုပါ ရင်းနှီးမြှုပ်နှံမှုကို DFID နှင့် မြန်မာနိုင်ငံတွင် စီးပွားရေးဆိုင်ရာ လုပ်ငန်းများ၌ အတိုင်ပင်ခံ လုပ်ငန်း လုပ်ဆောင်နေ သည့် Pragma Ventures Myanmar ၊ ဂျာမဏီ နိုင်ငံ အခြေစိုက် အော်ဂဲနစ် အထည်များ ထုတ်လုပ်သည့် Pure Sense Organics ကုမ္ပဏီ၊ ဓန Dana Facility တို့ ပူးပေါင်း ဆောင်ရွက်ခြင်း ဖြစ်ပြီး၊ ယင်းအစီအစဉ်ကို လာမည့် ၂ နှစ်အတွင်း လုပ်ဆောင်မည်ဟု ဆိုထားသည်။

DFID ၏ အကြီးအကဲ Dr Gail Marzettiက “မြန်မာနိုင်ငံ အတွက် စီးပွားရေး ကဏ္ဍ အသစ်တခု မဟုတ်ပေမယ့် အခွင့် အလမ်းကောင်းတွေ အများကြီး ရှိပါတယ်။ အရင်က အရည်အသွေးမြင့်တဲ့ အထည်အလိပ်တွေကို ရှမ်း၊ ချင်းပြည်နယ်နဲ့ နာဂ ဒေသ အပြင် မြန်မာနိုင်ငံ တဝန်းမှာ ထုတ်လုပ် ပါတယ်။ ဒီမှာ လုပ်ကိုင်နေတဲ့ တောင်သူတွေရဲ့ ကျွမ်းကျင်မှု ကောင်းအောင်နဲ့ အသေးစားနဲ့ အလတ် စား လုပ်ငန်း တွေ လုပ်ကိုင်သူတွေ ဝင်ငွေ ပိုကောင်းလာအောင် ဆောင်ရွက်သွားမှာ ဖြစ် တယ်” ဟု ပြောသည်။

ယင်း စီမံကိန်းတွင် ချင်းပြည်နယ်ရှိ စိုက်ပျိုးရေး လုပ်ငန်းများမှ အစပြု၍ ပိုးထည် ထုတ်လုပ် အချော သတ်ခြင်း အထိ ပိုမို ကောင်းမွန်စေရန် ပြုလုပ်ပြီး ဒီဇိုင်း၊ ကုန်အမှတ်တံဆိပ် ဖော်ဆောင် ပေးခြင်းနှင့် မြန်မာ့ ပိုးထုတ်ကုန်များကို နိုင်ငံ ရပ်ခြား တွင် ရောင်းချခြင်းတို့မှ တဆင့် နိုင်ငံ အတွင်း ပိုးထည် လုပ်ငန်း ဖွံ့ဖြိုးတိုးတက်အောင် ဆောင်ရွက်မည် ဖြစ်ကြောင်း သိရသည်။

နောက်ပိုင်းတွင် ပိုးထည် ထုတ်လုပ်ရေး လုပ်ငန်းမှ အရည်အသွေးမြင့် ပိုးထည် ကုန်အမှတ် တံဆိပ်များ ကို ဥရောပ၊ မြောက် အမေရိကနှင့် သြစတြေးလျ နိုင်ငံတို့ရှိ အိမ်အလှဆင် ဈေးကွက်သို့ တင်ပို့ ရောင်း ချသွားမည် ဖြစ်ကြောင်း DFID က ထုတ် ပြန် ထားသည်။

ယင်း စီမံကိန်းသည် ချင်းပြည်နယ်နှင့် ရန်ကုန်မြို့တို့ရှိ ရက်ကန်း လုပ်ကိုင်သူများ အတွက် ရေရှည် ခိုင်မြဲသော အလုပ် အကိုင်များ ဖန်တီးပေးမည် ဖြစ်ပြီး ဆင်းရဲ နွမ်းပါးသော အမျိုးသမီးများ အလုပ် လုပ်ကိုင်နိုင်သော အခွင့်အလမ်းများကို ဖန်တီးပေးနိုင် မည် ဖြစ်ကြောင်း Dr Gail Marzetti က ဆိုသည်။

ယင်းအပြင် ဒေသခံ ပိုးထည် လက်မှု ပညာရှင်နှင့် ရက်ကန်း လုပ်ကိုင်သူများ၏ လုပ်ငန်းကို အထောက်အကူပြုရန် အတွက် ရန်ကုန်မြို့တွင် ရက်ကန်း စတူဒီယို ၁ ခုကိုလည်း ဖွင့်လှစ်သွားမည် ဖြစ်ကြောင်းလည်း သိရသည်။

Pragma Ventures ဒါရိုက်တာ Catherine Smith ကလည်း“မြန်မာနိုင်ငံက အရည်အသွေးမြင့် ပိုးထည် ထုတ်လုပ်ရေးမှာ တချိန် က အထင်ကရ နေရာ အဖြစ် ရပ်တည်ခဲ့တယ်။ ပြီးတော့ ရာသီဥတုနဲ့ ပတ်ဝန်းကျင် အနေအထားတွေကလည်း ပိုး ထည် ထုတ်လုပ်ရေး အတွက် အကောင်းဆုံး ပံ့ပိုး ပေးထားပါတယ်။ ကျမတို့ အနေနဲ့ ဒေသခံ လက်မှု ပညာရှင်တွေနဲ့ ရက်ကန်း လုပ်ငန်းတွေ အတွက် ပြည်တွင်းဖြစ် ပိုးထည်တွေ လုံလုံလောက်လောက် ပံ့ပိုးပေးနိုင်မှာ ဖြစ်တယ်” ဟု ပြောသည်။

အော်ဂဲနစ် ချည်ထည်များ ထုတ်လုပ်နိုင်ရန် အတွက် ရာသီဥတုဒဏ် ခံနိုင်သော မျိုးစေ့အသစ်များ ပေးခြင်း အပြင် စိုက်ပျိုး သည့် တောင်သူများကိုလည်း အော်ဂဲနစ် စိုက်ပျိုးရေး နည်းလမ်းများ သင်ကြားပေးခြင်းများလည်း ပါဝင်မည် ဖြစ်ပြီး ၂၀၂၀ ပြည့်နှစ် နှစ်ကုန်ပိုင်း၌ အနည်းဆုံး လယ်သမား ၅၀၀ နှင့် လက်တွဲ လုပ်ဆောင်သွားရန် ရည်ရွယ်ထားသည် ဟု ၎င်း က ပြောဆိုသည်။

Catherine Smith က“ဒီစီမံကိန်းဟာ အသေးစား လယ်စိုက် တောင်သူတွေဆီကနေ တဆင့် ဝယ်ယူ ထုတ်လုပ်ပြီး မြန်မာ နိုင်ငံကို အသိအမှတ်ပြု အော်ဂဲနစ် ချည်ထည် ပံ့ပိုးသူ ဖြစ်လာအောင် လုပ်ဆောင်မှာပါ”ဟု ပြောသည်။

ချင်းပြည်နယ် ကုန်သည်များနှင့် စက်မှုလက်မှု လုပ်ငန်းရှင်များ အသင်း အထွေထွေ အတွင်းရေးမှူး ဦးကပ်ခင်းပေါင်က “ကျနော်တို့ ဆီမှာက သဘာဝ အထည်ရက် လုပ်တဲ့ဟာက အများဆုံး လုပ်နိုင် တဲ့ဟာ ဖြစ်တယ်။ ယူကေ က လာပြီးမှ ကူညီမယ် ဆိုရင်တော့ အလုပ်အကိုင် ရရှိရေးရော ကျနော်တို့ ဒေသထွက် ပစ္စည်းတွေကို နိုင်ငံတကာ ပြလို့ ရမယ်” ဟု ဧရာဝတီ ကို ပြောသည်။

၎င်းက ဆက်လက်၍ “အမျိုးသမီးတွေ အလုပ်အကိုင် ရရှိရေး အတွက် အခွင့်လမ်းတွေ အများကြီး ပေါ်လာမယ်။ ဒါက ကျနော်တို့ ကျွမ်းကျင်ပြီးသား လုပ်ငန်း တခု ဖြစ်တယ်။ အရင်းအနှီး မရှိလို့သာ ကျနော်တို့ အကြီးအကျယ် မလုပ်နိုင် တာ ဆိုတော့  ဒါက အများကြီး အထောက်အကူ ပြုမှာပါ” ဟု ဆိုသည်။

လက်ရှိ ချင်းပြည်နယ်တွင် အိန္ဒိယမှ အပ်ချည်များ တင်သွင်းပြီး ချည်ထည် ထုတ်လုပ်မှုကို မြို့နယ်တိုင်း လိုလို၌ လုပ်ကိုင် လျက် ရှိပြီး တချို့မြို့နယ်တို့တွင် ပိုးထည် ထုတ်လုပ်မှု လုပ်ငန်းများ လုပ်ကိုင်ကြကြောင်း ၎င်းက ပြောဆိုသည်။

အော်ဂဲနစ် ချည်ထည်မှာ ကမ္ဘာအနှံ့တွင် ဝယ်လိုအား များနေသော်လည်း နိုင်ငံတကာမှ ချည်ထည် ထုတ်လုပ်မှု၏ ၁ ရာခိုင်နှုန်းပင် မပြည့်ကြောင်းနှင့် မြန်မာနိုင်ငံသည် အော်ဂဲနစ် ချည်ထည် ထုတ်လုပ်ရန် အနေအထားကောင်းများတွင် ရှိနေသည်ဟု DFID က ထုတ်ပြန်ထားသည်။

The post မြန်မာ့ အော်ဂဲနစ် ပိုးထည် ချည်ထည် ထုတ်လုပ်မှု၌ UK မှ ရင်းနှီး မြှုပ်နှံမည် appeared first on ဧရာဝတီ.

အရှေ့တောင်အာရှဒေသ၌ အချက်အချာကျသည့် အခြေခံအဆောက်အဦဖြစ်မြောက်ရန် တွန်းအားပေးသည့်အနေဖြင့် မလေးရှားနိုင်ငံ ရထားလမ်းပိုင်း စီမံကိန်း ကုန်ကျစရိတ်ကို ဒေါ်လာဘီလီယံ ၂၀ တန်ဖိုးမှ ထက်ဝက်လျှော့ပေးမည်ဖြစ်ကြောင်း တရုတ်က ကမ်းလှမ်းသည်ဟု သတင်းရင်းမြစ်နှစ်ခုကို ကိုးကားပြီး ရိုက်တာသတင်းတပုဒ်က ကြာသပတေးနေ့တွင် ပြောသည်။ သို့သော် မလေးရှားဝန်ကြီးများ၏ သဘောထားမှတ်ချက်များမှာ ကွဲလွဲနေကြသဖြင့် ထွက်ပေါ်လာမည့် ရလဒ်မှာ မရေမရာဖြစ်နေသည်။

အရှေ့ကမ်းရိုးတန်း ရထားလမ်းပိုင်း ချိတ်ဆက်မှု(ECRL) အခြေအနေနှင့်ပတ်သက်၍ ရှေ့နောက်မညီဖြစ်နေသည့် ပြောဆိုကြေညာချက် ၂ ခု ယခင်သီတင်းပတ်က ထွက်ပေါ်လာခဲ့သည်။ အဆိုပါစီမံကိန်းအပေါ် သဘောတူစာချုပ် ပြန်လည်ညှိနှိုင်းပေးရခြင်းသည် ဝန်ကြီးချုပ် မဟာသီယာမိုဟာမက် အစိုးရအတွက် နိုင်ငံရေးနှင့် သံတမန်ဆက်ဆံရေး စိန်ခေါ်မှုအဖြစ် သိသာထင်ရှားစေခဲ့သည်။

အဆိုပါစီမံကိန်းအတွက် ကန်ထရိုက်တာဖြစ်သည့် တရုတ်ဆက်သွယ်မှု တည်ဆောက်ရေး ကုမ္ပဏီလီမိတက်(CCCC) က ၆၈၈ ကီလိုမီတာအရှည်ရှိ စီမံကိန်းအတွက် ကုန်ကျစရိတ် ရင်းဂစ် ၆၇ ဘီလီယံ(အမေရိကန်ဒေါ်လာ ၁၆.၃၉ ဘီလီယံ)အတွက် ထက်ဝက်မျှ လျှော့ပေးမည်ဖြစ်ကြောင်း ကမ်းလှမ်းလာသည်ဟု အဆိုပါ သတင်းက ဆိုသည်။

အတိုးနှုန်းနှင့် မြေယာဝယ်ယူမှု ကုန်ကျစရိတ်မှာ စုစုပေါင်းကုန်ကျစရိတ်၏ လက်ကျန်အဖြစ် သတ်မှတ်ပေးမည့်သဘောဖြစ်သည်။

လျှော့ဈေးဖြင့် အဆိုပြုထားသော်လည်း မဟာသီယာအစိုးရက ယခုလတွင် ထိုသဘောတူညီချက်ကို ဖျက်သိမ်းရန် ဆုံးဖြတ်ခဲ့ကြောင်း သတင်းရင်းမြစ်က ဆိုကြောင်း သိရသည်။ ယင်းသတင်းရင်းမြစ်များမှာ ထိရှလွယ်သည့်အကြောင်းအရာဖြစ်၍ မည်သူမည်ဝါဖြစ်ကြောင်း ထုတ်ဖော်ခြင်း မပြုပါ။

တရုတ်ရင်းနှီးမြှုပ်နှံနေမှုများကို ဝေဖန်သူတဦးဖြစ်သည့် မဟာသီယာက မေလတွင် အာဏာရလာပြီး ယခင်ဝန်ကြီးချုပ်ဟောင်း နာဂျစ်ရာဇတ် သဘောတူခဲ့သော တရုတ်စီမံကိန်းမှာ မျှတမှုမရှိဟု ဆို၍ ပြန်လည်ညှိရန် (သို့မဟုတ်) ဖျက်သိမ်းရန် တိုင်းပြည်ကို ကတိပြုခဲ့ပြီး အဆိုပါ ECRL ရထားလမ်း စီမံကိန်းကို ဇူလိုင်လတွင် ဆိုင်းငံ့ထားခဲ့သည်။

သို့ရာတွင် ဗုဒ္ဓဟူးနေ့၌ ဘဏ္ဍာရေးဝန်ကြီး လင်ဂွမ်အင်းက မလေးရှားအနေဖြင့် တရုတ်နှင့် ထပ်မံဆွေးနွေးရန် စည်းရုံး ပြောကြားနေခဲ့သည်။

ထိုသို့ စီမံကိန်းစရိတ် လျှော့ပေးမည်ဟု တရုတ်ဘက်က ကမ်းလှမ်းကြောင်း သတင်းသည် စီးပွားရေးဝန်ကြီးက ၎င်းတို့အစိုးရအနေဖြင့် သဘောတူစာချုပ် ရပ်ဆိုင်းရန် ဆုံးဖြတ်ကြောင်း ပြောကြားအပြီး ရက်ပိုင်းအတွင်းနှင့် မဟာသီယာက စီမံကိန်းရပ်ခြင်းအပေါ် တရုတ်က နားလည်ပေးရန် ကြိုးပမ်းနေကြောင်းသိရပြီး တရက်အကြာ၌ ထွက်ပေါ်လာခဲ့သည်။

စေ့စပ်ညှိနှိုင်းမှုများတွင် ပါဝင်ပတ်သက်ကြသည့် မလေးရှားအစိုးရ တာဝန်ရှိသူ အရေအတွက်မှာ များပြားလွန်းနေသဖြင့် အရှုပ်အထွေးပေါ်ပေါက်နေကြောင်းလည်း အဆိုပါသတင်းရင်းမြစ်များက ဆိုကြောင်း သိရသည်။

မလေးရှား ဘဏ္ဍာရေးဝန်ကြီးဌာနအပြင် တရုတ်ကုမ္ပဏီ CCCC နှင့် ၎င်း၏ပြည်တွင်းမိတ်ဖက် မလေးရှားမီးရထားလုပ်ငန်း(MRL) တို့ကလည်း ၎င်းတို့အဆိုပြုချက်ကို မဟာသီယာ၏ နှစ်ရှည်လများအကြံပေးဖြစ်နေသူ ဒိန်ဇိမ်းအူဒင်ထံသို့ တင်ပြခဲ့ကြသည်။

မဟာသီယာ အာဏာရလာပြီးနောက် မရှေးမနှောင်းမှာပင် ယခုဖျက်သိမ်းပြီးဖြစ်သည့် အကြံပေးကောင်စီတွင် ဒိန်ဇိမ်းအူဒင်က ဦးဆောင်ခဲ့သည်။ ၎င်း၏ ရုံးက သဘောထားမှတ်ချက် မပေးပါ။

မလေးရှား ဘဏ္ဍာရေးဝန်ကြီးဌာနကလည်း စုံစမ်းမေးမြန်းမှုများကို ဝန်ကြီးချုပ်ရုံးသို့ မေးရန် ပြောခဲ့သော်လည်း ဝန်ကြီးချုပ်ရုံးက မေးခွန်းများကို လတ်တလောဖြေကြားပေးခြင်း မရှိသေးပေ။ မလေးရှား မီးရထားလုပ်ငန်း(MRL) နှင့် တရုတ်ကုမ္ပဏီ(CCCC) တို့ကလည်း သဘောထား မှတ်ချက်ပေးရန် ငြင်းဆန်ကြသည်။

ဘေဂျင်းတွင် တရုတ် နိုင်ငံခြားရေးဝန်ကြီးဌာနပြောခွင့်ရသူ ဂန်ရှောင်က ယခု ရက်သတ္တပတ်တွင် ပြောကြားရာ၌ “စီမံကိန်း ဖျက်သိမ်းသည့်သတင်းကို ၎င်းအနေဖြင့် တွေ့ပြီးဖြစ်သော်လည်း အတိအကျ မသိရသေးကြောင်း” ဆိုသည်။

“ကျနော်သိထားသလောက်ကတော့ ဒီစီမံကိန်းက တန်းတူညီမျှမှု၊ အပြန်အလှန်အကျိုးရှိမှုနဲ့ သဘောတူတည်ဆောက်ရေးတွေ အခြေခံထားတဲ့ ဈေးကွက်စည်းမျဉ်းတွေအရ နှစ်ဘက်စလုံးက ကုမ္ပဏီတွေ ကျေနပ်လက်ခံထားမှုအပေါ် မူတည်ပါတယ်” ဟု ၎င်းက ပြောသည်။

ဗုဒ္ဓဟူးနေ့က မလေးရှားအစိုးရအဖွဲ့က အဆိုပါစီမံကိန်းအပေါ် သဘောထားမှတ်ချက်ပေးနေခြင်း ရပ်တန့်ရန် ဆုံးဖြတ်ခဲ့ကြပြီး မဟာသီယာ ကိုင်တွယ်မည့်ကိစ္စအဖြစ် မှတ်ယူလိုက်ကြသည်။

တိုင်းပြည်ကို နှစ်ပေါင်း ၆၀ အုပ်ချုပ်ခဲ့သည့် ဘာရီစန် အမျိုးသားမဟာမိတ်အဖွဲ့(နာဂျစ်၏ နိုင်ငံရေးအဖွဲ့)ကို တရုတ်နှင့် မိတ်ဖက်ဖြစ်နိုင်ချေ မရှိသည့် မဟာသီယာ ဦးဆောင်သည့် ညွန့်ပေါင်းအစိုးရက ရွေးကောက်ပွဲဖြင့် အနိုင်ရခဲ့ပြီးနောက် တရုတ်နိုင်ငံနှင့် မလေးရှားနိုင်ငံ ဆက်ဆံရေးမှာ ယိုယွင်းလာခဲ့သည်။

“ဖက်ဒရယ်အစိုးရထဲမှာ အတွေ့အကြုံ သိပ်မရှိတဲ့ မတူကွဲပြားတဲ့ ပါတီတွေနဲ့ ညွန့်ပေါင်းဖွဲ့ထားတာဆိုတော့ လွယ်ကူတဲ့ တာဝန်တော့ မဟုတ်ပါဘူး” ဟု Bower Group Asia မှ မလေးရှားပြည်သူ့ရေးရာမူဝါဒအတိုင်ပင်ခံဖြစ်သူ အေဒစ်ဇဲကာပါလီက ပြောသည်။ ““ပြီးတော့ ပါတီတခုစီကနေ မလေးရှားအစိုးရသစ်ထဲမှာ နိုင်ငံခြားရေးမူဝါဒနဲ့ ကွဲပြားခြားနားတဲ့စိတ်ကူးတွေ ရှိကောင်းရှိနိုင်ပါတယ်”ဟုလည်း ဆိုသည်။

အဆိုပါရထားလမ်းစီမံကိန်းကို နာဂျစ်အစိုးရလက်ထက်တွင် တရုတ်ရင်းနှီးမြှုပ်နှံမှုတွန်းအားကြောင့် ၂၀၁၇ ခုနှစ်တွင် စတင်ခဲ့သည်။ နာဂျစ်အစိုးရသည် ဧရာမဘဏ္ဍာရေးအရှုပ်တော်ပုံကြောင့် ဆယ်စုနှစ်တခုနီးပါး အာဏာရနေရာမှ ရွေးကောက်ပွဲတွင် အရှုံးနှင့်ရင်ဆိုင်ခဲ့ရသည်။

ကုန်ကျစရိတ် အလွန်ကြီးမားခြင်း၊ ပွင့်လင်းမြင်သာမှု မရှိခြင်းနှင့် စွန့်စားလုပ်ကိုင်ရခြင်းတို့သည် မလေးရှားနိုင်ငံအပေါ် မသက်သာလှသည့် ဧရာမကြွေးမြီ ဝန်ထုပ်ဝန်ပိုး ပိစေနိုင်ပြီး အဆိုပါစီမံကိန်းက နာဂျစ်အစိုးရအရှုပ်တော်ပုံကို ပုံဖော်နေသည့်ပမာ ပေါ်ပေါက်လာခဲ့သည်။

တချိန်တည်းမှာပင် မဟာသီယာအပါအဝင် အတိုက်အခံများက နာဂျစ်သည် မလေးရှား၏အချုပ်အခြားအာဏာကို တရုတ်ထံ ရောင်းစားကြောင်း အပြစ်တင် စွပ်စွဲခဲ့ကြသည်။

ကိုးကား ။ ။ Reuters, Nikkei Asian Review

ဆက်စပ်ဖတ်ရှုရန် – တရုတ် ရထားလမ်း စီမံကိန်း မလေးရှား တကယ် ဖျက်မှာလား

The post မလေးရှား ရထားလမ်း စရိတ် တဝက်နီးပါး လျှော့ပေးမည်ဟု တရုတ် ကမ်းလှမ်း appeared first on ဧရာဝတီ.

တရုတ်နိုင်ငံသို့ ပေးဆပ်ရမည့် မြင့်မားလှပြီး ဆက်လက် ကြီးထွားနေသော နိုင်ငံ၏ ကြွေးမြီများနှင့် ပတ်သက်၍ မြန်မာ လွှတ်တော် ကိုယ်စားလှယ်များက သတိပေးထားပြီး အမျိုးသားဒီမိုကရေစီအဖွဲ့ချုပ် (NLD) ဦးဆောင်သော အစိုးရ အနေဖြင့် အချုပ်အခြာအာဏာကို ထိပါးသော အကြွေးထောင်ချောက်မှ ရှောင်ရှားနိုင်ရေး အကြွေးများကို အမြန်ဆုံး ပြန်လည်ပေးဆပ်ရန်လည်း ၎င်းတို့က တိုက်တွန်းသည်။

၂၀၁၈ ခုနှစ်တွင် နိုင်ငံခြားသုံး အရန်ငွေကြေး အမေရိကန်ဒေါ်လာ ၆.၃၅ ဘီလျံမျှသာ ရှိနေချိန်တွင် နိုင်ငံတော်၏ ကြွေးမြီမှာ အမေရိကန်ဒေါ်လာ ၁၀ ဘီလျံရှိနေပြီး ထိုငွေများအနက် ဒေါ်လာ ၄ ဘီလျံမှာ တရုတ်နိုင်ငံသို့ ပေးဆပ်ရမည့် ကြွေးမြီများ ဖြစ်နေသောကြောင့် တရုတ်သို့ ဒေါ်လာပြန်ဆပ်မည့်အစား ဆန်များပေးပို့ရန် လွှတ်တော်ကိုယ်စားလှယ် ဦးသန်းစိုးက မကြာသေးမီက အကြံပြုခဲ့သည်။

ထိုသို့သော အစီအစဉ်ကို တရုတ်နိုင်ငံက လက်ခံ မခံကိုမူ ဆက်လက် စောင့်ကြည့်ရဦးမည် ဖြစ်သည်။ တရုတ်ချေးငွေ အများစု၏ အတိုးနှုန်းမှာ မြင့်မားလှပြီး ၄.၅ ရာခိုင်နှုန်းရှိကာ မြန်မာနိုင်ငံက ချေးယူသည့် ပြည်ပအစိုးရများနှင့် ဘဏ္ဍာရေး အဖွဲ့အစည်းများတွင် အတိုးနှုန်း အမြင့်ဆုံးဖြစ်သည်ဟု ယုံကြည်ရသည်။

မြန်မာနိုင်ငံ၏ ပြည်ပကြွေးမြီအများစုကို ယခင်စစ်အစိုးရ၏ လူ့အခွင့်အရေး ချိုးဖောက်မှုများကြောင့် အနောက်နိုင်ငံများက ပိတ်ဆို့ အရေးယူသည့်ကာလ ၁၉၈၈ မှ ၂၀၁၁ ခုနှစ်အတွင်း ရယူခဲ့ခြင်းဖြစ်သည်။

ထိုစဉ်က တရုတ်နိုင်ငံသည် အပယ်ခံ စစ်အစိုးရကို ရက်ရက်ရောရော ငွေထုတ်ချေးသည့် တခုတည်းသော အဓိက နိုင်ငံဖြစ်သည်။ နိုင်ငံတကာ၏ အပြစ်ပေးခံရသော ဆယ်စုနှစ် နှစ်ခုကြာ ကာလတွင် မြန်မာနိုင်ငံသည် တရုတ် ဘဏ္ဍာရေး အဖွဲ့အစည်းများထံမှ အကြီးအကျယ် ချေးယူခဲ့သည်။

ထိုသို့သော ကြွေးမြီဝန်ထုပ်ဝန်ပိုးသည် အိန္ဒိယသမုဒ္ဒရာသို့ လမ်းဖွင့်ပေးသည့် ကျောက်ဖြူ ရေနက်ဆိပ်ကမ်းနှင့် တရုတ်နိုင်ငံတောင်ပိုင်း ကုန်းတွင်းပိတ် ဒေသကို ဆက်သွယ်သည့် မြန်နှုန်းမြင့် ရထားလမ်းအပါအဝင် တရုတ်နိုင်ငံ၏ မြန်မာနိုင်ငံအတွက် မဟာသေနင်္ဂဗျူဟာ အစီအစဉ်ကို အဆင်ပြေ ချောမွေ့စေရန် ရည်ရွယ်သည်ဟု အနောက်တိုင်းနှင့် မြန်မာ စီးပွားရေး ပညာရှင်များက ပြောသည်။

အချုပ်အခြာအာဏာ ထိပါးစေနိုင်သည့် အကြွေးထောင်ချောက်နှင့် ပတ်သက်သော ပူပန်မှုများကို တရုတ် ကျောထောက်နောက်ခံပြု ဒေါ်လာ ၁၀ ဘီလျံတန် ကျောက်ဖြူဆိပ်ကမ်း စီမံကိန်းကို လွန်ခဲ့သော နှစ်က လွှတ်တော်တွင် ဆွေးနွေးစဉ် ဖော်ပြခဲ့ခြင်း ဖြစ်သည်။ ယခုအခါ ထိုစီမံကိန်းကို အစိုးရက ပြန်လည် သုံးသပ်ခဲ့ပြီး စီမံကိန်း အရွယ်အစား လျှော့ချမည့် အလားအလာရှိသည်။

အဆိုပြုထားသည်မှာ ကာလကြာမြင့်ပြီဖြစ်သော တရုတ် – မြန်မာ စီးပွားရေး စြင်္ကန်၏ အစိတ်အပိုင်း ရထားလမ်း စီမံကိန်းသည်လည်း ဆွေးနွေးပွဲများတွင် ပြန်လည် ပါဝင်လာသည်။

စစ်အစိုးရက အနောက်နိုင်ငံများနှင့် ထိတွေ့ ဆက်ဆံရန် နိုင်ငံရေးကန့်သတ်မှုများကို စတင်ဖြေလျှော့သည့် ၂၀၁၁ ခုနှစ်အထိ မြန်မာနိုင်ငံတွင် ပြည်ပကြွေးမြီ ဒေါ်လာ ၆.၇ ဘီလျံရှိနေပြီး ထိုကြွေးမြီ၏ ၉၇ ရာခိုင်နှုန်းမှာ တရုတ်မှ ဖြစ်ကြောင်း အစိုးရ၏ နောက်ဆုံးထုတ်ပြန်သော ကြွေးမြီဆိုင်ရာ အစီရင်ခံစာကို ပြည်တွင်း သတင်းကိုးကားမှုများ အရ သိရသည်။

ဗိုလ်ချုပ်ကြီးဟောင်း ဦးသိန်းစိန်ဦးဆောင်သည့် အရပ်သားတပိုင်းအစိုးရ အာဏာရှိနေစဉ် ၂၀၁၁ ခုနှစ်မှ ၂၀၁၆ ခုနှစ်အတွင်း နောက်ထပ်အကြွေး ဒေါ်လာ ၃.၁ ဘီလျံတင်ခဲ့သည်။

တရုတ်ချေးငွေ အများစုကို ရေအားလျှပ်စစ်ဆည်များ အပါအဝင် အခြေခံ အဆောက်အအုံများ အတွက် အများစုသော နိုင်ငံပိုင် တရုတ်ကုမ္ပဏီများနှင့် ဖက်စပ် သဘောတူညီချက်တွင် ရယူခြင်းဖြစ်သည်။ ထိုစီမံကိန်းများ အားလုံးသည် စီစဉ်သည့်အတိုင်း ဖြစ်သည်မဟုတ်ဘဲ တခါတရံ တရုတ်နိုင်ငံကို စိတ်ပျက်စေခဲ့သည်။

၂၀၁၁ ခုနှစ်က ဦးသိန်းစိန်သည် နိုင်ငံမြောက်ပိုင်း ကချင်ပြည်နယ်ရှိ ဒေါ်လာ ၃.၆ ဘီလျံတန် မြစ်ဆုံဆည် စီမံကိန်းကို ဆိုင်းငံ့ခဲ့သည်။ ထိုစီမံကိန်းတွင် မြန်မာနိုင်ငံ၏ အဓိကမြစ်ကြီး ဧရာဝတီ အထက်ပိုင်း မူလအစကို ပိတ်ကာ လျှပ်စစ်ထုတ်ပြီး ၉၀ ရာခိုင်နှုန်းကို တရုတ်နိုင်ငံ တောင်ပိုင်းသို့ တင်ပို့ရန် ဖြစ်သည်။ ဒေသခံအုပ်စုများက ထိုဆည်၏ သဘာ၀ ပတ်ဝန်းကျင်ဆိုင်ရာ ဆိုးကျိုးများကြောင့် ထိုဆည်ကို ဆန့်ကျင်ခဲ့ကြသည်။

သို့တိုင် မြန်မာနိုင်ငံသည် တရုတ်နိုင်ငံပိုင် China Power Investment Corporation က စီမံကိန်းအတွက် သုံးစွဲပြီး ဖြစ်သည်ဟုဆိုသော ဒေါ်လာ သန်း ၈၀၀ ကို အတိုးဖြင့် ပေးနေရနိုင်သည်။ ယခုအခါ NLD အစိုးရသည် ထိုပမာဏကို လျှော်ပေးမည် သို့မဟုတ် စီမံကိန်းပြန်စရန် တရုတ်ဖိအားကို အရှုံးပေးမည်ကို စဉ်းစားနေရသည်။

တရုတ်နိုင်ငံသို့ ပေးရန်ရှိနေသော အခြား အမေရိကန် ဒေါ်လာ သန်း ၃၀၀ မှာ ၂၀၁၃ ခုနှစ်က လယ်ယာသုံး စက်ကိရိယာများ ဝယ်ယူရန် ဖြစ်သည်။ ထို အစိုးရချင်းချေးငွေ၏ နှောင်ကြိုးမှာ စက်ကိရိယာအားလုံးကို တရုတ်နိုင်ငံမှ ဝယ်ယူ တင်သွင်းရမည်ဟူသော အချက်ဖြစ်သည်။

သို့သော် တဒေါ်လာမျှပင် နယ်စပ်ဖြတ်ကျော်လာခြင်း မရှိဘဲ တင်ပို့လိုက်သော စက်ကိရိယာများမှာလည်း အရည်အသွေး ညံ့လွန်းခြင်းကြောင့် အသုံးမဝင် ဖြစ်သွားသည်ဟု ထိုကိစ္စကို အကျွမ်းတဝင်ရှိသည့် မြန်မာနိုင်ငံ အခြေစိုက် စီးပွားရေးပညာရှင်များက ပြောသည်။

၂၀၁၆ ခုနှစ်တွင် NLD အာဏာရလာပြီးနောက် မြန်မာနိုင်ငံသည် ဖွံ့ဖြိုးရေး အကူအညီ ရင်းမြစ်များကို ခွဲထုတ်ရန် ကြိုးစားကာ တရုတ်နိုင်ငံအပေါ် မှီခိုမှုကို လျှော့ချသည်။ အထူးသဖြင့် မြန်မာနိုင်ငံသည် အတိုးနှုန်းနိမ့်ပြီး ပြန်လည် ပေးဆပ်ရေး စည်းကမ်းချက်များလည်း ပိုမို သက်သောင့်သက်သာ ရှိသော ဂျပန်နှင့် အာရှဖွံ့ဖြိုးရေးဘဏ် ထံမှ အကူအညီယူရန် ကြိုးစားသည်။

ထိုကဲ့သို့ ချေးငွေရင်းမြစ် ဖြန့်ခွဲခြင်းသည် စီးပွားရေးကို ဆွဲတင်ရန်နှင့် ယခင်အကြွေးများ ပြန်ဆပ်နိုင်စွမ်း ပိုမိုကောင်းမွန်စေရန် လုံလောက်ခြင်း ရှိမရှိ စင်ကာပူမှ Institute of Southeast Asian Studies-Yusof Ishak Institute ၏ သုတေသီ နစ်ဖရီးမင်းက မေးခွန်းထုတ်ထားသည်။

“NLD အစိုးရသည် သိသိသာသာ ပုံပျက်နေသော စီပွားရေးတခုကို အမွေ ဆက်ခံလိုက်ရသည်။ မြန်မာ့စီးပွားရေး လုပ်ငန်းများ၏ ရုပ်ပုံလွှာသည် နှိုင်းယှဉ်ချက်အားဖြင့် အရေအတွက်နည်းပြီး စီးပွားရေး အခွင့်ထူးများခံစားရရန် စစ်ဖက် ခေါင်းဆောင်များနှင့် အဆက်အသွယ်ကို အသုံးချသည့် မိသားစုပိုင် လုပ်ငန်းစုကြီးများက လွှမ်းမိုးထားသည့် ပုံစံဖြစ်သည်” ဟု ၂၀၁၈ ခုနှစ်အတွင်း အစီရင်ခံစာ တစောင်တွင် ဖရီးမင်းက ရေးသားခဲ့သည်။

စစ်တပ်နှင့် အဆက်အသွယ်ရှိသော ခရိုနီအနည်းငယ်က ထိန်းချုပ်ထားသည့် ထိခိုက်လွယ်ပြီး ငွေဖော်ရန် ခက်ခဲသော၊ စွမ်းဆောင်ရည် ကင်းမဲ့သော ဘဏ်လုပ်ငန်းကဏ္ဍနှင့် တရုတ် ဘဏ္ဍာရေး လုပ်ငန်းများသို့ ပေးရန် အကြွေး များလွန်းခြင်း တို့သည် ထိုစီးပွားရေးပုံပျက်မှု၏ အဓိက လက္ခဏာများ ဖြစ်သည်။

ဒီမိုကရေစီ ပုံစံတမျိုးကို လက်ခံလိုက်ပြီး ပြင်ပကမ္ဘာသို့ အမည်ခံတံခါး ဖွင့်လိုက်ပြီးနောက် တိုင်းပြည်သို့ အလုံးအရင်းနှင့် ဝင်လာမည်ဟု မျှော်လင့်ထားသော နိုင်ငံခြားတိုက်ရိုက် ရင်းနှီးမြှုပ်နှံမှုမှာ ယခုအချိန်အထိ စိတ်ပျက်စရာ အနေအထားသာ ရရှိသည်။ ဖရီးမင်း ထောက်ပြသည့်အတိုင်း ဆိုပါက “စီးပွားရေး ကိုယ်စားလှယ်အဖွဲ့များစွာ သွားကြ၊ ပြန်ကြရှိသော်လည်း ရင်းနှီးမြှုပ်နှံရန် ကတိပြုခြင်းနှင့် ငွေကြေး စိုက်ထုတ်ခြင်းမှာ အသင့်အတင့်သာ ရှိသည်။”

အဓိက အတားအဆီးမှာ တိုင်းပြည်ကို ၁၉၆၂ ခုနှစ်က စတင်အုပ်ချုပ်သည့် စစ်အုပ်ချုပ်ရေးသည် စီးပွားရေးကို ကြီးကြပ် လည်ပတ်စေမည့် မဏ္ဍိုင်အဖွဲ့အစည်း သို့မဟုတ် အင်စတီကျူးရှင်းများကို အင်အားချိနဲ့ စေခဲ့ခြင်းဖြစ်သည်။ ၁၉၈၈ ခုနှစ်အထိ မြန်မာနိုင်ငံသည် စစ်တပ်က အုပ်ချုပ်သည့် ဆိုရှယ်လစ်နိုင်ငံသာ ဖြစ်ပြီး တခုတည်းသော လွတ်လပ်သည့် ဈေးကွက်မှာ နေရာတကာတွင် တွေ့ရနိုင်သည့် မှောင်ခိုဈေးများသာ ဖြစ်သည်။

၁၉၈၈ ခုနှစ် နောက်ပိုင်းတွင် လွတ်လပ်သော စီးပွားရေး လုပ်ငန်းများကို အကန့်အသတ်ဖြင့် ခွင့်ပြုခဲ့သော်လည်း စစ်တပ်သည် ပြည်တွင်း လုပ်ငန်းရှင်များဖြင့် ပူးပေါင်းပြီး စီးပွားရေးကို တင်းကျပ်စွာ ချုပ်ကိုင်ထားသည်။ စီးပွားရေး တံခါးဖွင့်ခြင်းကို ၂၀၁၁ ခုနှစ်တွင် စတင်ခဲ့သော်လည်း စီးပွားရေးမှာ စစ်တပ်၏ မှားယွင်းစီမံခန့်ခွဲမှု ဆယ်စုနှစ်များမှ နာလန် မထသေးပေ။

စစ်တပ်၏ ပြင်းထန်သော ချေမှုန်းမှုကြောင့် မွတ်စလင် ၇ သိန်းကျော် ဘင်္ဂလားဒေ့ရှ်သို့ ထွက်ပြေးရသည့် ရခိုင်ပြည်နယ်မှ လူ့အခွင့်အရေး ချိုးဖောက်မှုများကြောင့် အနောက်နိုင်ငံများက မြန်မာနိုင်ငံကို ပြန်လည် အရေးယူပိတ်ဆို့ခြင်းသည် တရုတ်နိုင်ငံက မြန်မာအပေါ် ဘဏ္ဍာရေးသြဇာ ကျင့်သုံးရန် ခွင့်ပြုလိုက်ခြင်း ဖြစ်သည်။

လွတ်တော် ကိုယ်စားလှယ်များက တရုတ်ကြွေးမြီများနှင့် ပတ်သက်ပြီး စိုးရိမ်ကြောင်း ပြောကြားစေကာမူ အနောက်တိုင်း အရေးယူ ပိတ်ဆို့မှု အသစ်များကြောင့် အစိုးရသစ်အနေဖြင့် ခေတ်နောက်ကျသော စီးပွားရေးကို တိုးတက်စေရန် လိုအပ်သော ချေးငွေနှင့် ရင်းနှီးမြှုပ်နှံမှုအတွက် တရုတ်မှလွဲပြီး အခြား ရွေးစရာမရှိတော့ပေ။

အကြွေးကို ဆန်ဖြင့်ပေးဆပ်ခြင်းသည် မြန်မာလွှတ်တော်တွင် တီထွင်ဆန်းသစ်သော အတွေးအခေါ် ဖြစ်ကောင်း ဖြစ်နိုင်သော်လည်း နိုင်ငံကို အကြွေးသံသရာမှ လွတ်မြောက်စေရေး စီးပွားရေးနည်းလမ်း မရှိဘဲ အကြွေး ထောင်ချောက်သို့ ကျမည့် အန္တရာယ်အတွက် အဖြေမဟုတ်ပေ။

တရုတ်နိုင်ငံသည် သီရိလင်္ကာအပါအဝင် အခြားနိုင်ငံများတွင် အချုပ်အခြာအာဏာကို ထိပါးသော အခွင့်အရေးများရယူပြီး အကြွေးများ လျှော်ပစ်နေသည်။ မြန်မာနိုင်ငံတွင် တရုတ်နိုင်ငံက သေနင်္ဂဗျူဟာ အကျိုးစီးပွားအတွက် ပိုမို ထိန်းချုပ် လိုသည်ဟု ဖော်ပြထားသော စီးပွားရေး နယ်ပယ် များစွာ ရှိနေသည်။

(Asia Times ပါ Bertil Lintner ၏ Poor and isolated, Myanmar backs into a China debt trap ကို ဘာသာပြန်ဆိုသည်။)

The post တရုတ် အကြွေး ထောင်ချောက်ထဲသို့ တကျော့ပြန် အထီးကျန် လူမွဲ မြန်မာနိုင်ငံ appeared first on ဧရာဝတီ.

သီရိလင်္ကာနိုင်ငံသည် ငွေပေးငွေယူရှင်းတမ်း အကျပ်အတည်းနှင့် ရင်ဆိုင်ရန် နီးကပ် လာသောကြောင့် ဒေသတွင်းအဓိက မဟာမိတ်များထံမှ ဘဏ္ဍာရေး အကူအညီများ တောင်းခံနေရသည်။

ယခင် မကြုံဖူးလောက်အောင် များပြားသော ပြည်ပကြွေးမြီ ပေးဆပ်ရမည့် တာဝန်များကို ဖြည့်ဆည်းနိုင်ရန် အားထုတ်သည့် အနေဖြင့် သီရိလင်္ကာနိုင်ငံသည် တရုတ်၊ အိန္ဒိယ နိုင်ငံများနှင့် ဆွေးနွေးနေကြောင်း သိရသည်။

အိန္ဒိယ ဗဟိုဘဏ်သည် သီရိလင်္ကာဗဟိုဘဏ်သို့ ငွေလဲလှယ်မှု အစီအစဉ်တခုအရ ဒေါ်လာ သန်း ၄၀၀ ထုတ်ပေးရန် ယခုလ အစောပိုင်းက သဘောတူခဲ့သည်။

“အိန္ဒိယ ဗဟိုဘဏ်၏ လျင်မြန်ပြီး ကာလအကန့်အသတ်မဲ့သော အကူအညီသည် သီရိလင်္ကာနိုင်ငံ၏ ပြည်ပ အရန်ငွေကို လုံလောက်သော အဆင့်တွင် ထိန်းသိမ်းထားရန် အထောက်အကူပြုခြင်းဖြင့် ရင်းနှီးမြှုပ်နှံသူများ၏ ယုံကြည်မှုကို မြှင့်တင်ပေးမည်” ဟု သီရိလင်္ကာ ဗဟိုဘဏ်က ထုတ်ပြန်သော ကြေညာချက်တွင် ဖော်ပြထားသည်။

တချိန်တည်းတွင် တရုတ်နိုင်ငံဘဏ်ကလည်း သီရိလင်္ကာနိုင်ငံသို့ ချေးငွေ ဒေါ်လာ သန်း ၃၀၀ ထုတ်ပေးသည်ဟု သတင်းများက ဆိုသည်။

အိန္ဒိယ ဗဟိုဘဏ်နှင့် တရုတ်နိုင်ငံဘဏ်တို့သည် ၎င်းတို့၏ အကူအညီများကို ဒေါ်လာ ၁ ဘီလျံစီအထိ စဉ်းစားနေကြောင်း ကိုလံဘိုတွင် ကျင်းပသည့် ညီလာခံတခုတွင် သီရိလင်္ကာဗဟိုဘဏ် ဥက္ကဋ္ဌ အင်ဒရာဂျစ် ကွန်မာရာဆွာမိက ပြောသည်။

“သီရိလင်္ကာရဲ့ မိတ်ဆွေတွေဖြစ်တဲ့ နိုင်ငံကြီးနှစ်ခုက ကျနော်တို့နိုင်ငံ ပိုမိုကြီးမားတဲ့ အကျပ်အတည်း ကြုံရချိန်မှာ အကူအညီတွေကို မြှင့်တင်ပေးကြပါတယ်” ဟု ၎င်းက သီဟိုဠ် ကုန်သည်ကြီးများအသင်းက စီစဉ်သော အစည်းအဝေးတွင် ပြောခဲ့သည်။

လွန်ခဲ့သောနှစ်ကုန်က နိုင်ငံ၏ အကြွေး ပေးဆပ်နိုင်သည့်နှုန်းကို ကျသွားစေသော နိုင်ငံရေးမတည်ငြိမ်မှုကြောင့် ရင်းနှီးမြှုပ်နှံသူများကို ထိတ်လန့်စေသောအခါ သီရိလင်္ကာ၏ အရန် နိုင်ငံခြားသုံးငွေသည် ဒေါ်လာ ၆.၉ ဘီလျံအထိ ကျဆင်းသွားခဲ့သည်။

သီရိလင်္ကာနိုင်ငံသည် နိုင်ငံတကာ ငွေချေး စာချုပ်ဈေးကွက်ကို မြှင့်တင်ရန် အားထုတ်မှု မအောင်မြင်သောအခါ နိုင်ငံခြားသုံး အရန်ငွေကို သုံးပြီး နိုင်ငံတကာ အစိုးရငွေချေးစာချုပ် ဒေါ်လာ ၁ ဘီလျံဖိုးကို ပြန်လည် ပေးဆပ် ခဲ့ကြောင်း သီရိလင်္ကာ ဗဟိုဘဏ်က လွန်ခဲ့သောတပတ်က ကြေညာခဲ့သည်။

၂၀၁၉ ခုနှစ် နှစ်ကုန်တွင် ပြန်လည်ပေးဆပ်ရမည့် ပြည်ပအကြွေးမှာ စံချိန်တင်ပြီး ဒေါ်လာ ၅.၉ ဘီလျံရှိနေကာ နိုင်ငံအနေဖြင့် ထိုနည်းအတိုင်း ဆက်လက်သွားပါက နိုင်ငံခြားအရန်ငွေကြေး ကုန်ခမ်း သွားမည်ဖြစ်သည်။

စုစုပေါင်းတန်ဖိုး ဒေါ်လာ ၈၇ ဘီလျံရှိသော သီရိလင်္ကာ စီးပွားရေးတွင် ကြွေးမြီ မကြုံစဖူး များပြားနေသည်။ သီရိလင်္ကာနိုင်ငံသည် ၂၀၁၉ ခုနှစ်နှင့် ၂၀၂၂ ခုနှစ်အတွင်း ပြန်လည်ပေးဆပ်ရမည့် ကြွေးမြီမှာ ဒေါ်လာ ၂၀.၉ ဘီလျံရှိသည်ဟု ဘဏ်လုပ်ငန်း သတင်းရင်းမြစ်များက ဆိုသည်။

တရုတ်နိုင်ငံသည် သီရိလင်္ကာ၏ နောက်ဆုံး အားကိုးစရာ မြီရှင်နိုင်ငံဖြစ်နေသည်။ တရုတ်နိုင်ငံဘဏ်သည် ကိုလံဘိုတွင် လွန်ခဲ့သော နှစ်က ရုံးခန်းဖွင့်ခဲ့ပြီး သီရိလင်္ကာက နိုင်ငံတကာ ငွေရင်းဈေးကွက်မှ ဒေါ်လာရှာရန် ကြိုးစားသောအခါ တရုတ်က ၎င်းတို့တွင် ငွေကြေးများစွာရှိသောကြောင့် အစိုးရငွေချေးစာချူပ်များ အားလုံးကို ဝယ်ယူရန် ကမ်းလှမ်းခဲ့သည်ဟု အတွင်းသတင်းများအရ သိရသည်။

သို့သော် မြီရှင်နိုင်ငံ အများအပြား ခွဲထားလိုသောကြောင့် ထိုကမ်းလှမ်းမှုကို ပယ်ချခဲ့သည်ဟု သိရသည်။

မကြာသေးမီနှစ်များအတွင်း တရုတ်ဘဏ်များသည် အဓိက အခြေခံအဆောက်အအုံ စီမံကိန်း အများအပြားကို ငွေကြေး စိုက်ထုတ်ခဲ့သည်။ သီရိလင်္ကာနိုင်ငံ၏ ၂၀၁၈ ခုနှစ်ကုန်အထိ ပြည်ပကြွေးမြီ စုစုပေါင်း ဒေါ်လာ ၅၃.၁ ဘီလျံ၏ ၁၅ ရာခိုင်နှုန်းနီးပါးကို တရုတ်ကပိုင်သည်ဟု ကိုလံဘိုအခြေစိုက် အတိုင်ပင်ခံလုပ်ငန်း Verite သုတေသန လုပ်ငန်းက ခန့်မှန်းသည်။ နိုင်ငံ၏ ဒေါ်လာဖြင့် သတ်မှတ်သော ပြည်ပကြွေးမြီအများစုကို နိုင်ငံတကာ အစိုးရငွေချေးစာချုပ်များဖြင့် ရယူထားပြီး ၅၀ ရာခိုင်နှုန်းရှိကာ ကျန်ငွေများမှာ ဂျပန်၊ အာရှ ဖွံ့ဖြိုးရေးဘဏ်နှင့် ကမ္ဘာ့ဘဏ်များမှ ရယူထားသည်။

လွန်ခဲ့သောနှစ်က သီရိလင်္ကာနိုင်ငံသည် တရုတ်ဖွံ့ဖြိုးရေးဘဏ်မှ ဒေါ်လာ ၁ ဘီလျံချေးငွေရယူထားပြီး တရုတ်ဗဟိုဘဏ်ကလည်း ဒေါ်လာ သန်း ၂၅၀ နှင့် ညီမျှသော ငွေချေးစာချုပ်များ ပေးအပ်ထားသည်။

“တရုတ်နိုင်ငံကနေ ငွေချေးတဲ့အခါ အတိုးနှုန်းက ၂ ရာခိုင်နှုန်းဆိုတော့ နိုင်ငံတကာ ငွေချေး စာချုပ်တွေနဲ့ ယှဉ်ရင် သီရိလင်္ကာအတွက် အကျိုးပိုရှိတယ်။ နိုင်ငံတကာ ငွေချေးစာချုပ်တွေက အတိုးနှုန်း ၆.၂၉ ရာခိုင်နှုန်းလောက် ရှိတယ်” ဟု လွန်ခဲ့သောတပတ်က ကိုလံဘိုတွင် ကျင်းပသည့် တရုတ်ကြွေးမြီများ ဆွေးနွေးပွဲတခုတွင် Verite ၏ အမှုဆောင်ဒါရိုက်တာ နီရှန် ဒီ မယ်လ်က ပြောသည်။

မကြာသေးမီနှစ်များအတွင်း အိန္ဒိယ ဗဟိုဘဏ်သည် သီရိလင်္ကာ၏ ငွေဖော်နိုင်မှုနှင့် ငွေပေးချေမှု အကျပ်အတည်း များတွင် ဝင်ရောက်ကူညီလာသည်။ ၂၀၁၆ ခုနှစ်က ထိုဘဏ်သည် သီရိလင်္ကာ ဘဏ်ကို ဒေါ်လာ သန်း ၇၀၀ ခန့် ၃ လကြာ အကူအညီပေးခဲ့သည်။ နောက်ဆုံးပေးခဲ့သည့် ဘဏ္ဍာရေးအကူအညီ ဒေါ်လာ သန်း ၄၀၀ သည် အိန္ဒိယနိုင်ငံအနေဖြင့် နှစ်နိုင်ငံဆက်ဆံရေးကို ကာကွယ်လိုကြောင်း ပြသနေသည်။

တရုတ်နှင့် အိန္ဒိယတို့မှ ဘဏ္ဍာရေး အကူအညီများသည် အိန္ဒိယ သမုဒ္ဒရာမှ အချက်အခြာကျသော သီရိလင်္ကာအပေါ် သြဇာလွှမ်းမိုးရန် အားပြိုင်မှုကိုလည်း ပြသနေသည်။ နှစ် ၃၀ ကြာ ပြည်တွင်းစစ် ၂၀၀၉ ခုနှစ်တွင် ပြီးဆုံးပြီးနောက် တရုတ်နိုင်ငံသည် အိန္ဒိယ၏ အနီးကပ် အိမ်နီးချင်း သီရိလင်္ကာသို့ ထိုးဖောက် လာသည်။

သီရိလင်္ကာနိုင်ငံ၏ စီးပွားရေး ပြဿနာများကို ၎င်း၏ နိုင်ငံရေးပြဿနာများက ပိုမိုဆိုးရွားစေခဲ့သည်။ ၂၀၁၈ ခုနှစ် နှစ်ကုန်တွင် သမ္မတ မိုင်သရီပါလာ ဆီရီဆန်နာ ပြုလုပ်ခဲ့သည့် ဖွဲ့စည်းပုံအခြေခံဥပဒေအရ အာဏာသိမ်းမှုမှာ နိုင်ငံရေး အကျပ်အတည်းကို ပိုမိုဆိုးရွားစေခဲ့သည်။ သမ္မတက ဝန်ကြီးချုပ်ကို သူ၏ ညွန့်ပေါင်းအစိုးရမှ အကျဉ်းနည်းဖြင့် ဖြုတ်ချလိုက်ပြီး နိုင်ငံရေးအရ ပိုမိုလူကြိုက်များသူကို အစားထိုး လိုက်သည်။ သို့သော် ထိုသူကို ပါလီမန်က ထောက်ခံခြင်း မရှိပေ။

ချေးငွေပြန်လည် ပေးဆပ်နိုင်မှုအဆင့် သတ်မှတ်သည့် ထိပ်တန်းလုပ်ငန်းကြီး ၃ ခုဖြစ်သော Fitch Ratings, Standard & Poor’s နှင့် Moody’s Investor Services တို့က သီရိလင်္ကာ၏ အဆင့်ကို နှိမ့်ချလိုက် သောကြောင့် နိုင်ငံတကာချေးငွေများကို ပိုမိုကုန်ကျစရိတ် များစေခဲ့သည်။ Fitch က သီရိလင်္ကာကို B+ အဆင့်မှ အကြွေးဆုံးအဆင့်အထက် ၄ မှတ်သာ မြင့်တော့သော B သို့ လျှော့ချလိုက်သည်။

သီရိလင်္ကာ နိုင်ငံသည် နိုင်ငံရေးမတည်ငြိမ်မှုကြောင့် စတော့နှင့် ချေးငွေ သက်သေခံ လက်မှတ် ဈေးကွက်တွင် ဒေါ်လာ ၁ ဘီလျံခန့် ဆုံးရှုံးရသည်။ နှစ်စဉ် ၄ ရာခိုင်နှုန်းကျဆင်းနေသော သီရိလင်္ကာ ရူပီးငွေသည် နိုင်ငံရေး မတည်ငြိမ်မှုနှင့် စီးပွားရေး စွမ်းဆောင်မှု မကောင်းသောကြောင့် လွန်ခဲ့သော နှစ်ကုန်တွင် ဒေါ်လာနှင့်ယှဉ်လျှင် ၁၆ ရာခိုင်နှုန်း ကျဆင်းသွားသည်။

နိုင်ငံတကာ ငွေကြေးရန်ပုံငွေအဖွဲ့ (IMF) သည် ၂၀၁၆ ခုနှစ်က ဘဏ္ဍာရေးအကူအညီ ဒေါ်လာ ၁.၅ ဘီလျံ၏ နောက်ဆုံးအသုတ်ကို ဆိုင်းငံ့ပြီး သီရိလင်္ကာနိုင်ငံ၏ နိုင်ငံတကာ ငွေရင်းဈေးကွက်မှ ငွေရှာနိုင်သော အလားအလာကို လျှော့ချလိုက်သည်။ သီရိလင်္ကာအစိုးရ ကိုယ်စားလှယ်များက ဝါရှင်တန်မှ အရာရှိများကို သွားရောက် တွေ့ဆုံခဲ့ပြီးနောက် ယခုတပတ်အတွင်းတွင်မူ IMF ဆိုင်းငံ့ထားသော အစီအစဉ်ကို ပြန်လည် သုံးသပ်ရန် သဘောတူခဲ့သည်။

“ထိုကဲ့သို့သော အားထုတ်မှုများတွင် သီရိလင်္ကာ အာဏာပိုင်များကို ကူညီရန် IMF က အသင့်ရှိနေပြီး အစီအစဉ် ဆွေးနွေးမှုများ စတင်ရန်အတွက် IMF ကိုယ်စားလှယ် အဖွဲ့တဖွဲ့သည် ဖေဖော်ဝါရီလလယ်တွင် ကိုလံဘိုသို့ သွားရောက်ရန် စီစဉ်ထားသည်” ဟု မန်နေဂျင်းဒါရိုက်တာ ခရစ်စတင်း လာဂတ်က အင်္ဂါနေ့က ထုတ်ပြန်သော ကြေညာချက်တွင် ဖော်ပြထားသည်။

အစိုးရအနေဖြင့် လက်ရှိတွင် လွန်စွာအားနည်းနေသော ပို့ကုန်မြှင့်တင်ခြင်းနှင့် နိုင်ငံခြား တိုက်ရိုက်ရင်းနှီးမြှုပ်နှံမှု ဆွဲဆောင်ခြင်းတို့ဖြင့် ငွေလုံးငွေရင်း အသုံးစရိတ်ကို မြှင့်တင်ရန်လိုကြောင်း သုတေသီများကပြောသည်။

“ဒေါ်လာကြွေးမြီတွေကို ပြန်ပေးဖို့ ဒေါ်လာဝင်ငွေမရှိဘူး” ဟု သုတေသီတဦးက ထောက်ပြသည်။

ပို့ကုန်သည် လွန်ခဲ့သော နှစ် ၂၀ က စုစုပေါင်း အမျိုးသားထုတ်လုပ်မှု၏ ၃၃ ရာခိုင်နှုန်းရှိနေရာမှ ယခု ၁၃ ရာခိုင်နှုန်းသာ ရှိတော့ကြောင်းလည်း သူက ပြောသည်။

“တကယ်တော့ သီရိလင်္ကာ ရင်ဆိုင်နေရတာက ဒေါ်လာအကျပ်အတည်းပဲ” ဟု သူက ဆိုသည်။

( Nikkei Asian Review ပါ Marwaan Macan-Markar ၏ Sri Lanka seeks regional bailout as balance of payments crisis looms ကို ဘာသာပြန်ဆိုသည်။)

The post အကြွေးထောင်ချောက်ထဲက သီရိလင်္ကာ ငွေလှည့် ချေးရပြီ appeared first on ဧရာဝတီ.

အင်္ဂလန်နိုင်ငံ၊ Gatwick လေဆိပ်ကနေ လေယာဉ်စီးမယ့် ခရီးသည်တွေအနေနဲ့ မကြာမီအ ချိန်အတွင်း စက်ရုပ်တွေနဲ့ ကားပါကင်ထိုးနိုင်တော့မှာ ဖြစ်ပါတယ်။

ဟိသရိုးလေဆိပ်ပြီးနောက် UK ရဲ့ ဒုတိယ အကြီးမားဆုံးဖြစ်တဲ့ ဂတ်ဝစ်(Gatwick) လေဆိပ်ဟာ ကားပါကင်နေရာလွတ် အရေအတွက် ပိုများလာစေဖို့ ရည်ရွယ်ချက်နဲ့ စက်ရုပ်က အလိုအလျောက် ကားပါကင်ထိုးပေးမယ့် စနစ်ကို စတင် အသုံးပြုသွားမှာ ဖြစ်ပါတယ်။

Gatwick လေဆိပ်နဲ့ စက်ရုပ်ကားပါကင်စနစ်တွေကို အကောင်အထည်ဖော်နေတဲ့ Stanley Robotics ကုမ္ပဏီတို့ ပူးပေါင်းကာ ယခုနည်းပညာသစ်ကို Gatwick လေဆိပ်မှာ လာမယ့် ဧပြီလကနေ သြဂုတ်လအတွင်း စမ်းသပ်သွားမှာပါ။ Stanley Robotics ဟာ လိုင်ယွန်လေဆိပ်က ကားပါကင်ထိုးစက်ရုပ်တွေကို ထုတ်လုပ်၊ ဝန်ဆောင်မှုပေးနေတဲ့ ကုမ္ပဏီတခု ဖြစ်ပါတယ်။

Gatwick လေဆိပ် ကားပါကင်ကို လာတဲ့ ခရီးသည်တွေအနေနဲ့ မိမိတို့ မောင်းနှင်လာတဲ့ ကားကို ဂိုဒေါင်ပုံစံ အခန်းတခုထဲ မောင်းထည့်ပေးထားဖို့ပဲ လိုပါတယ်။ ပြီးရင်တော့ Stan ဆိုတဲ့ အလိုအလျောက် ပါကင်ထိုး စက်ရုပ် ရောက်ရှိလာကာ ဝန်ပင့်ယာဉ် (Forklift) အတိုင်း ကားအောက်ကို လက်တံပြားတခု ထိုးထည့်ကာ ကားပါကင်ဧရိယာထဲ သယ်ဆောင်သွားမှာ ဖြစ်ပါတယ်။

ကားပါကင်ထဲ ပါကင်ထိုးမယ့် ကိစ္စအဝဝကို စက်ရုပ်ကပဲ ဆောင်ရွက်ပေးသွားမှာပါ။ စက်ရုပ်တွေဟာ ခရီးသည်တွေရဲ့ ခရီးစဉ်မှတ်တမ်းကိုလည်း သိရှိနိုင်တဲ့အတွက် ခရီးသည်တွေ Gatwick လေဆိပ်ကို ပြန်လည် ရောက်ရှိလာတော့မယ်ဆိုရင် ကားကို ဂိုဒေါင်အခန်းထဲ အဆင်သင့် ပြန်ထုတ်ပေးထားမှာပါ။

စက်ရုပ်တွေကို ကားပါကင်ထိုးခိုင်းခြင်းဖြင့် ကားပါကင်နေရာလွတ်တွေ ပိုထွက်လာပြီး၊ ကားများများ ပိုဆံ့လာမှာ ဖြစ်တယ်လို့ သိရပါတယ်။ စက်ရုပ်သုံး အလိုအလျောက်ကားပါကင်ထိုးစနစ်ကို Gatwick လေဆိပ် ရဲ့ တောင်ဘက် အဆောက်အဦ ရက်ရှည် ကားပါကင်အတွင်းက Zone B မှာ စတင် စမ်းသပ်သွားမှာ ဖြစ်ပါတယ်။

လက်ရှိ ကားပါကင်နေရာလွတ် ၂,၃၅၀ ထဲက ကားပါကင်နေရာ ၁၇၀ ခုကို စက်ရုပ်ကားပါကင်ထိုးစနစ်သုံး ပါကင်နေရာ ၂၇၀ အဖြစ် ပြောင်းလဲသွားမှာ ဖြစ်ပါတယ်။ နေရာလွတ် ၁၀၀ လောက် ပိုထွက်လာမယ့် သဘောပါ။ စက်ရုပ်ကို ကားပါကင်သွားထိုးခိုင်းမယ့် စနစ်ကို စတင် အသုံးပြုပြီဆိုရင် ကားပါကင်နေရာလွတ် ၆,၀၀၀ ကျော်ကို ၈,၅၀၀ အထိ နေရာလွတ် တိုးမြှင့်နိုင်မှာ ဖြစ်တယ်လို့ Gatwick လေဆိပ်က ဆိုပါတယ်။

လူကိုယ်တိုင် ပါကင်ထိုးတာထက်စာရင် စက်ရုပ်တွေ ပါကင်ထိုးပေးတာဟာ ပိုမိုတိကျသလို ယာဉ်မောင်း ကားတံခါးဖွင့် ထွက်ဖို့ နေရာတောင် ချန်စရာမလိုတဲ့အတွက် အကျယ်အဝန်းတူ မြေနေရာထဲမှာတောင် ကားပါကင်နေရာ ပိုများများ ထွက်လာမှာ ဖြစ်ပါတယ်။ ယခုနည်းပညာ အောင်မြင်ခဲ့တယ်ဆိုရင် ဂတ်ဝစ်လေဆိပ်က ကားပါကင်အားလုံးမှာ ယခုစနစ် ပြောင်းလဲ အသုံးပြုသွားမှာ ဖြစ်တယ်လို့ ဆိုပါတယ်။

Ref: The Independent

The post Gatwick လေဆိပ်တွင် အလိုအလျောက် ကားပါကင်ထိုးပေးမည့် စက်ရုပ်များ အသုံးပြုမည် appeared first on ဧရာဝတီ.

မြန်မာနိုင်ငံ၏ ပထမဆုံး နိုင်ငံတကာ ရင်းနှီးမြှုပ်နှံမှု ထိပ်သီးဆွေးနွေးပွဲကို လွန်ခဲ့သောလ နှောင်းပိုင်းက နေပြည်တော်တွင် ကျင်းပခဲ့သည်။ နှစ်ရက်ကြာ ထိုထိပ်သီးဆွေးနွေးပွဲတွင် ပြည်နယ်နှင့်တိုင်း ဆယ်ခုရှိ အမေရိကန်ဒေါ်လာ ၃ ဘီလျံ (ကျပ် ၄.၅ ထရီလျံ) တန် စီမံကိန်း ၁၂၀ ကို ပြသခဲ့သည်။

ထိုအခမ်းအနား ဒုတိယနေ့တွင် ရင်းနှီးမြှုပ်နှံမှုနှင့် နိုင်ငံခြား စီးပွားဆက်သွယ်ရေး ဝန်ကြီး ဦးသောင်းထွန်းက အရှေ့တောင် အာရှ၏ နောက်ဆုံးနှင့် အကောင်းဆုံး စီးပွားရေး စစ်မျက်နှာတွင် မည်သည့်အတွက် ရင်းနှီးမြှုပ်နှံသင့်သည်ကို နိုင်ငံတကာ ဧည့်သည်များအား ရှင်းပြဆွေးနွေးသည်။ အစိုးရသည် ၂ နှစ်ကျော်ကြာ နှေးကွေးနေသော စီးပွားရေးကို ပြန်လည် ရှင်သန်စေရန် ကြိုးစားနေသည်။

“မြန်မာနိုင်ငံဟာ စီးပွားရေးအတွက် တံခါးဖွင့်ထားပြီး လိုအပ်တဲ့ အပြောင်းအလဲတွေ လုပ်နေတယ်” ဟု ဦးသောင်းထွန်းက ပြောသည်။

ဆယ်စုနှစ် ၅ ခုကျော်ကြာ စစ်အုပ်ချုပ်ရေးအပြီးတွင် စီးပွားရေးသည် ထောင်တက်မည်ဟု မျှော်လင့်ခဲ့သည့် လက်ရှိအစိုးရခေတ်တွင် မြန်မာငွေကြေးအင်အား ပျော့ခြင်း၊ ငွေကြေးဖောင်းပွမှုနှုန်း မြင့်မားခြင်း၊ လက်နက်ကိုင် ပဋိပက္ခ၊ မူဝါဒ မတည်ငြိမ်ခြင်းနှင့် ပြုပြင်ပြောင်းလဲမှု နှေးကွေးခြင်း တို့သည် စီးပွားရေး တိုးတက်မှုနှုန်းကို ကျဆင်းစေခဲ့သည်။

အစိုးရ၏ အရှေ့ဘက်သို့ မျက်နှာမူသော မူဝါဒအရ အစိုးရ အရာရှိများသည် အာရှတခွင်လှည့်လည်ပြီး မြန်မာ့ စီးပွားရေးကို အားတက်ဖွယ်ရာ ပြောကြားခဲ့သည်။ ယခုကျင်းပသော အခမ်းအနားသည်လည်း အရှေ့အာရှနိုင်ငံများမှ ရင်းနှီးမြှုပ်နှံမှုကို မြှင့်တင်သည့် အားထုတ်မှုလည်းဖြစ်သည်။ ပြည်တွင်းနှင့် နိုင်ငံပေါင်း ၁၇ နိုင်ငံမှ ကိုယ်စားလှယ်ပေါင်း ၁၆၀၀ ကျော် တက်ရောက်ကြပြီး ကုမ္ပဏီ ၄၀ ကျော်က ခင်းကျင်းပြသကြသည်။

ထိပ်တန်းနိုင်ငံများမှာ တရုတ်၊ ဂျပန်၊ စင်ကာပူနှင့် ထိုင်းတို့ဖြစ်သည်။ ဝန်ကြီးက ရင်းနှီးမြှုပ်နှံသူများကို ပြောသော စကားများအနက် မှတ်သားစရာ ၄ ခုမှာ အောက်ပါတို့ ဖြစ်သည်။

အဓိက ပြုပြင်ပြောင်းလဲရေးများ

ဥပဒေမူဘောင်များ ပြင်ဆင်ခြင်း၊ လုပ်ထုံးလုပ်နည်းဆိုင်ရာ အခက်အခဲများ ဖယ်ရှားပေးခြင်းနှင့် ကုမ္ပဏီများကို အွန်လိုင်းမှ မှတ်ပုံတင်ရန် ဆောင်ရွက်ခြင်း စသည့် မြန်မာနိုင်ငံသို့ နိုင်ငံခြား တိုက်ရိုက်ရင်နှီးမြှုပ်နှံမှု ဆွဲဆောင်ရန် အစိုးရက လက်ရှိ အချိန်အထိ ဆောင်ရွက်နေသော ပြုပြင်ပြောင်းလဲရေးများကို ဦးသောင်းထွန်းက တင်ပြခဲ့သည်။

ကမ္ဘာ့ဘဏ်က ထုတ်ပြန်သည့် စီးပွားရေး လုပ်ငန်းလုပ်ကိုင်လွယ်မှု အညွှန်းကိန်းကို ဦးသောင်းထွန်းက မေးခွန်းထုတ်သည်။ ထိုအညွှန်းကိန်းအရ မြန်မာနိုင်ငံသည် တိုးတက်မှုမရှိဘဲ၊ ယခင်နှစ်ကအတိုင်း ၁၇၁ တွင်သာ ရှိနေသည်။

“မြန်မာနိုင်ငံမှာ စီးပွားရေးလုပ်ရတာ အများကြီး ပိုလွယ်အောင်လို့ လွန်ခဲ့တဲ့ လအနည်းငယ်အတွင်းမှာ အရေးပါတဲ့ အပြောင်းအလဲတွေ လုပ်ခဲ့တယ်လို့ ကျနော်ပြောနိုင်တယ်” ဟု ဝန်ကြီးက ပြောသည်။

အဓိက ပြုပြင်ပြောင်းလဲရေး နှစ်ခုဖြစ်သော Standard operation procedures နှင့် Single window system များ ပြုလုပ်ထားကြောင်း ရင်းနှီးမြှုပ်နှံသူများကို သူက အာမခံ ပြောကြားသည်။ Standard operation procedures ကြောင့် ရင်းနှီးမြှုပ်နှံသူများအတွက် အဆင့်ဆင့် လွယ်ကူမည်ဖြစ်ပြီး Single window စနစ်သည် ကုန်သည်များနှင့် အာဏာပိုင်များ ရှင်းလင်းမှု ပြုလုပ်ရာတွင်နှင့် ခွင့်ပြုချက် ရယူရာတွင် အချိန်နှင့် ကုန်ကျစရိတ် သက်သာစေရန် ဆောင်ရွက်ပေးမည့် စနစ်ဖြစ်ကြောင်း သူက ပြောသည်။

ရင်းနှီးမြှုပ်နှံသူများကို မြေရရှိနိုင်မှုနှင့် မြေငှားရမ်းမှုဆိုင်ရာ သတင်းအချက်အလက်များ ပေးမည့် ဒစ်ဂျစ်တယ် စနစ် ဖြစ်သော “Land Bank” စနစ်ကို စတင်မိတ်ဆက်ရန် အစိုးရက လုပ်ဆောင်နေကြောင်းလည်း သူက ရှင်းပြသည်။

“ပိုမို ပွင့်လင်းမြင်သာမှု ရှိလာမယ်။ မြန်မာနိုင်ငံမှာ ရင်းနှီးမြှုပ်နှံလိုသူတွေအတွက် မျှတတဲ့အခြေအနေကို ပွင့်လင်းမြင်သာမှုက ဖန်တီးပေးလိမ့်မယ်လို့ ကျနော်ထင်တယ်” ဟု သူက ပြောသည်။

မြန်မာနိုင်ငံတွင် အသက်နှင့် အသက်မဟုတ်သော အာမခံ လုပ်ငန်းဆောင်ရွက်လိုသော ပြည်ပကုမ္ပဏီခွင့်ပြုသည့် ဗဟိုဘဏ်၏ မကြာသေးမီက လုပ်ဆောင်မှုကိုလည်း ဦးသောင်းထွန်းက ထည့်သွင်း ပြောကြားသွားသည်။

လာမည့် နှစ်ပေါင်း ၂၀ အတွင်း

ရေရှည်တည်တံ့ခိုင်မြဲပြီး တာဝန်သိသော အရည်အချင်းမီ စီးပွားရေးလုပ်ငန်း အမေရိကန်ဒေါ်လာ ဘီလျံ ၂၀၀ ကျော်ဖိုး ဆွဲဆောင်ရန် မြန်မာရင်းနှီးမြှုပ်နှံမှု စီမံကိန်း (Myanmar Investment Promotion Plan – MIPP) ကို အစိုးရက လွန်ခဲ့သော နှစ်က စတင်ခဲ့သည်။

ယခုနှစ်အတွက် ဦးစားပေးမှာ MIPP ကိုအာရုံစိုက်ရေး ဖြစ်ကြောင်း ၎င်းက ဆက်ပြောသည်။ သို့သော် စီးပွားရေး တိုးတက်မှုနှုန်းမှာ ၂၀၁၇-၁၈ ခုနှစ်က ၆.၈ ရာခိုင်နှုန်းရှိရာမှ ၂၀၁၈-၁၉ ခုနှစ်တွင် ၆.၂ ရာခိုင်နှုန်းသို့ အနည်းငယ် ကျဆင်းမည်ဟု ကမ္ဘာ့ဘဏ်က ခန့်မှန်းထားသည်။

ယခုနှစ်အတွက် အစိုးရက အဓိက ထားသောအချက်မှာ ရင်းနှီးမြှုပ်နှံမှု တိုးချဲ့ရေးနှင့် စီးပွားရေးကို ပိုမိုလျှင်မြန်စွာ ဖွင့်ပေးရေးဖြစ်ကြောင်း ဦးသောင်းထွန်းက အလေးထား ပြောသည်။

“ကျနော်တို့ဟာ ခုန်ပျံကျော်လွှားရုံတင် မဟုတ်ဘူး၊ အကြီးအကျယ် တိုးတက်ပြောင်းလဲမှု ရှိလာမယ်” ဟု သူက ဆိုသည်။

အဓိက စိန်ခေါ်မှုများ

ကမ္ဘာ့အခြေခံ အဆောက်အအုံဆိုင်ရာအမြင် Global Infrastructure Outlook အစီရင်ခံစာအရ မြန်မာ့စီးပွားရေး တိုးတက်မှုအတွက် အဓိက စိန်ခေါ်မှုမှာ အခြေခံအဆောက်အအုံ အကြီးအကျယ် လိုအပ်နေခြင်းဖြစ်ပြီး စာရင်းတွင် ဖော်ပြထားသည့် နိုင်ငံ ၅၀ တွင် အဆိုးဆုံး ဖြစ်နေသည်။ မြန်မာနိုင်ငံသည် အခြေခံအဆောက်အအုံ ဒေါ်လာ ၁၁၂ ဘီလျံဖိုး လိုအပ်နေသည်။

အခြေခံ အဆောက်အအုံသည် လက်ရှိအစိုးရ ရင်ဆိုင်နေရသည့် အကြီးမားဆုံး စိန်ခေါ်မှု ဖြစ်သည်ကို သူသိကြောင်း ဦးသောင်းထွန်းက ပြောသည်။ ကမ္ဘာ့အရေးအပါဆုံး ထွန်းသစ်စ ဈေးကွက်များဖြစ်သည့် တရုတ်နှင့် အိန္ဒိယ နိုင်ငံများ အကြားတွင် တည်ရှိသော သေနင်္ဂဗျူဟာကျသည့် အနေအထားကို အကျိုးရှိအောင် အသုံးချလိုကြောင်း သူက ဆက်ပြောသည်။

ရင်းနှီးမြှုပ်နှံသူများ အနေဖြင့် အခြေခံအဆောက်အအုံ စီမံကိန်းများတွင် ရင်းနှီးမြှုပ်နှံနိုင်သည့် အခွင့်အလမ်းကို အသုံးချရန် သူက တိုက်တွန်းသည်။ ထို့အပြင် မြန်မာနိုင်ငံသည် တရုတ်နိုင်ငံ၏ ရပ်ဝန်းတခု လမ်းတခုအစီအစဉ် (BRI) တွင် အဓိက နေရာမှ ပါဝင်နေကြောင်း သူက ပြောသည်။

“BRI ကိုကြည့်လိုက်ရင် မြန်မာနိုင်ငံက အားလုံးရဲ့ အလယ်မှာ ရောက်နေတယ်။ ရေကြောင်းပိုးလမ်းမကြီးက မြန်မာကို မဖြတ်လို့ မရဘူး” ဟု သူက ဆိုသည်။

BRI စီမံကိန်းများမှ နိုင်ငံအားလုံး အကျိုးခံစားရမည်ဟု ယုံကြည်သောကြောင့် တရုတ်နိုင်ငံ သြဇာကြီးထွားလာခြင်းကို အတားအဆီး တခုအဖြစ် မမြင်သင့်ကြောင်းလည်း ဦးသောင်းထွန်းက ပြောသည်။ သူ၏ အစိုးရသည် ကီလိုမီတာ ၁၇၀၀ ရှည်သော တရုတ်မြန်မာ စီးပွားရေးစြင်္ကန် အကောင်အထည်ဖော်ရေး သဘောတူညီချက်ကို စက်တင်ဘာလက လက်မှတ် ရေးထိုးခဲ့သည်။ ထိုစီးပွားရေး စြင်္ကန်သည် တရုတ်နိုင်ငံ ယူနန်ပြည်နယ်မှ စတင်ပြီး မြန်မာနိုင်ငံ၏ အဓိက စီးပွားရေး မြို့ကြီးများ ဖြစ်သည့် နိုင်ငံအလယ်ပိုင်းမှ မန္တလေးနှင့် စီးပွားရေးမြို့တော် ရန်ကုန်ကို ဖြတ်သန်းကာ ရခိုင်ပြည်နယ်ရှိ ကျောက်ဖြူ အထူးစီးပွားရေးဇုန် ဆိပ်ကမ်းအထိ ရောက်သည်။

“ကျနော်တို့က ထိပ်တိုက်တွေ့တာထက် ပူးပေါင်း ဆောင်ရွက်တာပဲ လုပ်နိုင်တယ်။ ဒါဟာ ဒေသတွင်းမှာသာမက၊ တကမ္ဘာလုံး တိုးတက်မှုကို အထောက်အကူ ပြုတယ်” ဟု ဦးသောင်းထွန်းက ပြောသည်။ BRI မြန်မာနိုင်ငံသည် အာရှ သယ်ယူပို့ဆောင်ရေး ဗဟိုချက်ဖြစ်လာနိုင်သည်ဟုလည်း သူက သုံးသပ်သည်။

တရုတ်နိုင်ငံနှင့် ဆက်ဆံရေး

နိုင်ငံတွင်း တရုတ် ရင်းနှီးမြှုပ်နှံမှုများကို ပြည်သူလူထုက စိုးရိမ်သော်လည်း ရိုဟင်ဂျာ အကျပ်အတည်းနှင့် ရခိုင်ပြည်နယ်မှ ဖြစ်ရပ်များသည် မြန်မာနိုင်ငံကို တရုတ်လက်အတွင်း ပြန်လည်တွန်းပို့နေသကဲ့သို့ ဖြစ်နေသည်ဟု ဝေဖန်သူများက ပြောသည်။

သို့သော် ဦးသောင်းထွန်းက “ကျနော်တို့က အားလုံးနဲ့ မိတ်ဆွေ ဖြစ်ချင်တယ်” ဟု ဆိုသည်။ ၎င်းက မြန်မာနှင့် တရုတ်နိုင်ငံတို့ ပူးပေါင်း ဆောင်ရွက်ရာတွင် ဥပမာအဖြစ် ကျောက်ဖြူ အထူးစီးပွားရေးဇုန်ကို ကိုးကား ပြောဆိုသည်။

ထိုစီမံကိန်းသည် BRI အရ တရုတ်နိုင်ငံကို ဒေသတွင်း ဆက်သွယ်မှု တိုးတက်စေရန် ဘင်္ဂလားပင်လယ်အော်ကို အသုံးပြုခွင့် ပေးသော စီမံကိန်းဖြစ်သည်။ တခြား ဥပမာတခုမှာ အိန္ဒိယနိုင်ငံနှင့် ပူးတွဲ အကောင်အထည်ဖော်သော ကုလားတန် ဘက်စုံ သယ်ယူပို့ဆောင်ရေး ကြားခံ စီမံကိန်း ဖြစ်သည်။ ထိုစီမံကိန်းသည် အိန္ဒိယနိုင်ငံ အရှေ့ပိုင်း ဆိပ်ကမ်းဖြစ်သော ကာလ်ကတ္တားနှင့် ကုန်းတွင်းပိတ် မီဇိုရမ်ပြည်နယ်သို့ မြန်မာနိုင်ငံ ချင်းပြည်နယ်၊ ရခိုင်ပြည်နယ်များကို ဖြတ်သန်း ဆက်သွယ်သော စီမံကိန်းဖြစ်သည်။

“ကျနော်တို့အားလုံးက လူသားအားလုံးအတွက် လုပ်နေတာ။ ဒါကြောင့် တရုတ်ဖြစ်ဖြစ်၊ အိန္ဒိယဖြစ်ဖြစ်၊ ဘင်္ဂလားဒေ့ရှ် ဖြစ်ဖြစ်၊ ထိုင်းဖြစ်ဖြစ် ပူးပေါင်းဆောင်ရွက်ဖို့ လိုတယ်” ဟု သူက ပြောသည်။

ရခိုင်ပြည်နယ်တွင် ပူးပေါင်းဆောင်ရွက်ရန်လို

အမျိုးသားဒီမိုကရေစီ အဖွဲ့ချုပ်အစိုးရသည် အရေးပါသော စီးပွားရေး ပြုပြင်ပြောင်းလဲမှုများ လုပ်ဆောင်ခဲ့သည်။ သို့သော် နိုင်ငံ၏ ပုံရိပ်ကို လွန်စွာထိခိုက်စေသော ၂၀၁၇ ရိုဟင်ဂျာ အကျပ်အတည်းနောက်ပိုင်းတွင် နိုင်ငံခြား ရင်းနှီးမြှုပ်နှံမှု သိသိသာသာ ကျဆင်းပြီး အနောက်တိုင်း ရင်းနှီးမြှုပ်နှံသူများသည် မြန်မာနိုင်ငံကို လွန်စွာ သတိထားလာသည်။ ရခိုင်ပြည်နယ် အကျပ်အတည်းသည် နိုင်ငံခြားရင်းနှီးမြှုပ်နှံမှု ရရှိရေးအတွက် ပြဿနာ ဖြစ်လာသည်။

အားလုံးလက်ခံနိုင်သော အဖြေကို မြန်မာအစိုးရက ရှာရန် ကြိုးစားနေကြောင်း ဦးသောင်းထွန်းက ရင်းနှီးမြှုပ်နှံသူများကို ထပ်မံ အာမခံထားသည်။ အစိုးရသည် ကွယ်လွန်သူ ရခိုင်ပြည်နယ်ဆိုင်ရာ အကြံပေးကော်မရှင် ဥက္ကဋ္ဌ ကိုဖီအာနန်၏ အစီရင်ခံစာကို အကောင်အထည် ဖော်နေသည်ဟု သူက ပြောသည်။

“ကျနော်တို့က ရေတိုမဟုတ်ဘူး၊ ရေရှည်အဖြေရှာဖို့လိုတယ်။ ဒါကြောင့် ငြိမ်းချမ်းရေးက လွှမ်းခြုံမယ်။ အသိုင်းအဝန်း အားလုံး သဟဇာတရှိရှိ ငြိမ်းချမ်းစွာနေမယ်” ဟု သူက ဆက်ပြောသည်။

ရခိုင်ပြည်နယ်တွင် အထောက်အထားမဲ့ နေထိုင်သူ များစွာရှိကြောင်း၊ ဆင်းရဲနွမ်းပါးကြောင်း၊ အလုပ်အကိုင်မရှိကြောင်း နိုင်ငံအနေဖြင့် ထိုပြဿနာများကို ကိုင်တွယ်ရန်လိုကြောင်း သူက ဆိုသည်။ မြန်မာနိုင်ငံအနေဖြင့် အကြမ်းဖက်ဝါဒကို လက်မခံကြောင်းလည်း သူက ပြောသည်။

“ဒါကြောင့်မို့လို့ နိုင်ငံတကာ အသိုင်းအဝန်းအနေနဲ့ ရေရှည် အလုပ်အကိုင်ရရှိရေးအတွက် အဖြေရှာဖို့ မြန်မာနိုင်ငံနဲ့ အတူလုပ်ဖို့ ကျနော်ပြောနေတာ” ဟုလည်း ၎င်းက ဆိုသည်။

အစိုးရသည် ရခိုင်ပြည်နယ်တွင် ဖေဖော်ဝါရီ ၂၁ -၂၂ ရက်နေ့များတွင် စိုက်ပျိုးရေး၊ မွေးမြူရေးနှင့် ငါးလုပ်ငန်း၊ ခရီးသွားလုပ်ငန်းနှင့် အသေးစားလုပ်ငန်းများ ကဏ္ဍများတွင် ရင်းနှီးမြှုပ်နှံမှုအတွက် ထိပ်သီးဆွေးနွေးပွဲများ ကျင်းပရန် စီစဉ်နေကြောင်း သူက ပြောသည်။

ဆန့်ကျင်သော ပြဿနာများကိုသာ အာရုံစိုက်ခြင်းသည် ဖြေရှင်းနိုင်မည်မဟုတ်ဘဲ ရခိုင်ပြည်နယ်အခြေအနေကို ပိုမို ဆိုးရွားစေမည်ဟု ဦးသောင်းထွန်းက မှတ်ချက်ပြုသည်။

ရခိုင်ပြဿနာကို ဖြေရှင်းရန် သက်ဆိုင်သူအားလုံး အတူ လုပ်ဆောင်ရမည်ဟု သူကပြောပြီး ရခိုင်ပြည်နယ် ရင်းနှီးမြှုပ်နှံမှု ထိပ်သီး ဆွေးနွေးပွဲသို့ တက်ရောက်ရန် ၎င်းက ပြောကြား တိုက်တွန်းလိုက်သည်။

“အခုအချိန်ဟာ သဟဇာတဖြစ်ဖို့ အားလုံး ပူးပေါင်းလုပ်ဆောင်ရမယ့် အချိန်ပါ။ ရခိုင်ပြည်နယ်မှာ ပြဿနာရှိတယ်ထင်ရင် တိုးတက်အောင် ပူးပေါင်းဆောင်ရွက်ရမှာပါ။ အခြေအနေ ပြောင်းလဲအောင် လုပ်ဆောင်ပေးမှာပါ” ဟု သူက ပြောသည်။

(Nan Lwin ၏ Government’s Message to Investors: Myanmar Open for Business ကို ဘာသာပြန်ဆိုသည်။)

The post မြန်မာ့စီးပွားရေး တံခါးဖွင့်ထားကြောင်း ရင်းနှီးမြှုပ်နှံသူများကို အစိုးရ အသိပေး appeared first on ဧရာဝတီ.

Facebook ပေါ်က သတင်းအချက်အလက်အမှားတွေကို ဖော်ထုတ်ပေးနေတဲ့ Snopes ကုမ္ပဏီဟာ Facebook နဲ့ လက်တွဲဖြုတ်လိုက်ပြီဖြစ်ကြောင်း သောကြာနေ့မှာ ထုတ်ပြန်ကြေညာလိုက်ပါတယ်။

သတင်းအချက်အလက်စိစစ်ရေးကုမ္ပဏီ Snopes ဟာ မှားယွင်းလွဲချော်နေတဲ့ သတင်းအကြောင်းအရာ၊ ဓာတ်ပုံ နဲ့ ဗီဒီယိုတွေ News Feed ပေါ်ကနေ လျော့ကျစေဖို့အတွက် Facebook ၂ နှစ်ကျော်ကြာ လက်တွဲဆောင်ရွက်ခဲ့ပါတယ်။ ဒါပေမယ့် Facebook ပလက်ဖောင်းပေါ် ပျံ့နှံ့နေတဲ့ သတင်းအချက်အလက်အမှားတွေကို ဆက်လက်ဖော်ထုတ်ပေးဖို့ အင်အားမရှိတော့တာကြောင့် Facebook နဲ့ စာချုပ်အသစ် မချုပ်တော့တာ ဖြစ်တယ်လို့ သတင်းထုတ်ပြန်ချက်မှာ ဖော်ပြထားပါတယ်။

“လက်ရှိမှာ ပြင်ပ အချက်အလက်စိစစ်ရေး ဝန်ဆောင်မှု (Third-party fact-checking services) တွေ လုပ်ဆောင် ပေးခြင်းရဲ့ ကုန်ကျစရိတ်တွေ၊ အကျိုးရလဒ်တွေကို ချင့်ချိန်နေပါတယ်။ မည်သည့် သတင်းမီဒီယာ ပလက်ဖောင်းအတွက် မဆို ပေးအပ်ကူညီမယ့် ကျနော်တို့ရဲ့ အားထုတ်မှုတွေဟာ ကျနော်တို့ အွန်လိုင်းလူ့အဖွဲ့အစည်းအတွက်ကော၊ ကုမ္ပဏီနဲ့ ဝန်ထမ်းတွေအတွက်ပါ သေချာပေါက် ကောင်းကျိုးရလဒ်ဖြစ်ထွန်းဖို့ပဲ လိုချင်ပါတယ်” လို့ Snopes CEO David Mikkelson နဲ့ လုပ်ငန်းဝန်ဆောင်မှုဆိုင်ရာ ဒုဥက္ကဌ Vinney Green တို့ လက်မှတ်ရေးထိုးထားတဲ့ သတင်းထုတ်ပြန်ချက်မှာ ရေးသားဖော်ပြထားပါတယ်။

Facebook နဲ့ လက်တွဲဖြုတ်လိုက်ရတာကတော့ လူနဲ့ အချိန်အင်အား မလောက်ငှလို့ ဖြစ်တယ်လို့ Green က ပြောပါ တယ်။

Facebook ပလက်ဖောင်းက အချက်အလက်စစ်ဆေးသူတွေအနေနဲ့ မှားယွင်းနေတဲ့ ပို့စ်တိုင်းကို ရွေးချယ် မှတ်သားပြီး၊ Dashboard စာမျက်နှာတခုမှာ ကိုယ်တိုင်ကိုယ်ကျ တခုချင်းစီ ဖြည့်သွင်းရပါတယ်။ ဒီတာဝန်ဟာ ရုံးချုပ်ရယ်လို့ မရှိဘဲ လုပ်ကိုင်နေတဲ့ ဝန်ထမ်း ၁၆ ဦးအတွက် အချိန်အလွန်ကုန်တဲ့ အလုပ်တခု ဖြစ်တယ်လို့ Snopes က ဆိုပါတယ်။

Snopes ဟာ ၂၀၁၆ အမေရိကန်ရွေးကောက်ပွဲပြီးနောက် သတင်းမှားတွေ တက်လာမှု လျော့ပါးစေဖို့အတွက် သီးခြားလွတ်လပ်တဲ့ အချက်အလက်စစ်ဆေးရေးအဖွဲ့အစည်းတွေနဲ့ ပူးပေါင်းကာ Facebook ကို ၂၀၁၆၊ ဒီဇင်ဘာကတည်းက ကူညီပေးနေတဲ့ ကုမ္ပဏီတခု ဖြစ်ပါတယ်။

အစပိုင်းမှာ အခမဲ့ လုပ်ဆောင်ပေးခဲ့တာပါ။ ၂၀၁၇ ခုနှစ်မှာတော့ လက်တွဲဆောင်ရွက်ပေးခဲ့တဲ့အတွက် Facebook ဆီက ဒေါ်လာ တ သိန်းကျော် ရရှိခဲ့ပါတယ်။ ဒါပေမယ့် Facebook နဲ့ သဘောတူညီချက်စာချုပ်ကုန်ဆုံးသွားတဲ့ ပြီးခဲ့တဲ့ ၂၀၁၈၊ ဒီဇင်ဘာလကတည်းက ကောလာဟလနဲ့ သတင်းမှားတွေကို စိစစ်ဖော်ထုတ်မှုကို ရပ်ဆိုင်းပစ်လိုက်ပါတယ်။

ထို့နောက်မှာတော့ အချက်အလက်စစ်ဆေးမှု ပိုမိုလွယ်ကူသက်သာစေဖို့အတွက် Facebook နဲ့ ဆွေးနွေးမှုတွေ လုပ်ခဲ့ပေမယ့် အောင်မြင်မှုမရှိခဲ့တာကြောင့် လက်တွဲဖြုတ်ကြောင်း ကြေညာလိုက်တာပါ။

လက်ရှိအချိန်ထိ Facebook နဲ့ လက်တွဲဆောင်ရွက်လိုစိတ် ရှိသေးပေမယ့်၊ လာမယ့် ၂၀၂၀ပြည့်နှစ် အမေရိကန်သမ္မတရွေးကောက်ပွဲအတွက်ပဲ ကိုယ်ပိုင်ဝန်ဆောင်မှုပေးဖို့ ဦးတည် ဆောင်ရွက်သွားမှာ ဖြစ်တယ်လို့ Snopes က ပြောကြားခဲ့ပါတယ်။

Snopes က လက်တွဲဖြုတ်သွားပေမယ့် ကမ္ဘာတဝှမ်းက အချက်အလက်စစ်ဆေးသူတွေနဲ့ လက်တွဲကာ သတင်းအချက်အလက်စစ်ဆေးမှု ပိုကောင်းအောင် ကြိုးစားနေတယ်လို့ Facebook ပြောရေးဆိုခွင့်ရှိသူတဦးက Poynter ကို အီးမေးလ်ကတဆင့် ပြောကြားခဲ့ပါတယ်။

Ref: Poynter, Snopes

The post သတင်းအချက်အလက် စိစစ်ရေးကုမ္ပဏီ Snopes နဲ့ Facebook တို့ လက်တွဲဖြုတ် appeared first on ဧရာဝတီ.

အတွင်းဝန်ရုံးတွင် ဝိုင်နှင့်အရက် အပါအဝင် အစားအသောက်များ ရောင်းချမည့် ၂ ရက်ကြာ ညဈေးပွဲတော်နှင့် ဂီတ အစီအစဉ်ကို ယခုလအတွင်း ကျင်းပရန် စီစဉ်ခြင်းသည် မြန်မာနိုင်ငံ၏ သမိုင်းအရ အရေးအပါဆုံး အဆောက်အအုံများ အနက် တခုကို ကျက်သရေ ကင်းမဲ့စေသည်ဟု ပြစ်တင်ဝေဖန်မှုများနှင့် ရင်ဆိုင်နေရသည်။

မြန်မာနိုင်ငံ၏ ပထမဆုံး မဟာဈေးပွဲတော် ဆိုသော ထိုပွဲတော်ကို Signature ညဈေး စီစဉ်ရေး ကုမ္ပဏီ၊ မြန်မာနိုင်ငံဆိုင်ရာ အမေရိကန် ပြည်ထောင်စု စိုက်ပျိုးရေးဌာန (USDA) နှင့် SY အုပ်စုတို့က ဖေဖော်ဝါရီလ ၁၁ နှင့် ၁၂ (ပြည်ထောင်စုနေ့) တွင် ကျင်းပရန် စီစဉ်နေခြင်းဖြစ်သည်။

ကိုလိုနီခေတ်နိဂုံးအဖြစ် ဗြိတိသျှ ယူနီယံဂျက်အလံကို ဖြုတ်ချသည့် ၁၉၄၈ ခုနှစ်ဇန်နဝါရီလက မြန်မာနိုင်ငံ၏ ပထမဆုံး လွတ်လပ်ရေးနေ့ကို အတွင်းဝန်ရုံးအတွင်း ကျင်းပခဲ့သောကြောင့် ထိုအဆောက်အအုံသည် သမိုင်းအရ လွန်စွာ အရေးပါသည်။

ထိုထက် ပိုမိုအရေးပါသည်မှာ အတွင်းဝန်ရုံး၏ အနောက်ဖက် အဆောင်တွင် မြန်မာ့လွတ်လပ်ရေး သူရဲကောင်း ဗိုလ်ချုပ်အောင်ဆန်းနှင့် အစိုးရအဖွဲ့ကို ၁၉၄၇ ခုနှစ်တွင် နိုင်ငံရေးပြိုင်ဘက်များက လုပ်ကြံသတ်ဖြတ်ခဲ့ခြင်း ဖြစ်သည်။ ယခုနှစ်ပေါင်းများစွာ ကြာသောအခါ ထိုအဆောက်အအုံကို အာဇာနည်နေ့၊ ဇူလိုင်လ ၁၉ ရက်နေ့တွင် အာဇာနည် များကို အများပြည်သူ ဂုဏ်ပြုနိုရန်အတွက် ဖွင့်လှစ်ပေးသည်။

ပွဲစီစဉ်သူများသည် ထူးခြားသော ဖြစ်ရပ်များဖြစ်ပွားခဲ့သည့် ထိုအရေးပါသော အဆောက်အအုံ၏ ထူးခြားသော သမိုင်းကို လျစ်လျှူရှုကာ အပျော်အပါး ဖျော်ဖြေမှုများ ကျင်းပခြင်းဖြင့် မလေးမစားလုပ်သည်ဟု ဝေဖန်သူများက ပြောနေသည်။ တိုင်းပြည်၏ လွတ်လပ်ရေးသူရဲကောင်းများ လုပ်ကြံခံရသည့်နေရာကို မလေးမစား လုပ်သည်ဟု ပြည်သူများက လူမှုကွန်ရက် Facebook တွင် ရေးသားကြသည်။

“ကျနော်တို့ အာဇာနည်တွေ လုပ်ကြံခံရတဲ့နေရာဟာ အပျော်အပါး လုပ်တဲ့နေရာ မဖြစ်သင့်လို့ ဒီပွဲကို လုံးဝ လက်မခံနိုင်ဘူး” ဟု Facebook သုံးသူတဦးက ဝေဖန်ရေးသားသည်။

ပွဲစီစဉ်သူများ၏ ကြေညာချက်အရ နိုဗိုတယ် ဟိုတယ်၊ ပါ့ခ် ရွိုင်ရယ်ဟိုတယ်နှင့် ဟာ့ဒ်ရော့ခ်ကဖေးတို့သည် ပွဲတော်တွင် ပါဝင်မည်ဖြစ်ပြီး ကယ်လီဖိုးနီးယားဝိုင်၊ အီတလီဝိုင်နှင့် ချိစ် အမျိုးမျိုးတို့ကို ရောင်းချမည်ဖြစ်သည်။ မြန်မာ့ရိုးရာ အစားအစာ များနှင့် ခေါင်ရည်ကိုလည်း ရောင်းချမည် ဖြစ်သည်။ ဟာ့ဒ်ရော့ခ်ကဖေးမှ ရော့ခ်ဂီတဝိုင်း တခုနှင့် ကျော်ကြားသော ပြည်တွင်း အဆိုရှင် R ဇာနည်က ဖျော်ဖြေမည်ဖြစ်ပြီး မြန်မာ့ရိုးရာအကများနှင့် ရုပ်သေးပွဲများလည်း ပါဝင်မည်ဟု သိရသည်။

ပြည်သူများက ပွဲတော်၏ ရည်ရွယ်ချက်ကို နားလည်မှု လွဲခြင်းဖြစ်ကြောင်း ပွဲစီစဉ်သော အဖွဲ့တခုဖြစ်သည့် Signature ၏ ပြောခွင့်ရသူတဦးက ဧရာဝတီသို့ ပြောသည်။

“ဒီပွဲရဲ့ ရည်ရွယ်ချက်က အမေရိကန်နဲ့ မြန်မာ ယဉ်ကျေးမှု ဖလှယ်ဖို့နဲ့ အတွင်းဝန်ရုံးရဲ့ လှပတဲ့ည ရှုခင်းကို ပြသဖို့ပဲ” ဟု အမည်မဖော်ပြရန် မေတ္တာရပ်ခံသော ထိုပြောခွင့်ရသူက ဆိုသည်။

“ဝေဖန်တာတွေရှိလို့ ပွဲအစီအစဉ် မပြောင်းဘူး။ အစိုးရအဆင့်ဆင့် ခွင့်ပြုချက်ရထားပြီးပြီ။ အပြောင်းအလဲ မလုပ်တော့ဘူး” ဟုလည်း သူက ဆက်ပြောသည်။

ထိုပွဲတော်သည် လူထုကို ဒေါသထွက်စေသည့် အတွင်းဝန်ရုံးဝင်းအတွင်း ကျင်းပသော ပထမဆုံး အစီအစဉ်မဟုတ်ပေ။

ဗိုလ်ချုပ်ဟောင်း တဦး၏ သမီးသည် အတွင်းဝန်ရုံး ဝင်းအတွင်း ၂၀၁၅ ခုနှစ်က မွေးနေ့ပွဲ ကျင်းပသောကြောင့် လွန်စွာ မသင့်တော်ကြောင်း လူထုက အပြင်းအထန် ဝေဖန်ခဲ့ဖူးသည်။

လက်ရှိ အချိန်တွင် အတွင်းဝန်ရုံးကို ပန်းချီပြခန်းများ၊ လက်မှုပညာ အလုပ်ရုံများ၊ အခမ်းအနား ကျင်းပရန်နေရာများ၊ အမှတ်တရ ပစ္စည်းဆိုင်များနှင့် ယဉ်ကျေးမှု ပြပွဲများ ကျင်းပရန်နေရာအဖြစ် ပြန်လည်မွမ်းမံနေသည်။ အတွင်းဝန်ရုံးကို ပြန်လည် မွမ်းမံရန် အစိုးရက ၂၀၁၂ ခုနှစ်တွင် အဏ္ဏဝါ အနုပညာ အုပ်စုကို ရွေးချယ်ခဲ့သည်။

ရန်ကုန် ရှေးဟောင်းအမွေအနှစ် ထိန်းသိမ်းရေးအဖွဲ့ (YHT) သည် ပြုပြင်ထိန်းသိမ်းရေး နည်းလမ်းများနှင့် အဆောက်အအုံ အသုံးပြုရေးတို့အတွက် နည်းပညာလေ့လာရန် အဏ္ဏဝါနှင့် ပူးပေါင်း ဆောင်ရွက်နေသည်။

ညဈေးပွဲတော် အစီအစဉ်ကို YHT ကလည်း ဆန့်ကျင်သည်။

“ဒီအဆောက်အအုံဟာ သမိုင်းဝင် အဆောက်အအုံဖြစ်လို့ ကျမတို့လည်း ပြည်သူတွေ ခံစားသလို ခံစားရပြီး ဒီလို အပျော်အပါးတွေ ဒီနေရာမှာ မလုပ်သင့်ဘူးလို့ ထင်တယ်။ ကျမတို့ သိထားတာက ဒီအဆောက်အအုံကို အနုပညာ ပြတိုက်လုပ်ဖို့ ပြင်ဆင်မွမ်းမံနေတယ်၊ အဲဒါက ကောင်းတယ်။ သောက်ကြ စားကြ ဂီတပွဲ ကျင်းပတာတော့ မသင့်တော် ဘူးပေါ့” ဟု YHT ဒါရိုက်တာနှင့် ဒုဥက္ကဋ္ဌ ဒေါ်မိုးမိုးလွင်ပြောသည်။

(Lwin Mar Htun ၏ Outrage Over Plan to Hold ‘NightFest’ at Yangon’s Secretariat ကို ဘာသာပြန်ဆိုသည်။)

The post ဝေဖန်မှုများကြားက အတွင်းဝန်ရုံး ည ပွဲဈေး ဆက်လုပ်မည် ဟုဆို appeared first on ဧရာဝတီ.

အိန္ဒိယနိုင်ငံက ဆယ်ကျော်သက်တဦးဟာ PUBG Mobile ဂိမ်းဆော့ဖို့ ဖုန်းအသစ် ပူဆာတာ မရတဲ့အတွက် မိမိကိုယ်ကို ကြိုးဆွဲချ သတ်သေသွားတယ်လို့ Times of India သတင်းမီဒီယာမှာ ဖော်ပြ ပါရှိလာပါတယ်။

အိန္ဒိယနိုင်ငံ၊ မွန်ဘိုင်းမြို့၊ Kurla မြို့နယ်က အသက် ၁၈ နှစ်အရွယ်၊ ယောကျ်ားလေးတဦးဟာ PUBG Mobile ဂိမ်းဆော့ဖို့အတွက် ရူပီး ၃၇,၀၀၀ (မြန်မာငွေ ၈ သိန်းဝန်းကျင်) တန် မော်ဒယ်မြင့် စမတ်ဖုန်းတလုံး ဝယ်ပေးဖို့ မိသားစုဝင်တွေကို ပူဆာခဲ့တယ်လို့ သိရပါတယ်။ ဒါပေမဲ့ မိသားစုဝင်တွေက သူတောင်းဆိုတာကို ငြင်းဆန်ခဲ့ပြီး၊ ရူပီး ၂၀,၀၀၀ (မြန်မာငွေ ၄ သိန်း) ကျော်တဲ့ ဖုန်းဆို ဝယ်ပေးမှာ မဟုတ်ကြောင်း ပြောကြားခဲ့ပါတယ်။

မိသားစုနဲ့ ကတောက်ကဆဖြစ်ပြီး စိတ်ညစ်နေတဲ့ ဆယ်ကျော်သက်ကောင်လေးဟာ နောက်ဆုံးမှာတော့ ကြိုးတချောင်းယူကာ နေအိမ် မီးဖိုချောင်ထဲက မျက်နှာကျက် ပန်ကာမှာ ကြိုးဆွဲချ အဆုံးစီရင်ခဲ့တယ်လို့ သိရပါတယ်။ ယခုအမှုကို မတေ်ာတဆသေဆုံးမှုနဲ့ ရဲစခန်းမှာ အမှုဖွင့်ထားပြီး ဆက်လက် စုံစမ်းမှုတွေ ပြုလုပ်လျက်ရှိပါတယ်။

PUBG Mobile ဂိမ်းဟာ လူငယ်တွေအကြားမှာ လတ်တလော အကြီးအကျယ် ခေတ်စားနေတဲ့ အခမဲ့ အွန်လိုင်း မိုဘိုင်းဂိမ်းတခုပါ။ ကစားသမား အယောက် ၁၀၀ ထဲမှာ နောက်ဆုံး ကျန်ရစ်သူတဦးသာ အနိုင်ရရှိတဲ့ တိုက်ခိုက်ရေးဂိမ်း အမျိုးအစား Battle Royale ဂိမ်းတခု ဖြစ်ပါတယ်။ ဒါပေမဲ့ ဒီဂိမ်းဟာ စွဲလန်းစေတတ်ပြီး၊ ဂိမ်းကြောင့် ကျောင်းသားတွေရဲ့ စာမေးပွဲရလဒ်တွေ ကျဆင်းစေတဲ့ စွပ်စွဲချက်တွေနဲ့ အိန္ဒိယမှာ ပိတ်ပင်တားမြစ်ဖို့ တောင်းဆိုချက်တွေလည်း ထွက်ပေါ်နေပါတယ်။

လွန်ခဲ့တဲ့ ရက်ပိုင်းကတင် ၁၁ နှစ်အရွယ် ကျောင်းသားတဦးက PUBG ဂိမ်းဟာ အကြမ်းဖက်မှု၊ ရန်လိုမှုနဲ့ Cyber အနိုင်ကျင့်မှုတို့ကို အားပေးရာ ရောက်တာကြောင့် ပိတ်ပစ်တားမြစ်ပေးဖို့ မွန်ဘိုင်းအထက်တရားရုံးကို မိခင်ဖြစ်သူမှ တဆင့် တောင်းဆိုလွှာ ရေးသား တင်သွင်းခဲ့ပါတယ်။

Ref: Times of India, NDTV

The post PUBG Mobile ဂိမ်းဆော့ရန် ဖုန်းအသစ် မဝယ်ပေးလို့ အိန္ဒိယ ဆယ်ကျော်သက်တဦး ကြိုးဆွဲချ သေဆုံး appeared first on ဧရာဝတီ.

ယူနက်စကိုစာရင်းဝင် ယဉ်ကျေးမှုအမွေအနှစ်များ ကိုယ်စီရှိကြသည့် ပုဂံမြို့နှင့် စီယမ်ရိပ်မြို့တို့ကို တိုက်ရိုက်လေကြောင်းလိုင်း ပျံသန်းပြေးဆွဲရေး ဖြစ်နိုင်ချေကို ကမ္ဘောဒီးယားနှင့်မြန်မာတို့ ယခင်သီတင်းပတ်က ဆွေးနွေးခဲ့ကြသည်။

အဆိုပါလေကြောင်းလိုင်းအတွက် အပြည်ပြည်ဆိုင်ရာ ပူးပေါင်းဆောင်ရွက်ရေးဝန်ကြီးဌာန ပြည်ထောင်စုဝန်ကြီး ဦးကျော်တင်နှင့် ကမ္ဘောဒီးယားအစိုးရ ဒုတိယဝန်ကြီးချုပ် ပရတ်ဆော့ဟွန်တို့သည် နေပြည်တော်၌ ကျင်းပသည့် ကမ္ဘောဒီးယား-မြန်မာနှစ်နိုင်ငံ ပူးပေါင်းဆောင်ရွက်ရေး ပူးတွဲကော်မရှင် ဒုတိယအကြိမ်အစည်းအဝေး၌ ထည့်သွင်းဆွေးနွေးခဲ့ကြကြောင်း ကမ္ဘောဒီးယားနိုင်ငံခြားရေးဝန်ကြီးဌာနမှ သတင်းထုတ်ပြန်အရ သိရသည်။

“နှစ်နိုင်ငံစလုံးသို့ ကမ္ဘာလှည့်ခရီးသွားဦးရေ တိုးတက်လာရေးနှင့် နှစ်နိုင်ငံပြည်သူများအကြား ဆက်သွယ်ရေး ပိုမိုတိုးမြင့်လာစေရေး ပုဂံမြို့နှင့် စီအမ်ရိပ်မြို့တို့ကို ဆက်သွယ်ပြေးဆွဲပေးမည့် တိုက်ရိုက်လေကြောင်းလိုင်းများအတွက် ဖြစ်နိုင်ချေကို နှစ်ဖက်ဆွေးနွေးညှိခဲ့ကြောင်း” အဆိုပါ သတင်းထုတ်ပြန်ချက်တွင် ဖော်ပြထားသည်။

နှစ်နိုင်ငံအကြား ခရီးသွားလုပ်ငန်းပူးပေါင်းဆောင်ရွက်မှု ပိုမိုခိုင်မာလာစေရန် “အန်ကော-ပုဂံ” (သို့မဟုတ်) ရှေးဟောင်းမြို့နှစ်မြို့” အမည်ရှိ အစီအစဉ်တိုးမြှင့်ရေးအတွက် မြန်မာနိုင်ငံက သဘောတူ လက်ခံသည်ဟု အဆိုပါသတင်းထုတ်ပြန်ချက်တွင် ဆက်လက်ရေးသားထားသည်။

၂၀၁၈ ခုနှစ်အတွင်း ကမ္ဘောဒီးယားနိုင်ငံသို့ ကမ္ဘာလှည့်ခရီးသွားဦးရေ ၆ ဒဿမ ၂ မီလီယံ လာရောက်ခဲ့ပြီး မြန်မာသို့ ၃ ဒဿမ ၅ မီလီယံ လာရောက်ခဲ့သည်။

ဆက်စပ်ဖတ်ရှုရန် – ဆွေမျိုးပေါက်ဖော်တို့ လာနေပြီ

The post ပုဂံနဲ့ အန်ကောဝပ် တိုက်ရိုက်လေကြောင်းလိုင်း ပျံသန်းပြေးဆွဲနိုင်ရန် ညှိနှိုင်းနေ appeared first on ဧရာဝတီ.

အီလက်ထရွန်နစ် ဖုန်းဘေလ် ဖြည့်သွင်းခြင်း ဝန်ဆောင်မှု လုပ်နေသော Red dot ကုမ္ပဏီကို ငွေကြေး လိမ်လည်မှုဖြင့် တရားစွဲဆိုရန် ပြင်ဆင်နေကြောင်း ကိုယ်စားလှယ်များထံက သတင်း ရရှိသည်။

ဖေဖော်ဝါရီလ ၄ ရက်က ရန်ကုန်မြို့ ဒဂုံမြို့နယ်၊ ယောမင်းကြီး လမ်းရှိ York center တွင် ဖွင့်လှစ်ထားသော Red dot ကုမ္ပဏီ ရုံးခန်းနှင့် မန္တလေး၊ တောင်ကြီး၊ မော်လမြိုင် အစရှိသည့် တိုင်းနှင့် ပြည်နယ်များတွင် ဖွင့်လှစ်ထားသော ရုံးခန်း များကို တပြိုင်တည်း ပိတ်သိမ်း၍ တိမ်းရှောင်နေကြောင်း ကိုယ်စားလှယ်များက ဆိုသည်။

ပဲခူးမြို့နယ် One way မိုလ်ဘိုင်းဖုန်း အရောင်းဆိုင် ပိုင်ရှင် ကိုဇင်ကိုကိုလွင်က “ပဲခူးက ကျနော် သိသလောက် ကိုယ်စား လှယ်တွေ လိုက်စုနေတယ်။ အခု သုံးယောက်တော့ ရပြီ။ ညနေကျရင် ရှေ့နေနဲ့ သေချာတိုင်ပင်မယ်။ သူကတော့ ငွေ ကြေးလိမ်လည်မှု နဲ့ စွဲလို့တော့ ပြောတယ်”ဟု ဧရာဝတီသို့ ပြောသည်။

Red dot စက်များမှာ ပြီးခဲ့သည့် ၂၀၁၈ ခုနှစ် အောက်တိုဘာလ ၁၀ ရက်မှ စတင်၍ ဖုန်းငွေဖြည့်ရာတွင် အဆင်မပြေမှုများ ဖြစ်ခဲ့ပြီးနောက် ဒီဇင်ဘာလတွင် ဝန်ဆောင်မှုမှာ လုံးဝ ရပ်တန့်သွားခဲ့သည်ဟု ကိုယ်စားလှယ်များက ပြောဆိုသည်။

ထိုသို့ အဆင်မပြေမှုများ စဖြစ်ချိန်ကတည်းက ကိုယ်စားလှယ် တချို့မှာ သွားရောက်ပြီး စက်ပြန်အပ်ခြင်း၊ ငွေပြန်ထုတ် ခြင်းများ ပြုလုပ်ခဲ့ကြသော်လည်း လူတိုင်း ငွေပြန်မရရှိခဲ့ကြောင်း ယခုအချိန်တွင် လုံးဝ ရုံးခန်း ပိတ်သိမ်း၍ ထွက်ပြေး တိမ်း ရှောင်နေကြောင်း သိရသည်။

Red dot ကုမ္ပဏီ ရုံးရှေ့၌ Red dot ပိတ်သွားကြောင်းနှင့် ဆက်သွယ် မေးမြန်းရန် ဖုန်းနံပါတ်တခုအား ဆိုင်းဘုတ် ထောင် ၍ ရေးသားထားသည်။

ကုမ္ပဏီ ပိတ်သိမ်းကာ တိမ်းရှောင်သွားသည့် အတွက် လက်တွဲ ဆောင်ရွက်နေသော အရောင်း ကိုယ်စားလှယ်များ အနေ နှင့် ငွေကြေး နစ်နာမှုများ ရှိခဲ့သဖြင့် ဥပဒေ အရ တရားစွဲဆိုရန် ပြင်ဆင် ဆောင်ရွက်နေကြောင်း ကိုယ်စားလှယ်များက ဆိုသည်။

စက်ဖိုး ကုန်ကျစရိတ်မှာ ၅၀၀၀၀ ကျပ် ဖြစ်ပြီး စက်အတွင်း ငွေကျပ် ၆၀၀၀၀ ခန့်မှ ငွေကျပ် သိန်းပေါင်းများစွာ အထိ ထည့် သွင်းရ သဖြင့် ဆုံးရှုံးသူများမှာ တဦးလျှင် ကျပ်သောင်း ဂဏန်းမှ ကျပ်သိန်းဂဏန်း အထိ ဆုံးရှုံးမှု ရှိပြီး တနိုင်ငံလုံး အတိုင်း အတာ အနေနှင့် လူဦးရေ ၂ သောင်းကျော် ငွေကျပ် သိန်းသောင်းနှင့် ချီ၍ နစ်နာခဲ့ရကြောင်း ကိုယ်စားလှယ်များက ပြော ဆိုသည်။

လက်ရှိတွင် အရောင်း ကိုယ်စားလှယ်များက Red dot အရောင်း ကိုယ်စားလှယ်များ Group ဖွင့်၍ ဆုံးရှုံးမှုများကို တိုင် ကြားရန် ဆွေးနွေးနေသော်လည်း မည်ကဲ့သို့ တိုင်ကြားရမည် မသိ ဖြစ်နေခြင်းကြောင့် အခက်ကြုံနေသည်ဟုလည်း မန္တလေးမြို့မှ အရောင်း ကိုယ်စားလှယ် ကိုစိုးမင်းသက် က ပြောသည်။

မြောက်ဒဂုံမြို့နယ် ရှိ ဦးသန့်ဇင်က“ကျနော် လွန်ခဲ့တဲ့ ခြောက်လလောက်က စလုပ်တာ ဖြစ်တယ်။ အက်ပလီကေးရှင်းနဲ့ အွန်လိုင်း ဖုန်းဘေလ် ရောင်းတာ။ Network error ဖြစ်သွားတယ် ဆိုပြီးတော့ ကျနော်တို့ သုံးလို့ မရတော့ဘူး။ သုံးလ လောက်ရှိပြီ။ အဲဒါနဲ့ တောက်လျှောက် ကွန်ပလိန်းလုပ်တော့ ပြင်နေပြီ ရမှာပါလို့ ပြောတယ်။ မနေ့ကမှ တခြား တယောက်ကနေ လာပြောတာ။ ရုံးကတော့ ပိတ်သွားပြီ။ ဘယ်လိုလုပ်ကြမလဲ ဆိုတော့မှ သိတာ”ဟု ဆိုသည်။

ဆက်လက်၍ ၎င်းက“တနိုင်ငံလုံး အနှံ့ဆိုရင် လူဦးရေ သောင်းနဲ့ ချီတော့ တယောက်ကို ကျပ် ၁ သိန်းလောက်နဲ့ ထား။ ကျပ်သိန်းသောင်းနဲ့ ချီတယ်။ ပြည်သူတွေ အကျိုးစီးပွား ကာကွယ်ဖို့ အတွက် ဘယ်လို လုပ်ရမလဲ ဆိုတာ စဉ်းစားနေ တယ်။ ကျနော်က ဦးဆောင်ပြီး တိုင်မယ်လို့ စီစဉ်ထားတယ်”ဟု ဧရာဝတီသို့ ပြောသည်။

Red Dot ကုမ္ပဏီသည် ပြီးခဲ့သည့် ၂၀၁၄ ခုနှစ်၌ ကုမ္ပဏီ စတင် ထူထောင်ခဲ့ကာ၂၀၁၅ ခုနှစ်တွင် လုပ်ငန်းများ စတင် လည် ပတ်လုပ်ခဲ့ပြီး ကိုယ်စားလှယ် ၂ သောင်းကျော် ရှိသည်။
Red Dot ကုမ္ပဏီ၏ အဓိက မိတ်ဖက်များမှာ ဆက်သွယ်ရေး အော်ပရေတာများ ဖြစ်သည့် အော်ရီဒူး၊ တယ်လီနော၊ MPTနှင့် Mytel တို့ ဖြစ်ကြပြီး အခြား မိတ်ဖက်များ အဖြစ် viber ၊ Ananda ၊ iflix ၊ Viu နှင့် ဘဏ်အချို့လည်း ပါဝင် ကြောင်း သိရသည်။

စားသုံးသူရေးရာ ဦးစီးဌာန ညွှန်ကြားရေးမှူး ဦးမြင့်ချိုက “Red dot နဲ့ ပတ်သက်လို့ တိုင်ကြားထားတာတော့ အများကြီးပဲ။ ဒါပေမယ့် ကျနော်တို့ ဒီ Red dot ပြဿနာကို ခွဲခြမ်း စိတ်ဖြာကြည့်တဲ့ အခါ စားသုံးသူ နစ်နာမှု မဟုတ်ဘူးဗျ။ သူက စီးပွားရေး ကတိကဝတ် ဖောက်ဖျက်မှု ဖြစ်နေတယ်။ အဲဒီတော့ တိုင်စာတွေကို အမှုဖွင့်ပါလို့ပဲ အကြံပေး ထားတယ်”ဟု ဧရာဝတီသို့ ပြောသည်။

ကုမ္ပဏီ ပိတ်၍ ထွက်ပြေးတာက ရာဇဝတ်မှု ဖြစ်နေကြောင်း ယင်းအတွက် စားသုံးသူ ရေးရာ ဌာနအနေနှင့် တိုက်ရိုက် ဖြေရှင်းနိုင်ခြင်း မရှိကြောင်း၊ တိုင်ကြားထားသည့် သူများအတွက် သဘောထားများကို ပြန်လည် ဖြေကြားပေးလျက် ရှိကြောင်း ၎င်းက ပြောသည်။

Red Dot ကုမ္ပဏီသည် ၂၀၁၇ ခုနှစ်က ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှု ဦးစီးဌာန (DICA)ရုံးတွင် Myanmar Red dot network limited နာမည်နှင့် နိုင်ငံခြားသား ပုဂ္ဂလိပိုင် ကုမ္ပဏီအဖြစ် မှတ်ပုံတင်ထားပြီး ကုမ္ပဏီ ဒါရိုက်တာများ အနေနှင့် အိုင်ယာလန် နိုင်ငံသား John Nagle နှင့် နယ်သာလန် နိုင်ငံသား Wouter De Jong တို့ဖြစ်ကြောင်း DICA ရုံး ကုမ္ပဏီ မှတ်ပုံတင် စာရင်းတွင် ဖော်ပြထားသည်။

DICA ညွှန်ကြားရေးမှူး ဦးမျိုးမင်းက “ဒါက ကုမ္ပဏီ ဥပဒေကို ဖောက်ဖျက်တာမှ မဟုတ်တာ။ ဥပမာ-ယာဉ်မောင်း လိုင်စင် မရှိဘဲ ကားမောင်းတယ်။ ယာဉ်တိုက်မှု ဖြစ်တယ် ဆိုရင် အမှု ၂ မှုဖြစ်တယ်။ ဒီကိစ္စတော့ ကုမ္ပဏီ မှတ်ပုံတင် ဥပဒေအရ အရေးယူဖို့ မရှိဘူး။ သူတို့မှာ စာချုပ်စာတမ်းတွေ ရှိမယ်။ ဒါတွေနဲ့ တရားစွဲပေါ့” ဟု ပြောသည်။

အဆိုပါ Red Dot ကုမ္ပဏီသည် အီလက်ထ ရွန်နစ်ဘီလ်ဖြည့်သွင်းခြင်း ဝန်ဆောင်မှု အပြင် မီတာဘီလ်ပေးဆောင်ခြင်းနှင့် ဗေဒင်ကဲ့သို့သော ဝန်ဆောင်မှုများအတွက် Red Dot Pay ဝန်ဆောင်မှုကိုလည်း လုပ်ကိုင်ဆောင်ရွက်နေခြင်း ဖြစ်သည်။

The post ငွေကြေး လိမ်လည်မှုနှင့် Red dot ကုမ္ပဏီကို တရားစွဲရန် စီစဉ် appeared first on ဧရာဝတီ.

မြန်မာ အရပ်သားခေါင်းဆောင် ဒေါ်အောင်ဆန်းစုကြည်သည် နိုင်ငံခြား ရင်းနှီးမြှုပ်နှံမှု ဆွဲဆောင်ခြင်း၊ ဗျူရိုကရေစီ ယန္တရားကို အဆင်ပြေ ချောမွေ့အောင် လုပ်ဆောင်ခြင်း၊ အခြေခံ အဆောက်အအုံများ တိုးတက်အောင် လုပ်ဆောင် ခြင်းနှင့် လူငယ်များ၏ ကျွမ်းကျင်မှုနှင့် စိတ်အားထက်သန်မှုတို့ အပေါ် အခြေခံပြီး စီးပွားရေး တိုးတက်အောင် လုပ်ဆောင်ရန် အစိုးရ၏ အားထုတ်မှုကို ထပ်မံတွန်းအားပေးလိုက်သည်။

“ပြုပြင်ပြောင်းလဲမှုတွေ ဆက်လက်လုပ်ဆောင်ဖို့နဲ့ ရင်းနှီးမြှုပ်နှံမှုအတွက် သင့်တော်တဲ့ ပတ်ဝန်းကျင်ကို ဖန်တီးပေးဖို့ ကျမတို့ရဲ့ ကတိကဝတ်ကို ထပ်မံ အတည်ပြု ပြောကြားလိုတဲ့အတွက် ကျမ ဒီအခမ်းအနားကို တက်ရောက်ခဲ့တာ ဖြစ်ပါတယ်” ဟု နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က လွန်ခဲ့သောတပတ်က နေပြည်တော်တွင် ကျင်းပသည့် “မြန်မာနိုင်ငံမှာ ရင်းနှီးမြှုပ်နှံပါ” (Invest Myanmar Summit) အမည်ရှိ ထိပ်သီးဆွေးနွေးပွဲတွင် နိုင်ငံတကာ ရင်းနှီးမြှုပ်နှံသူများနှင့် ပြည်တွင်း စီးပွားရေး ခေါင်းဆောင်များကို ပြောကြားခဲ့သည်။

ထိုဆွေးနွေးပွဲကို ပြည်ထောင်စုမြန်မာနိုင်ငံ ကုန်သည်များနှင့် စက်မှုလုပ်ငန်းရှင်များ အသင်းချုပ် (UMFCCI) က ပူးတွဲကျင်းပခဲ့ခြင်း ဖြစ်သည်။

ဒေါ်အောင်ဆန်းစုကြည်၏ မိန့်ခွန်းသည် နိုင်ငံ၏ စီးပွားရေးမူဝါဒကို ပိုမိုတောင့်တင်းအောင် လုပ်ဆောင်သော အဓိက အားထုတ်မှု ဖြစ်သည်ဟု လွတ်လပ်သော သုတေသီ ဦးနိုင်ကိုကိုက ပြောသည်။

“ဒီဆွေးနွေးပွဲက ဒေါ်အောင်ဆန်းစုကြည်ရဲ့ စီးပွားရေး မူဝါဒအောင်မြင်ရေးနဲ့ ကမ္ဘာတဝန်း မရေရာမှုတွေကြားမှာ စီးပွားရေး အသွင် ကူးပြောင်းရေးအတွက် အရမ်းကို အရေးကြီးတယ်” ဟု ဦးနိုင်ကိုကိုက ပြောသည်။ “ဒေါ်အောင်ဆန်းစုကြည်ရဲ့ စီးပွားရေးမူဝါဒဟာ စည်းမျဉ်းအခြေပြု ဈေးကွက်အခြေခံ စီးပွားရေး ပြိုင်ဆိုင်မှုနှစ်ခုစလုံးကို စတင် မိတ်ဆက်ပေးလိုက်တယ်” ဟုလည်း သူက ဆိုသည်။

အခြားသော သုတေသီများကမူ သတိထားပြီး ချီးကျူး ပြောဆိုကြသော်လည်း အားလုံး သဘောတူညီသော အချက်မှာ ထိုဆွေးနွေးပွဲသည် စီးပွားရေးကို ချဉ်းကပ်ရာတွင် အရေးပါသော အပြောင်းအလဲဖြစ်ကြောင်းနှင့် အတိတ်နှင့်လမ်းခွဲရန် အားထုတ်မှု ဖြစ်သည်ဟူသော အချက်ဖြစ်သည်။

“အစိုးရရဲ့မူဝါဒတွေက စီးပွားရေး လုပ်ငန်းတွေကို အားပေးတယ်၊ ယှဉ်ပြိုင်မှုနဲ့ လွတ်လပ်သော ဈေးကွက် အောင်မြင်ရေးကို ခွင့်ပြုတယ်” ဟု နိုင်ငံတော်အတိုင်ပင်ခံ၏ စီးပွားရေးအကြံပေး အရာရှိချုပ် ရှောင်တန်နဲက ပြောသည်။

အစိုးရက လက်ရှိအချိန်အထိ ဆောင်ရွက်နေသော ပြုပြင်ပြောင်းလဲရေးများ၏ အရေးပါမှုကိုလည်း ဒေါ်အောင်ဆန်းစုကြည်က အလေးထား ပြောကြားခဲ့သည်။

“ပြုပြင်ပြောင်းလဲရေး အားလုံးဟာ အခြေခံအားဖြင့်တော့ အားလုံးအကျုံးဝင်တဲ့ စီးပွားရေးတိုးတက်မှုကို ရည်မှန်းတဲ့ ဈေးကွက် အခြေပြု စီးပွားရေး ဖော်ဆောင်ဖို့ လုပ်ထုံးလုပ်နည်းနဲ့ ဥပဒေဆိုင်ရာ ပတ်ဝန်းကျင်ကို ခေတ်မီအောင် လုပ်ဆောင်ရေးကို အာရုံစိုက်တယ်” ဟု ဒေါ်အောင်ဆန်းစုကြည်က ပြောသည်။

“ကမ္ဘာ့စီးပွားရေးနဲ့ ပိုမိုပေါင်းစည်းပြီး မြန်မာနိုင်ငံရဲ့ တိုးတက်မှုကို မြှင့်တင်ဖို့လိုအပ်တဲ့ စနစ်ပိုင်းဆိုင်ရာ ပြုပြင်ပြောင်းလဲရေး တွေကိုလည်း လုပ်ဆောင်ပြီးဖြစ်ပါတယ်” ဟုလည်း သူက ဆက်လက်ပြောကြားခဲ့သည်။

မကြာသေးမီက ထုတ်ပြန်ခဲ့သော မြန်မာသေနင်္ဂဗျူဟာ တိုးတက်ရေး စီမံကိန်း (MSDP) သည် ထိုစီမံကိန်းကို အသေးစိတ် ဖော်ပြနေသည်။

“ဒီနေရာမှာ အစိုးရရဲ့ ချဉ်းကပ်ပုံနည်းလမ်းဟာ တန်းတူညီမျှ ယှဉ်ပြိုင်ရေးနဲ့ စည်းမျဉ်းအခြေပြု စီးပွားရေးစနစ် အပေါ်မှာ အခြေခံကြောင်း ထင်ရှားပါတယ်” ဟု ဦးနိုင်ကိုကိုက ပြောသည်။

“အရင် ခရိုနီ စနစ်နဲ့ ခရိုနီတွေဟာ ဒေါ်အောင်ဆန်းစုကြည် စီးပွားရေးမူဝါဒတွေရဲ့ စည်းမျဉ်းအခြေပြု ဈေးကွက် ယန္တရား၊ စွမ်းဆောင်ရည်နဲ့ ယှဉ်ပြိုင်မှုတွေနဲ့ အလုပ်မလုပ်နိုင်ကြဘူး။ နောက်ကွယ်မှာ ညည်းညူနေမယ့်အစား သူတို့တွေ လိုက်ပါ ပြောင်းလဲရလိမ့်မယ်” ဟုလည်း သူက ဆိုသည်။

ဒေါ်အောင်ဆန်းစုကြည်၏ မိန့်ခွန်းသည် ၂၀၂၀ ရွေးကောက်ပွဲမတိုင်မီ ရှေ့နှစ် ၂ နှစ်အတွင်း အစိုးရ၏ ထိပ်တန်းဦးစားပေး ၂ ခုတို့က စီးပွားတိုးတက်ရေးနှင့် ငြိမ်းချမ်ရေးဖြစ်ကြောင်း ပြသလိုက်ပြီး ဦးတည်ဘက် ပြောင်းသွားကြောင်းကိုလည်း ပြသနေသည်။

အမျိုးသား ဒီမိုကရေစီအဖွဲ့ချုပ် ဦးဆောင်သော အစိုးရသည် လက်နက်ကိုင် ပဋိပက္ခ အဆုံးသတ်ရေးကိုသာ လွန်စွာ အာရုံစိုက်နေပြီး စီးပွားတိုးတက်ရေးကို လျစ်လျူရှုထားသည်ဟု စီးပွားရေး အသိုင်းအဝန်းက ခါးခါးသီးသီး ဝေဖန်ကြသည်။

Invest Myanmar Summit သည် ပုဂ္ဂလိက စီးပွားရေးလုပ်ငန်းများနှင့် အစိုးရအကြား ဆက်ဆံရေးကို တောင့်တင်း စေလိုသော UMFCCI ခေါင်းဆောင်မှုပိုင်းမှ လူငယ်လုပ်ငန်းရှင် အုပ်စု၏ အစီအစဉ်ဖြစ်သည်။

“ဒါဟာ ပုဂ္ဂလိက ကဏ္ဍရဲ့ စွမ်းအားနဲ့ အစီအစဉ်ကို သုံးပြီး မူဝါဒတွေ ဆုံးဖြတ်ရာမှာနဲ့ စီးပွားရေး လုပ်ငန်းတွေကို အားပေးတဲ့ ပတ်ဝန်းကျင် ဖန်တီးရာမှာ ပြည်တွင်းစီးပွားရေး လုပ်ငန်းတွေကို ထည့်သွင်းဖို့ အစိုးရကို အားပေးပြီး မြန်မာနိုင်ငံအတွက် စံနှုန်းသစ်ကို ထူထောင်ဖို့ ကြိုးစားလိုက်တာ ဖြစ်တယ်။ ဒါဟာ အစိုးရနဲ့ နိုင်ငံရဲ့ ပြည်တွင်းစီးပွားရေး အသိုင်းအဝန်းအကြား ပူးပေါင်းဆောင်ရွက်ရေး ခေတ်သစ်ရဲ့ အစဖြစ်မယ်လို့ မျှော်လင့်ပါတယ်” ဟု ဆွေးနွေးပွဲကို အဓိက စီစဉ်သူ ဦးဝေဖြိုးက ပြောသည်။

ထို ဆွေးနွေးပွဲကို ထူးခြားစေသည်မှာ ဒေသဆိုင်ရာ အစိုးရများ တက်ကြွစွာ ပါဝင်ခြင်း ဖြစ်ကြောင်းလည်း သူက ဆိုသည်။

ကရင်၊ ချင်း၊ မွန်၊ ရခိုင်၊ ရှမ်း၊ ရန်ကုန်၊ စစ်ကိုင်း၊ မန္တလေး၊ ဧရာဝတီနှင့် တနင်္သာရီ စသည့် ပြည်နယ်နှင့်တိုင်းအစိုးရ ၁၀ ခု တို့ ထိုဆွေးနွေးပွဲသို့ တက်ရောက်ခဲ့သည်။ ရင်းနှီးမြှုပ်နှံသူများကို ရည်ရွယ်သော လုပ်ငန်းများတွင် ကုန်ထုတ်လုပ်ငန်းများ၊ အထည်ချုပ်လုပ်ငန်းများ၊ လျှပ်စစ်နှင့် စွမ်းအင်၊ ခရီးသွားလုပ်ငန်း၊ ပညာရေး၊ အစားအစာ ပြုပြင်ထုတ်လုပ်ရေး၊ ငါးလုပ်ငန်း၊ ကျန်းမာရေး စောင့်ရှောက်မှု၊ အခြေခံအဆောက်အအုံနှင့် အိမ်ခြံမြေ လုပ်ငန်းများပါဝင်သည်။

အစိုးရ အရာရှိများ၏ သဘောထားများ ပြောင်းလဲလာသည်ကိုလည်း ဆွေးနွေးပွဲ တက်ရောက်သူ အများအပြား သတိထားမိကြသည်။

“ဒီဆွေးနွေးပွဲဟာ စိတ်လှုပ်ရှားစရာ အတွေ့အကြုံဖြစ်ပြီး စီးပွားရေး လုပ်ငန်းရှင်တွေရဲ့ စိတ်ဝင်စားမှုနဲ့ လိုအပ်ချက်တွေကို နားထောင်လိုတဲ့၊ ဖော်ရွေတဲ့ အစိုးရ အရာရှိတွေနဲ့ အတားအဆီးမရှိ တွေ့ခွင့်ရခဲ့တယ်” ဟု Great Golden Empire မှ ဒါရိုက်တာ၊ စီးပွားရေး လုပ်ငန်းအတိုင်ပင်ခံနှင့် လုပ်ငန်းရှင်တဦးဖြစ်သူ ချားလ် စတက်ဘာက ပြောသည်။

“စီမံကိန်းတွေနဲ့ စီးပွားရေး အခွင့်အလမ်းတွေကို လက်လှမ်းမီအောင် တင်ပြခဲ့တယ်။ ဒါကြောင့် ရင်းနှီးမြှုပ်နှံသူတွေဟာ စီမံကိန်း အကောင်အထည် ဖော်တာနဲ့ပတ်သက်ပြီး ပြည်နယ်ဝန်ကြီးတွေနဲ့ အလွယ်တကူ စကားပြောနိုင်တယ်” ဟု Asia Focus သို့ သူက ပြောသည်။

“ဒါပေမယ့် ရင်းနှီးမြှုပ်နှံသူတွေကို ဆွဲဆောင်ဖို့ဆိုရင် မြန်မာနိုင်ငံအနေနဲ့ လုပ်စရာတွေ အများကြီး ရှိနေသေးတယ်။ ရှင်းရှင်းလင်းလင်း ထိထိရောက်ရောက် ရှိပြီး မြန်ဆန်တဲ့ စီမံကိန်း အကောင်အထည် ဖော်မှု လိုအပ်နေသေးတယ်” ဟုလည်း သူက ဆိုသည်။

မြန်မာနိုင်ငံသည် စီးပွားရေးလုပ်ငန်းများကို တံခါးဖွင့်ထားပေးကြောင်း ဒေါ်အောင်ဆန်းဆုကြည်မှ အစ အစိုးရ အရာရှိများ အားလုံးအပါအဝင် အစိုးရက အကြိမ်ကြိမ် ပေးလိုက်သည့် အဓိက သတင်းစကားကို အလေးမထားသူ များလည်း ရှိနေသည်။

ဗျူရိုကရေစီ ယန္တရား၏ ခေါင်းမာမှု၊ ရန်လိုမှု တို့နှင့် ပတ်သက်ပြီး တီးတိုးဝေဖန်နေသော ပြည်တွင်း ပြည်ပ စီးပွားရေးသမား အမျာအပြားလည်း ရှိနေသည်။

ထိုအချက်များသည် စီးပွားရေး ပြုပြင်ပြောင်းလဲရေးနှင့် တံခါးဖွင့်ပေးရေးအတွက် အကြီးမားဆုံး အတားအဆီးများ ဖြစ်နေသည်ဟု ထင်ရှားသော ပြည်တွင်း စီးပွားရေးလုပ်ငန်း အမှုဆောင် တဦးက ပြောသည်။ နေ့စဉ် ဆက်ဆံနေရသော အစိုးရဝန်ထမ်းများနှင့် ဆက်ဆံရေး ထိခိုက်မည် စိုးသောကြောင့် သူ၏အမည်ကို မဖော်ပြရန် ထို စီးပွားရေး လုပ်ငန်း အမှုဆောင်က ရှင်းပြသည်။

“ဒါမျိုးတွေကို အရင်ကလည်း ကြားဖူးတယ်” ဟု ဟောင်ကောင်အခြေစိုက် New Asia Property Consultants မှ ဒါရိုက်တာ တိုနီ ပစ်ကွန်ကပြောသည်။ “မြန်မာနိုင်ငံက ညီလာခံကြီးတွေ ကျင်းပတာမျိုးကို သိပ်ကြိုက်တာ။ စကားတွေ အများကြီးပြောပြီး အလုပ်ကျတော့ သိပ်မလုပ်ဘူး။ နောက်တော့ ဘာမှဖြစ်မလာဘူး” ဟု သူက ပြောသည်။

“ရင်းနှီးမြှုပ်နှံသူတွေအတွက် မြန်မာနိုင်ငံဟာ လတ်တလောတော့ စိတ်ဝင်စားစရာ မကောင်းသေးဘူး။ ရခိုင်ပြည်နယ် မြောက်ပိုင်းက စီးပွားရေးပြဿနာ ကြောင့်လည်းပါသလို စီးပွားရေး ပြုပြင်ပြောင်းလဲမှုနဲ့ စီမံကိန်းတွေ အတည်ပြုမှုမှာ မဆုံးနိုင်အောင် နှောင့်နှေး နေတာတွေကြောင့်လည်း ပါတယ်” ဟု သူက ဆိုသည်။

သို့သော် မြန်မာနိုင်ငံမှ လက်ရှိ ရင်းနှီးမြှုပ်နှံမှု ရာသီဥတုအခြေအနေကို လူတိုင်း အဆိုးမြင်ကြသည်တော့ မဟုတ်ပေ။ မကြာသေးမီကမှ ထူထောင်ခဲ့သည့် ရင်းနှီးမြှုပ်နှံမှု လုပ်ငန်းသစ်ဖြစ်သော Ascent Capital Partners သည် မြန်မာနိုင်ငံ၏ စီးပွားရေး အလားအလာနှင့် အကျိုးအမြတ် ရနိုင်ခြေတို့နှင့် ပတ်သက်ပြီး လွန်စွာ စိတ်အားထက်သန်နေသည်။ ထိုလုပ်ငန်းသည် မြန်မာနိုင်ငံတွင် အခြေစိုက်ပြီး နိုင်ငံတွင် ရင်းနှီးမြှုပ်နှံရန် စီးပွားဘက်များထံမှ ရန်ပုံငွေ ဒေါ်လာ သန်း ၅၀ ရှာထားပြီး ဖြစ်နေသည်။

“ကျနော်တို့က မြန်မာနိုင်ငံ အလားအလာကို ယုံကြည်တယ်” ဟု ထိုလုပ်ငန်းကို တည်ထောင်သူ စင်ကာပူနိုင်ငံသား လင် ချောင်ချောင်က ပြောသည်။ “ရင်းနှီးမြှုပ်နှံသူတွေ ရင်ဆိုင်ရတဲ့ စိန်ခေါ်မှုတွေအားလုံးကို ကျနော်တို့သိပေမယ့် မြန်မာနိုင်ငံရဲ့ ရေရှည် အလားအလာကို ကျနော်တို့ အကောင်းမြင်တယ်” ဟု သူက ဆိုသည်။

“အစပိုင်းမှာတော့ အလားအလာကို အသိအမှတ်မပြုကြတာ မျိုးတွေ ရှိပါတယ်။ ဒါပေမယ့် လက်ရှိ ခေါင်းဆောင်မှုပိုင်းမှာ စွမ်းအားနဲ့ လေသံ အပြောင်းအလဲရှိတယ်။ စီးပွားရေးရဲ့ အရေးပါမှုကို အသိအမှတ်ပြုမှုရှိတယ်။ ဘာတွေလိုနေတယ်ဆိုတာ အများကြီး ပိုနားလည်လာတယ်” ဟုလည်း သူက ပြောသည်။

သေနင်္ဂဗျူဟာကျသော တည်နေရာဖြစ်သည့် အိန္ဒိယနှင့် တရုတ်နိုင်ငံများကြားတွင် တည်ရှိခြင်း၊ ဘင်္ဂလား ပင်လယ်အော်နှင့် ကပ္ပလီ ပင်လယ်များနှင့် ထိစပ်နေခြင်းတို့ကြောင့် မြန်မာနိုင်ငံသည် ဒေသတွင်း ဈေးကွက်များကို နိုင်ငံတကာ ကုန်သွယ်ရေးလမ်းကြောင်းနှင့် ချိတ်ဆက်ပေးနိုင်သည်ဟု ဒေါ်အောင်ဆန်းစုကြည်က ရင်းနှီး မြှုပ်နှံသူများကို ပြောခဲ့သည်။

“အခုအချိန်မှာ မြန်မာနိုင်ငံဟာ ရင်းနှီးမြှုပ်နှံမှုအတွက် သင့်တော်တဲ့ အခြေအနေတွေကိုသာမက၊ ကြိုတင်မှန်းဆနိုင်ပြီး အဆင်ပြေချောမွေ့ ဖော်ရွေတဲ့ ပတ်ဝန်းကျင်ကိုပါ ဖန်တီးဖို့ ကတိပြုထားတာ ထင်ရှားတယ်လို့ ထင်ပါတယ်။ ရင်းနှီးမြှုပ်နံှမှုတွေဟာ တာဝန်သိဖို့၊ သဘာဝပတ်ဝန်းကျင်၊ လူမှုရေးနဲ့ အုပ်ချုပ်ရေးတွေနဲ့ ပူးပေါင်းဆောင်ရွက်မယ့် ရင်းနှီမြှုပ်နှံမှုနဲ့ စီးပွားရေး လုပ်ဆောင်မှုတွေကို ဖော်ဆောင်ဖို့ ရင်းနှီးမြှုပ်နှံသူတွေကို ကျမတို့ တောင်းဆိုနေတာပါ” ဟု ဒေါ်အောင်ဆန်းစုကြည်က ဆိုသည်။

သို့သော် အထူးသဖြင့် အနောက်တိုင်းမှ ရင်းနှီးမြှုပ်နှံသူများသည် ရခိုင်ပြည်နယ် ပြဿနာကြောင့် မြန်မာနိုင်ငံတွင် ပါဝင်ပတ်သက်ရန် စိတ်ပူပန်နေသည်။ ရခိုင်ပြည်မှ စစ်ဖက်၏ အလွန်အကျွံ လုပ်ရပ်များကို အစိုးရက ထိန်းချုပ်ရန် ပျက်ကွက်သောကြောင့် ဥရောပသမဂ္ဂသည် မြန်မာနိုင်ငံကို ပေးအပ်ထားသော အခွန်ကင်းလွတ်ခွင့်ကို ပြန်လည် ရုပ်သိမ်းရန် စဉ်းစားနေသည်။ ထိုအရေးယူမှုတွင် မြန်မာနိုင်ငံအတွက် အကျိုးအမြတ်များသော အထည်ချုပ်လုပ်ငန်း ပါဝင်နေပြီး အလုပ်အကိုင် ထောင်ပေါင်းများစွာ ထိခိုက်သွားနိုင်သည်။

ထိုကြောင့်ပင် လိုအပ်ချက်အရ မြန်မာနိုင်ငံသည် အရှေ့တိုင်းကိုသာ မျက်နှာမူနေရသည်။ လွန်ခဲ့သော နှစ်အတွင်း တရုတ်၊ စင်ကာပူ၊ ထိုင်းနှင့် ဂျပန်တို့သည် ထိပ်တန်း ရင်းနှီးမြှုပ်နှံသည့် နိုင်ငံများဖြစ်နေသည်။ မြင်နိုင်သော အနာဂတ်ကာလ အတွင်း ထိုနိုင်ငံများသည်ပင် အဓိက ရင်းနှီးမြှုပ်နှံသူများ ဆက်လက်ဖြစ်နေမည်ဟု စီးပွားရေး အကြီးအကဲ ရင်းနှီး မြှုပ်နှံမှုနှင့် နိုင်ငံခြားစီးပွား ဆက်သွယ်ရေးဝန်ကြီးနှင့် မြန်မာနိုင်ငံ ရင်းနှီးမြှုပ်နှံမှု ကော်မရှင် ဥက္ကဋ္ဌ ဦးသောင်းထွန်းက ပြောသည်။

သို့သော် လက်ရှိအစိုးရသည် တိုင်းပြည်အတွက် အကျိုးရှိမည့် အလုပ်အကိုင်ဖန်တီးမည့်၊ အထူးသဖြင့် ကျေးလက်ဒေသ များတွင် ဆင်းရဲနွမ်းပါးမှု လျှော့ချမည့် ရင်းနှီးမြှုပ်နှံမှုကိုသာ စိတ်ဝင်စားကြောင်း သူက အလေးထားပြောသည်။

တိုက်ဆိုင်စွာ Great Wall အစားအသောက်လုပ်ငန်းနှင့် Hong Kong International Sugar Engineering တို့သည် စစ်ကိုင်းတိုင်း ကသာတွင် သကြားစက်နှင့် Biomass ဇီဝစွမ်းအင် စက်ရုံတည်ဆောက်ရန် ဒေါ်လာ သန်း ၂၀၀ တန် နားလည်မှု စာခွန်လွှာကို ဆွေးနွေးပွဲ ပထမနေ့တွင် လက်မှတ်ရေးထိုးလိုက် သောကြာင့် အာရှရင်းနှီးမြှုပ်နှံမှုများ၏ အရေးပါမှုကို မီးမောင်းထိုးပြလိုက် သကဲ့သို့ ဖြစ်နေသည်။

ထိုစီမံကိန်းအရ သကြားစက်သည် တနေ့လျှင် သကြားတန်ချိန် တသောင်း ထုတ်လုပ်နိုင်ပြီး ဇီဝစွမ်းအင်စက်ရုံသည် လျှပ်စစ်ဓာတ်အား ၆၀ မဂ္ဂါဝပ် ထုတ်လုပ်မည်ဖြစ်သည်။

လင်ချောင်ချောင်က ရင်းနှီးမြှုပ်နှံသူများအတွက် မြန်မာနိုင်ငံ၏ အလားအလာ တောက်ပနေသည်ဟု ယုံကြည်နေသည်။

“မြန်မာနိုင်ငံဟာ အလားအလာကြီးမားတဲ့ စီးပွားရေး အခြေခံတွေရှိတဲ့ အာရှက နောက်ဆုံး ရှေ့တန်း ဈေးကွက် နိုင်ငံဖြစ်တယ်။ ASEAN က အာရှရဲ့ နှလုံးသားမှာ ရှိသလို မြန်မာနိုင်ငံက အရှေ့တောင်အာရှရဲ့ အသည်းနှလုံးဖြစ်တယ်” ဟု သူက ပြောသည်။

(Bangkok Post ပါ Larry Jargan ၏ ‘Suukyinomics’ taking hold ကို ဘာသာပြန်ဆိုသည်။)

The post ဒေါ်အောင်ဆန်းစုကြည်၏ စီးပွားရေးမူဝါဒများ အခြေခိုင်လာ appeared first on ဧရာဝတီ.

Facebook Messenger မှာ ပို့ပြီးသား မက်ဆေ့တွေကို နှစ်ဖက်စလုံးမှာ ပြန်ဖျက်နိုင်တဲ့ ‘Unsend’ လုပ်ဆောင်ချက် ပါဝင်လာပြီ ဖြစ်ပါတယ်။ ပြီးခဲ့တဲ့နှစ် နိုဝင်ဘာလက နိုင်ငံအနည်းငယ်အတွက်ပဲ စတင် ထုတ်ပေးခဲ့ပြီး၊ ယနေ့မှာတော့ တကမ္ဘာလုံးက အသုံးပြုသူတိုင်းမှာ ရရှိလာတာပါ။

ပို့ပြီးသား မက်ဆေ့တခုကို နှစ်ဖက်စလုံးမှာ ပြန်ဖျက်နိုင်ဖို့ အချိန် ၁၀ မိနစ် ပေးထားပါတယ်။ Group Chat ထဲက မက်ဆေ့တွေလည်း ပြန်ဖျက်နိုင်မှာ ဖြစ်ပါတယ်။

CEO Mark Zuckerberg ပေးပို့ထားတဲ့ မက်ဆေ့တွေကို Facebook က နှစ်ဖက်စလုံးမှာ ပြန်ဖျက်ပစ်ခဲ့ပြီး၊ ၇ လအကြာမှာ ‘Unsend’ လုပ်ဆောင်ချက်ကို သာမန်အသုံးပြုသူတွေအတွက် စတင်စမ်းသပ် ထုတ်ပေးခဲ့ပါတယ်။ ယနေ့မှာတော့ Android, iOS နဲ့ Web ကနေ Messenger အသုံးပြုသူတိုင်း သုံးလို့ရပြီ ဖြစ်ပါတယ်။

တခြားလူတဦးကို မှားယွင်းပို့မိတဲ့ စကားတွေ၊ အရေးကြီးလျှို့ဝှက်စကားတွေကို Messenger မှာ ပြန်ဖျက်ချင်တယ်ဆိုရင် အရင်အတိုင်း ဖျက်လိုတဲ့ မက်ဆေ့ကို ခဏဖိထားလိုက်ပါ။ ဒီအခါ ‘Remove for Everyone’ နဲ့ ‘Remove for You’ ဆိုပြီး ပေါ်လာပါလိမ့်မယ်။ တဖက်လူတွေဆီမှာပါ မက်ဆေ့ပျက်သွားချင်တယ်ဆိုရင် ‘Remove for Everyone’ ကို ရွေးပေးလိုက်ရုံပါပဲ။ ၁၀ မိနစ်အတွင်းမှာပဲ ပြန်ဖျက်နိုင်တာ ဖြစ်ပြီး၊ ၁၀ မိနစ်ကျော်သွားရင်တော့ ကိုယ့်ဘက်မှာပဲ ဖျက်လို့ရတော့မှာပါ။ ဖျက်လိုက်တဲ့ မက်ဆေ့တွေကို အမှတ်အသား ပြထားမှာ ဖြစ်ပါတယ်။

စာသားမက်ဆေ့တွေ သာမက ဓာတ်ပုံ၊ ဗီဒီယို၊ အသံ၊ Links၊ GIF စသဖြင့် ပေးပို့လိုက်သမျှ အရာတိုင်းကို ပြန်ဖျက်လို့ ရပါတယ်။

မိမိ Messenger မှာ Unsend လုပ်ဆောင်ချက် မရရှိသေးဘူးဆိုရင် အရင်ဆုံး Messenger App ကို Update လုပ်ပေးပါ။ Update လုပ်ပြီးတာတောင် မရသေးဘူးဆိုရင်တော့ Settings>Applications ကနေ Messenger ကို ရွေးပြီး၊ Storage မှာ Clear Cache လုပ်ပေးလိုက်ပါ။ ဖုန်းကို Restart ချကြည့်ပါ။ ဒါဆိုရင်တော့ Unsend လုပ်ဆောင်ချက် စတင်အသုံးပြုနိုင်ပြီ ဖြစ်ပါတယ်။

Ref: The Verge

The post Facebook Messenger အသုံးပြုသူအားလုံး Unsend လုပ်ဆောင်ချက် စတင်ရရှိ appeared first on ဧရာဝတီ.

မကြာမီအချိန်အတွင်း ဗြိတိသျှစစ်သားတွေဟာ ပကတိယောင် (Virtual Reality) နည်းပညာသုံး ခေါင်းစွပ်တွေနဲ့ ကြမ်းတမ်းခက်ခဲတဲ့ မြေပြင်၊ အန္တရာယ်များတဲ့ အခြေအနေတွေမှာ လေ့ကျင့်နိုင်တော့မှာ ဖြစ်ပါတယ်။

ကာကွယ်ရေးဝန်ကြီးဌာန (MOD) ဟာ ဆော့ဖ်ဝဲကုမ္ပဏီ Bohemia Interactive Simulations (BISim) နဲ့ ပကတိယောင်နည်းပညာသုံးစစ်ရေး လေ့ကျင့်မှု (VRLT) အစီအစဉ် စမ်းသပ်ဖို့အတွက် ပေါင် ၁ သန်းတန် စာချုပ် ချုပ်ဆိုလိုက်ပါတယ်။

ဈေးကွက်တွင်း ဝယ်ယူရရှိနိုင်တဲ့ Oculus Rift နဲ့ HTC Vive Pro လို VR ခေါင်းစွပ်တွေကို အသုံးပြုကာ VR ဟာ့ဒ်ဝဲတွေနဲ့ BISim ရဲ့ စစ်ရေးတုပမှုဆော့ဖ်ဝဲတွေကို စစ်ရေးလေ့ကျင့်မှု အခြေအနေတွေမှာ ကောင်းမွန်စွာ အသုံးချနိုင်မယ့် နည်းလမ်းတွေကို လေ့လာသွားမှာ ဖြစ်ကြောင်း BISim ရဲ့ UK အရောင်းဌာနမှုး Rusty Orwin က ပြောကြားခဲ့ပါတယ်။

VRLT စမ်းသပ်အစီအစဉ်မှာ အရည်အသွေးမြင့်ပုံရိပ်တွေကို ဖန်တီးပေးနိုင်တဲ့ VR ခေါင်းစွပ်တွေနဲ့ ပတ်ဝန်းကျင် အခြေအနေပုံစံအတုတွေကို ဖန်တီးလေ့ကျင့်နိုင်မှာပါ။ ညှပ်ပူးညှပ်ပိတ် ပစ်ခတ်ခံရမှု၊ လူအုပ်ထိန်းချုပ်မှုနဲ့ ရန်သူပြည့်နှက်နေတဲ့ အဆောက်အဦကို စီးနင်းမှု စတဲ့ အမှန်တကယ်လေ့ကျင့်ဖို့ ရှုပ်ထွေးခက်ခဲတဲ့ စစ်မြေပြင်အခြေအနေအမျိုးမျိုးကို VR ခေါင်းစွပ်တွေနဲ့ ဖန်တီး လေ့ကျင့်နိုင်ပါလိမ့်မယ်။

စစ်သားတွေအနေနဲ့ အပြင်က တကယ့် ပစ္စည်းတွေကို ထိတွေ့ကိုင်တွယ် လေ့ကျင့်နိုင်တဲ့ Mixed Reality နည်းပညာကိုလည်း ကောင်းမွန်စွာ အသုံးချနိုင်ရန် ဆက်လက်လေ့လာသွားမှာ ဖြစ်တယ်လို့ ဗြိတိန်စစ်တပ်က ဆိုပါတယ်။

ယခုစနစ်မှာ ကွန်ပျူတာပုံရိပ် (Avatar) တွေရဲ့ မျက်နှာ၊ ခန္ဓာကိုယ်ပုံစံတွေကိုလည်း စိတ်ကြိုက်ပြင်ဆင်နိုင်တဲ့အတွက် ရောင်းရင်းစစ်သည်တွေနဲ့ အတူ စစ်မြေပြင်အခြေအနေတခုတည်းမှာ တပ်ဖွဲ့လိုက် လေ့ကျင့်နိုင်မှာပါ။

ဒါ့အပြင် လေ့ကျင့်ရေးကို ပြန်လည် လေ့လာကြည့်ရှုလို့ရတဲ့အတွက် စစ်သားတွေအနေနဲ့ မိမိတို့ရဲ့ စွမ်းဆောင်ရည်ကို ကိုယ်တိုင်ကိုယ်ကျ လေ့လာကာ စွမ်းရည်တိုးတက်အောင် လေ့ကျင့်နိုင်မှာ ဖြစ်ပါတယ်။

BISim ကုမ္ပဏီကို သြစတြေးလျနိုင်ငံမှာ ၂၀၀၁ ခုနှစ်က ဖွဲ့စည်းခဲ့ပြီး၊ အမေရိကန်၊ UK၊ သြစတြေးလျ၊ ပိုလန်၊ ဂျာမနီနဲ့ ချက်သမ္မတနိုင်ငံတို့မှာ ဝန်ထမ်း ၂၅၀ ကျော် ခန့်အပ်ထားနိုင်ပြီး ဖြစ်ပါတယ်။ ကာကွယ်ရေးအဖွဲ့အစည်းပေါင်း ၅၀ ကျော်ဟာ BISim က ထုတ်လုပ်တဲ့ နည်းပညာတွေနဲ့ တပ်ဖွဲ့ဝင်တွေကို လေ့ကျင့်သင်ကြားပေးလျက်ရှိတယ်လို့ ကုမ္ပဏီက ဆိုပါတယ်။

MOD ရဲ့ လေ့ကျင့်ရေးဦးစီးချုပ် ဗိုလ်မှူးချုပ် Booby Walton-Knight CBE က “VR နည်းပညာဟာ စစ်သားတွေ ပို့ဆောင်ရေးကနေ လေ့ကျင့်ရေးကွင်းတွေ၊ စစ်လက်နက်ပစ္စည်းအတွက် ကုန်ကျစရိတ် မရှိတဲ့အတွက် ရေရှည်မှာလည်း စစ်တပ်အသုံးစရိတ်ကို သိသိသာသာလျှော့ချပေးနိုင်မှာ” လို့ ပြောကြားခဲ့ပါတယ်။

ယခု VRLT အစီအစဉ်ဟာ ရှေ့တန်းစစ်မျက်နှာမှာ နည်းပညာအသစ်တွေ ပေါင်းစပ်အသုံးချဖို့ ချထားပေးတဲ့ ဗြိတိန် ကာကွယ်ရေးဆန်းသစ်မှုရန်ပုံငွေ ပေါင် သန်း ၈၀၀ ထဲက တစိတ်တပိုင်းသာ ရှိပါသေးတယ်။ ဗြိတိန်တော်ဝင်လေတပ်ဟာ လွန်ခဲ့တဲ့နှစ်ကလည်း ရဟတ်ယာဉ်မှုးတွေကို တကယ့်အခြေအနေတွေမှာ လေ့ကျင့်နေရသည့်အလား ပုံဖော်၊ဖန်တီးပေးနိုင်တဲ့ ပေါင် ၅၃ သန်းတန် Chinook ရဟတ်ယာဉ် တုပစက် (Simulator) တခုကို ပြသခဲ့ပါတယ်။

ဒါ့အပြင် ဗြိတိန်တော်ဝင်ရေတပ်ကလည်း ရာသီဥတုအခြေအနေ အမျိုးမျိုးကို ပုံစံတူ ပြုလုပ်ပေးနိုင်တဲ့ Simulator တွေနဲ့ ရေတပ်အရာရှိတွေကို သဘောၤထိန်းချုပ်ရေးတွေ လေ့ကျင့်ပေးလျက် ရှိပါတယ်။

Ref: DailyMail, Army Technology

The post စစ်ရေးလေ့ကျင့်မှုတွေမှာ ပကတိယောင် (Virtual Reality) နည်းပညာကို ဗြိတိန်စစ်တပ် အသုံးပြုမည် appeared first on ဧရာဝတီ.

ဥရောပတလွှား နိုင်ငံများအနေဖြင့် 5G မိုဘိုင်းလ်ကွန်ရက် ထူထောင်ရေးတွင် တရုတ်ဆက်သွယ်ရေး ကုမ္ပဏီ Huawei ၏ ပံ့ပိုးမှုကို ခွင့်မပြုရန် အမေရိကန်အစိုးရ တာဝန်ရှိသူများက သတိပေးထား ကြောင်း အမေရိကန် သံတမန်တဦး၏ အင်္ဂါနေ့ ကပြောကြားချက်ကို ကိုးကား၍ Bangkok Post ကဆိုသည်။

ဥရောပ သမဂ္ဂနိုင်ငံများသည် ချက်ခြင်းနီးပါး ဆက်သွယ်နိုင်ပြီး ဒေတာ စွမ်းရည်ကျယ်ပြန့်ကာ အနာ ဂတ်နည်းပညာများ ပါဝင်သည့် ပဉ္စမမျိုးဆက် ကွန်ရက် (5-G) များကို စတင် အသုံးပြုရန် ပြင်ဆင်နေ သောကြောင့် ထိုကိစ္စသည် အရေးကြီး သည်ဟု အမေရိကန်နိုင်ငံက သတ်မှတ်သည်။

အမေရိကန်နိုင်ငံခြားရေးဌာနအရာရှိတဦးက “တရုတ်လိုမျိုး နိုင်ငံတွေဆီကနေ စိတ်မချရတဲ့ ပံ့ပိုးသူ တွေနဲ့ သဘောတူ လက်မှတ်ထိုးတာတွေ၊ ထိုးဖို့ ဦးတည်တာတွေ အလျင်စလို မလုပ်ကြဖို့ ကျနော်တို့ တိုက်တွန်းနေပါတယ်” ဟု ဘရပ်ဆဲလ် မြို့တွင် သတင်းထောက်များနှင့်တွေ့ဆုံရာ၌ ပြောကြားခဲ့သည်။

ထို့အပြင် အီးယူတာဝန်ရှိသူများ၊ ဘယ်လ်ဂျီယံ၊ ပြင်သစ်နှင့် ဂျာမနီနိုင်ငံတို့မှ အစိုးရတာဝန်ရှိသူများ နှင့် အဆိုပါ အမေရိကန် နိုင်ငံခြားရေးဌာနမှ အရာရှိတို့ အကြား အစည်းအဝေးထိုင်ခဲ့ကြောင်း၊ အလားတူ တခြားသော နိုင်ငံခြားရေး အရာရှိများက လည်း စပိန်နှင့်အခြားနိုင်ငံများသို့ သွားရောက်၍ အမေရိကန်စိုးရိမ်ပူပန်နေမှုကို ချပြမည်ဟု သိရသည်။

“ဟွာဝေး ဒါမှမဟုတ် ZTE တို့လို စိတ်မချရတဲ့ ပံ့ပိုးသူတွေနဲ့ လုပ်တာဟာ ခင်ဗျားတို့ အမျိုးသားလုံခြုံ ရေးအတွက် အမျိုးမျိုး သော ဂယက်ရိုက်မှုတွေ ရှိလာမှာဖြစ်ပါတယ်”ဟု အမည်မဖော်လိုသူ အမေရိကန်နိုင်ငံခြားရေးအရာရှိက သတိပေးပြော ကြားခဲ့သည်။

ထိုကိစ္စရပ်များသည် ဉာဏပစ္စည်း ပိုင်ဆိုင်မှု ကာကွယ်ရေး၊ ကိုယ်ရေး အချက်အလက် လုံခြုံမှုနှင့် လူ့အခွင့်အရေးတို့ကို ထိခိုက်နိုင်ကြောင်းလည်း ၎င်းက ဖြည့်စွက်ပြောကြားခဲ့သည်။

ဝါရှင်တန်၏ ဦးစားပေးမှာ ဥရောပကို သတိပေးရန်ဖြစ်ကြောင်း၊ အမေရိကန်၏ အမြင်အရ ဥရောပ တွင် ခိုင်မာသော မဟာမိတ်များရှိသောကြောင့် အမျိုးသားလုံခြုံရေးအပိုင်းကို ပိုမိုအာရုံစိုက်ရန် လိုကြောင်း အဆိုပါ အရာရှိက ဆက်ပြောသည်။

ပြီးခဲ့သည့် ဒီဇင်ဘာလအတွင်းကလည်း ဥရောပကော်မရှင် ဒု ဥက္ကဋ္ဌ အန်ဒရူးရပ်စ် အန်ဆစ်က Huawei နှင့် ZTE တို့၏ ခြိမ်းခြောက်လာနိုင်မှုအပေါ် အမေရိကန်၏ သတိပေးချက်ကို ထပ်ဆင့်ပြော ကြားထားပြီးဖြစ်သည်။

အက်စတိုးနီးယား ဝန်ကြီးချုပ်ဟောင်းကမူ “အဖွဲ့ဝင်နိုင်ငံတွေ အတွက် အမျိုးသားလုံခြုံရေးက လုံလုံလောက်လောက် ရှိပါတယ်” ဟုဆိုသည်။

Huawei ကမူ ၎င်း၏စက်ကိရိယာများကို သူလျှိုလုပ်ငန်းအတွက် သုံးနိုင်မည်မဟုတ်ကြောင်း အပြင်းအထန်ငြင်းဆန်ထား သည်။

ကျွမ်းကျင်သူများ၏ အဆိုအရ Huawei သည် ပြီးခဲ့သည် ၆ လနှင့် ၁ နှစ်ကာလအတွင်း ဆွီဒင်နိုင်ငံရှိ အဲရစ်ဆင် (Ericsson) အတွက် 5G ကွန်ရက် အရည်အသွေး ပြည့်မီအောင် ဦးဆောင် လုပ်ကိုင်နိုင်ခဲ့ ကြောင်း၊  ဖင်လန်နိုင်ငံမှ နိုကီရာ(Nokia)သည်လည်း ထပ်မံ၍ နောက်ကွယ်မှ ရပ်တည်ပေးနေကြောင်း ပြောဆိုနေကြသည်။

ပြင်သစ်နိုင်ငံမှ Bouygues Telecom နှင့် SFR ကဲ့သို့ ဆက်သွယ်ရေးလုပ်ငန်းကုမ္ပဏီများကလည်း ဟွာဝေး ထုတ်လုပ် သည့် စက်ကိရိယာများဖြင့် ပြင်သစ်မြို့ကြီးအများအပြားတွင် အော်ပရေတာများက စတင်စမ်းသပ်လုပ်ကိုင်နေပြီဖြစ်သည်။

လက်ရှိတွင်လည်း ၎င်း၏စီးပွားရေးအစုရှယ်ယာများမှာ မြင့်နေပြီး၊ စီးပွားရေးဆိုင်ရာ သတင်းနှင့် အချက်အလက်များ ထုတ်ပြန်ပေးသည့် Bloomberg ၏ အတွင်းရေး အချက်အလက်များသိမ်းဆည်း ရာဖြစ်သည့် ဒတ်ချ်တယ်လီကွန် (Deutsche Telekom)ကုမ္ပဏီကလည်း “အကယ်၍ ဟွာဝေး၏ 5G စက်ကိရိယာများကို မသုံးဘဲနေမည်ဆိုလျှင် ဥရောပသည် တရုတ်နှင့် အမေရိကန် နောက်တွင် နှစ်နှစ်ထက်မကျော်ဘဲ နောက်ကျကျန်နေခဲ့မည်ဖြစ်ကြောင်း” သတိပေးခဲ့သည်။

သို့သော် ဝါရှင်တန်အနေဖြင့် စီးပွားရေးအကျိုးအမြတ်ထက် လုံခြုံရေးဘက်ကို ပိုမိုနှိုးဆော်ပေးနေခဲ့ရ ကြောင်း အမေရိကန်သံတမန်များက ပြောကြားခဲ့ကြသည်။

The post 5G ကွန်ရက် အတွက် Huawei ပံ့ပိုးမှု လက်မခံရန် EU ကို အမေရိကန်သတိပေး appeared first on ဧရာဝတီ.

ဘောင်မဲ့ဖုန်းတွေ ခေတ်စားလာတာနဲ့အတူ ဖုန်းရှေ့ဘက်မျက်နှာပြင်ကို အပေါက်ဖောက်ပြီး ကင်မရာထားတဲ့ ဒီဇိုင်းတွေလည်း စတင် ခေတ်စားလာပြီလို့ ပြောလို့ရပါတယ်။ Samsung၊ Huawei နဲ့ Honor တို့က ထုတ်တဲ့ ဖုန်းတွေမှာ အဆိုပါ နည်းပညာကို တွေ့မြင်ခဲ့ရပြီး ဖြစ်ပါတယ်။ အခုဆို Xiaomi ကလည်း လိုက်ထုတ်တော့မှာပါ။

Xiaomi ဟာ ကင်မရာအပေါက်နှစ်ခုတွဲ ပါတဲ့ ဖုန်းဒီဇိုင်းတခုအတွက် ကမ္ဘာ့ ဉာဏမူပိုင်ခွင့်ရုံး (World Intellectual Property Office) ကနေ Xiaomi မူပိုင်ခွင့်ရရှိခဲ့တယ်လို့ သိရပါတယ်။

Xiaomi ရဲ့ ရှေ့ကင်မရာနှစ်ခု ဒီဇိုင်းကတော့ တခြားဖုန်းကုမ္ပဏီတွေနဲ့ နည်းနည်းကွဲပြားပါတယ်။ Galaxy S10+ မှာဆိုရင် Samsung က ဘဲဥပုံ အပေါက်အတွင်းမှာပဲ Selfie ကင်မရာနှစ်လုံးကို ထားဖို့ စီစဉ်နေပါတယ်။ Xiaomi ကတော့ ကင်မရာတလုံးချင်းစီအတွက် အပေါက်တပေါက်စီ ကပ်လျက် ထားရှိသွားမှာပါ။

ဒုတိယကင်မရာအပေါက်က အရန်ရှေ့ကင်မရာတလုံး ဒါမှမဟုတ်ရင် အချက်ပြမီး (Notification light) နဲ့ ဖုန်းအကွာအဝေးသိဆန်ဆာ (Proximity sensor) ထားဖို့အတွက် ဖြစ်နိုင်ပါတယ်။ ဒါပေမယ့် Xiaomi ရဲ့ ဒီဇိုင်းမူပိုင်ခွင့်ထဲမှာလည်း ဒီပုံစံတခုတည်းတော့ မဟုတ်ပါဘူး။ တဖက်တချက်စီမှာ အပေါက်ဖောက်ထားတဲ့ဒီဇိုင်း၊ ကင်မရာနှစ်လုံးကို တဖက်တည်းမှာ ထားထားတဲ့ ဒီဇိုင်း စတဲ့ မတူညီတဲ့ ဒီဇိုင်းပုံစံ ၂၄ ခုကို မြင်တွေ့ရပါတယ်။

ယခုဒီဇိုင်းအသစ်ဟာ Xiaomi ဘယ်ဖုန်းမှာ ပါလာမလဲဆိုတာကိုတော့ မသဲကွဲသေးပါဘူး။ Xiaomi ရဲ့ Mi MIX စီးရီးဟာ စခရင်အပြည့်ဒီဇိုင်းသစ်တွေ အမြဲသုံးနေကြ ဖုန်းစီးရီးဖြစ်တာကြောင့် Mi MIX မော်ဒယ်အသစ်မှာ ပါဝင်လာနိုင်ပါတယ်။

Mi MIX 3 မှာလည်း ရှေ့ကင်မရာနှစ်လုံး ပါတာဆိုတော့ Mi MIX 4 မှာလည်း ကင်မရာနှစ်လုံး ထပ်ထားပေးဖို့ Xiaomi က စဉ်းစားနေပုံ ပေါ်ပါတယ်။ Mi ဒါမှမဟုတ် Redmi မော်ဒယ်မြင့်ဖုန်းတလုံးမှာလည်း ပါလာနိုင်ဖွယ်ရှိပါတယ်။

Xiaomi ဟာ မကြာခင်ကျင်းပမယ့် Mobile World Congress (MWC) ပွဲမှာ ဖေဖော်ဝါရီလ ၂၄ ရက်နေ့ကျရင် မီဒီယာမိတ်ဆက်ပွဲတခုလုပ်ဖို့ ရက်သတ်မှတ်ပြီး ဖြစ်ပါတယ်။ အဆိုပါပွဲမှာတော့ Mi MIX 3 5G Edition ဖုန်းနဲ့ ခေါက်ချိုးအသုံးပြုနိုင်တဲ့ ပထမဆုံး Xiaomi ဖုန်းတို့ကို မိတ်ဆက်မယ်လို့ သတင်းပြေးနေပါတယ်။

Ref: GSM Arena, GizmoChina

The post ကင်မရာအပေါက် နှစ်ခုပါ ဖုန်းဒီဇိုင်းအတွက် Xiaomi မူပိုင်ခွင့် ရရှိ appeared first on ဧရာဝတီ.

အီလက်ထရွန်နစ်စနစ် ဖုန်းဘေလ်ဖြည့်သွင်းခြင်း ဝန်ဆောင်မှု လုပ်နေသော Red dot ကုမ္ပဏီသည် မြန်မာနိုင်ငံတော်ဗဟိုဘဏ်မှ လိုင်စင်ထုတ်ပေးထားခြင်း မရှိသောကြောင့် ၎င်းနှင့် သက်ဆိုင်ခြင်း မရှိကြောင်း ဗဟိုဘဏ် ဒုဥက္ကဋ္ဌ ဦးဘိုဘိုငယ်က ဖေဖော်ဝါရီလ ၆ ရက်တွင် မီဒီယာများသို့ ပြောသည်။

Red Dot သည် မြန်မာနိုင်ငံတော် ဗဟိုဘဏ်၌ လိုင်စင်လျှောက်ထားခြင်းလည်း မရှိကြောင်း၊ ဗဟိုဘဏ်မှ လိုင်စင်ပေးထားခြင်းလည်း မရှိကြောင်း၊ ငွေရေးကြေးရေးကို ဆောင်ရွက်သည့် လုပ်ငန်းခုလည်း မဟုတ်ကြောင်း ယင်းလုပ်ငန်းမှာ ဖုန်းဘေလ် ရောင်းသည့် ဝန်ဆောင်မှုလုပ်ငန်းတခုသာ ဖြစ်ကြောင်း ၎င်းက ပြောသည်။

အီလက်ထရွန်နစ် ဖုန်းဘေဖြည့်သွင်းခြင်း ဝန်ဆောင်မှု လုပ်ဆောင်နေသော Red Dot ကုမ္ပဏီသည် ပြီးခဲ့ ဖေဖော်ဝါရီလ ၄ ရက်က ရန်ကုန်မြို့ ဒဂုံမြို့နယ်၊ ယောမင်းကြီးလမ်းရှိ york center တွင် ဖွင့်လှစ်ထားသော ကုမ္ပဏီရုံးခန်းနှင့် မန္တလေး၊ တောင်ကြီး၊ မော်လမြိုင်အစရှိသည့် တိုင်းနှင့် ပြည်နယ်များတွင် ဖွင့်လှစ်ထားသော ရုံးခန်းများကို တပြိုင်တည်း ပိတ်သိမ်း၍ တိမ်းရှောင်နေသောကြောင့် မြန်မာတနိုင်ငံလုံးရှိ ကိုယ်စားလှယ်ပေါင်း ၂ သောင်းကျော်မှာ ငွေကျပ် သိန်းသောင်းချီ၍ ဆုံးရူံးမှုနှင့် ရင်ဆိုင်နေရသည်။

ကုမ္ပဏီ ပိတ်သိမ်းကာ တိမ်းရှောင်သွားသည့် အတွက် လက်တွဲ ဆောင်ရွက်နေသော အရောင်း ကိုယ်စားလှယ်များ အနေ နှင့် ငွေကြေး နစ်နာမှုများ ရှိခဲ့သဖြင့် ဥပဒေ အရ တရားစွဲဆိုရန် ပြင်ဆင် ဆောင်ရွက်နေကြောင်း ကိုယ်စားလှယ်များက ဆိုသည်။

Red Dot ကုမ္ပဏီ၏ အဓိက မိတ်ဖက်များမှာ ဆက်သွယ်ရေး အော်ပရေတာများ ဖြစ်သည့် အော်ရီဒူး၊ တယ်လီနော၊ MPTနှင့် Mytel တို့ ဖြစ်ကြသည်။

အဆိုပါ Red Dot ကုမ္ပဏီနှင့် ပတ်သက်၍ တာဝန်ယူမှုကို ပို့ဆောင်ရေးနှင့် ဆက်သွယ်ရေးဝန်ကြီးဌာနရုံးသို့ ဧရာဝတီမှ မေးမြန်းရာတွင် ယင်းဌာန တာဝန်ရှိသူတဦးက “ဒါတော့ ကျနော်တို့ မသိဘူးဗျ။ သတင်းသာကြားတာ ကျနော်တို့ဆီကို တရားဝင် ဘာမှ တက်မလာသေးဘူး။ အရေးယူပေးပါ၊ ဒီလိုလုပ်တယ်၊ ဒီလိုဖြစ်သွားတယ်လို့ ပြည်ထောင်စု ဝန်ကြီးရုံးကို လိပ်မူပြီးတော့ တင်လိုက်ပါ”ဟု ပြောသည်။

Red Dot ကုမ္ပဏီသည် ၂၀၁၇ ခုနှစ်က ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှု ဦးစီးဌာန (DICA)ရုံးတွင် Myanmar Red dot network limited နာမည်နှင့် နိုင်ငံခြားသား ပုဂ္ဂလိပိုင် ကုမ္ပဏီအဖြစ် မှတ်ပုံတင်ထားပြီး ကုမ္ပဏီ ဒါရိုက်တာများ အနေနှင့် အိုင်ယာလန် နိုင်ငံသား John Nagle နှင့် နယ်သာလန် နိုင်ငံသား Wouter De Jong တို့ဖြစ်ကြောင်း DICA ရုံး ကုမ္ပဏီ မှတ်ပုံတင် စာရင်းတွင် ဖော်ပြထားသည်။

Red Dot လုပ်ငန်းရပ်ဆိုင်းခြင်းနှင့် ပတ်သက်၍ ဈေးကွက်အတွင်း မိုဘိုင်းငွေကြေးကဏ္ဍ၏ တည်ငြိမ်မှုနှင့် ကိုယ်စားလှယ်များဖြင့် လုပ်ကိုင်လည်ပတ်လျက်ရှိသော ငွေကြေးဝန်ဆောင်မှုလုပ်ငန်းများ၏ လုပ်ငန်းများအပေါ် စိုးရိမ်ပူပန်မှုများ ရှိလာနိုင်သောကြောင့် Wave Money က မိုဘိုင်းငွေကြေးဝန်ဆောင်မှုလုပ်ငန်းများဆိုင်ရာ စည်းမျဉ်းစည်းကမ်းများနှင့်အညီ မြန်မာနိုင်ငံတော် ဗဟိုဘဏ်မှ လိုင်စင်ယူ၍ လုပ်ဆောင်နေသော လုပ်ငန်းဖြစ်ကြောင်း ယနေ့ ဖေဖော်ဝါရီလ ၆ ရက်က ထုတ်ပြန် ကြေညာခဲ့သည်။

ဦးဘိုဘိုငယ်ကလည်း “ ကျနော်တို့ ကြည့်နေပါတယ်။ ဒီ wave မှာတော့ ပိုပြီးခိုင်မာတဲ့ အတွက် ဖြစ်စရာမရှိပါဘူး။ အဲလိုပဲ ကျနော်တို့ OK ကိုလည်း regulate လုပ်ပါတယ်”ဟု ရှင်းပြသည်။

ဆက်စပ်ဖတ်ရှုရန်

ငွေကြေး လိမ်လည်မှုနှင့် Red dot ကုမ္ပဏီကို တရားစွဲရန် စီစဉ်

The post Red Dot ကုမ္ပဏီကို လိုင်စင်ထုတ်ပေးမထားဟု ဗဟိုဘဏ် ပြော appeared first on ဧရာဝတီ.